ជនជាតិដើមភាគតិចព្នងនៅខេត្តមណ្ឌលគិរីអះអាងថា ដីព្រៃកប់សពរបស់ពួកគាត់ចំនួន ៤កន្លែងត្រូវបានក្រុមហ៊ុនឯកជនរំលោភយក។ ចំណែកអាជ្ញាធរពាក់ព័ន្ធនៅតំបន់នោះមិនព្រមទប់ស្កាត់ និងជួយដោះស្រាយនោះទេ ។ មន្ត្រីសង្គមស៊ីវិលថា អាជ្ញាធរត្រូវតែស្វែងរកដំណោះស្រាយជូនប្រជាពលរដ្ឋជុំវិញករណីនេះប្រសើរជាងគេចវេះមិនព្រមដោះស្រាយឲ្យពួកគាត់។
ដីព្រៃកប់សពរបស់ជនជាតិដើមភាគតិចព្នងចំនួន ៤កន្លែងផ្សេងគ្នា ស្ថិតនៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ត្រូវក្រុមហ៊ុនឯកជនរំលោភយកទាំងស្រុង ហើយក្រុមហ៊ុនបានលួងលោមពលរដ្ឋនៅតំបន់នោះឲ្យលក់ដីចម្ការវិលជុំបែបប្រពៃណីថែមទៀត។ សហគមន៍លើកឡើងទៀតថា អាជ្ញាធរពាក់ព័ន្ធនៅតំបន់នោះ ឃុបឃិតគ្នាជាមួយក្រុមហ៊ុនទើបក្រុមឈ្មួញអ្នកមានអំណាចហ៊ានរំលោភយកដីកប់សពបែបនេះ។
តំណាងសហគមន៍ភូមិពូទ្រូ លោក ប្រុង ភើង ប្រាប់វិទ្យុអាស៊ីសេរីនៅថ្ងៃទី១៦ ខែកញ្ញាថា មានក្រុមហ៊ុនឯកជនចំនួន២ ដែលលោកសុំមិនបង្ហាញឈ្មោះ បានរំលោភយកដីព្រៃកប់សពរបស់ជនជាតិដើមភាគតិចចំនួន៤កន្លែងផ្សេងគ្នា និងដីចម្ការវិលជុំបែបប្រពៃណី ហើយសហគមន៍បានស្នើឲ្យអាជ្ញាធរពាក់ព័ន្ធជួយរកដំណោះស្រាយ ប៉ុន្តែរហូតមកដល់ពេលនេះអាជ្ញាធរមិនទាន់ចុះដោះស្រាយបញ្ហានេះឲ្យប្រជាពលរដ្ឋនោះទេ។ លោកស្នើឲ្យអាជ្ញាធរជួយរកដំណោះស្រាយ និងត្រូវប្រគល់ដីព្រៃកប់សពទាំងនោះឲ្យប្រជាពលរដ្ឋវិញ ពីព្រោះពលរដ្ឋមិនមានដីព្រៃសម្រាប់កប់សពទៀតនោះទេ។
លោក ប្រុង ភើង៖ «និយាយអត់ចេញទេ ភូមិអត់ជួយទេ ភូមិរុញឲ្យទៅឃុំ ឃុំរុញឲ្យទៅស្រុកដល់ពេលទៅដល់ស្រុកអត់ឃើញដោះស្រាយទេ ដីខ្មោចដីចម្ការវិលជុំរបស់ជនជាតិដើមភាគតិច ចង់ឲ្យយកមកវិញ ហើយឲ្យខាងពួកខ្ញុំបានរស់នៅដូចពីមុនមកដូចពីដូនតាចង់ឲ្យសុខសប្បាយ»។
អ្នកភូមិអះអាងទៀតថា អាជ្ញាធរភូមិឃុំមិនបានទប់ស្កាត់ឬរក្សាដីព្រៃកប់សពនោះទេ ផ្ទុយទៅវិញឃុបឃិតគ្នាជាមួយក្រុមហ៊ុន បោះត្រា និងចុះហត្ថលេខាប្រគល់ដីទាំងនោះឲ្យទៅក្រុមហ៊ុនឯកជនគ្រប់គ្រងថែមទៀត។
ជុំវិញរឿងនេះ វិទ្យុអាស៊ីសេរី មិនអាចទាក់ទងអភិបាលខេត្តមណ្ឌលគិរី លោក ថង សាវុន ដើម្បីសុំការអត្ថាធិប្បាយបានទេ នៅថ្ងៃទី១៦ ខែកញ្ញា ដោយទូរស័ព្ទចូលតែគ្មានអ្នកលើក។
ក្រៅពីដីព្រៃកប់សពហើយនោះ ដីភ្នំ ព្រៃជំនឿជាច្រើនកន្លែងទៀតក្នុងខេត្តមណ្ឌលគិរីត្រូវបានអាជ្ញាធរឃុបឃិតគ្នាជាមួយក្រុមឈ្មួញមានអំណាច រំលោភយក និងចេញបណ្ណកម្មសិទ្ធិជាដីឯកជនបន្តបន្ទាប់។ លើសពីនោះ មានប្រជាពលរដ្ឋមួយចំនួនបានលក់ដីស្រែចម្ការរបស់ខ្លួន រួចនាំគ្នាចូលទៅកាប់ទន្ទ្រានដីព្រៃនៅក្នុងតំបន់ការពារ ដើម្បីអាស្រ័យផល ហើយអាជ្ញាធរមិនបានអើពើទប់ស្កាត់ឡើយ។
ទាក់ទិននឹងបញ្ហានេះ មន្ត្រីសម្របសម្រួល នៃសមាគមអាដហុក (Adhoc) ប្រចាំខេត្តមណ្ឌលគិរី លោក ប៊ី វ៉ាន់នី ជំរុញឲ្យអាជ្ញាធរនៅតំបន់នោះ ស្វែងរកដំណោះស្រាយជុំវិញបញ្ហានេះឲ្យបានឆាប់ និងត្រូវឈរលើប្រយោជន៍របស់ជនជាតិដើមភាគតិចជាធំ ពីព្រោះពួកគាត់ជាពលរដ្ឋដែលងាយរងគ្រោះបំផុត។
លោក ប៊ី វ៉ាន់នី៖ «យើងគួរតែធ្វើការការពារនូវវប្បធម៌ឲ្យល្អប្រសើររបស់ជនជាតិដើមភាគតិច ការពារនូវសិទ្ធិរបស់ជនជាតិដើមភាគតិច ពីព្រោះវប្បធម៌ជនជាតិដើមភាគតិចគាត់រស់នៅ ហើយយើងជាអ្នកមានលុយមានអំណាច សូម្បីតែដីព្រៃកប់សពយើងចង់បានដែរមិនដឹងថាប្រជាពលរដ្ឋជនជាតិដើមភាគតិចជាជនងាយរងគ្រោះ ឬក៏យើងជាអ្នកមានអំណាចមានលុយជាជនរងគ្រោះ»។
កាលពីឆ្នាំ២០១៩ អតីតនាយករដ្ឋមន្ត្រី លោក ហ៊ុន សែន ធ្លាប់បានចេញបទបញ្ជាឲ្យហ៊ុមព័ទ្ធ និងថែរក្សា ដីព្រៃភ្នំ ដីអាស្រ័យផល និងចម្ការស្រល់ ទុកជាតំបន់អភិរក្សការពារ និងជាតំបន់ទេសចរណ៍ ប៉ុន្តែរហូតមកដល់ពេលនេះនៅតែមានក្រុមឈ្មួញរំលោភយក ដោយមិនខ្លាចញញើតបទបញ្ជាមួយនេះឡើយ។
ជនជាតិដើមភាគតិចព្នងព្រមាន ឡើងទៅរាជធានីភ្នំពេញ ដើម្បីសុំអន្តរាគមន៍ ពីអាជ្ញាធរថ្នាក់ជាតិក៏ដូចនាយករដ្ឋមន្ត្រី ប្រសិនបើអាជ្ញាធរថ្នាក់ក្រោមជាតិ នៅតែមិនព្រមដោះស្រាយឲ្យប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។