សមត្ថកិច្ច​ខេត្ត​កណ្ដាល ប្រើ​ហិង្សា​និង​ចាប់​ខ្លួន​ពលរដ្ឋ​ជា​ច្រើន​នាក់​ក្នុង​ជម្លោះ​ដីធ្លី​នៅ​ព្រលាន​យន្ត​ហោះ​ថ្មី

ដោយ មាន ឫទ្ធិ
2021-09-12
Share
សមត្ថកិច្ច​ខេត្ត​កណ្ដាល ប្រើ​ហិង្សា​និង​ចាប់​ខ្លួន​ពលរដ្ឋ​ជា​ច្រើន​នាក់​ក្នុង​ជម្លោះ​ដីធ្លី​នៅ​ព្រលាន​យន្ត​ហោះ​ថ្មី ទិដ្ឋភាពពលរដ្ឋ​ភូមិ​កំពង់តាឡុង ឃុំ​បឹងខ្យាង ស្រុក​កណ្ដាលស្ទឹង តវ៉ា​រឿង​ដីធ្លី​ជាមួយក្រុមហ៊ុន​អូស៊ីអាយស៊ី (OCIC) នៅ​ថ្ងៃ​ទី១២ ខែ​កញ្ញា ឆ្នាំ​២០២១។
Photo Provided

កម្លាំង​សមត្ថកិច្ច​ចម្រុះ​ខេត្ត​កណ្ដាល រាប់រយ​នាក់ ប្រើ​ហិង្សា និង​បាញ់​គ្រាប់បែក​ផ្សែង​ដាក់​ក្រុម​ប្រជាពលរដ្ឋ​មាន​ជម្លោះដីធ្លី ដែល​ទាមទារ​ចូល​ទៅ​មើល​ដីស្រែ​ក្នុង​ទីតាំង​ព្រលាន​យន្តហោះ​ថ្មី ដែល​ក្រុមហ៊ុន​ឈូស​ឆាយ​។ មន្ត្រី​អង្គការ​សង្គម​ស៊ីវិល​ផ្នែក​សិទ្ធិមនុស្ស​និង​ដីធ្លី ចាត់ទុក​ការ​ប្រើ​ហិង្សា​របស់​អាជ្ញាធរ​នេះ ថា រំលោភ​សិទ្ធិមនុស្ស​ធ្ងន់ធ្ងរ និង​សិទ្ធិ​តវ៉ា​របស់​ពលរដ្ឋ​ក្នុង​ការ​ស្វែងរក​ដំណោះស្រាយ​វិវាទ​ដីធ្លី ដោយ​សន្តិវិធី។

កម្លាំង​នគរបាល និង​កងរាជអាវុធហត្ថ ប្រមាណ​៣០០​នាក់ ប្រដាប់​ដោយ​ខែល និង​ដំបង ប្រើ​ហិង្សា​ទៅលើ​ប្រជាពលរដ្ឋ​មាន​ជម្លោះដីធ្លី​ប្រមាណ​១០០​នាក់ នៅក្នុង​ភូមិ​កំពង់តាឡុង ឃុំ​បឹងខ្យាង ស្រុក​កណ្ដាលស្ទឹង ឲ្យ​រងរបួស​ជាច្រើន​នាក់ និង​ចាប់ខ្លួន​ពលរដ្ឋ​២១​នាក់ នាំទៅ​ស្នងការ​នគរបាល​ខេត្ត​កណ្ដាល។

អំពើ​ហិង្សា នៅ​ថ្ងៃ​ទី​១២ កញ្ញា កើត​ឡើង ក្រោយ​ពេល​ពលរដ្ឋ​នាំគ្នា​ដុត​សំរាម​នៅ​ខាងមុខ​រនាំង​ដែក​បិទផ្លូវ​របស់​កម្លាំង​សមត្ថកិច្ច ដើម្បី​ទាមទារ​ឲ្យ​អាជ្ញាធរ​បើកផ្លូវ​ឲ្យ​ពួកគាត់​អាច​ចូល​ទៅ​មើល​ដីស្រែ​របស់​ពួកគាត់ ដែល​ត្រូវ​ក្រុមហ៊ុន​ឈូស​បំផ្លាញ​ចោល ប៉ុន្តែ​ត្រូវ​សមត្ថកិច្ច​ហាមឃាត់។

ពលរដ្ឋ​ម្នាក់​ដែល​រត់គេច​ពី​តាម​ការ​ចាប់ខ្លួន​របស់​សមត្ថកិច្ច លោកស្រី ឃឹម ម៉ាលី ឲ្យ​ដឹង​ថា សមត្ថកិច្ច ដើរ​វាយ​ទាត់​ធាក់​ប្រជាពលរដ្ឋ ដែល​មាន​បាតដៃ​ទទេ តាម​អំពើ​ចិត្ត និង​ដក​យក​ម៉ូតូ​អ្នកភូមិ​ដែល​ចត​ចោល អស់​ជាច្រើន​គ្រឿង ហើយ​ចរន្តអគ្គិសនី​ត្រូវ​បាន​កាត់ផ្ដាច់។

លោកស្រី​បន្ត​ថា សមត្ថកិច្ច​ព្យាយាម​តាម​ស្វែងរក​លោកស្រី និង​ប្ដី ដោយ​សង្ស័យ​ថា​ជា​តំណាង​ពលរដ្ឋ ព្រោះ​រយៈពេល​២-៣​ថ្ងៃ​មកនេះ ពលរដ្ឋ​នាំគ្នា​រៀបចំ​ឯកសារ​ផ្ដិត​ស្នាម​មេដៃ និង​ថតចម្លង​ប្លង់ដី ដើម្បី​ដាក់​ញត្តិ​នៅ​តាម​ស្ថាប័នរដ្ឋ ក្នុង​រាជធានី​ភ្នំពេញ នៅ​ដើម​សប្ដាហ៍​ក្រោយ​នេះ។

ពលរដ្ឋ​រូប​នេះ ចាត់ទុក​ទង្វើ​អាជ្ញាធរ​ខេត្ត​កណ្ដាល​ប្រើ​ហិង្សា​ដាក់​ប្រជាពលរដ្ឋ ថា​ជា​រឿង​អយុត្តិធម៌ ចំពោះ​ប្រជាពលរដ្ឋ​ម្ចាស់​ដី​ជិត​៣​រយ​គ្រួសារ ដែល​ត្រូវ​បាត់បង់​ដីស្រែ​ទៅ​ខាង​ក្រុមហ៊ុន​ហើយ ថែមទាំង​រង​ការ​ធ្វើ​បាប​ពី​សំណាក់​អាជ្ញាធរ​ទៀត​៖ «គេ​មិនដែល​យក​ក្បាល​ប្រជាពលរដ្ឋ​ទុក​ក្នុង​ខ្លួន​គេ​ទេ។ ចង់​ប្រជាពលរដ្ឋ​ងាប់​ម៉េច​ងាប់​ទៅ​។ នេះ​ហើយ​អាជ្ញាធរ​ស្រុក​ខ្មែរ ច្បាប់​ស្រុក​ខ្មែរ​។ ឲ្យ​ប្រជាពលរដ្ឋ​គោរព​ច្បាប់​ទៅ គោរព​តែ​ប្រជាពលរដ្ឋ​ទៅ បើ​គាត់​នាំគ្នា​មក​ផ្ដល់​ដី​ប្រជាពលរដ្ឋ​នេះ​។ ឥឡូវ ឮសូរ​គេ​ដាក់​បណ្ដឹង​ថា ពួក​ខ្ញុំ​ហ្នឹង​គប់​វៃ​ពួកគេ​អី​ណា​។ ខ្ញុំ​ថា​ធ្វើ​ម៉េច​ធ្វើ​ទៅ ច្បាប់​លើ​អ្នកឯង​។ ទោះបី ពួក​ខ្ញុំ​ត្រូវ​ក៏​ពួក​អ្នក​ឯង​ថា​ខុស​ដែរ​។ អ៊ីចឹង​! ពួក​ខ្ញុំ​វា​គ្មានអ្វី នោះ​ទេ​ជាមួយ​អ្នកឯង គ្មានអ្វី​តតាំង​ទេ»

kandal2.JPG
ទិដ្ឋភាពពលរដ្ឋ​ភូមិ​កំពង់តាឡុង ឃុំ​បឹងខ្យាង ស្រុក​កណ្ដាលស្ទឹង តវ៉ា​រឿង​ដីធ្លី​ជាមួយក្រុមហ៊ុន​អូស៊ីអាយស៊ី (OCIC) នៅ​ថ្ងៃ​ទី១២ ខែ​កញ្ញា ឆ្នាំ​២០២១។ Photo Provided

វិទ្យុ​អាស៊ីសេរី មិន​សុំ​ការ​ឆ្លើយ​បំភ្លឺ​រឿង​ប្រើ​ហិង្សា​ពី​កម្លាំង​សមត្ថកិច្ច​នេះ ពី​អភិបាល​ខេត្ត​កណ្ដាល លោក គង់ សោភ័ណ្ឌ និង​ស្នងការ​នគរបាល​ខេត្ត​កណ្ដាល លោក ឈឿន សុចិត្ត បាន​ទេ ដោយ​ហៅ​ទូរស័ព្ទ​ចូល​តែ​ពុំ​មាន​អ្នកទទួល។

ទាក់ទង​នឹង​រឿង​នេះ អ្នកសម្របសម្រួល​គម្រោង​ធុរកិច្ច និង​សិទ្ធិមនុស្ស​នៃ​មជ្ឈមណ្ឌល​សិទ្ធិមនុស្ស​កម្ពុជា លោក វណ្ណ សូផាត មាន​ប្រសាសន៍​ថា ការ​ប្រើ​ហិង្សា​ពី​សំណាក់​អាជ្ញាធរ​ដាក់​ប្រជាពលរដ្ឋ​ម្ចាស់​ដី​បែបនេះ​បង្ហាញ​ឲ្យ​ឃើញ​ពី​ជំហរ​មិន​ឯករាជ​ក្នុង​ការ​ដោះស្រាយ​ជម្លោះ​រវាង​ពលរដ្ឋ និង​ភាគី​ក្រុមហ៊ុន និង​ជា​ការ​រំលោភ​សិទ្ធិមនុស្ស​ធ្ងន់ធ្ងរ។

លោក​ស្នើ​ដល់​អាជ្ញាធរ​បញ្ឈប់​ការប្រើ​អំពើ​ហិង្សា​ដាក់​ពលរដ្ឋ ហើយ​ងាក​ទៅ​ដោះស្រាយ​វិវាទ​ដីធ្លី​នេះ​ដោយ​សន្តិវិធី និង​ផ្ដល់​សំណង​សមរម្យ​ជូន​ពលរដ្ឋ​៖ «កន្លែង​ហ្នឹង ដែល​យើង​ជា​សង្គម​ស៊ីវិល​តែង​លើក​ដល់​រាជរដ្ឋាភិបាល សុំ​ឲ្យ​មេត្តា​គិតគូរ​មួយ​សារ​ទៀត​ឲ្យ​មានការ​ដោះស្រាយ​ដោយ​សន្តិវិធី ចៀសវាង​ប្រើ​ហិង្សា​។ វា​ខុសច្បាប់​សិទ្ធិមនុស្ស​អន្តរជាតិ ក៏ដូចជា​ច្បាប់​ក្នុងស្រុក​យើង​ដែរ​។ ដី​គាត់​មាន​ប្លង់​ត្រឹមត្រូវ​ដល់ពេល​ទៅ​ចរចា​ហើយ មិនបាន​ត្រូវ​គ្នា ហើយ​ទៅ​បង្ខំ​ហ្នឹង ជា​ការ​រំលោភ​សិទ្ធិមនុស្ស​ធ្ងន់ធ្ងរ​ណាស់​។ ការ​ចាប់​អីហ្នឹង សុទ្ធ​ជា​តាក់​មួយ​ខាង​ក្រុមហ៊ុន​និង​អាជ្ញាធរ ធ្លាប់​បាន​ធ្វើ​មក​ហើយ នៅ​ជម្លោះដីធ្លី​តាំង​ពីមុនៗ​មក»

ក្រុមហ៊ុន​សាជីវកម្ម​វិនិយោគ​ក្រៅប្រទេស​កម្ពុជា ហៅ​កាត់​អូ​.ស៊ី​.អាយ.ស៊ី (OCIC) របស់ លោក ពុង ឃាវសែ ដែល​ជា​អ្នកជំនួញ​ស្និទ្ធ​នឹង​លោកនាយក​រដ្ឋមន្ត្រី ហ៊ុន សែន ទទួល​បាន​សិទ្ធិ​សាងសង់​ព្រលាន​យន្តហោះ​ខ្នាត​អន្តរជាតិ​មួយ​នៅ​ទីនោះ​។ តាម​គម្រោង ក្រុមហ៊ុន​នឹង​សាងសង់​រួចរាល់​នៅ ឆ្នាំ​២០២៣​។ ព្រលាន​យន្តហោះ​ថ្មី​នេះ វិនិយោគ​ក្នុង​ទឹកប្រាក់​ប្រមាណ​ជាង​មួយ​ពាន់​លាន​ដុល្លារ (.៥០០​លាន​) លើ​ផ្ទៃដី ជិត​បី​ពាន់​ហិកតារ (.៦០០)

ប្រជាពលរដ្ឋ ប្រកាន់​ជំហរ​ថា នឹង​រួមគ្នា​បន្ត​ការ​ទាមទារ​រក​ដំណោះស្រាយ​ជា​ថ្មី​ទៀត ទោះបីជា​ត្រូវ​ប្រឈម​នឹង​ការ​ធ្វើ​ទុក​បុក​ម្នេញ​ពី​សំណាក់​អាជ្ញាធរ​ក៏ដោយ​។ ពួកគាត់​ស្នើសុំ​លោកនាយក​រដ្ឋមន្ត្រី ហ៊ុន សែន ដោះស្រាយ​បញ្ចប់​ជម្លោះដីធ្លី​នេះ​ឱ្យ​បាន​ឆាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល