ក្រុមហ៊ុនវៀតណាម និងអាជ្ញាធរខេត្តក្រចេះ បន្តចុះដុតផ្ទះ និងគំរាមចាប់ពលរដ្ឋកំពុងមានវិវាទដីធ្លី
2024.07.02
ពលរដ្ឋរងគ្រោះដីធ្លីត្រូវបានក្រុមហ៊ុនវៀតណាមនិងអាជ្ញាធរចុះដុតផ្ទះសម្បែងចោល កាលពីថ្ងៃទី២៧ ខែមិថុនា ឆ្នាំ២០២៤។ រូបភាពពលរដ្ឋ
Photo: RFA
ពលរដ្ឋមានវិវាទដីធ្លីនៅខេត្តក្រចេះអះអាងថា ក្រុមហ៊ុនវៀតណាម និងអាជ្ញាធរបានដាក់គ្រឿងចក្រជាច្រើនឈូសឆាយបំផ្លាញផលដំណាំ ដុតផ្ទះសម្បែង និងគំរាមកំហែងចាប់ខ្លួនតំណាងពលរដ្ឋដែលធ្លាប់ឡើងទៅតវ៉ា និងសុំកិច្ចអន្តរាគមន៍ពីអាជ្ញាធរថ្នាក់ជាតិ។ មន្ត្រីសង្គមស៊ីវិលនៅតែទទូចឲ្យអាជ្ញាធរ និងក្រុមហ៊ុនស្វែងរកដំណោះស្រាយដោយសន្តិវិធី និងយុត្តិធម៌។
ប្រជាពលរដ្ឋ ស្ថិតនៅឃុំកោះខ្ញែរ ស្រុកសំបូរ ខេត្តក្រចេះ ដែលកំពុងមានវិវាទដីធ្លីជាមួយក្រុមហ៊ុនវៀតណាមឈ្មោះ កាម៉ាដេនូ វេនឈ័រ (ខេមបូឌា) លីមីធីត (Kamdhenu Ventures Cambodia Limited KVCL) និងក្រុមហ៊ុន កសិកម្ម យុវជន ស្វាយរៀង អះអាងថា ក្រុមហ៊ុន និងអាជ្ញាធរខេត្ត បានដាក់គ្រឿងចក្រឈូសឆាយបំផ្លាញផលដំណាំកសិកម្ម ដុតផ្ទះសម្បែងពលរដ្ឋអស់៧ខ្នង និងព្យាយាមតាមចាប់ខ្លួនតំណាងពលរដ្ឋ ដែលប្រមូលគ្នាឡើងទៅតវ៉ានៅរាជធានីភ្នំពេញថែមទៀត។
តំណាងប្រជាពលរដ្ឋ ១រូបក្នុងចំណោម ៥រូប នៅឃុំកោះខ្ញែរ លោក ហុន សុខហេង ប្រាប់វិទ្យុអាស៊ីសេរីនៅថ្ងៃទី១ ខែកក្កដា ថា អាជ្ញាធរខេត្តមិនបានដោះស្រាយឲ្យប្រជាពលរដ្ឋដូចពាក្យសន្យាជាមួយប្រជាពលរដ្ឋនៅភ្នំពេញនោះទេ ផ្ទុយទៅវិញ ក្រុមហ៊ុនវៀតណាម និងអាជ្ញាធរខេត្ត បន្តចុះដុតបំផ្លាញផ្ទះសម្បែង ផលដំណាំកសិកម្ម និងគំរាមកំហែងចាប់ខ្លួនប្រជាពលរដ្ឋថែមទៀត។ លោកថា អាជ្ញាធរបានបោកបញ្ឆោតឲ្យពួកគាត់ត្រឡប់ទៅស្រុកវិញ ឈប់ឲ្យតវ៉ានៅភ្នំពេញ ដោយសារអាជ្ញាធរចង់បិទបាំងទង្វើអាក្រក់ និងមិនទទួលខុសត្រូវដែលបានបំផ្លាញទ្រព្យសម្បត្តិរបស់ប្រជាពលរដ្ឋទាំងអស់នោះ។ លោកស្នើឲ្យអាជ្ញាធរថ្នាក់ជាតិអន្តរាគមន៍ និងស្វែងរកដំណោះស្រាយដល់ពួកគាត់។
លោក ហុន សុខហេង៖ «ដុតផ្ទះ និងរុញផ្ទះអស់ចំនួន៧ខ្នង គេអត់មានឲ្យសាបព្រោះអាស្រ័យផលសព្វថ្ងៃ ហើយសព្វថ្ងៃគេមិនឲ្យសាបព្រោះអ្វីទេលើដីប្រជាពលរដ្ឋសព្វថ្ងៃ គេអត់ដោះស្រាយតែម្ដងនិយាយរួមទៅ ដីប្រជាពលរដ្ឋមានតែប៉ុណ្ណឹងអស់ប៉ុណ្ណឹងមិនដឹងមានអ្វីទៀតអស់ដីធ្វើស្រែហើយ ។ សូមឲ្យរដ្ឋាភិបាលជួយដោះស្រាយពួកខ្ញុំទាំង៥ភូមិផង។ ហើយថ្ងៃនេះខ្ញុំយកពាក្យបណ្ដឹងដាក់ទៅសាលាស្រុក បើអត់មានដំណោះស្រាយទៀត ខ្ញុំឡើងទៅភ្នំពេញទៀត»។
ជុំវិញរឿងនេះ វិទ្យុអាស៊ីសេរី មិនអាចទាក់ទងអភិបាលរងស្រុកសំបូរ លោក ចេង គឺមជប់ និងអភិបាលខេត្តក្រចេះ លោក វ៉ា ថន បានទេនៅថ្ងៃទី១ ខែកក្កដា។ ចំណែកប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ក៏វិទ្យុអាស៊ីសេរីមិនអាចទាក់ទងបានដែរ នៅថ្ងៃដដែលនេះ។
ទោះជាយ៉ាងណា កាលពីថ្ងៃទី១៩ ខែមិថុនាកន្លងទៅ ពលរដ្ឋមានវិវាទដីធ្លីជិត៥០នាក់បាននាំគ្នាឡើងមកភ្នំពេញ ដាក់លិខិតសុំកិច្ចអន្តរាគមន៍ និងស្វែងរកដំណោះស្រាយ ពីស្ថាប័នពាក់ព័ន្ធ ដើម្បីឲ្យក្រុមហ៊ុនវៀតណាម បញ្ឈប់ការឈូសឆាយ ដំណាំកសិកម្ម និងឈប់ឲ្យអាជ្ញាធរខេត្តក្រចេះ គំរាមកំហែងទៅលើប្រជាពលរដ្ឋ ហើយអាជ្ញាធរខេត្តក៏បានតាមលួងលោម និងបានសន្យាដោះស្រាយបញ្ហាដីធ្លីឲ្យប្រជាពលរដ្ឋនៅពេលពួកគាត់ត្រឡប់ទៅផ្ទះវិញ។ ប៉ុន្តែបច្ចុប្បន្នអាជ្ញាធរខេត្តមួយនេះ មិនបានដោះស្រាយឲ្យពលរដ្ឋដូចការសន្យាឡើយ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា អាជ្ញាធរថ្នាក់ជាតិត្រូវតែតាមដាន និងពិនិត្យមើលបញ្ហាឲ្យច្បាស់លាស់។ លោកថា រដ្ឋាភិបាលមានសិទ្ធិផ្ដល់ដីសម្បទានសេដ្ឋកិច្ចដល់ក្រុមហ៊ុនឯកជនបាន ចុះហេតុអ្វីរដ្ឋមិនអាចកាត់ឆ្វៀលដីទាំងនោះឲ្យទៅប្រជាពលរដ្ឋសម្រាប់អាស្រ័យផល។ លោកបន្ថែមថា រដ្ឋាភិបាលគួរតែចុះសិក្សាពីផលប៉ះពាល់ជាក់ស្ដែង ហើយធ្វើការដោះស្រាយតាមនីតិវិធី។
លោក យិន ម៉េងលី៖ «យើងត្រូវពិនិត្យមើលលទ្ធភាពជាក់ស្តែកទៅពួកគាត់ថា តើពួកគាត់ពិតជាកាន់កាប់ជាក់ស្ដែង ពូកគាត់ពិតជារងផលប៉ះពាល់ពីការសម្បទានសេដ្ឋកិច្ចពិតប្រាកដ ឬយ៉ាងម៉េច ឬក៏មួយការវាយតម្លៃផលប៉ះពាល់ដំបូងមិនច្បាស់លាស់ ទើបវាមានផលប៉ះពាល់ដល់ពូកគាត់។ រដ្ឋាភិបាលគួរតែឆ្វៀលដីឲ្យប្រជាពលរដ្ឋទៅដើម្បីឲ្យគាត់បានអាស្រ័យផលប៉ះពាល់ពិតប្រាកដពីការសម្បទានសេដ្ឋកិច្ចនេះ»។
ក្រុមហ៊ុនវៀតណាម កាម៉ាដេនូ វេនឈ័រ និងក្រុមហ៊ុន អិន ខេ អេហ្គ្រី (ខេមបូឌា) (NK Agri (Cambodia) co. ltd)ទទួលបានដីសម្បទានសេដ្ឋកិច្ចពីរដ្ឋាភិបាល ជិត១ម៉ឺន ៧ពាន់ (១៦,៥២៧)ហិកតារកាលពីឆ្នាំ២០០៩ ដើម្បីដាំដំណាំអំពៅ ប៉ុន្តែបានក្ស័យធន់នៅឆ្នាំ២០១៧។ ប៉ុន្តែនៅឆ្នាំ២០២១ក្រុមហ៊ុន កាម៉ាដេនូ វេនឈ័រ និងក្រុមហ៊ុនកសិកម្ម យុវជន ស្វាយរៀង បានសហការគ្នាដំណើរការវិនិយោគឡើងវិញ ដើម្បីផលិតស្ករអំពៅ សម្រាប់ផ្គត់ផ្គង់ទីផ្សារក្នុងប្រទេសកម្ពុជានិងវៀតណាម។
ដោយសារនៅតែគ្មានដំណោះស្រាយពីអាជ្ញាធរថ្នាក់ខេត្ត តំណាងពលរដ្ឋលើកឡើងថា ប្រជាពលរដ្ឋចំនួន ៥ភូមិគ្រោងនាំគ្នា វេចបង្វេច ចានឆ្នាំង មុងភួយ ខ្នើយកន្ទេល ឡើងមកបោះជុំរុំនៅរាជធានីភ្នំពេញម្ដងទៀត ដើម្បីស្នើឲ្យរដ្ឋាភិបាល ជួយអន្តរាគមន៍ និងស្វែងរកដំណោះស្រាយ។ ពលរដ្ឋអះអាងថា ពេលលើកគ្នាមកជាលើកទី២នេះ ប្រសិនបើរដ្ឋាភិបាលគ្មានដំណោះស្រាយឲ្យពួកគេនោះទេ ពួកគេនឹងមិនត្រឡប់ទៅស្រុកវិញជាដាច់ខាត ពីព្រោះពួកគេបាត់បង់ផ្ទះសម្បែង ស្រែចម្ការ និងទ្រព្យសម្បត្តិអស់ពីខ្លួន ដោយសារតែក្រុមហ៊ុនវៀតណាម និងអាជ្ញាធរខេត្តក្រចេះ សហការគ្នាចុះ ឈូសឆាយផលដំណាំ និងដុតផ្ទះសម្បែងចោលអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