តំណាង​ពលរដ្ឋ​មាន​ជម្លោះ​ជាមួយ​ក្រុមហ៊ុន​ UDG​ ឡើង​​ដាក់​​ញត្តិ​​នៅ​​ស្ថានទូត​​ប្រទេស​​មហាអំណាច​​ជា​​ថ្មី​​ទៀត

ដោយ មួង ណារ៉េត
2018.12.11
ជម្លោះដីធ្លី​នៅកោះកុង ៦២២ តំណាង​សហគមន៍​​ ៣​រូប មាន​ជម្លោះ​ដីធ្លី​ជាមួយ​ក្រុមហ៊ុន​ចិន យូឌីជី (UDG) នៅ​ស្រុក​គិរីសាគរ ខេត្ត​កោះកុង ត្រូវ​បាន​ស្ថានទូត​ចិន អនុញ្ញាត​ឲ្យ​ចូល​ដាក់​ញត្តិ​ កាល​ពី​ថ្ងៃ​ទី១១ ខែ​ធ្នូ ឆ្នាំ២០១៨។
រូប៖ សហគមន៍

តំណាង​ពលរដ្ឋ ៧៧​គ្រួសារ នៅ​ខេត្ត​កោះកុង ដែល​មាន​វិបត្តិ​ដីធ្លី​រ៉ាំរ៉ៃ​ជាមួយ​ក្រុមហ៊ុន​ចិន បាន​មក​ដាក់​ញត្តិ​ជា​ថ្មី​ទៀត​នៅ​ស្ថានទូត​អាមេរិក ចិន និង​ស្ថានទូត​អឺរ៉ុប ក្នុង​បំណង​ស្វែងរក​ដំណោះស្រាយ​ជម្លោះដីធ្លី ដែល​ពួកគេ​ចោទ​ថា ក្រុមហ៊ុន​ចិន​មួយ ឈ្មោះ​យូញៀន ឌីវីឡុបមិន គ្រុប (Union Development Group) ឬ​យូឌីជី (UDG) រំលោភបំពាន​យ៉ាង​អយុត្តិធម៌​ជាង ១០​ឆ្នាំ​មក​ហើយ។

តំណាង​ពលរដ្ឋ ៧៧​គ្រួសារ រស់នៅ​ភូមិ​តានួន ឃុំ​តានួន ស្រុក​គិរីសាគរ ខេត្ត​កោះកុង ទាមទារ​ឲ្យ​អាជ្ញាធរ​ខេត្ត កាត់​ឆ្វៀល​ផល​ប៉ះពាល់​ចេញពី​ដី​ដែល​ក្រុមហ៊ុន​ចិន​រំលោភ​យក និង​ត្រូវ​ផ្ដល់​សំណង​​សមរម្យ​តាម​តម្លៃ​ទីផ្សារ។ ពួកគេ​ត្អូញ​ថា ជាង ១០ ឆ្នាំ​មក​ហើយ ដែល​អ្នកភូមិ​ទន្ទឹង​រង់ចាំ​ដំណោះស្រាយ​ពី​អាជ្ញាធរ​នៅ​គ្រា​ដែល​ពួកគាត់​បាន​ដាក់​ញត្តិ​ស្ទើរតែ​គ្រប់​ស្ថាប័នរដ្ឋ តែ​គ្មាន​លទ្ធផល។

តំណាង​ពលរដ្ឋ​មក​ដាក់​ញត្តិ​នៅ​រាជធានី​ភ្នំពេញ លោក សំ ធី ឲ្យ​ដឹង​ថា អាជ្ញាធរ​ខេត្ត គ្មាន​ឆន្ទៈ​ដោះស្រាយ​វិបត្តិ​ដីធ្លី​ជូន​ពលរដ្ឋ​ក្រីក្រ​នោះ​ទេ ថែមទាំង​ទម្លាក់កំហុស មក​លើ​ក្រុម​ពលរដ្ឋ​វិញ​ថា ជា​អ្នក​រស់នៅ​ខាងក្រៅ​មូលដ្ឋាន និង​តែងតែ​រារាំង​ពួកគេ​មិន​ឲ្យ​អាស្រ័យ​ផល​លើ​ដី​ដែល​ធ្លាប់​កាន់កាប់​មុន​ឆ្នាំ២០០០។ លោក​ថា គ្រួសារ​លោក បាត់បង់​ដី​កសិកម្ម ៨​ហិកតារ​ដែល​គ្រប់គ្រង​មុន​ឆ្នាំ​២០០០ រហូត​មក​ទល់​ពេលនេះ ជាង ១០​ឆ្នាំ​មក​ហើយ ត្រូវ​បាន​ក្រុមហ៊ុន​ចិន​រំលោភ​យក​យ៉ាង​អយុត្តិធម៌។ លោក​ថា កន្លងទៅ អាជ្ញាធរ​ចុះ​ដោះស្រាយ​វិបត្តិ​ដីធ្លី​នៅ​តំបន់​នោះ​ដែរ តែ​ការ​ដោះស្រាយ​នោះ​ទៀតសោត មិន​គ្រប់​ជ្រុងជ្រោយ និង​រើសអើង រវាង​ពលរដ្ឋ​រស់នៅ​មូលដ្ឋាន និង​ពលរដ្ឋ​រស់នៅ​ខាងក្រៅ​មូលដ្ឋាន​៖ «អាជ្ញាធរ​ពី​មុនៗ​មក ទៅ​ដោះស្រាយ​ដែរ តែ​ដោះ​បានតែ​ពលរដ្ឋ​រស់នៅ​ក្នុងស្រុក និង​ក្នុង​ភូមិ អត់​ចំ​គោលការណ៍​របស់​ពួក​ខ្ញុំ​ដែល​តវ៉ា​ទាមទារ​ហ្នឹង។ ពួក​ខ្ញុំ​ទាមទារ​ទាំងអស់​គ្នា អោយ​ទាមទារ​កាត់​ឆ្វៀល​ចេញ ពួក​ខ្ញុំ ៧៧​គ្រួសារ​ហ្នឹង គឺ​ពួក​ខ្ញុំ​ឈប់​ទាមទារ​ត​ទៀតហើយ»

