ពលរដ្ឋ​មាន​ជម្លោះ​ដីធ្លី​ជាមួយ​ក្រុមហ៊ុន OCIC នៅ​ខណ្ឌ​ជ្រោយ​ចង្វារ​ ស្នើសុំ​សាលា​ក្រុង​ភ្នំពេញ​ឲ្យ​មាន​កិច្ច​ពិភាក្សា​រក​ដំណោះ​ស្រាយ​

ដោយ សុ ជីវី
2019-01-17
អ៊ីម៉ែល
មតិ
Share
បោះពុម្ព
តំណាង​ពលរដ្ឋ​នៅ​តំបន់​ជ្រោយចង្វារ លោក ជា សុផាត ផ្ដល់​បទសម្ភាសន៍​នៅ​ថ្ងៃ​ទី​២៩ ខែ​មីនា ឆ្នាំ​២០១៧។
តំណាង​ពលរដ្ឋ​នៅ​តំបន់​ជ្រោយចង្វារ លោក ជា សុផាត ផ្ដល់​បទសម្ភាសន៍​នៅ​ថ្ងៃ​ទី​២៩ ខែ​មីនា ឆ្នាំ​២០១៧។
RFA

តំណាង​សហគមន៍​មាន​ជម្លោះដីធ្លី​ ដាក់​ញត្តិ​ជា​ថ្មី​នៅ​សាលា​រាជធានី​ភ្នំពេញ​ ស្នើ​សុំ​ឲ្យ​មាន​កិច្ច​ពិភាក្សា​ពិគ្រោះ​យោបល់​ ដើម្បី​ស្វែង​រក​ដំណោះស្រាយ​ថ្មី​មួយ​សម្រាប់​ពលរដ្ឋ​រស់​នៅ​តំបន់​ជ្រោយ​ចង្វារ​ ដែល​កំពុង​រង​ផល​ប៉ះពាល់​ពី​ការ​អភិវឌ្ឍ​តំបន់​នោះ ​ដោយ​ក្រុមហ៊ុន អូ.ស៊ី.អាយ.ស៊ី (OCIC)​ជាង ៨​ឆ្នាំ​មកនេះ។

តំណាង​សហគមន៍​ជ្រោយ​ចង្វារ លោក ជា សុផាត ប្រាប់​អាស៊ី​សេរី​ថា សាលា​ក្រុងភ្នំពេញ​នឹង​ជូន​ដំណឹង​មក​លោក​វិញ ក្នុង​រយៈ​ពេល​២-​៣​ថ្ងៃ​ទៀត ​បន្ទាប់​ពី​រដ្ឋបាល​សាលា​ក្រុងភ្នំពេញ​ទទួល​ញត្តិ នៅ​ថ្ងៃ​ទី​ពុធ ទី១៦ មករា។ ក្រៅ​ពី​ដាក់​ញត្តិ​សាលាក្រុង​ លោក ជា សុផាត និង​លោក សេង សារៀម បន្ត​ដាក់​ញត្តិ​តាម​ស្ថាប័ន​ជាតិ​មួយ​ចំនួន​ទៀត​ មានអាជ្ញាធរ​ជាតិ​ដោះស្រាយ​ទំនាស់​ដីធ្លី ក្រសួង​រៀបចំ​ដែនដី​នគរោបនីយកម្ម និង​សំណង់ ក្រសួង​មហាផ្ទៃ ខុទ្ទកាល័យ​លោក​ ហ៊ុន សែន និង​តំណាង​អង្គការ​សហ​ប្រជាជាតិ​​ប្រចាំ​ប្រទេស​កម្ពុជា។

