ពលរដ្ឋ១៣នាក់តំណាងឲ្យ១២១គ្រួសារ ដែលមានវិវាទដីធ្លីជាមួយក្រុមហ៊ុន អូស៊ីអាយស៊ី (OCIC) នៅតំបន់ព្រលានយន្តថ្មី នាំគ្នាដើរដាក់ញត្តិតាមស្ថានទូតមួយចំនួន ក្នុងរាជធានីភ្នំពេញ ជួយអន្តរាគមន៍ទៅរដ្ឋាភិបាលពន្លឿនដំណោះស្រាយ។ ស្ថានទូតដែលពលរដ្ឋដាក់ញត្តិនោះ មានស្ថានទូតអាមេរិក បារាំង អូស្ត្រាលី ជប៉ុន និងស្ថានទូតចិន។
ការស្វែងរកកិច្ចអន្តរាគមន៍ពីបណ្ដាស្ថានទូតបរទេស ពីសំណាកប្រជាពលរដ្ឋរស់នៅតំបន់មានជម្លោះដីធ្លីដ៏រ៉ាំរ៉ៃនៅស្រុកកណ្ដាលស្ទឹង ខេត្តកណ្ដាល ធ្វើឡើងបន្ទាប់ពីពួកគាត់បានព្យាយាមស្វះស្វែងរកកិច្ចអន្តរាគមន៍ជាច្រើនលើកពីស្ថាប័នជាតិគ្រប់លំដាប់ថ្នាក់ ក្នុងរយៈពេល៤ឆ្នាំមកហើយ ប៉ុន្តែគ្មានស្ថាប័នមួយណា អាចផ្ដល់ដំណោះស្រាយជូនពួកគាត់ទេ។
តំណាងពលរដ្ឋម្នាក់លោក ទួន វណ្ណៈ ប្រាប់វិទ្យុអាស៊ីសេរីនៅថ្ងៃទី៦ ខែមេសាថា ការដាក់ញត្តិនេះមានប្រជាពលរដ្ឋមកពីឃុំបឹងខ្យាង និងព្រែកស្លែង ស្នើឲ្យឯកអគ្គរដ្ឋទូតទាំងនេះ ជួយអន្តរាគមន៍ទៅរដ្ឋាភិបាល និងភាគីក្រុមហ៊ុនរបស់ឧកញ៉ា ពុង ឃាវសែ ជួបជាមួយប្រជាពលរដ្ឋ ដោះស្រាយបញ្ចប់វិវាទដីធ្លី ដោយផ្ដល់សំណងសមរម្យណាមួយ ដែលពួកគាត់អាចទទួលយកបាន។
លោកបន្តថា អាជ្ញាធរខេត្តកណ្ដាលនៅតែប្រកាន់គោលការណ៍ដដែល គឺផ្ដល់សំណងឲ្យពលរដ្ឋ ក្នុងតម្លៃដីមួយការ៉េ៨ដុល្លារ ឬដោះដូរដីទៅទីតាំងផ្សេង គឺគ្មានផ្ដល់ដំណោះស្រាយណាល្អប្រសើរជាងនេះទេ ខណៈតម្លៃដីនៅតំបន់នោះ ចាប់ពី៥០ដុល្លារ ដល់១៣០ដុល្លារក្នុងម៉ែត្រការ៉េ។
លោកបញ្ជាក់ថា ពួកគាត់មិនអាចទទួលយកបានទេសំណងដែលអាជ្ញាធរផ្ដល់ឲ្យនោះ ព្រោះតិចតួចពេក ដែលមិនអាចទិញដីនៅទីតាំងថ្មីបាន៖ «បើសិនពួកខ្ញុំទទួលយក៨ដុល្លារ បើទទួលក៏ក្រ មិនទទួលក៏ក្រដែរ។ អ៊ីចឹង ! ពួកខ្ញុំនឹងតស៊ូមតិតទៅទៀត។ ខ្ញុំសំណូមពរដល់រដ្ឋាភិបាល និងស្ថាប័នផ្សេងៗជំរុញឲ្យតំណាងក្រុមហ៊ុនចូលរួមដោះស្រាយជូនប្រជាពលរដ្ឋដែលរងគ្រោះដោយសារព្រលានយន្តហោះភ្នំពេញថ្មីនេះ»។
លោក ទួន វណ្ណៈ ឲ្យដឹងថា មន្ត្រីស្ថានទូតបានទទួលញត្តិពីតំណាងប្រជាពលរដ្ឋ ហើយនិយាយថានឹងបញ្ជូនសំណើនេះទៅតំណាងអង្គទូត។
វិទ្យុអាស៊ីសេរីមិនអាចសុំការឆ្លើយតបរឿងនេះ ពីតំណាងក្រុមហ៊ុន អូស៊ីអាយស៊ី (OCIC ) លោក ជូ កុកសាយ និងអភិបាលខេត្តកណ្ដាល លោក គង់ សោភ័ណ្ឌ បានទេ ដោយហៅទូរស័ព្ទចូលតែពុំមានអ្នកទទួល។
ជុំវិញរឿងនេះ ប្រធានផ្នែកសិទ្ធិមនុស្ស និងដីធ្លី នៃសមាគមអាដហុកលោក នី សុខា មានប្រសាសន៍ថា ករណីប្រជាពលរដ្ឋស្វែងរកកិច្ចអន្តរាគមន៍ពីបណ្ដាស្ថានទូតបរទេសនេះ គឺបង្ហាញឲ្យឃើញពីកម្សោយរបស់អាជ្ញាធររដ្ឋ ដែលមិនអាចដោះស្រាយបញ្ចប់បញ្ហាជូនពលរដ្ឋរបស់ខ្លួនត្រឹមត្រូវតាមច្បាប់ ក្នុងវិវាទដីធ្លីនេះបាន។
លោកបន្តថា ការកំណត់តម្លៃដីដោយឯកតោភាគីពីខាងក្រុមហ៊ុន ហើយតម្រូវឲ្យពលរដ្ឋរងផលប៉ះពាល់ពីការអភិវឌ្ឍទទួលយកសំណងបែបនេះ គឺជាការផ្ដល់សំណង ផ្ទុយពីស្មារតីច្បាប់ ដែលតម្រូវឲ្យផ្ដល់សមរម្យ ដោយយុត្តិធម៌ និងអាចទទួលយកបាន។
លោកយល់ថា ប្រសិនបើរដ្ឋាភិបាល និងអាជ្ញាធរទទួលដោះស្រាយវិវាទនេះ ដោយប្រកាន់យកគោលនយោបាយដោះស្រាយជូនប្រជាពលរដ្ឋ ស្របតាមច្បាប់អស្សាមិករណ៍ ជម្លោះដីធ្លីនេះ នឹងអាចដោះស្រាយបានដោយជោគជ័យ ហើយនឹងមានការសាទរពីមជ្ឈដ្ឋានជាតិនិងអន្តរជាតិ៖ «បើសិនជាយើងដោះស្រាយដីធ្លីគាត់នៅទីតាំងហ្នឹងទៅអភិវឌ្ឍ យើងត្រូវដោះស្រាយសំណងឲ្យគាត់ជាតម្លៃដីហ្នឹងឲ្យគាត់ត្រឡប់មកវិញ ទី១។ ទី២ អាចដោះស្រាយឲ្យដីគាត់ដែលមានប្រហាក់ប្រហែលនឹងដីដែលយើងយករបស់គាត់។ អាហ្នឹងហើយដែលគេហៅថាសមរម្យនិងយុត្តិធម៌។ យើងមើលនៅក្នុងច្បាប់អស្សាមិករណ៍ទៅ ប៉ុន្តែបើយើងទៅកំណត់តម្លៃហើយយើងអត់បានឈរនៅលើសមភាព ឈរលើគោលការណ៍ច្បាប់ទាំងអស់ហ្នឹងទេ។ នេះជាដោះស្រាយក្នុងការបង្ខិតបង្ខំ។ ខ្ញុំគិតថាមិនទទួលបានជោគជ័យទេ ហើយបណ្ដាលឲ្យគាត់ឈឺចាប់ រត់ទៅរកទូត ដើម្បីឲ្យជួយអន្តរាគមន៍ហ្នឹង»។
ពលរដ្ឋឲ្យដឹងថា ក្រុមហ៊ុន អូស៊ីអាយស៊ី (OCIC) ដែលទទួលបានសិទ្ធីសាងសង់ព្រលានយន្តហោះថ្មី ដាក់កម្លាំងសន្តិសុខជាច្រើននាក់ រារាំងអ្នកភូមិមិនឲ្យចូលមើលដី និងធ្វើស្រែបានទៀតទេ ដោយក្រុមហ៊ុនព្រមានចាប់ខ្លួនពលរដ្ឋបញ្ជូនទៅតុលាការ។
ពលរដ្ឋថា គ្រួសារម្នាក់ៗធ្លាក់ខ្លួនក្រីក្រ កូនបាត់បង់ការសិក្សា និងជំពាក់ធនាគារវ័ណ្ឌក ដោយសារបាត់បង់ដីស្រែ ជាង៤ឆ្នាំមកនេះ ហើយអាជ្ញាធរនិងក្រុមហ៊ុនមិនព្រមផ្ដល់សំណងសមរម្យណាមួយឲ្យពួកគាត់នៅឡើយ។
ពលរដ្ឋ១២១គ្រួសារ ដែលមានដីសរុប៦៣ហិកតារ ស្ថិតក្នុងគម្រោងក្រុមហ៊ុន ស្នើសុំលោកនាយករដ្ឋមន្ត្រី ហ៊ុន សែន ចេញមុខអន្តរាគមន៍ដោះស្រាយបញ្ចប់វិវាទដីធ្លីដ៏រ៉ាំរ៉ៃមួយនេះ ឲ្យបានឆាប់ ដើម្បីឲ្យពួកគាត់ស្វែងរកតាំងថ្មីរស់នៅ និងប្រកបរបរចិញ្ចឹមជីវិតបានសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។