ប្រជាពលរដ្ឋនៃភូមិមួយនារាជធានីភ្នំពេញ សម្ដែងការខកចិត្តត្បិតពួកគាត់ទាមទារឲ្យអាជ្ញាធរខណ្ឌដង្កោ ដោះស្រាយស្ថាបនាប្រព័ន្ធលូបង្ហូរទឹកកុំឲ្យលិចផ្ទះសម្បែងរបស់ពួកគាត់ ប៉ុន្តែមន្ត្រីអាជ្ញាធរបែរជាជំរុញពួកគាត់ ឲ្យទាមទារការលុបស្រះជំនួសវិញ។
ប្រជាពលរដ្ឋភូមិខ្វា បញ្ចេញប្រតិកម្មភ្លាមៗប្រឆាំងនឹងជំហររបស់អាជ្ញាធរ នៅថ្ងៃទី១៥ មករា ទាក់ទងនឹងបញ្ហាទឹកលិចភូមិឋានរបស់ពួកគាត់។
តំណាងប្រជាពលរដ្ឋភូមិខ្វា លោកស្រី ចាន់ សុផា យល់ថា អាជ្ញាធរខណ្ឌពុំមានសុឆន្ទៈបម្រើផលប្រយោជន៍ប្រជាពលរដ្ឋឡើយ៖ «បំណងរបស់គាត់ និយាយទៅប្រហែលជាគាត់ចង់ឲ្យពួកយើងគាំទ្រដល់ការលុបស្រះហ្នឹង ហើយបើសិនជាមានបញ្ហាប៉ះពាល់លិចដល់ផ្ទះពួកយើង ប្រហែលជាគាត់ឆ្លើយថា នេះគឺជាការព្រមព្រៀងរបស់ប្រជាពលរដ្ឋ។ ការលុបស្រះមិនមែនជាដំណោះស្រាយទេ គ្រាន់ជាគោលបំណងរបស់អ្នកដែលគាត់ចង់បានប្រយោជន៍តែប៉ុណ្ណោះ»។
តំណាងប្រជាពលរដ្ឋភូមិខ្វា ម្នាក់ទៀត លោកស្រី ជួន សុខុម ថ្លែងថា លោកស្រីព្រមទទួលយកមធ្យោបាយណាក៏ដោយចុះ ឲ្យតែអាចបញ្ចៀសទឹកជំនន់លិចភូមិរបស់ពួកគាត់បាន៖ «បើសិនជាគេលុបស្រះហ្នឹង ទឹកវាហៀរមកលើហើយចា៎ ហើយវាអត់មានប្រព័ន្ធលូហូរចេញ គឺបញ្ហាប៉ះពាល់ប្រជាពលរដ្ឋកាន់តែខ្លាំង។ តែបើលុបស្រះហើយមានប្រព័ន្ធលូទៀត គឺហ្នឹងវាល្អចំពោះប្រជាជន។ មានប្រព័ន្ធលូហើយយើងលុបស្រះទៅ វាហូរតាមប្រព័ន្ធលូហ្នឹងចេញទៅ វាអត់អាចលិចលង់ប្រជាជនតទៅទៀតទេ»។
ប្រតិកម្មរបស់ប្រជាពលរដ្ឋ គឺបន្ទាប់ពីពួកគាត់ដែលជាតំណាងអ្នករស់នៅភូមិខ្វា សង្កាត់ដង្កោ ជាង ១៥០គ្រួសារ និងគាំទ្រដោយតំណាងសហគមន៍ដែលមានបញ្ហាដីធ្លីក្នុងរាជធានីភ្នំពេញមួយចំនួនផង សរុបប្រមាណ ១០០នាក់ បាននាំគ្នាតវ៉ាខាងមុខសាលាខណ្ឌដង្កោ នៅព្រឹកថ្ងៃទី១៥ មករា ហើយដែលអភិបាលរងខណ្ឌដង្កោ លោក ប្រាជ្ញ សីហា បានចេញមកជួបពួកគាត់ តែលោកបង្ហាញជំហរផ្ទុយពីបំណងរបស់ប្រជាពលរដ្ឋ៖ «ខណ្ឌក៏សុំទៅវិញដែរថា ឥឡូវសុំមេដៃពីបងប្អូន ថាសូមឲ្យម្ចាស់ស្រះហ្នឹងលុបស្រះគាត់ទៅ។ កាលណាលុបទៅ ភ្លៀងមកវាមានប្រព័ន្ធលូត្រូវតែបង្ហូរចេញហើយ ហើយកន្លែងបងប្អូនដែលលិចហ្នឹង វាមានកម្រិតមួយតិចទឹកវាតិច ហើយក៏វាមិនដក់យូរ។ ទោះបីយើងបូមខ្លាំងណាស់បូមមួយអាទិត្យរីងអស់ បើអានេះយើងបូមប៉ុន្មានខែក៏មិនរីងដែរ។ ជារួមអ៊ីចឹងណា៎»។
ពាក់ព័ន្ធនឹងបញ្ហានេះ ប្រធានគ្រប់គ្រងកម្មវិធីចងក្រងសហគមន៍ដើម្បីសិទ្ធិលំនៅឋាន នៃអង្គការសមធម៌កម្ពុជា លោក ស៊ូ សាវឿន មានប្រសាសន៍ថា បើឈរលើភាពស្មោះត្រង់នោះ អាជ្ញាធរអាចនឹងពន្លឿនការស្វែងរកដំណោះស្រាយបញ្ចប់បញ្ហាបាន៖ «គាត់ហាក់ដូចជាមិនច្បាស់លាស់ណាមួយទេមកទល់ពេលនេះ។ ខ្ញុំឃើញថា ម្ដងគាត់នៅខាងភាគីប្រជាពលរដ្ឋ ម្ដងគាត់នៅខាងភាគីដែលបង្កបញ្ហា។ អ៊ីចឹងខ្ញុំចង់ឲ្យគាត់ធ្វើការសិត (set = កំណត់) អាទិភាពទៅលើប្រជាពលរដ្ឋជាធំ ដើម្បីកុំឲ្យប្រជាពលរដ្ឋគាត់ចេះតែខាតបង់ពេលវេលា ហើយអាជ្ញាធរខ្លួនឯងហ្នឹងក៏រវល់តែដោះស្រាយរឿងដដែលៗជាច្រើនលើកជាច្រើនសាអ៊ីចឹងណា៎»។
ទោះយ៉ាងណាក៏ដោយ លោក ប្រាជ្ញ សីហា សន្យាថានឹងឲ្យតំណាងប្រជាពលរដ្ឋចំនួន ៥រូប ជួបចរចាជាមួយលោកនៅថ្ងៃអង្គារ សប្ដាហ៍ក្រោយ។
កាលពីចុងរដូវវស្សាកន្លងទៅ ប្រជាពលរដ្ឋភូមិខ្វា ជាច្រើនគ្រួសារ បានរងគ្រោះដោយទឹកលិចផ្ទះសម្បែង។ ពួកគាត់មួយចំនួន បាននាំគ្នាបោះតង់រស់នៅក្បែររបងសាកលវិទ្យាល័យភូមិន្ទកសិកម្ម ហើយមួយចំនួនទៀត បានភៀសខ្លួនទៅរកទីសុវត្ថិភាពដទៃទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។