តំណាង​ពលរដ្ឋ​ម្នាក់ទៀត​លោកស្រី ម៉ៃ ពៅ ប្រាប់​អាស៊ីសេរី​ថា អាជ្ញាធរ​ខេត្ត​កោះកុង​បាន​សន្យា​ច្រើន​សា​មក​ហើយ​ថា នឹង​ដោះស្រាយ​ជូន​ពួកគាត់ តែ​មក​ទល់​ពេល​នេះ​ជាង ១០​ឆ្នាំ​មក​ហើយ នៅ​តែ​គ្មាន​តម្រុយ​លទ្ធផល។ លោកស្រី​ថា តំណាង​ពលរដ្ឋ ៦​នាក់ បាន​មក​ដាក់​ញត្តិ​សុំ​កិច្ច​អន្តរាគមន៍ ពី​ប្រទេស​មហាអំណាច ដោយសារតែ​ពួកគេ​គ្មាន​ជម្រើស ខណៈ​ស្ថាប័នរដ្ឋ​ស្ទើរតែ​គ្រប់​ស្ថាប័ន​ពួកគាត់​ដាក់​ញត្តិ​អស់ហើយ តែ​គ្មាន​ប្រសិទ្ធភាព។ លោកស្រី​បន្ថែម​ថា ក្រុមហ៊ុន​ចិន បាន​រំលោភ​យក​ដី​របស់​ពល​រដ្ឋ​ចំនួន ៧៧​គ្រួសារ សរុប​ទាំងអស់​ចំនួន ជាង ១​ពាន់​ហិកតារ៖ «ប៉ះពាល់​មែនទែន រំលោភ​ដី​របស់​ពួក​ខ្ញុំ​ច្រើន​ហិកតារ​ដែរ វា​យក​ទាំងអស់​តែម្ដង​។ អត់​ឲ្យ​ពួក​ខ្ញុំ​តែម្ដង»

ស្ត្រី​ដដែល​បន្ថែម​ថា មន្ត្រី​ស្ថានទូត​ចិន​បាន​ប្រាប់​ពួកគាត់​ថា នឹង​ពន្លឿន​អន្តរាគមន៍​ទៅ​អាជ្ញាធរ​កម្ពុជា​ឲ្យ​ដោះស្រាយ​ឲ្យ​បាន​ឆាប់ ព្រោះ​ក្រុមហ៊ុន​នោះ ជា​ក្រុមហ៊ុន​ឯកជន និង​បាន​អនុវត្ត​ខុស​គោលការណ៍​ច្បាប់​របស់​កម្ពុជា​ផង។

អភិបាលខេត្ត​កោះកុង អ្នកស្រី មិថុនា ភូថង ប្រាប់​អាស៊ីសេរី​យ៉ាង​ខ្លី​ថា អាជ្ញាធរ​ពាក់ព័ន្ធ​បាន​វាស់វែង​ដី​មាន​វិវាទ​នោះ​រួចហើយ និង​បាន​អនុវត្ត​នីតិវិធី​ស្នើសុំ​បន្ថែម​ទៀត ក៏ប៉ុន្តែ​ទីតាំង​ដី​មួយ​ចំនួន​មាន​ព្រៃ​ច្រើន និង​កំពុង​ធ្វើ​ការ​ដោះស្រាយ​ជា​បណ្ដើរៗ​៖ «អាជ្ញាធរ​គាត់​បាន​វាស់វែង​រួច​ហើយ​នៅតែ​នីតិវិធី​ស្នើសុំ​បន្ថែម​ទៀត ហើយ​កន្លែង​មួយ​ចំនួន​មាន​ព្រៃ​ច្រើន មាន​ជាប់​ពាក់ព័ន្ធ​គ្នា និង​កំពុង​ធ្វើការ​ដោះស្រាយ»

