ស្ត្រី ៤នាក់ តំណាងឲ្យសហគមន៍រងគ្រោះដីធ្លីក្នុងរាជធានីភ្នំពេញ ដាក់ញត្តិនៅស្ថានទូតសហរដ្ឋអាមេរិក ស្នើសុំជួបពិភាក្សាជាមួយភរិយាប្រធានាធិបតីសហរដ្ឋអាមេរិក អ្នកស្រី មីស្សែល អូបាម៉ា (Michelle Obama) ដែលនឹងមកទស្សនកិច្ចប្រទេសកម្ពុជា ចាប់ពីថ្ងៃទី២០ ដល់ថ្ងៃទី២២ មីនា។
តំណាងសមាគមន៍បឹងកក់ អ្នកស្រី យ៉ោម បុប្ផា ថ្លែងថា គោលបំណងនៃជំនួបជាមួយ អ្នកស្រី មីស្សែល អូបាម៉ា គឺចង់លើកឡើងពីបញ្ហាដីធ្លីដ៏រ៉ាំរ៉ៃនៅសហគមន៍របស់ពួកគាត់ និងសកម្មជនដីធ្លី សកម្មជនបក្សនយោបាយ និងព្រះសង្ឃ ដែលកំពុងជាប់ឃុំក្នុងពន្ធនាគារព្រៃស៖ «ចង់ឲ្យលោកជំទាវផ្តល់យោបល់យ៉ាងម៉េច ជំរុញដល់រដ្ឋាភិបាលឲ្យមានការដោះលែង ពីព្រោះសកម្មជនយើងបានជាប់គុកជាច្រើនខែ ប៉ុន្តែនៅមិនទាន់មានសញ្ញាមួយណាដែលឲ្យពួកគាត់មានសេរីភាពឡើងវិញ»។
បន្ទាប់ពីដាក់ញត្តិ អ្នកស្រី យ៉ោម បុប្ផា ឲ្យដឹងថា តំណាងមន្ត្រីស្ថានទូតទទួលយក និងដាក់ញត្តិតាមការិយាល័យដែលពាក់ព័ន្ធនឹងការងារនេះ។
រាល់ការដាក់ញត្តិនៅតាមស្ថាប័នរដ្ឋ និងស្ថានទូតនានាកន្លងមក ពលរដ្ឋដែលចូលរួមមានប្រមាណ ៥០នាក់ ដោយឡែកការដាក់ញត្តិនៅស្ថានទូតសហរដ្ឋអាមេរិក នៅព្រឹកថ្ងៃទី១៣ ខែមីនា មានស្ត្រី ៤នាក់ប៉ុណ្ណោះមកពីសមាគមបឹងកក់ សហគមន៍បុរីកីឡា ៣មករា សហគមន៍នៅក្បែរព្រលានយន្តហោះអន្តរជាតិភ្នំពេញ ហើយការដាក់ញត្តិនេះ ក៏មានការឃ្លាំមើលពីមន្ត្រីស៊ីវិលរបស់រដ្ឋាភិបាលដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។