សហគមន៍មានទំនាស់ដីធ្លី ៩៥៥ គ្រួសារនៅខេត្តកោះកុង ជួបជុំគ្នានៅខាងមុខសាលាស្រុកស្រែអំបិល ដើម្បីស្នើសុំដីសម្បទានសង្គមកិច្ច ដែលរដ្ឋាភិបាលផ្ដល់ឲ្យ។ អាជ្ញាធរបានឲ្យតំណាងពលរដ្ឋ២នាក់ចូលជជែកពិភាក្សាពាក់ព័ន្ធនឹងការផ្ដល់ដីសម្បទានសង្គមកិច្ចនេះ ហើយបានឲ្យតំណាងពលរដ្ឋចុះស្រង់ទិន្នន័យពលរដ្ឋក្រីក្រពិតប្រាកដឡើងវិញ។
សហគមន៍មានទំនាស់ដីធ្លី ៩៥៥គ្រួសារនៅខេត្តកោះកុង រាប់រយនាក់បានជួបជុំគ្នានៅសាលាស្រុកស្រែអំបិល ដើម្បីរង់ចាំជួបអភិបាលរងខេត្តកោះកុង លោក សុខ សុទ្ធី ដើម្បីជជែកពិភាក្សាពាក់ព័ន្ធនឹងការស្នើសុំដីសម្បទានសង្គមកិច្ច នៅព្រឹកថ្ងៃទី១ ខែកក្កដា។
អាជ្ញាធរ បានអនុញ្ញាតឲ្យតំណាងពលរដ្ឋ២នាក់ គឺលោកស្រី ផាវ ញ៉ើង និងលោក ហាន់ ទៀត ចូលរួមពិភាក្សាជាមួយអាជ្ញាធរ។
តំណាងពលរដ្ឋ លោកស្រី ផាវ ញ៉ើង ប្រាប់វិទ្យុអាស៊ីសេរីនៅថ្ងៃទី១ ខែកក្កដាថា អាជ្ញាធរបានឲ្យលោកស្រីពិនិត្យមើលទិន្នន័យពលរដ្ឋក្រីក្រ ដែលអាជ្ញាធរមូលដ្ឋានបានចុះស្រង់កាលពីពេលកន្លងទៅ មានប្រមាណជាង២រយគ្រួសារ ក្នុងចំណោមពលរដ្ឋជាង២ពាន់គ្រួសារក្នុងស្រុកស្រែអំបិល ហើយលោកស្រី កត់សម្គាល់ថា ពលរដ្ឋក្រីក្រពិតប្រាកដមានចំនួនច្រើនជាងអ្វី ដែលអាជ្ញាធរបានរកឃើញនេះ។ លោកស្រី បញ្ជាក់ថា ក្នុងចំណោមពលរដ្ឋជាង២រយគ្រួសារនោះ អាជ្ញាធរបានបែងចែកជា២ អាទិភាពផ្សេងៗគ្នាទៀត ហើយពួកគាត់នឹងទទួលបានទំហំដីខុសគ្នាដែរ។
លោកស្រី ផាវ ញ៉ើង៖«អាទិភាពទី១ហ្នឹងគឺ ទទួលបានដីតែ៧ពាន់ម៉ែត្រការ៉េទេ បានន័យថា ៧០អា អត់ដល់មួយហិកតារទេទាំងដីផ្ទះ ដីលំនៅឋាន លុះត្រាតែបុគ្គលនោះចូលក្នុងអាទិភាពទី១ ហ្នឹងទៀត។ អាទិភាពទី១នេះ មានន័យថា ពលរដ្ឋដែលអត់មានទាំងដីផ្ទះ ដីស្រែ ដីចម្ការ តែគាត់រស់នៅទីហ្នឹង ដប់ ម្ភៃ សាមសិបឆ្នាំឧទាហរណ៍អីចឹង។ សម្រាប់បុគ្គល ដែលមករស់នៅទីហ្នឹង ដើរនៅស៊ីឈ្នួលចាំចម្ការឲ្យគេ ឬទើបមករស់នៅទីហ្នឹង គឺមិនផ្ដល់អាទិភាពក្នុងលក្ខខណ្ឌទី១ ឬទី២ ទេ គឺសុំមិនឲ្យតែម្ដង គាត់និយាយអីចឹងណា ប៉ុន្តែអាទិភាពទី២ គឺបានដី ៥ពាន់ម៉ែត្រការ៉េ បានន័យថា កន្លះហិកតារ»។
លោកស្រី ផាវ ញ៉ើង បន្ថែមថា ក្រោយពីមានភាពមិនប្រក្រតីមួយចំនួនជុំវិញបញ្ហាពលរដ្ឋក្រីក្រតិចជាងចំនួនជាក់ស្ដែង អភិបាលរងខេត្តកោះកុង បានឲ្យតំណាងពលរដ្ឋទាំង២នាក់ ចុះស្រង់ទិន្នន័យពលរដ្ឋក្រីក្រពិតប្រាកដសាឡើងវិញ ដោយសហការជាមួយអាជ្ញាធរមូលដ្ឋាន។ តំណាងពលរដ្ឋរូបនេះ ស្នើដល់គណៈកម្មការគ្រប់គ្រងដីសាធារណៈរបស់រដ្ឋ ប្រចាំខេត្តកោះកុង បន្ថែមទំហំដី ដែលពលរដ្ឋត្រូវទទួលបាន និងផ្ដល់អាទិភាពយ៉ាងហោចណាស់ឲ្យពលរដ្ឋ៩៥៥គ្រួសារ មានសិទ្ធិទទួលបានដីសម្បទានសង្គមកិច្ចពីរដ្ឋាភិបាល។
លោកស្រី ផាវ ញ៉ើង៖«សុំឲ្យរដ្ឋាភិបាលមេត្តាគិតគូរផ្ដល់ដីសម្បទានសង្គមកិច្ចឲ្យប្រជាពលរដ្ឋក្នុងស្រុកស្រែអំបិល និងស្រុកបុទុមសាគរនេះ ឲ្យខានតែបានដោយសារតែពួកគាត់ គឺជាប្រជាពលរដ្ឋ ដែលអត់មានដីធ្វើកសិកម្មពិតប្រាកដ អ្នកខ្លះគឺជាជនរងគ្រោះ ប៉ុន្តែមិនហ៊ានចេញមកតវ៉ាបាត់បង់ដី អ្នកខ្លះគឺជាអ្នកដែលអត់មានដីពិតប្រាកដមែន អត់ដែលបានលក់បានដូរអ្វីទេ តែគ្នាវាអត់មាន ដូចថា កើតមកត្រកូលអ្នកក្រស្រាប់ អត់មានដីមានធ្លីអីទេ មានតែបន្តិចបន្តួចអីចឹងទៅ ហូបមិនគ្រប់»។
តំណាងពលរដ្ឋ លោកស្រី ផាវ ញ៉ើង ឲ្យដឹងទៀតថា អាជ្ញាធរ បានស្នើឲ្យតំណាងពលរដ្ឋទាំង២នាក់ ទុកកិច្ចប្រជុំនៅពីព្រឹកថ្ងៃទី ១ កក្កដា ជាការណ៍សម្ងាត់ ប៉ុន្តែលោកស្រី អះអាងថា ការបញ្ចេញព័ត៌មាននេះ គឺក្នុងគោលបំណងនិយាយពីការពិតក្នុងភាពជាតំណាងរបស់ពលរដ្ឋ ដែលបានជជែកជាមួយអាជ្ញាធរ។
វិទ្យុអាស៊ីសេរី នៅមិនទាន់អាចទាក់ទងអភិបាលខេត្តកោះកុង អ្នកស្រី មិថុនា ភូថង ដើម្បីសុំការឆ្លើយតប សំណើរបស់ពលរដ្ឋបាននៅឡើយទេ នៅថ្ងៃទី១ ខែកក្កដា ។
ជុំវិញរឿងនេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី ប្រាប់វិទ្យុអាស៊ីសេរីថា ការស្រង់ទិន្នន័យពលរដ្ឋក្រីក្រពិតប្រាកដ គឺពុំមានភាពលំបាកឡើយ ប្រសិនបើជាមានកិច្ចសហការរួមគ្នារវាងតំណាងពលរដ្ឋ និងអាជ្ញាធរ។ មន្ត្រីសង្គមស៊ីវិល រូបនេះ លើកឡើងថា រដ្ឋាភិបាល គួរតែផ្អាកផ្ដល់ដីសម្បទានសេដ្ឋកិច្ចក្នុងទំហំច្រើនឲ្យទៅក្រុមហ៊ុនឯកជន ហើយបង្វែរទៅជា ដីសម្បទានសង្គមកិច្ចជូនដល់ពលរដ្ឋក្រីក្រ ដើម្បីឲ្យពលរដ្ឋមានសេដ្ឋកិច្ចកាន់តែល្អប្រសើរ លើកស្ទួយសេដ្ឋកិច្ចជាតិ។
លោក យិន ម៉េងលី៖«កាលណាប្រជាពលរដ្ឋលោកមានដីគ្រប់គ្រាន់ក្នុងការបង្កបង្កើនផល សេដ្ឋកិច្ចរបស់ប្រជាពលរដ្ឋគាត់មានការកើនឡើងហើយ សេដ្ឋកិច្ចពលរដ្ឋមានការធូរធារអីចឹងកំណើនសេដ្ឋកិច្ច ក៏វាកើនពីហ្នឹងដែរ ហើយវាអាចកាត់បន្ថយការចំណាកស្រុក ដែលមានការលំបាកនៅស្រុកគេដែរ។ អីចឹងរដ្ឋាភិបាលលោកអាចកាត់ឆ្វៀលបន្ថែមទៀត ហើយអីចឹងយើងត្រូវពិនិត្យឲ្យច្បាស់ឲ្យជាក់ស្ដែងទៅ ឲ្យចំគោលដៅឲ្យប្រជាពលរដ្ឋឲ្យចំមុខសញ្ញា ដែលត្រូវឲ្យ ហើយធ្វើយ៉ាងម៉េច កុំឲ្យមានពាក្យចាស់លោកថា ត្រីងៀតឆ្លៀតពង ពេលដែលមានអីចឹងទៅ មានការបន្លំដេកកណ្ដាលអីចឹងទៅ អីចឹងឲ្យច្បាស់ជាមួយប្រជាពលរដ្ឋ ដែលគាត់អត់ដីហ្នឹង»។
វិវាទដីធ្លីរបស់សហគមន៍ចំនួន៣នៅខេត្តកោះកុងនេះ បានអូសបន្លាយពេលជិត២០ឆ្នាំហើយ ដោយសាររដ្ឋាភិបាលកាត់ឆ្វៀលឱ្យទៅឧកញ៉ា និងអ្នកមានអំណាចធ្វើជាកម្មសិទ្ធិ ក្នុងនោះមាន លោក លី យ៉ុងផាត់ ជាសមាជិកព្រឹទ្ធសភាមកពីគណបក្សប្រជាជនកម្ពុជា និងជាប្រធានសមាគមឧកញ៉ា និងលោក ហេង ហ៊ុយ មន្ត្រីជាន់ខ្ពស់ក្រសួងមហាផ្ទៃ។
ដោយសារជម្លោះដីធ្លីទាំងនេះ អាជ្ញាធរខេត្តកោះកុង កាលពីថ្ងៃទី២៩ ខែមិថុនា ឆ្នាំ២០២៣ បានចាប់ខ្លួនសកម្មជនដីធ្លីចំនួន ១២នាក់ មកពីសហគមន៍ចំនួន៣ បន្ទាប់ពីពួកគាត់ព្យាយាមឡើងទៅដាក់ញត្តិស្នើសុំកិច្ចអន្តរាគមន៍ពីរដ្ឋមន្ត្រីក្រសួងយុត្តិធម៌លោក កើត រិទ្ធ ឱ្យទម្លាក់ការចោទប្រកាន់លើតំណាងសហគមន៍របស់ពួកគាត់ចំនួន៣០នាក់ និងដោះស្រាយវិវាទដីធ្លីជូនពួកគាត់។
ក្រោយមកតុលាការបានដោះលែងសកម្មជនដីធ្លីទាំងនោះ ឱ្យមានសេរីភាពឡើងវិញ ។ ក្រៅពីជាប់ពន្ធនាគារ ពលរដ្ឋខ្លះបានបាត់បង់ជីវិតក្នុងអំឡុងពេលចេញតវ៉ា ខ្លះទៀតធ្លាក់ខ្លួនក្រីក្រ បែកបាក់គ្រួសារ និងជាប់ពាក្យបណ្ដឹងនៅតុលាការជាដើម៕