ក្រុមហ៊ុន​ចិន​ឈ្មោះ យូញៀន ឌីវីឡុបមិន គ្រុប (Union Development Group) ឬ​យូឌីជី (UDG) ទទួល​សិទ្ធិ​វិនិយោគ​ដី​ចំនួន ៣៦.០០០​ហិកតារ កាលពី​ឆ្នាំ​២០០៨ ស្ថិតនៅ​ស្រុក​គិរីសាគរ និង​ស្រុក​បុទុមសាគរ ខេត្ត​កោះកុង រយៈពេល ៥០ឆ្នាំ។ អ្នកស្រុក​ថា ក្រុមហ៊ុន​នេះ បាន​វិយោគ​ទីកន្លែង​កម្សាន្ត​សម្រាប់​ភ្ញៀវ​ទេសចរ ព្រលាន​យន្តហោះ ទីលាន​វាយ​កូន​ហ្គោល និង​កំពង់ផែ​ជាដើម។

មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក (ADHOC) លោក មាន ព្រហ្មមុនី សង្កេត​ឃើញ​ថា ពលរដ្ឋ​បាន​កាន់កាប់​ដី មុន​ពេល​ដែល​ក្រុមហ៊ុន​មិនទាន់​វិនិយោគ​ដី​នៅ​តំបន់​នោះ ហេតុនេះ​ក្រុមហ៊ុន​ត្រូវ​កាត់​ឆ្វៀល​ផល​ប៉ះពាល់​ចេញ និង​ផ្ដល់​សំណង​សមរម្យ​ដែល​មាន​ការ​ឯកភាព​ពី​ភាគី​ពាក់ព័ន្ធ។ លោក​រកឃើញ​ថា មាន​ភាព​មិន​ប្រក្រតី​ជាច្រើន ដែល​ក្រុមហ៊ុន​ចិន អនុវត្ត​ផ្ទុយ​ពី​គោលការណ៍​វិនិយោគ បំពាន​ច្បាប់ និង​រំលោភ​សិទ្ធិ​រស់នៅ​របស់​ពលរដ្ឋ នៅ​មិនទាន់​ឃើញ​អាជ្ញាធរ​ណា​ជំរុញ​ឲ្យ​ក្រុមហ៊ុន​ទទួលខុសត្រូវ​នោះ​ទេ។ រីឯ​ពលរដ្ឋ​រងគ្រោះ​នៅតែ​លំបាក​វេទនា​ចំណាយ​ពេល និង​ថវិកា ស្វែងរក​ដំណោះស្រាយ​នៅ​រាជធានី​ភ្នំពេញ៖ «តាមច្បាប់​ភូមិបាល​សម្បទាន​ដី​សេដ្ឋកិច្ច​ត្រូវ​ផ្ដល់​សំណង​ជាមុន ដោយ​សមរម្យ​និង​យុត្តិធម៌ មាត្រា​៥ នៃ​ច្បាប់​ភូមិបាល ហើយ​រដ្ឋធម្មនុញ្ញ​មាត្រា ៤៤ រដ្ឋធម្មនុញ្ញ។ តែ​ឥឡូវ​មិន​ទាន់​មាន​គោលការណ៍​ណាមួយ ឲ្យ​ពលរដ្ឋ​ទទួល​សំណង​សមរម្យ និង​យុត្តិធម៌​តាម​គោលការណ៍​ព្រមព្រៀងគ្នា​នៅ​នៅឡើយ​ទេ»

មន្ត្រី​សិទ្ធិមនុស្ស​រូប​នេះ យល់ថា អាជ្ញាធរ​ពាក់ព័ន្ធ​ហាក់​ខ្លាច​រអា​ជាមួយ​ក្រុមហ៊ុន​ចិន បើ​ទោះ​បី​ជា​ពលរដ្ឋ​ទទួលរង​ភាព​អយុត្តិធម៌​យ៉ាង​ណា​ក្តី។ ពលរដ្ឋ​ចោទ​ថា កន្លងទៅ​ក្រុមហ៊ុន​នេះ​បាន​បណ្ដេញ​ពលរដ្ឋ​ចេញពី​លំនៅឋាន ក្នុង​ភូមិ​ក្បែរ​មាត់សមុទ្រ ដោយ​ឲ្យ​សំណង​មិន​សមរម្យ និង​ប្រើ​កម្លាំង​ប្រដាប់​អាវុធ​គំរាមកំហែង​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។