សហគមន៍រងគ្រោះដីធ្លី នៅខេត្តស្វាយរៀង បាននាំគ្នាកាត់បន្ថយការចំណាយប្រាក់ទៅលើអាហារប្រចាំថ្ងៃ ដើម្បីសន្សំប្រាក់ទុកសងទៅម្ចាស់បំណុល ។មន្ត្រីសង្គមស៊ីវិលជំរុញឱ្យរដ្ឋាភិបាលមានវិធានការរកដំណោះស្រាយជាបន្ទាន់ កុំឱ្យពលរដ្ឋរងទុក្ខកាន់តែខ្លាំងច្រើនឡើងជាងនេះ។
សហគមន៍រងគ្រោះដីធ្លីសាមគ្គីរមាសហែក បានអះអាងប្រាប់វិទ្យុអាស៊ីសេរីឱ្យដឹងនៅថ្ងៃទី១៥ខែវិច្ឆិកាថា ប្រជាពលរដ្ឋរស់នៅក្នុងឃុំអំពិល ស្រុករមាសហែក ខេត្តស្វាយរៀង ប្រមាណជាង៤រយគ្រួសារ បាននាំគ្នាកាត់បន្ថយការចំណាយទៅលើម្ហូបអាហារ ប្រចាំថ្ងៃ ដើម្បីទុកប្រាក់ទាំងសងទៅម្ចាស់បំណុលវិញ ។ សហគមន៍បន្ថែមថា ការធ្វើបែបនេះ ដោយសារតែពួកគេមិនអាចរកប្រាក់ចំណូល និងមួយវិញទៀតពួកគេកំពុងតែមានវិវាទដីធ្លីជាមួយក្រុមហ៊ុនមួយដែលពួកគាត់អះអាងថា បានរំលោភយកដីរបស់គាត់។
តំណាងសហគមន៍សាមគ្គីរមាសហែក លោកស្រី ខៀវ សារុន ឱ្យដឹងបន្ថែមថា សហគមន៍របស់លោកស្រី ភាគច្រើនពឹងផ្អែកទៅលើមុខរបរកសិកម្ម ធ្វើស្រែ ដាំដំឡូង និងដាំបន្លែ ដើម្បីលក់បានប្រាក់យកទៅផ្គត់ផ្គង់ជីវភាពគ្រួសារ និងសងម្ចាស់បំណុល ប៉ុន្តែដោយសារតែទំនិញនៅលើទីផ្សារក៏មានការកើនឡើង រីឯកសិផលរបស់សហគមន៍ក៏លក់មិនបានថ្លៃធ្វើឲ្យពួកគាត់ជួបបញ្ហាហិរញ្ញវត្ថុយ៉ាងធ្ងន់ធ្ងរ។ លោកស្រីបន្ថែមថា មួយរយៈចុងក្រោយនេះ ប្រជាសហគមន៍ប្រមាណ៩៥ភាគរយកំពុងជាប់បំណុលធ្ងន់ធ្ងរ និងកំពុងកាត់បន្ថយម្ហូបអាហារហូបចុកប្រចាំថ្ងៃ។
លោកស្រី ខៀវ សារុន៖ «សម្រាប់ការហូបចុករបស់ពួកគាត់ គាត់ថាពីមុន១០.០០០រៀល គាត់ហូបមួយថ្ងៃសឹងតែមិនគ្រប់ផង ដល់ឥឡូវហ្នឹង១០.០០០រៀល ការចំណាយរបស់គាត់ត្រឹមតែ៥.០០០រៀល បានន័យថា អត់បរិបូណ៌ទេ ធ្វើម៉េចបានតែម៉ាឆ្អែត អ៊ីចឹងហើយហ្នឹងគឺជារឿងមួយទៅដែលធ្វើឱ្យពិបាកដល់សុខភាពរបស់ពួកគាត់នៅពេលដែលគាត់ហូបអាហារអត់គ្រប់គ្រាន់ ហើយអាហារហ្នឹងហូបដើម្បីតែឆ្អែត»។
រីឯសមាជិកសហគមន៍សាមគ្គីរមាសហែកម្នាក់ទៀត គឺលោក វ៉ា ភា បានឱ្យដឹងថា គ្រួសារលោកបានខ្ចីលុយធនាគារមកធ្វើផ្ទះ ដោយក្នុងមួយខែត្រូវសងជិត ៣រយដុល្លារ ហើយរាល់ថ្ងៃលោកត្រូវលក់ទ្រព្យសម្បត្តិខ្លះ និងសន្សំលុយកូនធ្វើការងាររោងចក្រខ្លះ និងត្រូវបង្ខំចិត្តហូបចុក រិះថាំ ដើម្បីសន្សំប្រាក់ទុកសងធនាគារ។