ដំណោះស្រាយ​ដែល​ពលរដ្ឋ​សរសេរ​ក្នុង​ញត្តិ​ដាក់​ជូន​អភិបាល​ក្រុង​ភ្នំពេញ គឺ​ស្នើ​ឲ្យ​សាលា​ក្រុង​ភ្នំពេញ ផ្អាក​រាល់​សកម្មភាព​របស់​ក្រុមហ៊ុន OCIC នៅ​លើ​ដី​ដែល​មិន​ទាន់​ដោះស្រាយ​ កាត់​ឆ្វៀល​ដី​លំនៅឋាន​ទាំង​អស់​ចេញ​ពី​គម្រោង​អភិវឌ្ឍ​ និង​ចេញ​ប័ណ្ណ​កម្មសិទ្ធិ (ប្លង់​រឹង) ដោយ​មិន​គិត​ប្រវែង​​គម្លាត​១០០ម៉ែត្រ ឬ​ក្រៅ​១០០​ម៉ែត្រ​ពី​ផ្លូច​ជាតិ​លេខ 6A និង​ពី​ច្រាំង​ទន្លេសាប។ ​ក្រៅ​ពី​នេះ ដី​អាស្រ័យ​ផល​សម្រាប់​ធ្វើ​ស្រែ​ចម្ការរបស់ពលរដ្ឋ​ដែល​ជា​ម្ចាស់​ដី ចូលរួម​អភិវឌ្ឍន៍ ​ដោយ​ប្រគល់​ដី​៥០% ជូន​សាលា​ក្រុង​ភ្នំពេញ​និង​ក្រុមហ៊ុន ហើយ​ដី​៥០%​ដែល​នៅ​សល់​ ស្នើ​សុំ​ចេញ​ប័ណ្ណ​កម្មសិទ្ធិ​ឲ្យ​ម្ចាស់​ដី ឬ​ក្រុមហ៊ុន​អាច​ទិញ​តាម​តម្លៃ​ទីផ្សារ​សម្រាប់​ដី​ទាំង​មូល​។ ហើយ​នឹង​ដោះស្រាយ​ផល​ប៉ះពាល់​ដី​លំនៅឋាន​ នៅ​ភូមិ​ដើម​គរ សង្កាត់​ជ្រោយ​ចង្វារ​ ៨គ្រួសារ​ ដែល​ក្រុមហ៊ុន​ឈូស​កម្ទេច​ចោល​កាល​ពី​ខែ​មេសា​ ឆ្នាំ​២០១៧។

តំណាង​ពលរដ្ឋ ៨២​គ្រួសារ​នៅ​តំបន់​ជ្រោយ​ចង្វារ លោក ជា សុផាត សង្ឃឹម​ថា រដ្ឋមន្ត្រី​ក្រសួង​ដែន​ដី លោក ជា សុផារ៉ា ដែល​ឡើង​កាន់​តំណែង​ជា​ប្រធាន​អាជ្ញាធរ​ជាតិ​ដោះស្រាយ​ទំនាស់​ដីធ្លី និង​អភិបាល​ក្រុង​ភ្នំពេញ លោក​ ឃួង ស្រេង​ នឹង​ពិនិត្យ​មើល​ករណី​ជម្លោះ​ដីធ្លី​របស់​ពួកគាត់​ ដើម្បី​ឈាន​ទៅ​រក​ដំណោះស្រាយ​មួយ​ដែល​ពលរដ្ឋ​អាច​ទទួល​យក​បាន៖ «ខ្ញុំ​សង្ឃឹម​និង​ជឿ​ជាក់​ថា អាជ្ញាធរ​ជាតិ​ដោះស្រាយ​ទំនាស់​ដីធ្លី ហើយ​ឯកឧត្ដម​អភិបាល​ក្រុង ប្រហែល​ជា​គាត់​នឹង ពិនិត្យ​និង​សើរើ​ឡើង​វិញ​ ដើម្បី​រក​ដំណោះ​ស្រាយ​មួយ​ដោយ​សមស្រប​ឲ្យ​ពួក​ខ្ញុំ កុំ​ឲ្យ​ពួក​ខ្ញុំ នៅ​បើក​ភ្នែក​មក​ពេល​ណា​ នៅ​តែ​គិត​ពី​រឿង​ដី​របស់​ខ្លួន គិត​តែ​ពី​រឿង​អយុត្តិធម៌​នៅ​ក្នុង​ខ្លួន តើ​ថ្ងៃ​ណា​បាន​ពួក​ខ្ញុំ​ហ្នឹង មាន​ជីវិត​រស់​នៅ​ ដូច​ថា​យើង​អស់​ទុក្ខ​កង្វល់​ពី​ការ​បាត់​បង់​ទ្រព្យ​សម្បត្តិ​ហ្នឹង។ ខ្ញុំ​គិត​ឃើញ​ថា អភិបាល​ក្រុង​ថ្មី ១​ឆ្នាំ​មក​ហើយ ប្រហែល​ជា​លោក​មាន​វិធីសាស្រ្ត​ជួយ​ដោះស្រាយ​ឲ្យ​ពួក​ខ្ញុំ​ ដោយ​សមរម្យ»

ចំពោះ​ជម្លោះដីធ្លី​ដ៏​រ៉ាំរ៉ៃ​រវាង​អ្នក​ជ្រោយ​ចង្វារ​និង​ក្រុម​ហ៊ុនOCIC របស់​លោក​ឧកញ៉ា ពុង​ ខៀវសែ ដែល​អូស​បន្លាយ​ជាង​ ៧​ឆ្នាំ​មក​នេះ មន្ត្រី​សម្របសម្រួល​គម្រោង​កំណែ​ទម្រង់​ដីធ្លី​នៃ​មជ្ឈមណ្ឌល​សិទ្ធិ​មនុស្ស​កម្ពុជា លោក វណ្ណ សូផាត យល់​ថា ដំណោះស្រាយ​ពិត​ជា​មាន​ ប្រសិន​បើ​អាជ្ញាធរ​មាន​ឆន្ទៈ​ពិតប្រាកដ​ក្នុង​ការ​បញ្ចប់​ជម្លោះ​ដីធ្លីនៅ​កណ្ដាល​ក្រុង​ភ្នំពេញមួយ​នេះ៖ «បញ្ហា​ អូ.ស៊ី.អាយ.​ស៊ី​ នេះ គឺ​ថា​យូរ​ឆ្នាំ​ហើយ។ ហើយ​សាលា​រាជធានី​ភ្នំពេញ​នៅតែ​ប្រកាន់​ជំហរ ផ្ដល់​ជូន​គាត់​តែ​១០%។ បើសិន​នៅតែ​ប្រកាន់​ជំហរ​ហ្នឹង មិន​មាន​ជំហរ​ផ្សេង​ទៀត​សម្រាប់​ដំណោះស្រាយ​ពិសេស​ណា​ផ្សេង​ទៀត​ទេ គឺ​ថា​វា​ពិបាក​ណាស់។ ខ្ញុំ​យល់​ថា វា​មិន​អាច​ឈាន​ទៅ​រក​ដំណោះស្រាយ​បញ្ចប់​បាន​ទេ លុះត្រាតែ ខាង​សាលា​រាជធានី​ភ្នំពេញ ក៏​ដូច​ជា​ក្រុមហ៊ុន ឬមួយ​ក៏​ឯកឧត្តម​ ជា សុផារ៉ា អាច​ប្រជុំ​ ឬក៏​សម្របសម្រួល​ក្នុង​ការ​ស្វែង​រក​ដំណោះស្រាយ​ណា​ទទួល​យក​បាន​ទាំង​អស់​គ្នា ហ្នឹង​បាន​អាច​ទៅ​មុខ​រួច»

កាល​ពី​ឆ្នាំ​២០១២ ក្រុម​ហ៊ុន​ OCIC​ របស់​លោក​ឧកញ៉ា ពុង ខៀវសែ ចាប់​ដំណើរ​ការ​សាងសង់​ក្រុង​រណប​ក្នុង​ខណ្ឌ​ជ្រោយ​ចង្វារ​ ក្រោយ​ពី​ទទួល​បាន​សិទ្ធិ​អភិវឌ្ឍន៍​ ពី​សាលាក្រុង​ភ្នំពេញ​លើ​ផ្ទៃ​ដី​សរុប​ប្រមាណ​៣៨៧​ហិកតារ។ ​គម្រោង​អភិវឌ្ឍន៍​នេះ​ស្ថិត​នៅ​ភាគ​ខាង​កើត​ទីក្រុង​ភ្នំពេញ​ ជាប់​ច្រាំងទន្លេ​ខាងកើត​ឈៀង​ខាង​ឆ្វេង​ ស្ពាន​មិត្តភាព​កម្ពុជា-ជប៉ុន​ និង​ស្ពាន​មិត្ត​ភាព​កម្ពុជា-ចិន។

លោក ជា​ សុផាត តំណាង​សហគមន៍​ជ្រោយ​ចង្វារ ឲ្យ​ដឹង​ថា​ បច្ចុប្បន្ន​នេះ ខាង​ភាគី​ក្រុមហ៊ុន​នៅ​តែ​បន្ត​ការ​ឈូស​ឆាយ​ដីធ្លី​ពលរដ្ឋ និង​សាងសង់ ផ្ទះល្វែង ​ភោជនីយដ្ឋាន ​រហូត​មក​ដល់​ពេល​នេះ ​ដោយ​គ្មាន​ការ​ផ្អាក​មួយ​ថ្ងៃ​ណា​ឡើយ។ ប្រជាពលរដ្ឋ​រស់​នៅ​តំបន់​ជ្រោយ​ចង្វារ ស្នើ​សុំ​ប្រមុខ​ដឹកនាំ​ លោក ហ៊ុន សែន​ ជួយ​អន្តរាគមន៍​ដោះស្រាយ​បញ្ចប់​ជម្លោះ​ដីធ្លី​ជូន​ពួកគាត់ ​ដែល​ភាគ​ច្រើន​ជា​មន្ត្រី​រាជការ​ធ្វើ​ការ​តាម​ក្រសួង​ស្ថាប័នរដ្ឋ​នានា មាន​នគរបាល ទាហាន និង​គ្រូ​បង្រៀន​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល