សហគមន៍​មាន​ជម្លោះ​ដីធ្លី​នៅ​ក្រុង​ភ្នំពេញ​ជាង ១០០​នាក់ នឹង​ប្រារព្ធ​​ខួប ៧​ឆ្នាំ​នៃ​ការ​បណ្ដេញ​អ្នក​បុរី​កីឡា​ចេញ​ពី​ផ្ទះ​សម្បែង​ដោយ​បង្ខំ

ដោយ មាន ឫទ្ធិ
2019-01-02
អ៊ីម៉ែល
មតិ
Share
បោះពុម្ព
តំណាង​អ្នក​សហគមន៍​បុរីកីឡា លោកស្រី សរ ស៊ន ចេញ​ពី​អធិការដ្ឋាន​នគរបាល​ខណ្ឌ​៧មករា កាល​ពី​ថ្ងៃ​ទី​២៧ ខែ​មីនា ឆ្នាំ​២០១៧។
តំណាង​អ្នក​សហគមន៍​បុរីកីឡា លោកស្រី សរ ស៊ន ចេញ​ពី​អធិការដ្ឋាន​នគរបាល​ខណ្ឌ​៧មករា កាល​ពី​ថ្ងៃ​ទី​២៧ ខែ​មីនា ឆ្នាំ​២០១៧។
RFA/Tha Kitya

នៅ​ដើម​ឆ្នាំ​២០១៩​ នេះ គឺ​ជា​ខួប​ ៧​ឆ្នាំ​ នៃ​ព្រឹត្តិការណ៍​ ផ្ទុះ​ជា​អំពើ​ហិង្សា​មួយ​ នៅ​ចំកណ្ដាល​ទីក្រុង​​ភ្នំពេញ។ នៅ​ក្នុង​ព្រឹត្តិការណ៍​នោះ ផ្ទះ​សម្បែង​អ្នក​បុរី​កីឡា​ជាង ​២​០០​ខ្នង​ ត្រូវ​បាន​ឈូស​កម្ទេច​ចោល ហើយ​ពលរដ្ឋ​ជាច្រើន​នាក់​រង​របួស​ ដោយសារ​ការ​ប្រើ​អំពើ​ហិង្សា​ពី​សំណាក់​កង​កម្លាំង​សមត្ថកិច្ច​ខណ្ឌ​ ៧មករា រួម​នឹង​កង​សន្តិសុខ​ក្រុមហ៊ុន ផានអ៊ីមិច កាល​ពី​ដើម​ឆ្នាំ​២០១២។ នៅ​ថ្ងៃ​ទី​៣ ខែ​មករា​ ស្អែក​នេះ អ្នក​បុរី​កីឡា​ដែល​រស់​នៅ​ក្នុង​អគារ​ចាស់​ភាគ​ច្រើន​ជា​ស្ត្រី​វ័យ​ចំណាស់ និង​កុមារ នឹង​ប្រមូល​ផ្ដុំ​គ្នា​ ប្រារព្ធ​ខួប​រំលឹក​អំពី​ព្រឹត្តិការណ៍​ហិង្សា​នោះ។

តំណាង​អ្នក​បុរី​កីឡា​ដែល​បន្ត​រស់នៅ​ក្នុង​អាគារ​ចាស់​ លោកស្រី ស ស៊ន ប្រាប់​អាស៊ី​សេរី​ ថា ការ​ប្រារព្ធ​ខួប​៧​ឆ្នាំ ​នៃ​ការ​បណ្ដេញ​ពលរដ្ឋ​ចេញ​ដោយ​បង្ខំ​នៅ​តំបន់​បុរី​កីឡា​ នៅ​ថ្ងៃ​ទី​៣ មករា​ នឹង​មាន​មនុស្ស​ចូល​ទាំង​ចាស់​ទាំង​ក្មេង​ជាង ១០០​នាក់​ ដែល​មក​ពី​សហគមន៍​មាន​ជម្លោះ​ដីធ្លី​ក្នុង​ក្រុង​ភ្នំពេញ។ ពលរដ្ឋ​ ដែល​នឹង​មក​ចូលរួម​ប្រារព្ធ​ខួប ៧​ឆ្នាំ​នៅ​បុរី​កីឡា​ មាន​អតីត​អ្នក​បុរី​កីឡា​ រស់​នៅ​តំបន់​ភ្នំបាត​ និង​ទួល​សំបូរ អ្នក​បឹង​កក់​ អ្នក​ភូមិ​២៣ អ្នក​ភូមិ​បឹង​ឈូក និង​សហគមន៍​ថ្មគោល។

ក្នុង​ពិធី​នៅ​ថ្ងៃ​ទី​៣ មករា លោក​ស្រី​ ស ស៊ន ឲ្យ​ដឹង​ថា មាន​និមន្ត​ព្រះ​សង្ឃ ៤អង្គ​សូត្រ​មន្ត​ និង​រាប់​បាត្រ ហើយ​បង្ហោះ​ប៉ោង​ប៉ោង​អម​ជាមួយ​សារ​ សុំ​ដំណោះ​ស្រាយ​ដីធ្លី​ឲ្យ​បាន​ឆាប់​ ក្នុង​ឆ្នាំ​ថ្មី​នេះ។ សារ​ដែល​អ្នក​បុរី​កីឡា​នឹង​​បង្ហោះ​ជាមួយ​ប៉ោង​ប៉ោង សរសេរ​ថា «មាន​ផ្ទះ​មាន​ដី​ គឺ​មាន​កូន​ចៅ​មាន​អនាគត» «ផ្ទះ​និង​ដី គឺ​ជា​ជីវិត​របស់​ពួក​ខ្ញុំ»

ជុំ​វិញ​ជម្លោះ​ដីធ្លី​នៅ​តំបន់​បុរី​កីឡា​កណ្ដាល​ក្រុង​ភ្នំពេញ​ជាង ​៧​ឆ្នាំ​មក​នេះ តំណាង​អ្នក​បុរី​កីឡា​ លោកស្រី ស ស៊ន ស្នើ​សុំ​អាជ្ញាធរ​ ពិសេស​សាលា​ក្រុង​ភ្នំពេញ​ និង​ភាគី​ក្រុម​ហ៊ុន ប្រញាប់​ផ្ដល់​ដំណោះស្រាយ​ជូន​ពួកគាត់​ឲ្យបាន​ឆាប់ ដូច​ពលរដ្ឋ​រស់នៅ​តំបន់​ប៊ូលឌិញ (Building)។ លោក​ស្រី​បញ្ជាក់​ថា សំណង​ដែល​ពួកគាត់​ចង់បាន​ គឺ​ការដោះដូរ​កន្លែង​រស់នៅ​ពី​អគារ​ចាស់​ទៅ​នៅ​ក្នុង​អគារ​ថ្មី​ដែល​សង់​ដោយ​ក្រុមហ៊ុន បើ​មិន​បាន​រស់​នៅ​ក្នុង​អគារ​ថ្មី ស្នើ​សុំ​ជា​ទឹក​ប្រាក់​ក្នុង​តម្លៃ​មួយ ដែល​អាច​រក​ទិញ​ផ្ទះ​រស់​នៅ​និង​ប្រកប​របរ​ចិញ្ចឹម​ នៅ​ក្នុង​ទី​ក្រុង​បាន៖ «ក្នុង​ឆ្នាំ​ថ្មី​ហ្នឹង! ពួក​មីង​ចង់​បាន​ផ្ទះ​ ចង់បាន​ផ្ទះ​នៅ​ អត់​មាន​ចង់​ចេញ​ទៅ​ណា​ក្រៅ​ពី​បុរី​កីឡា​ទេ​ ព្រោះ​អី​រដ្ឋាភិបាល​អភិវឌ្ឍន៍​នៅ​ហ្នឹង​កន្លែង។ អត់​ផ្ទះ​ឲ្យ​លុយ​មក ឲ្យ​លុយ​ដែល​សំណង​អាច​ទិញ​ផ្ទះ​បាន ឥឡូវ​ផ្ទះ​ឡើង​ថ្លៃ​មិន​ដូច​ពី​មុន​ទេ។ ពីមុន ១ម៉ឺន​២ម៉ឺន​ទិញ​ផ្ទះ​បាន ឥឡូវ​ទិញ​អត់​បាន​ទេ ផ្ទះ​ឡើង​ថ្លៃ​រាល់​ថ្ងៃ»