លោក វ៉ា ភា៖ «ហើយនៅជាង១ឆ្នាំទៀត បាទ!នៅបង់បន្តហូរហែរហូត ព្រោះអ្វីកូនទៅធ្វើការមក ខ្ញុំលក់អ្វីតិចតួចៗ ហើយផ្សំគ្នាទៅបានបង់គេ១ខែៗរួច។ បានកូនៗគេទៅធ្វើការនៅរោងចក្រអ៊ីចឹងទៅបានជំនួយ»។
សហគមន៍គត់សម្គាល់ទៀតថា កុមារមួយចំនួនត្រូវឪពុកម្ដាយបង្ខំឱ្យឈប់រៀន រួចហើយ ធ្វើអត្តសញ្ញាណប័ណ្ណបន្លំ បង្កើនអាយុឱ្យគ្រប់ចំនួនធ្វើការងារ ដើម្បីអាចរកការងារបានធ្វើរកចំណូលជួយសងបំណុលនៅក្នុងគ្រួសារ។ ក្រៅពីនោះពលរដ្ឋ ដែលពេញកម្លាំងជាង៥០ភាគរយនៅក្នុងឃុំបាននាំគ្នាចេញទៅរកការងារធ្វើនៅភ្នំពេញ និងក្រុងបាវិតជាប់ព្រំដែនកម្ពុជា-វៀតណាម និងមួយផ្នែកធំ ទៅធ្វើការនៅប្រទេសថៃ។
ជុំវិញរឿងនេះ វិទ្យុអាស៊ីសេរីមិនអាចទាក់ទងអភិបាលខេត្តស្វាយរៀង លោក ប៉េង ពោធិ៍សា បានទេនៅថ្ងៃទី១៥ ខែវិច្ឆិកា។
ជុំវិញរឿងនេះ អ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី ប្រាប់អាស៊ីសេរីតាមរយៈសារតេឡេក្រាម(Telegram) កាលពីថ្ងៃទី១៥ ខែវិច្ឆិកា ថា ស្ថាប័នផ្ដល់កម្ចីនៅកម្ពុជាតែងតែពិនិត្យតាមគោលការណ៍លំហូរសាច់ប្រាក់មុននឹងផ្ដល់កម្ចីដល់អតិថិជន។ លោកថា ក្នុងស្ថានភាពវិបត្តិសេដ្ឋកិច្ចនេះ លោកជំរុញឱ្យពលរដ្ឋដែលជំពាក់បំណុល មានភាព ក្លាហាន និងស្មោះត្រង់ក្នុងការចរចាជាមួយស្ថាប័នផ្ដល់កម្ចីទាំងនោះ ដើម្បីរៀបចំកម្ចីឡើងវិញ។
ទាក់ទិននឹងបញ្ហានេះ នាយកទទួលបន្ទុកកិច្ចការទូទៅនៃអង្គការលីកាដូ (Licadho) លោក អំ សំអាត ជំរុញឱ្យរដ្ឋាភិបាលមានវិធានការជាក់លាក់ជាបន្ទាន់ ដើម្បីកុំឱ្យពលរដ្ឋរងផលប៉ះពាល់កាន់តែច្រើនឡើង ហើយរដ្ឋាភិបាលត្រូវតែរកការងារឱ្យពលរដ្ឋ និងរកទីផ្សារឱ្យកសិករលក់កសិផលមានតម្លៃថ្លៃ។
លោក អំ សំអាត៖ «យើងមើលបញ្ហាសេដ្ឋកិច្ច ឥឡូវវាទាក់ទងនឹងបញ្ហាការងារសម្រាប់គាត់ទី១ ហើយយើងឃើញហើយការបាត់បង់ការងារ ឬក៏បញ្ហាខ្វះទីផ្សារការងារ ហ្នឹងវាជាឥទ្ធិពលមួយហើយដល់កម្មករកម្មការិនីដែលគាត់ថយការងារ សុទ្ធតែជាផលប៉ះពាល់ បញ្ហាទី២ គឺរឿងទីផ្សាររបស់កសិករ ធ្វើម៉េចឱ្យពួកគាត់មានទីផ្សារ»។
ប្រជាសហគមន៍ដីធ្លីសាមគ្គីរមាសហែក ចំនួន២ឃុំ គឺឃុំអំពិល និងឃុំគរគី ស្ថិតនៅក្នុងស្រុករមាសហែក ខេត្តស្វាយរៀង មានពលរដ្ឋចំនួន៤៤០គ្រួសារ ដែលកំពុងមានទំនាស់ដីធ្លីចាប់តាំងពីឆ្នាំ២០១០ ដោយក្រុមហ៊ុនបានរំលោភយកដីរបស់ពួកគេ ប៉ុន្តែរហូតមកដល់ពេលនេះទំនាស់ដីធ្លីនៅមិនទាន់មានដំណោះស្រាយនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។