នាយករដ្ឋមន្ត្រី ហ៊ុន សែន កាលពីថ្ងៃទី២៨ ខែវិច្ឆិកា បានបញ្ជាឲ្យអាជ្ញាធរពាក់ព័ន្ធ ចុះបង្ក្រាបមន្ត្រីរាជការ ឬពលរដ្ឋ ទាំងឡាយណា ដែលបានកាប់ទន្ទ្រាន និងកាន់កាប់ដីព្រៃលិចទឹកយ៉ាងអនាធិបតេយ្យ នៅតំបន់បឹងទន្លេសាប។ លោក ហ៊ុន សែន ក៏បានបញ្ជារឲ្យដកហូតដីទាំងនោះត្រឡប់មកវិញ ដើម្បីដាំព្រៃឈើឡើងវិញ និងការពារព្រៃទាំងនោះទុកជាជម្រកត្រីពង៖ «ត្រូវដកហូតមកវិញទាំងអស់ ទាំងរបស់មន្ត្រី និងរបស់ប្រជាជន នៅក្នុងដែនដែលយើងបានកំណត់ ដែលត្រូវការពារនោះទេ ព្រោះនៅមិនយូរប៉ុន្មានទេ ទឹកនឹងស្រកផុត ពួកគេនឹងចាប់ផ្តើមបង្កបង្កើនផល ឬកាប់បន្ថែមនៅទីនោះ យើងមិនអនុញ្ញាតអោយបង្កបង្កើនផល លើដីដែលត្រូវដកហូតមកវិញនេះនោះទេ»។
លោក ហ៊ុន សែន ចេញបទបញ្ជាឲ្យអាជ្ញាធរបង្ក្រាបនេះ បន្ទាប់ពីលោកបានទទួលរបាយការណ៍ស្រាវជ្រាវ ពីរាជបណ្ឌិតសភាកម្ពុជា ដែលបង្ហាញថាមានការកាប់នៅព្រៃលិចទឹក ដែលជាតំបន់ស្នូល និងតំបន់ត្រូវការពារ យ៉ាងអនាធិបតេយ្យនៅក្នុងខេត្តមួយចំនួននៅតំបន់បឹងទន្លេសាប ជាពិសេសខេត្តកំពង់ឆ្នាំង។ លោក ហ៊ុន សែន ក៏បានបញ្ជាក់ថា របាយការណ៍នេះរកឃើញថា អតីតអភិបាលខេត្តកំពង់ឆ្នាំងដែលទើបចាកចេញពីដំណែង បានកាប់បំផ្លាញយកដីប្រមាណជា ជាង ២ ០០០ ហិកតារឯណោះ។
ជុំវិញការរកឃើញនេះ លោក ហ៊ុន សែន បានបញ្ជាឲ្យប្រធានអង្គភាពប្រឆាំងអំពើពុករលួយ លោក ឱម យឹនទៀង ស្រាវជ្រាវរកមន្ត្រីដែលមានជាប់ពាក់ព័ន្ធនឹងការកាប់ទន្រានដីព្រៃលិចទឹកនេះ ដើម្បីបញ្ជូនទៅតុលាការកាត់ទោសតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។