មន្ត្រី​សម្របសម្រួល​គម្រោង​កំណែ​ទម្រង់​ដីធ្លី​នៃ​មជ្ឈមណ្ឌល​សិទ្ធិ​មនុស្ស​កម្ពុជា​ លោក វណ្ណ សូផាត សង្កេត​ឃើញ​ថា អាជ្ញាធរ​បាន​ខិត​ខំ​ដោះស្រាយ​បញ្ហា​ដីធ្លី​នៅ​បុរី​កីឡា​នេះ បាន​ច្រើន​ករណី​មក​ហើយ​។ មន្ត្រី​ដែល​ធ្វើ​ការ​ផ្នែក​បញ្ហា​ដី​ធ្លី​រូប​នេះ យល់ថា សាលា​ក្រុង​ភ្នំពេញ​ និង​ភាគី​ក្រុម​ហ៊ុន គួរ​ប្រញាប់​ដោះស្រាយ​ជូន​អ្នក​បុរី​កីឡា​ដែល​នៅ​សេស​សល់៖ «ខ្ញុំ​ថា បើ​ក្រុមហ៊ុន​ហើយ​នឹង​សាលា​រាជធានី​ភ្នំពេញ​បង្កើន​ឆន្ទៈ ហើយ​នឹង​ពិភាក្សា​ម្ដង​ទៀត​អំពី​សំណង ដែល​សមរម្យ​អាច​ទទួល​យក​បាន ដោយ​អ្នក​រង​ផល​ប៉ះពាល់​ហ្នឹង ហើយ​បញ្ចប់​ទៅ​វា​ចប់​បាត់​ហើយ​ កុំឲ្យ​នៅ​រ៉ាំរ៉ៃ​អញ្ចឹង​ទៀត​ណា៎។ ប្រជាពលរដ្ឋ​ គាត់​ចង់បាន​តែ​តម្លៃ​ណាមួយ​ដែល​គាត់​អាច​យក​ទៅ​ ផ្ទះ​ឬក៏​ទិញ​ដី​ទៀត​បាន។ កុំ​ឲ្យ​គាត់​យក​ទៅ​ តម្លៃ​ដែល​មិន​អាច​យក​ទៅ​ទិញ​ផ្ទះ​ទិញ​ដី​ទៀត​បាន​ មិន​ដឹង​ថា គាត់​ទៅ​រស់​នៅ​កន្លែង​ណា​បាន​ទេ បាទ!»

កាលពី​ឆ្នាំ​ ២០០៣ ដី​បុរី​កីឡា ដែល​មាន​ទំហំ​១៤,១២ ហិកតារ ស្ថិត​នៅ​សង្កាត់​វាល​វង់​ ខណ្ឌ ​៧ ​មករា ត្រូវ​បាន​រដ្ឋាភិបាល​ ធ្វើ​សម្បទាន​ទៅ​ឲ្យ​ក្រុមហ៊ុន ផានអ៊ីម៉ិច ដើម្បី​សាងសង់​អគារ​ពាណិជ្ជកម្ម​ និង​សាងសង់​អគារ​ចំនួន ១០​អគារ លើ​ផ្ទៃ​ដី​ទំហំ ២ហិកតារ ដើម្បី​សង់​លំនៅឋាន​ជូន​ប្រជាពលរដ្ឋ​នៅ​បុរី​កីឡា ១.៧៧៦ គ្រួសារ ដើម្បី​ដោះដូរ​​ដី​ជាង ១២ហិកតារ សម្រាប់​គម្រោង​អភិវឌ្ឍន៍​បុរី​កីឡា។

ប៉ុន្តែ​នៅ​ឆ្នាំ២០១០ ក្រុមហ៊ុន​សង់​បាន​តែ ៨អគារ ដែល​ទុក​ឲ្យ​ពលរដ្ឋ​ ៣៨០គ្រួសារ​ ពុំ​បាន​សំណង​ត្រឹម​ត្រូវ​ ត្រូវ​បន្ត​រស់នៅ​លើ​ដី​មាន​ជម្លោះ។ អ្នក​បុរី​កីឡា​ខ្លះ​ ដែល​បាន​ប្ដូរ​ទៅ​នៅ​ក្រៅក្រុង​ ដោយសារ​ខ្វះ​សេវាកម្ម​មូលដ្ឋាន​នានា បាន​វិល​មក​រស់នៅ​បុរី​កីឡា​វិញ​ ដោយ​តាំង​លំនៅ​បណ្ដោះអាសន្ន លើ​គំនរ​សំរាម​ក្រោម​អគារ​ទាំង ៨ នៅ​បុរី​កីឡា។

