ពលរដ្ឋជិត ២០គ្រួសារ ដែលបានឯកភាពទទួលយកគោលនយោបាយសំណង ពីក្រុមហ៊ុនទំនប់វារីអគ្គិសនីសេសានក្រោមពីរ នៅខេត្តស្ទឹងត្រែង បានទៅពឹងអាជ្ញាធរមូលដ្ឋានជាថ្មីទៀត ឲ្យជួយពន្លឿន ផ្ដល់សំណងដីកសិកម្មជូនពួកគាត់ ដែលអាជ្ញាធរ និងក្រុមហ៊ុនបានសន្យាផ្តល់ឱ្យក្នុងមួយគ្រួសារ ៥ហិកតារស្មើៗ គ្នា។ អ្នកភូមិថា ប្រសិនបើអាជ្ញាធរនៅតែពន្យារពេល មិនដោះស្រាយបញ្ហានេះទេ ពួកគាត់នឹងគ្មានដីធ្វើកសិកម្មចិញ្ចឹមជីវិតទេ នៅឆ្នាំ២០១៩ នេះ។
ពលរដ្ឋជិត ២០គ្រួសាររស់នៅភូមិស្រែគថ្មី ឃុំស្រែគ (ថ្មី) ស្រុកសេសាន ត្អូញត្អែរពីភាពយឺតយ៉ាវក្នុងការផ្ដល់សំណងដីកសិកម្ម របស់ក្រុមហ៊ុន និងគណៈកម្មការដោះស្រាយផលប៉ះពាល់។ ពួកគាត់ថា ជាង ៣ឆ្នាំមកហើយ ដែលអាជ្ញាធរ និងក្រុមហ៊ុន អូសបន្លាយពេល មិនដោះស្រាយ បញ្ហានេះឲ្យដាច់ស្រឡះ ដូចការសន្យារ។
ពលរដ្ឋដែលឯកភាព ទទួលយកគោលនយោបាយសំណង គឺលោក ផាត ស៊ឺ ឲ្យដឹងនៅថ្ងៃទី៣ មេសាថា ជាង ៣ឆ្នាំមកហើយ គ្រួសារលោកខានធ្វើកសិកម្មចិញ្ចឹមជីវិត។ ពួកគាត់បានទៅសុំកិច្ចអន្តរាគមន៍ពីអាជ្ញាធរភូមិ/ឃុំ ក៏ប៉ុន្តែអាជ្ញាធរទាំងនោះ បែរជាប្រាប់អ្នកភូមិឲ្យទៅរកតំណាងក្រុមហ៊ុន ដោះស្រាយទៅវិញ។ លោកសង្កត់ធ្ងន់ថា គ្រួសារលោកបង្ខំចិត្តទទួលយកសំណង ពីក្រុមហ៊ុនដោយសារគ្មានជម្រើស ត្បិតភូមិកំណើតពួកគាត់ បានក្លាយជាផ្ទៃអាង នៃទំនប់វារីអគ្គិសនីសេសានក្រោមពីរ បិទទ្វារទឹកពន្លិចភូមិជាច្រើនខែមកហើយ៖ «គេនិយាយថា ចាំមើលក្រុមហ៊ុនគេរកឲ្យតែរហូតដល់ឥឡូវមិនទាន់បានផង។ បើមានលុយជួលគេស៊ីសំណូកសូកប៉ាន់បានគេទៅដោះស្រាយ។ បើអត់មានលុយទៅឆ្ងាយហើយ។ ឲ្យផ្ទះគ្នា ដេញមើលតែឆ្កែឆ្មា ( ជម្លៀសពីភូមិចាស់ ) គេថា បើមិនចុះពីផ្ទះ គេចាប់យកទៅតុលាការចេះចុះ។ ពលរដ្ឋខ្លាចចុះទៅ ( ទទួលសំណង )» ។
កាលចុងខែមីនា ឆ្នាំ២០១៩ ពលរដ្ឋ ១៨គ្រួសារ បាននាំគ្នាទៅដល់ផ្ទះ មេឃុំជាប់ឆ្នោតមកពីគណបក្ស សង្គ្រោះជាតិ គឺលោក សៀក មេគង្គ ឲ្យជួយអន្តរាគមន៍ទៅអាជ្ញាធរមូលដ្ឋាន និង តំណាងក្រុមហ៊ុន ដើម្បីឲ្យពួកគាត់មានលទ្ធភាពធ្វើកសិកម្មចិញ្ចឹមជីវិតនៅឆ្នាំ២០១៩ នេះ។
អាស៊ីសេរីបានព្យាយាមទាក់ទង មេឃុំស្រែគថ្មី លោក ហ្វឿន ជឿន និងអភិបាលស្រុកសេសាន ដែលទើបតែងតាំងថ្មី លោក សុវណ្ណ ពិសេដ្ឋ ដើម្បីសុំការបំភ្លឺរឿងនេះ តែទូរស័ព្ទហៅចូលច្រើនដង គ្មានអ្នកទទួលនៅថ្ងៃទី៤ មេសា។ រីឯជំទប់ទី ១ នៃឃុំស្រែគ លោក ញៀន ជាតិ បដិសេធមិនអធិប្បាយរឿងនេះទេ ដោយខ្លាចថ្នាក់លើស្ដីបន្ទោស៖ «ជារឿងមេ បើខ្ញុំផ្ដល់ព័ត៌មានទៅ មេបន្ទោសខ្ញុំ។ ខ្ញុំមិនអាចផ្ដល់ព័ត៌មានទេ » ។
ចំណែកតំណាងក្រុមហ៊ុនទំនប់វារីអគ្គិសនីសេសានក្រោមពីរ លោក អ៊ុំ រ៉េត អះអាងថា ក្រុមហ៊ុន និងអាជ្ញាធរពាក់ព័ន្ធ បានដោះស្រាយសំណងជូនពលរដ្ឋដែលឯកភាពទទួលយកគោលនយោបាយ សំណងចប់សព្វគ្រប់ហើយ។ ចំណែកពលរដ្ឋជិត ២០គ្រួសារ ដែលអះអាងថា មិនទាន់ទទួលបានសំណងដីកសិកម្ម លោកនៅមិនទាន់ទទួលដំណឹងនេះនៅឡើយទេ។ តែយ៉ាងណា លោកនឹងពិនិត្យករណីនេះឡើងវិញ៖ «ក្រុមហ៊ុនធ្វើការជាមួយគណៈកម្មការដោះស្រាយផលប៉ះពាល់ មានភូមិ / ឃុំ / ស្រុក រហូតដល់ក្រសួងក៏ចូលរួមដែរ ហើយព័ត៌មានហ្នឹង ដូចជា មិនបានទទួល។ ការដោះស្រាយសំណងធ្វើចប់អស់ហើយ ដូចជា មិនមានទាន់បានទទួលសំណងអីទេ មិនដឹងជា ព័ត៌មានហ្នឹងយ៉ាងម៉េច ចាំមើលខ្ញុំនឹងសាកសួរថែម » ។
មេឃុំជាប់ឆ្នោត មកពីគណបក្ស សង្គ្រោះជាតិ លោក សៀក មេគង្គ ទទួលស្គាល់ថា ពលរដ្ឋជិត ២០គ្រួសារ និងពលរដ្ឋបំបែកគ្រួសារជិត ៣០គ្រួសារ ឋិតក្នុងលក្ខខណ្ឌទទួលបានសំណង នៅមិនទាន់ទទួលបានដីកសិកម្មនៅឡើយទេជាង ៣ឆ្នាំមកហើយ។ លោកថា ភាពយឺតយ៉ាវនៃការដោះស្រាយបញ្ហានេះ នឹងធ្វើឲ្យពលរដ្ឋជួបការលំបាកផ្នែកជីវភាព និងគ្មានដីបង្កបង្កើនផលជាដើម។ លោកសង្កេតឃើញថា កន្លងទៅអាជ្ញាធរដោះស្រាយសំណងជូនពលរដ្ឋ ប្រកាន់បក្សពួកនិយម និងនិន្នាការនយោបាយ ដែលធ្វើឲ្យពលរដ្ឋខ្លះមិនសប្បាយចិត្ត៖ «សូមឲ្យអាជ្ញាធរស្រុកខេត្តក៏ដោយ ក្រុមហ៊ុនក៏ដោយ ធម្មតាជីវភាពប្រជាពលរដ្ឋ ជាប្រចាំ បើធ្វើរបៀបនេះដូចសម្លាប់ ជីវិតឆ្នាំងបាយរបស់គ្នា។ គ្នាខំលះបង់ភូមិចាស់ធំធេងណាស់ យើងត្រូវតែគិត អត់ពិបាកទេ។ ដោះស្រាយរាល់ថ្ងៃនេះ កត្តាបក្សពួក គឺខ្លាំងតែម្ដង អ្នកណាចេះអែបអប និងឲ្យលុយកាក់បានលឿនណាស់ » ។
លោក សៀក មេគង្គ បន្ថែមថា មានចំណុចខ្វះចន្លោះជាច្រើន ដែលគណៈកម្មការដោះស្រាយផលប៉ះពាល់ និងក្រុមហ៊ុនមិនទាន់អនុវត្តបានដូចការសន្យា រួមមាន បញ្ហាខ្វះទឹកប្រើប្រាស់ ដីកសិកម្មដែលផ្ដល់សំណងមួយចំនួន ត្រួតស៊ីគ្នាការផ្ដល់សំណងពុំមានតម្លាភាព និងមានដីកន្លែងខ្លះដែលផ្ដល់ឲ្យជាដីព្រៃរេចរឹល ជាដើម។
មកទល់ពេលនេះ ពលរដ្ឋដែលព្រមទទួលសំណងពីផលប៉ះពាល់ទំនប់វារីអគ្គិសនីសេសានក្រោមពីរ នៅឃុំស្រែគ បានមកតាំងទីលំនៅថ្មីនៅតំបន់នោះ មានចំនួនជាង ៥២០គ្រួសារ ក្នុងចំណោមពលរដ្ឋ ៥៧០គ្រួសារ ហើយបច្ចុប្បន្ននៅសល់ពលរដ្ឋ ៤៥គ្រួសារ នៅឃុំស្រែគ និងពលរដ្ឋជាង ៥០គ្រួសារនៅឃុំក្បាលរមាស បូកបញ្ចូលពលរដ្ឋបំបែកគ្រួសារ ដែលក្រាញននៀលមិនទទួលគោលនយោបាយសំណងខណៈដែលផ្ទះ និងភូមិកំណើតរបស់ពួកគេត្រូវទឹកលិចលង់ទាំងស្រុងកាលពីចុងឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។