តំណាងសហគមន៍ដីធ្លីម្នាក់ ស្នើសុំអាជ្ញាធរឱ្យស្វែងរកជនដៃដល់ ៣នាក់ ដែលព្រួតគ្នាប្រើហិង្សាលើរូបលោកបណ្ដាលឲ្យរងរបួសក្បាល និងក្រោមភ្នែកខាងឆ្វេងដេរ៣ថ្នេរ។
តំណាងសហគមន៍ស្រែប្រាំង នៅឃុំត្រពាំងព្រីង ស្រុកតំបែរ ខេត្តត្បូងឃ្មុំ លោក ហឿន ស៊ីនាត រៀបរាប់ប្រាប់វិទ្យុអាស៊ីសេរី នៅថ្ងៃទី១៧ តុលា ថា ជនមិនស្គាល់មុខ ៣នាក់ ជិះម៉ូតូ ២គ្រឿង ចុះមកព្រួតវាយលោកទាំងកម្រោលដោយគ្មានមូលហេតុ ខណៈលោក និងមិត្តភ័ក្ដិ ២នាក់ទៀត បានដើរទៅរកទិញអាហារបរិភោគ បន្ទាប់ពីពួកលោកចូលរួមវេទិកាប្រជាពលរដ្ឋកម្ពុជា (CPF) ឆ្នាំ២០២២ ដែលរៀបចំដោយក្រុមអង្គការសង្គមស៊ីវិលស្ដីអំពី "ការពារលំហពលរដ្ឋប្រជាធិបតេយ្យ និងសិទ្ធិមនុស្ស ដើម្បីសមធម៌ និងយុត្តិធម៌នៅកម្ពុជា"។ លោក បញ្ជាក់ថា ហេតុការណ៍នេះ កើតឡើងនៅតំបន់បឹងត្របែក ខណ្ឌចំការមន រាជធានីភ្នំពេញ កាលពីវេលាម៉ោងជាង ៨យប់ ថ្ងៃទី១៦ ខែតុលា។ សកម្មជនដីធ្លីរូបនេះអះអាងថា លោក មិនដែលស្គាល់ ឬមានទំនាស់ជាមួយជនដៃដល់ឡើយ ដូច្នេះលោកសង្ស័យថា ករណី អាចជាការវាយច្រឡំ ឬអាចជាការរៀបចំដោយក្រុមណាមួយ ដើម្បីបំបាក់ស្មារតីលោក កុំឲ្យចូលរួមរឿងកិច្ចការងារសង្គម និងបញ្ហាដីធ្លី៖ « គាត់ជិះម៉ូតូមកឈប់នៅកន្លែងខ្ញុំ ហើយវាយខ្ញុំតែម្ដង ហើយវាយហើយ គាត់ឡើងម៉ូតូទៅវិញទៅ។ អ្នកទាំងនោះចំណាស់ដែរ មើលទៅ ២០ ទៅ ៣០ឆ្នាំហើយ។ ខ្ញុំអត់ដែលមានទំនាស់ជាមួយអ្នកណាទេ ឬឌឺដងជាមួយអ្នកណាដែរ ដោយសារខ្ញុំអត់ដែលស្គាល់កន្លែងហ្នឹងទេ។ ជូនកាល ខ្ញុំដាក់ការសង្ស័យថា វាយច្រឡំ ឬគាត់ជក់គ្រឿងញៀន ឬមួយទៀត ការវាយនេះបើគាត់មានត្រៀមទុក ខ្ញុំសង្ស័យថា ដោយសារពួកខ្ញុំជាសកម្មជនដីធ្លី ក្រែងលោគេបោះដៃ បោះអីមកឲ្យវាយខ្ញុំ។ នេះជាការព្រួយបារម្ភរបស់ខ្ញុំ។ ខ្ញុំសំណូមពរដល់សមត្ថកិច្ច ដោយសារខ្ញុំដាក់ពាក្យបណ្ដឹងដល់ប៉ុស្តិ៍ដើមថ្កូវ។ ដូច្នេះសូមជួយស្វែងរកជនដៃដល់មកដាក់ទោសទៅតាមច្បាប់ » ។
រូបភាពពីវីដេអូកាមេរ៉ាសុវត្ថិភាព បង្ហាញថា ខណៈលោក ហឿន ស៊ីនាត កំពុងដើរនៅលើដងផ្លូវ ស្រាប់តែបុរស ៣នាក់ ជិះម៉ូតូពីរគ្រឿងចុះមកព្រួតវាយលោក ហឿន ស៊ីនាត នៅចំពោះមុខមនុស្សជាច្រើនទៀត ហើយចេញជិះគេចចេញភ្លាម។ ក្រោយពេលកើតហេតុ ជនរងគ្រោះ បានដាក់បណ្ដឹងទៅអាជ្ញាធរប៉ុស្តិ៍នគរបាលសង្កាត់ផ្សារដើមថ្កូវ កាលពីថ្ងៃទី១៧ ខែតុលា ដើម្បីឲ្យតាមចាប់ជនដៃដល់ទាំងនោះមកផ្ដន្ទាទោសតាមច្បាប់។ លោកបន្ថែមថា ពលរដ្ឋដែលរស់នៅកន្លែងកើតហេតុ បានប្រាប់លោកថា ជនដៃដល់ គឺជាជាងផ្សារដែកនៅតំបន់នោះ។ ដូច្នេះ លោកសង្ឃឹមថា អាជ្ញាធរ នឹងដោះស្រាយរឿងនេះដោយយុត្តិធម៌ ដើម្បីលុបបំបាត់ការសង្ស័យ និងការរិះគន់នានា។
ជុំវិញរឿងនេះ នាយប៉ុស្តិ៍រដ្ឋបាលសង្កាត់ផ្សារដើមថ្កូវ លោក សូ សំបាន មិនបានឆ្លើយតបថា លោក បានស្រាវជ្រាវ ឬដោះស្រាយបែបណា ចំពោះបណ្ដឹងរបស់ជនរងគ្រោះនោះទេ ហើយលោក ហាក់ដូចជាចាត់ទុកជារឿងតូចតាច។ លើសពីនេះលោក បែរជាខឹងអ្នកយកព័ត៌មានវិទ្យុអាស៊ីសេរី ដែលទូរស័ព្ទសួរនាំលោកអំពីរឿងនេះនៅពេលយប់ ហើយចុចផ្ដាច់ទូរស័ព្ទវិញ៖ « គ្រាន់តែគេប៉ះ អូ ! គេនេះគាត់នៅកន្លែងលក់ដូរហើយម៉ោងថ្មើរនេះ បងឯងខលមកខ្ញុំសួររឿងអ៊ីចឹង » ។
លោក ហឿន ស៊ីនាត ដែលជាជនរងគ្រោះ គឺស្ថិតក្នុងចំណោមតំណាងសហគមន៍ស្រែប្រាំង ស្រុកតំបែរ ខេត្តត្បូងឃ្មុំ ចំនួន ៨នាក់ ដែលសាលាដំបូងខេត្តត្បូងឃ្មុំ កាត់ទោសឲ្យជាប់ពន្ធនាគារម្នាក់ ៧ឆ្នាំ ពីបទកំហែងយកដោយមានស្ថានទម្ងន់ទោស ដោយសារតែព្យាយាមធ្វើសកម្មភាពការពារដីធ្លីសហគមន៍របស់ពួកគាត់ ដែលក្រុមហ៊ុនចិនឈ្មោះ ហាមិនីវេន អ៊ិនវេស្តមេន (Hamenivent Investment) ឈូសឆាយរំលោភយកទំហំ ៧៨៥ហិកតារ។ប៉ុន្តែទោសនេះ ក្រោយមក សាលាឧទ្ធរណ៍ត្បូងឃ្មុំ បានបន្ថយមកត្រឹមជាង២ឆ្នាំវិញ។ គិតមកទល់ពេលនេះ លោក ហឿន ស៊ីនាត ទើបតែត្រូវបានតុលាការដោះលែងចេញពីពន្ធនាគាររយៈពេលប្រមាណ ១ខែប៉ុណ្ណោះ។
លោក ហឿន ស៊ីណាត អះអាងថា លោកនឹងបន្តជំរុញ និងតាមដានករណីលោក រហូតទាល់តែសមត្ថកិច្ចរកឃើញ និងនាំខ្លួនជនដៃដល់មកផ្ដន្ទាទោសតាមច្បាប់។
កន្លងមក មានសកម្មជននយោបាយបក្សប្រឆាំង និងសាច់ញាតិរបស់ពួកគេ សកម្មជនសង្គម និងសកម្មជនដីធ្លីជាង ៤០នាក់ហើយ ដែលត្រូវបានជនមិនស្គាល់មុខប្រើប្រាស់ទម្រង់លួចវាយប្រហាក់ប្រហែលគ្នាបណ្ដាលឲ្យរបួសធ្ងន់ ហើយជនរងគ្រោះខ្លះបានធ្លាក់ខ្លួនពិការអស់មួយជីវិត។ ជនរងគ្រោះមួយចំនួនទៀត មិនត្រឹមតែមិនទទួលបានយុត្តិធម៌នោះទេ ថែមទាំងត្រូវបានជនល្មើសលួចវាយប្រហារផ្ទួនៗ គ្នាពីរលើក និងជនរងគ្រោះខ្លះទៀត ថែមទាំងត្រូវបានអាជ្ញាធរ ក្រុងភ្នំពេញចាប់ឃុំខ្លួនក្នុងពន្ធនាគារទៀតផង។ ធ្ងន់ធ្ងរជាងនេះ ជនរងគ្រោះមួយរូប គឺលោក ស៊ិន ខុន ដែលជាសកម្មជនគណបក្សសង្គ្រោះដែរនោះ ត្រូវបានជនល្មើស កាប់ប្រហារបណ្ដាលឲ្យស្លាប់ក្នុងថ្លុកឈាមយ៉ាងរន្ធត់។
ក្រុមអង្គការជាតិ និងអន្តរជាតិ រួមទាំងអង្គការសហប្រជាជាតិផង បានចេញសេចក្តីថ្លែងការណ៍ព្រួយបារម្ភជាបន្តបន្ទាប់ ចំពោះអំពើហិង្សាលើសកម្មជនគណបក្សប្រឆាំង និងសកម្មជនសង្គមជាញឹកញាប់នេះ និងចាត់ទុកថា ករណីទាំងនេះ គឺការធ្វើទុក្ខបុកម្នេញផ្នែកនយោបាយ ដែលត្រូវតែបញ្ឈប់ជាបន្ទាន់។ពួកគេ យល់ថា ដើម្បីបំបាត់ការរិះគន់នានា គឺសមត្ថកិច្ច ត្រូវតែធ្វើការស៊ើបអង្កេតឲ្យបានដិតដល់ ដើម្បីស្វែងរកជនពាក់ព័ន្ធ ទៅអនុវត្តតាមច្បាប់ ដើម្បីផ្តល់យុត្តិធម៌ដល់ជនរងគ្រោះ និងលុបបំបាត់ភាពភ័យខ្លាចរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។