មក​ដល់​ថ្ងៃ​ទី៣ និង​ទី៤ ខែ​មករា ឆ្នាំ​២០១២ ករណី​បុរី​កីឡា ក៏​ផ្ទុះ​ជា​អំពើ​ហិង្សា​ នៅ​ពេល​​ក្រុម​គ្រួសារ​នៅ​សេស​សល់​ត្រូវ​បាន​បណ្ដេញ​ចេញ​ដោយបង្ខំ​ពី​ផ្ទះ​សម្បែង​ ពី​សំណាក់​កង​សន្តិសុខ​របស់​ក្រុមហ៊ុន ផានអ៊ីម៉ិច និង​កង​កម្លាំង​សមត្ថកិច្ច​ចម្រុះ​ព្រម​ទាំង​កងរាជអាវុធហត្ថ​ដែល​បង្ហាញ​ពី​ការ​ពាក់ព័ន្ធ​របស់​រាជរដ្ឋាភិបាល​ក្នុង​ករណី​នេះ។ សកម្មភាព​បណ្ដេញ​ចេញ​ទាំង​នោះ ធ្វើឡើង​ដោយ​ប្រើ​គ្រឿង​ចក្រ​ឈូស​ឆាយ​ផ្ទះ​សម្បែង​ពលរដ្ឋ ប្រើ​ដំបង​ឆក់ និង​ឧស្ម័ន​បង្ហូរ​ទឹក​ភ្នែក។ ក្នុង​ពេល​បណ្ដេញ​ចេញ​នោះ ផ្ទះ​សម្បែង​ជាង ២០០ខ្នង ត្រូវ​បាន​កម្ទេច​ ហើយ​ប្រជា​ពលរដ្ឋ​ជា​ច្រើន​នាក់​រង​របួស និង​មួយ​ចំនួន​ផ្សេង​ទៀត ត្រូវ​បាន​ចាប់ និង​ឃុំ​ខ្លួន។

បច្ចុប្បន្ន ផ្ទៃ​ដី​នៅ​បុរី​កីឡា​ដែល​បណ្ដេញ​ពលរដ្ឋ​ចេញ​ដោយ​បង្ខំ កាល​ពី​ឆ្នាំ​២០១២ នឹង​ត្រូវ​ជំនួស​មកវិញ ជា​អគារ​លំនៅឋាន​បែប​ពាណិជ្ជកម្ម​អន្តរ​ជាតិ​ដំបូង​គេ​នៅ​កម្ពុជា ឈ្មោះ​ថា CEO KT Pacific តាមរយៈ​ការ​អភិវឌ្ឍ​រួមគ្នា​រវាង​ក្រុមហ៊ុន​ចិន ឈ្មោះ លីស៊ីន គ្រុប (LiXin Group) និង​ក្រុម​ហ៊ុន ខេធី ប៉ាស៊ីហ្វិច គ្រុប (KT Pacific Group)។ ក្នុង​គេហទំព័រ​អចលនទ្រព្យ​កម្ពុជា ចុះ​ផ្សាយ​កាល​ពី​​ខែ​មករា ឆ្នាំ​២០១៨​ ឲ្យ​ដឹង​ថា ក្រុមហ៊ុន​ចិន​ឈ្មោះ ស៊ីឈួន ហ័រស៊ី គ្រុប (Sichuan Huaxi Group) ទទួល​សិទ្ធិ​សាង​សង់​អគារ​ពាណិជ្ជកម្ម​មួយ​នេះ​ ដែល​មាន​កម្ពស់ ៣៣​ជាន់ ស្ថិត​នៅ​ក្នុង​ខណ្ឌ​៧​មករា។ នៅ​ក្នុង​គម្រោង​នៃ​ការ​សាងសង់​អគារ​ទំនើប​ ដែលគេ​រំពឹង​ថា​នឹង​បញ្ចប់​នៅ​ឆ្នាំ​២០២០ រួម​មាន អគារ​លំនៅឋាន សាល​សន្និបាត​ពាណិជ្ជកម្ម​អន្តរជាតិ មជ្ឈមណ្ឌល​ពាណិជ្ជកម្ម​អន្តរ​ជាតិ ផ្សារ​ទំនើប កន្លែង​កម្សាន្ត និង​ភោជនីយដ្ឋាន។

ខណៈ​មាន​ក្រុមហ៊ុន​ចិន​កំពុង​សង់​អគារ​ទំនើប តំណាង​អ្នក​បុរី​កីឡា​ អ្នកស្រី ស ស៊ន ប្រកាន់​ជំហរ​ថា​ ពួកគាត់​ដែល​រស់​នៅ​ជិត ២០គ្រួសារ​ ​នឹង​មិន​ចាកចេញ​ពី​អគារ​ចាស់​ឡើយ ទោះ​បី​ជា​ត្រូវ​ប្រឈម​នឹង​ការ​បណ្ដេញ​ចេញ​ជាថ្មី​ទៀត​ក៏ ដោយ បើ​សិន​មិន​ទទួល​បាន​សំណង​ជា​ការ​ដោះដូរ​កន្លែង​រស់​នៅ​ក្នុង​អគារ​ថ្មី​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល