ពលរដ្ឋ​​ខេត្ត​ព្រះសីហនុ​ចោទ​ក្រុមហ៊ុន​របស់​ឧបនាយករដ្ឋមន្ត្រី យឹម ឆៃលី រំលោភ​ដី​ពួកគេ

ដោយ ទីន ហ្សាការីយ៉ា
2018-12-23
អ៊ីម៉ែល
មតិ
Share
បោះពុម្ព
ប្រធាន​ក្រុមប្រឹក្សា​ស្ដារ​អភិវឌ្ឍន៍​វិស័យ​កសិកម្ម និង​ជនបទ លោក​ឧបនាយករដ្ឋមន្ត្រី យឹម ឆៃលី ថ្លែង​នៅ​ថ្ងៃ​ទី​២ ខែ​មិថុនា ឆ្នាំ​២០១៦។
ប្រធាន​ក្រុមប្រឹក្សា​ស្ដារ​អភិវឌ្ឍន៍​វិស័យ​កសិកម្ម និង​ជនបទ លោក​ឧបនាយករដ្ឋមន្ត្រី យឹម ឆៃលី ថ្លែង​នៅ​ថ្ងៃ​ទី​២ ខែ​មិថុនា ឆ្នាំ​២០១៦។
RFA

ពលរដ្ឋ​នៅ​ខេត្ត​ព្រះសីហនុ ចោទ​ប្រកាន់​ថា ក្រុមហ៊ុន​របស់​អ្នក​មាន​អំណាច​ម្នាក់ បាន​ប្រើ​សិទ្ធិ​អំណាច​រំលោភ​យក​ដីធ្លី​របស់​ពួកគេ។ ពួកគេ​លើកឡើង​ថា ជម្លោះដីធ្លី​ដែល​អូស​បន្លាយ​ជាង ៧​ឆ្នាំ​មក​នេះ រវាង​ពួកគេ​នឹង​ក្រុមហ៊ុន​ឋានសួគ៌​នោះ ទោះ​ពលរដ្ឋ​ទៅ​សុំ​អន្តរាគមន៍​ពី​ក្រសួង​ស្ថាប័ន​ណា​ក៏​គេ​មិន​មាន​ដំណោះស្រាយ​ដែរ។

ពលរដ្ឋ​មាន​បញ្ហា​ដីធ្លី​ឲ្យ​ដឹង​ថា ក្រុមហ៊ុន​ឈ្មោះ​ឋានសួគ៌ បាន​រំលោភ​យក​ដីធ្លី​ពួកគេ ហើយ​និង​ព្យាយាម​បណ្ដេញ​ពួកគេ​ចេញពី​ផ្ទះសំបែង​លើ​ដី​មាន​ជម្លោះ។

តំណាង​សហគមន៍​អូរត្រជាក់ចិត្ត​លោក សំ សុផាត ឲ្យ​អាស៊ីសេរី​ដឹង​ថា នៅ​សហគមន៍​របស់​លោក​មាន​ពលរដ្ឋ ៦៣​គ្រួសារ ត្រូវ​ក្រុមហ៊ុន​ឋានសួគ៌​វាយកម្ទេច​ផ្ទះសំបែង​ដើម្បី​បណ្ដេញ​ចេញ​ពី​ដី​មាន​ជម្លោះ​តាំងពី​ឆ្នាំ​២០១១ មក។ លោក​ថា ពលរដ្ឋ​បាន​ស្វះ​ស្វែងរក​អន្តរាគមន៍​ពី​អាជ្ញាធរ​ខេត្ត​ព្រះសីហនុ និង​ស្ថាប័ន​ថ្នាក់​ជាតិ ប៉ុន្តែ​មិន​ទទួល​បាន​ដំណោះស្រាយ​នោះ​ទេ៖ «ក្រុមហ៊ុន​ហ្នឹង​ចាប់ផ្ដើម​មក​ធ្វើ​បាន​មាន​បញ្ហា ដំបូង​គេ​ថា គេ​ចូល​មក​ធ្វើ​ផ្លូវ​ឲ្យ​ប្រជាពលរដ្ឋ​ក្នុង​ចំណុច​ហ្នឹង​ដើម្បី​ឲ្យ​ពលរដ្ឋ​ងាយ​ឆ្លងកាត់ ប៉ុន្តែ​បែរ​ជា​យក​ឫស្សី​មក​ដាំ​លើ​កន្លែង​សម្រាប់​ធ្វើ​ផ្លូវ»

តំណាង​ពលរដ្ឋ​ដដែល​ឲ្យ​ដឹង​ទៀត​ថា ក្រៅពី​ក្រុមហ៊ុន​ឋានសួគ៌ នៅ​ឆ្នាំ​២០១៥ រដ្ឋបាល​ព្រៃឈើ មក​អះអាង​ថា ដី​មាន​ជម្លោះ​ជា​ដី​គម្រប​ព្រៃឈើ​ដែល​តម្រូវ​ឲ្យ​ពលរដ្ឋ​ចាកចេញ​ពី​ដី​នោះ។

ពលរដ្ឋ​ឲ្យ​ដឹង​ថា ដី​មាន​ជម្លោះ​នោះ​មាន​ទំហំ​ជាង​៥០០​ហិកតារ ស្ថិត​សហគមន៍​បាត​ខ្ទះនិង​សហគមន៍​អូរត្រជាក់ចិត្ត ឃុំ​សំរ៉ុង ស្រុក​ព្រៃនប់ ហើយ​ពួកគេ​ចូល​មក​រស់នៅ​លើ​ដី​នោះ កាលពី​ឆ្នាំ​១៩៩១​មក​ម្ល៉េះ។

តំណាង​ពលរដ្ឋ​បាតខ្ទះ លោក អ៊ំ ធឿន ឲ្យ​ដឹង​ដែរ ដោយសារ​លោក​ចេញមុខ​ទាមទារ​រក​យុត្តិធម៌​ករណី​ជម្លោះដីធ្លី​លោក​ត្រូវ​សមត្ថកិច្ច​ចាប់​ជាប់ពន្ធនាគារ។ តំណាង​ពលរដ្ឋ​រូប​នេះ យល់ថា ជម្លោះដីធ្លី​ដី​រ៉ាំរ៉ៃ​នេះ លុះត្រា​របប​ក្រុងភ្នំពេញ​មាន​ឆន្ទៈ ទើប​អាច​ជួយ​ដោះស្រាយ​បាន​ព្រោះ​ម្ចាស់​ក្រុមហ៊ុន​នេះ​គឺជា​មន្ត្រី​ជាន់ខ្ពស់​នៅ​ក្នុង​របប​នេះ៖ «គេ​ដាក់​បារាស​ឲ្យ​យើង​ឆ្លង បើ​និយាយ​រួម​ទៅ​គេ​ប្ដឹង​យើង»

អាស៊ីសេរី​មិនទាន់​អាច​សុំ​ការ​បំភ្លឺ​ពី​អ្នកនាំពាក្យ​សាលាខេត្ត​ព្រះសីហនុ លោក ឱ សារឿន បាន​ទេ​នៅ​ថ្ងៃ​ទី​២៣ ធ្នូ ដោយ​ទូរស័ព្ទ​របស់​លោក​រោទ៍​ជា​ច្រើនដង​គ្មាន​អ្នកទទួល។

ចំណែក​អ្នក​សម្របសម្រួល​របស់​អង្គការ​សិទ្ធិមនុស្ស​អាដហុក (Adhoc) នៅ​ក្រុងព្រះសីហនុ លោកស្រី ជៀប សុធាវី និយាយ​ថា បញ្ហា​ដីធ្លី​តំបន់​នេះ​លោកស្រី​តែង​សង្កេត​ឃើញ​ថា អភិបាលស្រុក​ស្ទឹងហាវ និង​សមត្ថកិច្ច​ខេត្ត​ព្រះសីហនុ​បាន​ធ្វើ​សកម្មភាព​បណ្ដេញ​ពលរដ្ឋ​ជំនួស​ឲ្យ​ក្រុមហ៊ុន។ លោកស្រី​ឲ្យ​ដឹង​ថា ទោះជា​ក្រុមហ៊ុន​នេះ​មាន​សិទ្ធិ​អំណាច​លើ​ដី​មាន​ជម្លោះ​នេះ ប៉ុន្តែ​លោកស្រី​បាន​ទទួល ដំណឹង​ពី​ពលរដ្ឋ​ថា ក្រុមហ៊ុន​នេះ​មិន​ទាន់​បាន​ចុះបញ្ជី​នៅ​ក្រសួង​ពាណិជ្ជកម្ម និង​ក្រុមប្រឹក្សា​អភិវឌ្ឍ​កម្ពុជា​នៅឡើយ​ទេ៖ «ករណី​នេះ​ប្រហែលជា​អាច​មាន​ដំណោះស្រាយ​បើសិនជា​លោក​ឧបនាយករដ្ឋមន្ត្រី​គាត់​ជា​ប្រធាន​ក្រុមហ៊ុន​ឋានសួគ៌»

ពលរដ្ឋ​ថា ចាប់​តាំង​ពី​ពួកគេ​មាន​ជម្លោះ​ជា​ក្រុមហ៊ុន​ឋានសួគ៌ ពលរដ្ឋ​ដែល​ជាង​តំណាង​សហគមន៍​តែងតែ​រង​ការចោទប្រកាន់​ពី​សំណាក់​តុលាការ និង​ត្រូវ​ជាប់​ពន្ធនាគារ​ជា​ញឹកញាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល