ប្រជាសហគមន៍មានជម្លោះដីធ្លីដែលឈ្មួញទិញហើយឱ្យលុយមិនគ្រប់នៅក្នុងស្រុកកោះធំខេត្តកណ្តាលអះអាងថា ពួកគេកំពុងជួបការលំបាកវេទនាខ្លាំង ហើយសមាជិក សហគមន៍៥នាក់ហើយបានឈឺស្លាប់នៅផ្ទះដោយសារមិនមានលុយទៅព្យាបាលជំងឺនៅពេទ្យ។
សមាជិកសហគមន៍ចំនួន៥៣គ្រួសារបានលក់ដីទំហំជិត ១៤០ហិកតារ(១៣៨,២) ឱ្យឈ្មួញម្នាក់តាំងពីឆ្នាំ២០១៩ ប៉ុន្តែ រហូតដល់ខែមីនា ឆ្នាំ២០២៣ ឈ្មួញទើប ប្រគល់លុយឱ្យពលរដ្ឋម្ចាស់ដីតែ១០ ទៅ២០ភាគរយនៃតម្លៃដីសរុបប៉ុណ្ណោះ។
ប្រធានសហគមន៍ព្រែកអណ្តូង នៅក្នុងឃុំលើកដែកស្រុកកោះធំ លោក សន សុង ថ្លែងថា ប្រជាពលរដ្ឋកំពុងជួបការលំបាកខ្លាំង រហូតដល់មានអ្នកស្លាប់ ៥នាក់ ដោយសារមិនមានលុយព្យាបាលជំងឺ។
លោក សន សុង៖ «ខ្វះខាតខ្លះឈឺក្នុងប្លុក៥៣គ្រួសារហ្នឹង អត់លុយមើលជំងឺថា លក់ដីក្រែងមានលុយមើលជំងឺ។ អត់មានហ្នឹងអស់ ៤ទៅ ៥គ្រួសារហើយ គ្រាន់តែស្លាប់អត់មានលុយមើលជំងឺ»។
ប្រជាពលរដ្ឋដែលស្លាប់ទាំង៥នាក់នោះ មានអាយុចន្លោះពី៥០ ទៅ ៦០ឆ្នាំ។ ប្រពន្ធលោក ម៉ឺង មាន ដែលស្លាប់ គឺលោកស្រី គង់ ឱ្យដឹងថា ប្តីរបស់លោកស្រីមានជំងឺបំពង់ក ហើយលោកស្រី ខ្ចីបុលគេបានជាង ១ពាន់ដុល្លារ ទៅព្យាបាលជំងឺនៅពេទ្យលោកសង្ឃក្នុងរាជធានីភ្នំពេញ តែ ៣ថ្ងៃក៏អស់លុយ។ លោកស្រីក៏សម្រេចចិត្តនាំប្តីទៅផ្ទះវិញបណ្ដោយជីវិតតាមព្រេងវាសនា ហើយប្តីលោកស្រីក៏ស្លាប់នៅអំឡុងចុងឆ្នាំ២០២២។
លោកស្រី គង់៖ «កាលគាត់មិនទាន់ខូច(ស្លាប់)ហ្នឹងលក់ដី ដល់ពេលលក់ដីហ្នឹងទៅ អត់មានលុយអត់មានអីមើល។ បានអីមើលបើដេកពេទ្យ ៣ថ្ងៃអស់១ពាន់ដុល្លារ ទៅហើយមកស្រុកវិញ ទៅអស់មានលុយត ចងការគេមានលុយអី!ជំពាក់គេដល់សព្វថ្ងៃ»។
លោកស្រី គង់ ឱ្យដឹងទៀតថា ពេលនេះកូនរបស់លោកស្រី ក៏កំពុងមានជំងឺ ហើយត្រូវព្យាបាលតាមបែបបុរាណដោយប្រើថ្នាំឫសឈើដោយសារមិនមានលុយទៅពេទ្យ។
ប្រជាសហគមន៍ម្នាក់ទៀតលោកស្រី សៀក ឡុង ឱ្យដឹងថា គាត់លក់ដីដើម្បីយកលុយទៅសងបំណុល ក៏ប៉ុន្តែនៅពេលដែលមិនទទួលបានលុយធ្វើឱ្យបំណុលរបស់លោកស្រី ចេះតែកើនឡើង។
លោកស្រី សៀក ឡុង៖ «ឥឡូវនៅជំពាក់រដ្ឋទៀត ដល់ពេលត្រូវការអត់មានលុយសង ដល់អត់មានលុយសងទៅចងការគេ ហើយការកាន់តែច្រើនទៀត។ អ៊ីចឹងខ្ញុំត្រូវការលក់ដើម្បីបានលុយសងគេ និងឱ្យកូនរៀនផងអីផង។ ឥឡូវខ្ញុំជំពាក់រដ្ឋអត់មានលុយបង់រដ្ឋ»។
ប្រធានសហគមន៍លោក សន សុង ថ្លែងថា អាជ្ញាធរដោះស្រាយមិនមានប្រសិទ្ធភាព អាចដោយសារទទួលផលប្រយោជន៍ ឬឃុបឃិតគ្នាជាមួយឈ្មួញ។
លោក សន សុង៖ «ពិបាកត្រង់អាជ្ញាធរគាត់អត់ធ្វើការឱ្យប្រជាពលរដ្ឋដូចគាត់ត្រូវរ៉ូវគ្នាជាមួយឈ្មួញ»។
ឈ្មួញដែលប្រមូលទិញដីប្រជាសហគមន៍ព្រែកអណ្តូងលោក ហៀក ហ៊ន ថ្លែងថា រូបលោកមិនបានគេចវេច ចេញពីការទទួលខុសត្រូវមិនព្រមបង់លុយបង្គ្រប់ឱ្យពលរដ្ឋទេ។ ប៉ុន្តែលោកថា ពេលនេះលោកបង្វិលលុយមិនទាន់។
លោក ហៀក ហ៊ន៖ «ខ្ញុំអត់ទាន់បានជួបគាត់ទេបង ខ្ញុំកំពុងតែស្វែងរកដើម្បីដោះស្រាយឱ្យពួកគាត់។ គេចវេសទៅណាខ្ញុំ?អត់ទេបងត្រូវតែដោះស្រាយឱ្យប្រជាពលរដ្ឋហើយ។ ក្នុងមុនចូលឆ្នាំហ្នឹងខ្ញុំដោះស្រាយគាត់បណ្តើរៗហើយបង»។
ដីទំហំជិត១៤០ហិកតារ ដែលលោក ហៀក ហ៊ន បានទិញពីកសិករ នេះគឺជាប្រភេទដីធ្វើស្រែ។ ដីនោះកសិករនៅអាចបន្តធ្វើកសិកម្មបាន ប៉ុន្តែមិនអាចលក់ដូរ ឬដាក់ជាទ្រព្យធានាសម្រាប់ខ្ចីធនាគារបានទេ ព្រោះឯកសារត្រូវបានរៀបចំរួចប្រគល់ឱ្យឈ្មោះ ហៀក ហ៊ន ជាអ្នកគ្រប់គ្រង។
អភិបាលរងស្រុកកោះធំ លោក ច្រឹក ស្រ៊ង មានប្រសាសន៍ថា អាជ្ញាធរកំពុងប្រឹងប្រែងរកមធ្យោបាយដោះស្រាយ ។ ប៉ុន្តែលោកថា ដោយសារស្ថានភាពសេដ្ឋកិច្ចជួបការលំបាក ឈ្មួញទិញដីមិនអាចរកលុយបន្ថែម ទើបខាងសាលាស្រុកមិនអាចកំណត់ពេលដោះស្រាយបញ្ចប់បញ្ហានេះបាន។
ចំពោះការចោទថា អាជ្ញាធរស្រុកទទួលបានផលប្រយោជន៍ពីឈ្មួញនោះ លោក ច្រឹក ស្រ៊ង ជាអ្នកដោះស្រាយបញ្ហានេះបញ្ជាក់ថា លោកមិនដែលទទួលផលប្រយោជន៍អ្វីទេ។
លោក ច្រឹក ស្រ៊ង៖ «អាជ្ញាធរទាំងស្រុកទាំងឃុំកំពុងព្យាយាមដោះស្រាយ រកដំណោះស្រាយជូនពួកគាត់ហើយ មិនមែនមានន័យថា យើងទទួលសំណងពីខាងណាទេ និយាយដោយត្រង់ ខ្ញុំវិញគឺអត់និយាយត្រង់គឺអត់ម៉ង។ ខ្ញុំបើសិនជាខ្ញុំចេះយកលុយអ៊ីចឹង ខ្ញុំអត់ជិះម៉ូតូកញ្ចាស់ទេ ខ្ញុំប្រាប់បងឯង។ ខ្ញុំជិត២០ឆ្នាំហើយរឿងថា ពុករលួយអ៊ីចឹងសុំទោសអត់ទេ»។
មន្ត្រីសម្របសម្រួលនៃសមាគមសម្ព័ន្ធសហគមន៍កសិករកម្ពុជា លោក គុច សុខុម ជាអ្នកបានសម្របសម្រួលបញ្ហានៅសហគមន៍ព្រែកអណ្តូងនេះ មានប្រសាសន៍ថា អាជ្ញាធរមានតួនាទីសម្រេចលើករណីនេះ បើឈ្មួញមិនមានលុយគ្រប់ឱ្យពលរដ្ឋ គឺឈ្មួញ ត្រូវប្រគល់ឯកសារឱ្យម្ចាស់ដីវិញ។
លោក គុច សុខុម៖ «បើករណីលុយកក់រហូតដល់ឥឡូវ២ឆ្នាំ តាំងពី២០១៩ ២០២០ ចឹងទៅ ២ទៅ៣ឆ្នាំបាត់ទៅហើយ បើឈ្មួញអត់មានលទ្ធភាពទេ គួរតែអាជ្ញាធរដោះស្រាយថា តំណាងក្រុមហ៊ុនហ្នឹង ប្រគល់ឯកសារឱ្យប្រជាពលរដ្ឋវិញ បើសិនជាមិនមានលទ្ធភាពក្នុងការផ្តល់ប្រាក់គ្រប់កិច្ចសន្យា ដែលគាត់បានព្រមព្រៀងគ្នាជាមួយប្រជាពលរដ្ឋ»។
ជុំវិញបញ្ហានេះដែរ លោក ច្រឹក ស្រ៊ង បញ្ជាក់ថា អាជ្ញាធរស្រុកមិនទាន់អាចសម្រេចបានយ៉ាងណានៅឡើយ ព្រោះតម្លៃដីទាំងនោះជិត ២លានដុល្លារជាចំនួនច្រើន និងពិបាកដោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។