អង្គការ​អន្តរជាតិ​ស្នើ​ឱ្យ​បញ្ឈប់​ការ​ធ្វើ​ទុក​បុក​ម្នេញ​លើ​ពលរដ្ឋ និង​អ្នកការពារ​សិទ្ធិ​ដីធ្លី​នៅ​ព្រះវិហារ

ដោយ ស្ងួន អមរា
2019-04-05
អ៊ីម៉ែល
មតិ
Share
បោះពុម្ព
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
រូបថត៖ សមាគម អាដហុក (ADHOC)

សម្ពន្ធ​អង្គការ​អន្តរជាតិ​ផ្នែក​សិទ្ធិ​ពលរដ្ឋ​មូលដ្ឋាន ស្នើ​ឱ្យ​អាជ្ញាធរ​បញ្ឈប់​ការ​ធ្វើទុក្ខបុកម្នេញ​លើ​ប្រជា​សហគមន៍ ដែល​រងគ្រោះ​ដោយសារ​ការរំលោភ​យក​ដីធ្លី​នៅ​ក្នុង​ខេត្ត​ព្រះវិហារ​។ ការ​អំពាវនាវ​នេះ ដោយសារតែ​តុលាការ​ខេត្ត​ព្រះវិហារ កាលពី​សប្ដាហ៍​មុន បាន​កោះហៅ​មន្ត្រី​អង្គការ​ពន្លក​ខ្មែរ និង​ប្រជាពលរដ្ឋ​ជាច្រើន​នាក់​ទៅ​បំភ្លឺ រឿង​បង្ខាំង​គ្រឿងចក្រ​ក្រុមហ៊ុន​ចិន ដែល​ជា​សំណុំរឿង​ផ្អឹប​ទុក​អស់​រយៈពេល​ជាច្រើន​ឆ្នាំ​មក​ហើយ។

អង្គការ​សម្ពន្ធភាព​ប្រជាជន​ដើម្បី​អធិបតេយ្យភាព​ស្បៀង ហៅ​កាត់​ថា PCFS (The People’s Coalition on Food Sovereignty) ដែល​មាន​មូលដ្ឋាន​នៅ​ប្រទេស​ហ្វីលីពីន ថ្កោលទោស​ជា​ខ្លាំង​ចំពោះ​ការ​រំលោភ​បំពាន​ទាំងឡាយ​ប្រឆាំង​នឹង​ពលរដ្ឋ​នៅ​ក្នុង​ខេត្ត​ព្រះវិហារ ដែល​ការពារ​ដីធ្លី​របស់​ពួកគេ​ពី​ការ​ច្បាម​យក​ពី​សំណាក់​ក្រុមហ៊ុន​ចិន។

អង្គការ​អន្តរជាតិ​មួយ​នេះ​បញ្ជាក់​នៅ​ក្នុង​សេចក្ដី​ថ្លែងការណ៍​នៅ​ពេល​ថ្មីៗ​នេះ​ថា ការរំលោភ​សិទ្ធិមនុស្ស​ដែល​ផ្តើម​ចេញ​ពី​ការ​តស៊ូ​ប្រឆាំង​នឹង​ការ​រឹបអូស​យក​ដីធ្លី កំពុង​កើត​ឡើងជា​បន្តបន្ទាប់​នៅ​លើ​ពិភពលោក ជាពិសេស​នៅ​តំបន់​អាមេរិក​ឡាទីន និង​តំបន់​អាស៊ី ក្នុង​នោះ​ក៏​មាន​កម្ពុជា​ផង​ដែរ ហើយ​សកម្មជន​ដីធ្លី និង​ជនជាតិ​ដើម​ភាគតិច គឺជា​ជនរងគ្រោះ​នៃ​អំពើ​ទាំងនេះ។

កាលពី​សប្ដាហ៍​មុន តុលាការ​ខេត្ត​ព្រះវិហារ​បាន​កោះហៅ​មន្ត្រី​អង្គការ​សង្គម​ស៊ីវិល និង​ពលរដ្ឋ​ជនជាតិ​​ដើម​ភាគតិច​កួយ​ឃុំ​ប្រមេរ សរុប​៩ នាក់ ឱ្យ​ចូល​ខ្លួន​ឆ្លើយ​បំភ្លឺ​ក្នុង​សំណុំរឿង​បង្ខាំង​គ្រឿងចក្រ ២​គ្រឿង របស់​ក្រុមហ៊ុន​ឡានហ្វេង (Lan Feng) និង​រ៉ូយហ្វេង (Rui Feng) ដែល​ជា​បុត្រ​សម្ពន្ធ​របស់​ក្រុមហ៊ុន​ស្ករស គ័ងទុង ហេងហ្វូ (Guangdong Hengfu Group Sugar Industry Co., Ltd) របស់​ចិន កាលពី​ចុង​ឆ្នាំ​២០១៤ កន្លង​ទៅ​។ អ្នក​ទាំង​៩ ត្រូវ​បាន​ចោទប្រកាន់ និង​ដាក់​ក្រោម​ការ​ត្រួតពិនិត្យ​ពី​បទ “​សមគំនិត​ក្នុង​អំពើ​ចាប់​ឃុំឃាំង និង​ការ​បង្ខាំង​ដោយ​ខុសច្បាប់​” ។

អង្គការ​សម្ពន្ធភាព​ប្រជាជន​ដើម្បី​អធិបតេយ្យភាព​ស្បៀង ថ្លែង​ថា នេះ​គឺជា​បទចោទប្រកាន់​ដែល​គ្មាន​មូលដ្ឋាន​គ្រប់គ្រាន់ និង​ធ្វើឡើង​តាម​ការ​បង្គាប់​បញ្ជា​របស់​ក្រុមហ៊ុន ព្រោះ​ក្រុមហ៊ុន​បាន​ឈូស​ឆាយ​ដី​ស្រែចម្ការ​ដែល​ពលរដ្ឋ​ធ្លាប់​បង្កបង្កើនផល ដែល​ធ្វើ​ឱ្យ​ពួកគេ​បង្ខំចិត្ត​ឃាត់​គ្រឿងចក្រ​ពីរ​គ្រឿង​នោះ​ទុក។ ម្យ៉ាងវិញទៀត អាជ្ញាធរ​ក៏បាន​យក​គ្រឿងចក្រ​ទាំងនោះ​ទៅ​ឱ្យ​ក្រុមហ៊ុន​វិញ​រួចរាល់​ហើយ​ដែរ ដូច្នេះ​មិន​គួរ​ណា​មាន​ចំណាត់ការ​តាម​ផ្លូវ​ច្បាប់​លើ​ក្រុម​ពលរដ្ឋ​បែបនេះ​នោះ​ឡើយ​។

អង្គការ​អន្តរជាតិ​មួយ​នេះ​ក៏បាន​ថ្កោលទោស​ករណី​ដែល​អាជ្ញាធរ​ប្រើប្រាស់​កម្លាំង និង​អាវុធ បង្ក្រាប​ទៅលើ​ករណី​វិវាទ​ដីធ្លី​រវាង​ពលរដ្ឋ និង​ក្រុមហ៊ុន​មេត្រីភាព នៅ​ក្នុង​ស្រុក​ជាំក្សាន្ត ខេត្ត​ព្រះវិហារ​ផង​ដែរ។

អភិបាលខេត្ត​ព្រះវិហារ​លោក អ៊ុន ចាន់ដា បដិសេធ​ផ្ដល់​បទ​សម្ភាស​តាម​ទូរស័ព្ទ ចំណែក​ចៅក្រម​ស៊ើបសួរ​តុលាការ​ខេត្ត​ព្រះវិហារ លោក ជៀន ស្រស់ ក៏​មិន​ធ្វើ​អត្ថាធិប្បាយ​ដូចគ្នា។

មន្ត្រី​ស៊ើបអង្កេត​ជាន់ខ្ពស់ និង​ជា​អ្នកនាំពាក្យ​សមាគម​អាដហុក (ADHOC) លោក ស៊ឹង សែនករុណា កត់សម្គាល់​ថា វិវាទ​ដីធ្លី​នៅ​ខេត្ត​ព្រះវិហារ ជាពិសេស​ករណី​ពលរដ្ឋ​ជនជាតិ​ដើម​ភាគតិច​កួយ និង​ក្រុមហ៊ុន​ចិន នៅតែ​អូស​បន្លាយ​មក​ទល់​នឹង​ពេល​បច្ចុប្បន្ន ដោយ​មិន​ឃើញ​អាជ្ញាធរ​ដោះស្រាយ​ឱ្យ​បាន​ចប់​សព្វគ្រប់​នោះ​ទេ។ ផ្ទុយទៅវិញ បែរ​ជា​មាន​ចំណាត់ការ​តាម​ផ្លូវ​ច្បាប់​លើ​ពលរដ្ឋ និង​មន្ត្រី​អង្គការ​ពន្លក​ខ្មែរ​ទៅវិញ ដែល​លោក​ថា នេះ​ជា​ការ​អនុវត្ត​ផ្ទុយ​នឹង​ការណែនាំ​របស់​រដ្ឋាភិបាល និង​អនុសាសន៍​របស់​លោក​នាយករដ្ឋមន្ត្រី ហ៊ុន សែន។ លោក​ស្នើ​ឱ្យ​អាជ្ញាធរ​ដោះស្រាយ​បញ្ចប់​ទំនាស់​ដីធ្លី​នៅ​ក្នុង​ខេត្ត និង​ទម្លាក់​ចោល​បទចោទប្រកាន់​ទាំងឡាយ​លើ​ប្រជាពលរដ្ឋ និង​មន្ត្រី​អង្គការ​សង្គម​ស៊ីវិល៖ «យើង​គួរតែ​កុំ​ប្រើ​តុលាការ​នេះ​ដាក់​សម្ពាធ​ទៅលើ​ប្រជាពលរដ្ឋ ឬក៏​ខាង​អង្គការ​សង្គម​ស៊ីវិល​ដែល​គាត់​បាន​ធ្វើការ​ផ្នែក​នេះ​អី​។ យើង​គួរតែ​ទម្លាក់​ចោល​បទចោទប្រកាន់​ទៅ ហើយ​យើង​គួរតែ​ពន្លឿន​នីតិវិធី​ក្នុង​ការ​ដោះស្រាយ​បញ្ហា​ដីធ្លី​ដែល​កំពុងតែ​កើតមាន​នៅ​ក្នុង​តំបន់​ហ្នឹង​ទៅវិញ ខ្ញុំ​យល់ថា វា​ជា​រឿង​ដែល​ល្អ​ប្រសើរ»

អង្គការ​សង្គម​ស៊ីវិល មើល​ឃើញ​ថា វិវាទ​ដីធ្លី​រវាង​ពលរដ្ឋ និង​ក្រុមហ៊ុន​ចិន​នៅ​ខេត្ត​ព្រះវិហារ បាន​ដើរ​មក​ដល់​ចំណុច​មួយ​ដ៏​គួរ​ឱ្យ​ព្រួយបារម្ភ ដែល​ទាមទារ​ឱ្យ​មាន​ដំណោះស្រាយ​ជាបន្ទាន់ ក៏ប៉ុន្តែ​អាជ្ញាធរ​ខេត្ត​ព្រះវិហារ និង​របប​ក្រុងភ្នំពេញ​តែងតែ​អះអាង​ថា ពួកគេ​បាន​ដោះស្រាយ​បញ្ចប់​បញ្ហា​នេះ​រួចរាល់​ហើយ។

ទោះជា​យ៉ាងណា ពលរដ្ឋ​បញ្ជាក់​ថា ទំនាស់​ដីធ្លី​រ៉ាំរ៉ៃ​នេះ​មិនទាន់​ត្រូវ​បាន​ដោះស្រាយ​បញ្ចប់​នៅឡើយ​ទេ ហើយ​ភាគី​អាជ្ញាធរ​តែងតែ​បង្ហាញ​ជំហរ​លម្អៀង​ទៅ​រក​ក្រុមហ៊ុន​ជានិច្ច បើ​ទោះ​បី​ជា​ពលរដ្ឋ​ស្ទើរតែ​បាត់បង់​អស់​រលីង​នូវ​មុខរបរ និង​ដីធ្លី​សម្រាប់​បង្កបង្កើនផល​ក៏ដោយ។

អង្គការ​សម្ពន្ធភាព​ប្រជាជន​ដើម្បី​អធិបតេយ្យភាព​ស្បៀង អំពាវនាវ​ដល់​សមាជិក បណ្ដាញ និង​អ្នកតស៊ូ​មតិ​ផ្នែក​អធិបតេយ្យភាព​ស្បៀង​ទាំងអស់ ឱ្យ​ចូលរួម​ថ្កោលទោស​ចំពោះ​ការ​ធ្វើ​ទុក្ខបុកម្នេញ​លើ​ប្រជាកសិករ​នៅ​ក្នុង​ប្រទេស​កម្ពុជា និង​បង្ហាញ​ចំណង​សាមគ្គីភាព​ជាមួយ​សហគមន៍​ដែល​រង​ផល​ប៉ះពាល់​ដោយសារ​ការរំលោភ​យក​ដីធ្លី​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល