សហគមន៍នេសាទ និងសង្គមស៊ីវិលបង្ហាញក្តីបារម្ភចំពោះការកាត់ឆ្វៀលដី មិនមានតម្លាភាព
2022.05.31
លោកនាយករដ្ឋមន្ត្រី ហ៊ុន សែន។
រូប៖ ហ្វេសប៊ុកលោក ហ៊ុន សែន
ប្រជាពលរដ្ឋនៅតាមសហគមន៍ជាប់បឹងទន្លេសាប និងសង្គមស៊ីវិល ព្រួយបារម្ភពីអាជ្ញាធរ ឆ្វៀលដីចែកពលរដ្ឋគ្មានតម្លាភាព និងអំពើពុករលួយ។ ការលើកឡើងនេះបន្ទាប់ពីលោកនាយករដ្ឋមន្ត្រី ហ៊ុន សែន ចេញសារណែនាំឱ្យអាជ្ញាធរខេត្តជុំវិញបឹងទន្លេសាបចុះពិនិត្យនិងកាត់ឆ្វៀលដីជូនប្រជាពលរដ្ឋនៅតំបន់នោះ។
ប្រជាពលរដ្ឋ និងសង្គមស៊ីវិលព្រួយបារម្ភថា ការឆ្វៀលដីនឹងគ្មាន តម្លាភាពនោះទេ ប្រសិនបើក្រសួងពាក់ព័ន្ធបណ្ដោយឱ្យអាជ្ញាធរមូលដ្ឋានចុះវាស់វែងដីធ្លីគ្មានការចូលរួមពីស្ថាប័នពាក់ព័ន្ធ។
អនុប្រធានសហគមន៍នេសាទដីក្រោមរហាលសួង ឃុំព្រែកហ្លួង ស្រុកឯកភ្នំ ខេត្តបាត់ដំបង លោក ហោ សំអាត ប្រាប់វិទ្យុអាស៊ីសេរីនៅថ្ងនៅទី៣០ ឧសភា ថា នៅតំបន់លោក អាជ្ញាធរមិនទាន់បានចុះត្រួតពិនិត្យដីធ្លីរួចហើយ ប៉ុន្តែមិនទាន់កាត់ឆ្វៀលចែកជូនពលរដ្ឋនៅឡើយទេគិតត្រឹមថ្ងៃទី៣០ឧសភា។ លោក ហោ សំអាត យល់ថា បើរដ្ឋាភិបាលមិនកាត់ឆ្លៀលដីឲ្យពលរដ្ឋគឺជាការល្អ ដើម្បីរក្សាដីទាំងនោះទុកជាសម្បត្តិរដ្ឋ ព្រោះអាជ្ញាធរ បង្ហាញទីតាំងព្រំប្រទល់ខុសដែលធ្វើបាត់បង់ព្រៃលិចទឹកបន្តទៀត។ លោកក៏សំណូមពរដល់រដ្ឋាភិបាលឱ្យបញ្ជូនស្ថាប័នចុះ ចាត់ចែងកាត់ដីឱ្យបានស្មើភាពគ្នា ទាំងប្រជាពលរដ្ឋក្រីក្រ និងអ្នកមានលុយមានអំណាច៖ «ខ្ញុំគាំទ្រការធ្វើបែបហ្នឹង ប៉ុន្តែគ្រាន់ថា សំខាន់ វាពិបាកក្នុងការកំណត់ថា ប៉ុន្មានឆ្នាំ ប៉ុន្មានឆ្នាំ បើថ្នាក់ជាតិគាត់ចុះមកពិនិត្យមើលហ្មង វាស្រួលទេ តែបើថ្នាក់មូលដ្ឋានខ្លួនឯង អាហ្នឹងជារឿង ខ្លះជារឿងនៅតាមឃុំ ឃុំមួយៗខ្លះហ្នឹងមានពាក់ព័ន្ធជាមួយមន្ត្រីខ្លះហ្នឹង គាត់កាប់ឆ្វៀលតាំងថ្មីៗ គាត់កាប់ថ្មីៗ ដល់អញ្ចឹង គាត់អាចដំឡើងថា អាហ្នឹងគាត់កាន់កាប់យូរហើយ អាហ្នឹងវាជារឿងដែលពិបាក»។
យន្តការកាត់ដីឲ្យពលរដ្ឋរស់នៅតំបន់បឹងទន្លេសាបពេលនេះ ខណៈគណបក្សប្រជាជនកម្ពុជា ដែលកំពុងគ្រប់គ្រងអំណាច ហើយក៏កំពុងស្វះស្វែងរកសំឡេងឆ្នោតពីពលរដ្ឋ ជាមួយគណបក្សនយោបាយចំនួន១៦បក្សផ្សេងទៀត ពីការបោះឆ្នោតជ្រើសរើសក្រុមប្រឹក្សាឃុំសង្កាត់។
ជុំវិញរឿងនេះ ប្រធានរដ្ឋបាលជលផលខេត្តបាត់ដំបង លោក ជួង សុភា ប្រាប់វិទ្យុអាស៊ីសេរីថា នៅខេត្តបាត់ដំបងអាជ្ញាធរមិនទាន់ចុះកាត់ឆ្វៀលដីជូនប្រជាពលរដ្ឋនៅឡើយទេ ព្រោះពេលនេះជាយុទ្ធនាការឃោសនារកសំឡេង ។ លោកបន្តថា ខេត្តនឹងចុះវាស់វែងដីចែកជូនប្រជាពលរដ្ឋតាមភាពជាក់ស្ដែងក្នុងពេលឆាប់ៗខាងមុខ៖ «បាទ! ព្រោះឥឡូវនេះយើង និងកំពុងស៊ើបអឺ ស្រាវជ្រាវរកអត្តសញ្ញាណប័ណ្ណប្រជាពលរដ្ឋណាពិតប្រាកដ នរណាប៉ះពាល់ម៉េច យើងនិងអនុវត្តសិន ប៉ុន្តែជាគោលការណ៍នៅពេលបោះឆ្នោតរួច យើងនិងសម្រេចថា យ៉ាងម៉េច ប៉ុន្តែនិងអនុវត្តតាមបណ្តើរៗ ប៉ុន្តែសំខាន់ការងារនេះ នៅលើឯកឧត្តមអភិបាលខេត្តជាអនុវត្តផ្ទាល់បាទ»។
ពាក់ព័ន្ធរឿងដីព្រៃលិខិតនៅតំបន់បឹងទន្លេសាបនេះក៏មានពលរដ្ឋម្នាក់នៅព្រំប្រទល់ខេត្តបន្ទាយមានជ័យ និងខេត្តបាត់ដំបង ក៏ត្រូវបានអាជ្ញាធរចាប់ឃុំខ្លួននៅពន្ធនាគារកាលពីចុងឆ្នាំ ២០២១ ក្រោយពីនាយករដ្ឋមន្ត្រីប្រកាសនឹងចាត់វិធានការទៅលើអាជ្ញាធរទាំងឡាយណា ទន្ទ្រានព្រៃលិចទឹកឱ្យខានតែបាន។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ បើសិនរាជរដ្ឋាភិបាល បានគិតគូរដល់ផលប្រយោជន៍ប្រជាពលរដ្ឋ និងប្រយោជន៍សាធារណៈ ឱ្យមានតម្លាភាពក្នុងការកាត់ឆ្វៀលទៅដល់អ្នកដែលបានកាន់កាប់ដីពិតប្រាកដ ។ លោកព្រួយបារម្ភថា រឿងនេះប្រសិនបើក្រសួងពាក់ព័ន្ធបណ្ដោយឱ្យអាជ្ញាធរ ខេត្តចុះវាស់វែងដីដោយគ្មានការចូលរួមពីស្ថាប័នផ្សេងទេនោះ នឹងការបែងចែកដីគ្មានតម្លាភាព ជាពិសេសគឺប្រជាពលរដ្ឋក្រីក្រនឹងមិនទទួលបានដីដើម្បីដាំដុះឡើយ៖ «ការផ្តល់ឱ្យហ្នឹងវាពិតថាបានទៅដល់ប្រជាពលរដ្ឋ ដែលគាត់ត្រូវការដី គាត់ខ្វះខាតដីហ្នឹងពិតប្រាកដឬអត់ ចៀសវាងបានទៅក្រុមឈ្មួញ បានទៅក្រុមជនមានអំណាចណាមួយ អឺ បន្លែបន្លំក្នុងការ ផ្តល់ឱ្យហ្នឹង ហើយអាហ្នឹងគួរតែមានការត្រួតពិនិត្យ ហើយក៏ពិនិត្យមើលឡើងវិញដែរ ចំពោះការប្រតិបត្តិកន្លងមក បើសិនជា បញ្ហាទាំងអស់ហ្នឹង ត្រូវបានគិតគូរដោះស្រាយមកជូនប្រជាពលរដ្ឋ អ៊ីចឹងគួរតែពិចារណា ទៅលើពលរដ្ឋដែលធ្លាប់រងការចោទប្រកាន់ ការចាប់ខ្លួនផ្សេងៗ អំពីបញ្ហាទាំងអស់ហ្នឹងដែរ ដើម្បីធ្វើឱ្យ..បញ្ហាហ្នឹងអាចមានភាពធូរស្រាលឡើងវិញ អំពីភាពតានតឹងកន្លងមក»។
ជុំវិញការលើកឡើងនេះ វិទ្យុអាស៊ីសេរី មិនអាចសុំបញ្ជាក់បន្ថែម ពីអ្នកនាំពាក្យក្រសួងដែនដី លោក សេង ឡូត បានទេនៅថ្ងៃទី៣០ ខែឧសភា។
ថ្មីៗនេះ លោកនាយករដ្ឋមន្ត្រី ហ៊ុន សែន បានបញ្ជាឱ្យអាជ្ញាធរខេត្តជាប់បឹងទន្លេសាប ចុះត្រួតពិនិត្យដើម្បីកាត់ឆ្វៀលដីព្រៃលិចទឹកមួយចំនួនចែកជូនដល់ប្រជាពលរដ្ឋដែលបានកាន់កាប់ចាប់ពី១០ឆ្នាំឡើងទៅ។ ការប្រកាសរបស់លោក ហ៊ុន សែន នេះធ្វើឡើងក្នុងពេលយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំសង្កាត់ នៅថ្ងៃទី០៥ មិថុនា ខាងមុខជិតចូលមកដល់ ។ ភ្លាមៗក្រោយពីមានបញ្ជាពីលោកហ៊ុន សែន នេះ អាជ្ញាធរខេត្តមួយចំនួនបានចុះរួមមាន បាត់ដំបង បន្ទាយមានជ័យ និងខេត្តពោធិ៍សាត់ជាដើម ចុះពិនិត្យដីនៅតមពន់បឹងទន្លេសាប និងជួបប្រជាពលរដ្ឋនៅតំបន់នោះ ដើម្បីត្រៀមកាត់ឆ្វៀលដីបែងចែកជូនពួកគាត់ជាបន្តបន្ទាប់។
កាលពីការបោះឆ្នោតឆ្នាំ២០១៣ រដ្ឋាភិបាលលោក ហ៊ុន សែន បានបង្កើតក្រុមយុវជនប្រទេសវាស់ដីឲ្យពលរដ្ឋ ប៉ុន្តែក្រោយការបោះឆ្នោតក្រុមនេះក៏បាត់ស្ងាត់ទៅវិញ។ នៅចុងក្រោយនេះ ការដោះស្រាយបញ្ហាដីធ្លីទូទាំងប្រទេសដឹកនាំដោយ រដ្ឋមន្ត្រីក្រសួងរៀបចំដែនដី លោក ជា សុផារ៉ា ក៏រងការរិះគន់ថា មិនសូវមានប្រសិទ្ធភាពនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អតិថិជនផ្ទុះការតវ៉ាករណីគម្រោងឧកញ៉ា ឡេង ណាវ៉ាត្រា ដែលបង់លុយច្រើនឆ្នាំមិនបានផ្ទះ
- ព្រះភិក្ខុ សាន សុជា ដែលជាព្រះសង្ឃល្បីល្បាញខាងទូន្មានបែបពុទ្ធសាសនាលាចាកសិក្ខាបទ
- នគរបាលយុត្តិធម៌បញ្ជូនសំណុំរឿងលោក ថេង សាវឿន និងសហការីទៅតុលាការ
- គ.ជ.ប ថា ខ្លួនមិនអាចឆ្លើយពីមូលហេតុដែលភ្លើងទៀនមិនអាចចូលរួមបោះឆ្នោតជាតិបានទេ ទោះបានចូលរួមបោះឆ្នោតឃុំសង្កាត់ក៏ដោយ
- លោក ហ៊ុន សែន ចោទមន្ត្រីទូតលោកខាងសេរីថា ព្រហើន និងប្រមាថកម្ពុជា
