ពលរដ្ឋ​ខេត្ត​ព្រះវិហារ​មាន​ជម្លោះ​ដីធ្លី​ជាមួយ​អាជ្ញាធរ​ស្វែងរក​កិច្ច​អន្តរាគមន៍​ជា​ថ្មី​ពី​ក្រសួង​ដែនដី

ដោយ ជាតិ ចំណាន
2018-04-30
Share
ជា សុផារ៉ា ២០១៧ ៨៥៥ រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា ថ្លែង​ពេល​ជួប​អ្នក​ប៊ូឌីង នៅ​ទីស្ដីការ​ក្រសួង នៅ​ថ្ងៃ​ទី៧ ខែ​មេសា ឆ្នាំ​២០១៧។
Photo: RFA

ក្រុម​ពលរដ្ឋ​ជាង​២០០​គ្រួសារ ដែល​មាន​ជម្លោះដីធ្លី​រ៉ាំរ៉ៃ​ជាមួយ​អាជ្ញាធរ​ខេត្ត​ព្រះវិហារ និង​អាជ្ញាធរ​ជាតិ​ព្រះវិហារ នាំគ្នា​ឡើង​មក​រាជធានី​ភ្នំពេញ ដើម្បី​ដាក់​ញត្តិ​ទៅ​ក្រសួង​ដែនដី ស្វែងរក​កិច្ច​អន្តរាគមន៍​ជាថ្មី ពី​លោក ជា សុផារ៉ា។ សង្គម​ស៊ីវិល ស្នើ​ឲ្យ​ក្រសួង​ដែនដី ស្វែងរក​ដំណោះស្រាយ​ជូន​ពលរដ្ឋ ដើម្បី​បញ្ចប់​ជម្លោះ​រ៉ាំរ៉ៃ​នេះ។

តំណាង​ពលរដ្ឋ សហគមន៍​រងគ្រោះ​ដីធ្លី​ខេត្ត​ព្រះវិហារ លោក ផាន់ ឈឿន ឲ្យ​ដឹង​ថា មន្ត្រី​ក្រសួង​ដែនដី​បាន​ទទួលយក​ញត្តិ​របស់​ពលរដ្ឋ​រង​គ្រោះ​ដីធ្លី​រួចរាល់​ហើយ នៅ​ព្រឹក​ថ្ងៃ​ទី​៣០ មេសា ប៉ុន្តែ មន្ត្រី​នៃ​ក្រសួង​ដែនដី មិនបាន​សន្យា​ថា នឹង​ផ្ដល់​ព័ត៌មាន​ត្រលប់​ឲ្យ​ពួកគាត់​វិញ​នៅ​ថ្ងៃ​ណា​ទេ។ លោក ផាន់ ឈឿន បន្ដ​ថា ពលរដ្ឋ​នឹង​បន្ត​នាំគ្នា​ស្នាក់​នៅ​តាម​ផ្ទះ​ជួល ផ្ទះ​បងប្អូន កន្លែង​ការដ្ឋាន​សំណង់ និង​វត្ត​អារាម ក្នុង​រាជធានី​ភ្នំពេញ ដើម្បី​រង់ចាំ​ដំណោះស្រាយ​របស់​ក្រសួង​ដែនដី។

ដី​ដែល​មាន​ជម្លោះ ជាមួយ​អាជ្ញាធរ​ខេត្ត​ព្រះវិហារ និង​អាជ្ញាធរ​ជាតិ​ព្រះវិហារ ត្រូវ​បាន​ពលរដ្ឋ​អះអាង​ថា មាន​ទំហំ ៣.៣៥៣ហិកតារ ជា​កម្មសិទ្ធិ​របស់​ពលរដ្ឋ​ចំនួន ២៥៣​គ្រួសារ មាន​ទីតាំង​ស្ថិតនៅ​ភូមិ​ស្វាយជ្រុំ ឃុំ​កន្ទួត ស្រុក​ជាំក្សាន្ដ ខេត្ត​ព្រះវិហារ។ តំណាង​សហគមន៍​ដីធ្លី រៀបរាប់​ថា ដី​មាន​ជម្លោះ​នោះ ត្រូវ​បាន​បង្កើត​ជា​ភូមិ​ដោយ​សម្ដេច​ព្រះសីហនុ ក្នុង​ឆ្នាំ​១៩៦២។ ពលរដ្ឋ​ម្ចាស់​ភូមិ បាន​ចាក​ចេញពី​ភូមិ​សម័យ​សង្គ្រាម​ឆ្នាំ​៧០ ហើយ​នៅ​ក្រោយ​សម័យ​សង្គ្រាម ពលរដ្ឋ​បាន​ត្រលប់​ទៅ​រស់នៅ​ក្នុង​ភូមិ​វិញ តាម​ការ​អំពាវនាវ​របស់​អតីត​អភិបាលក្រុង​ភ្នំពេញ លោក ជា សុផារ៉ា និង​អតីត​អភិបាល​ខេត្ត​ព្រះវិហារ លោក ព្រាប តាន់។

ពលរដ្ឋ​អះអាង​ថា ពលរដ្ឋ​ចាប់ផ្ដើម​មាន​ជម្លោះ គឺ​ក្រោយពេល​ពលរដ្ឋ​មិន​ព្រម​លក់​ដី ទៅ​ឲ្យ​តំណាងរាស្ត្រ​ខេត្ត​ព្រះវិហារ លោក សួស យ៉ារ៉ា ក្នុង​តម្លៃ​ថោក។ ក្រោយមក នៅ​ឆ្នាំ​២០០៨ ប្រធាន​អាជ្ញាធរ​ជាតិ​ព្រះវិហារ គឺ លោក ជុច ភឿន បាន​ចេញ​សេចក្ដីជូនដំណឹង​មក ដាក់​បញ្ចូល​ដី​របស់​អ្នកភូមិ​ស្ថិត​ក្រោម​ការ​គ្រប់គ្រង​របស់​អាជ្ញាធរ​ជាតិ​ព្រះវិហារ និង​បង្ខំ​ឲ្យ​ពលរដ្ឋ​ចាកចេញ​ពី​ដី ដោយ​យក​កងទ័ព​មក​វាយ​បណ្ដេញ​ចេញ និង​ដុត​ផ្ទះ​ពលរដ្ឋ​ចោល​ជា​បន្តបន្ទាប់។

អ្នកភូមិ​ស្វាយជ្រំ បន្ដ​ថា ក្រោយពី​បាន​ដុត​ផ្ទះ​បណ្ដេញ​ពលរដ្ឋ​ចេញពី​ភូមិកំណើត អាជ្ញាធរ​ខេត្ត និង​អាជ្ញាធរ​ជាតិ​ព្រះវិហារ បាន​បន្លំ​ឯកសារ​បំភ័ន្ត​ទៅ​ថ្នាក់លើ ថា ពលរដ្ឋ​នៅ​ភូមិ​ស្វាយជ្រំ​យល់ព្រម​ចាក​ចេញ​ពី​លំនៅឋាន​ក្នុងភូមិ ហើយ​ទៅ​រស់នៅ​កន្លែង​ថ្មី ដែល​មាន​ទីតាំង​ស្ថិត​ក្នុង​ព្រៃ។

លោក ផាន ឈឿន ប្រាប់​ថា ក្រោយពេល​បណ្ដេញ​អ្នកភូមិ​ចេញ អាជ្ញាធរ​បាន​យក​ប្រជាជន​ថ្មី ទៅ​នៅ​លើ​ដី​ភូមិ​មាន​ជម្លោះ ខណៈ​ដែល​ម្ចាស់​ភូមិ​ស្វាយជ្រំ​ពិតប្រាកដ គ្មាន​ផ្ទះ និង​ដីស្រែ​ធ្វើ​ចម្ការ​ទេ។

កាល​ពី​ពេល​មាន​សង្គ្រាម​ខ្មែរ​ថៃ ឆ្នាំ​២០០៨ អ្នកភូមិ​ស្វាយជ្រំ​អះអាង​ថា ពួកគាត់​គឺជា​អ្នក​ជួយ​ផ្គត់ផ្គង់​និង​បាន​ដាំបាយ​ឲ្យ​ទាហាន​ខ្មែរ​បរិភោគ ប៉ុន្តែ ក្រោយ​មក អ្នកភូមិ​បាន​នាំគ្នា​ជម្លៀស​ចេញពី​ភូមិ តាម​ការ​អំពាវនាវរ​បស់​អាជ្ញាធរ។ អ្នកភូមិ​ថា ក្រោយ​ចប់​សង្គ្រាម​ខ្មែរ និង​ថៃ ឆ្នាំ​២០០៨ អ្នកភូមិ​បាន​វិល​ត្រលប់​ទៅ​ភូមិ​វិញ ប៉ុន្តែ​អាជ្ញាធរ​ចាប់ផ្ដើម​យុទ្ធនាការ បណ្ដេញ​អ្នកភូមិ​ចេញ ដោយ​សំអាង​លើ​ស..(សេចក្ដី​ជូន​ដំណឹង) របស់​អាជ្ញាធរ​ជាតិ​ព្រះវិហារ។

អាស៊ីសេរី មិន​អាច​សុំ​ការ​បំភ្លឺ ពី​ករណី​ជម្លោះដីធ្លី​នេះ បាន​ពី​ខាង​តំណាងរាស្ត្រ​ខេត្ត​ព្រះវិហារ និង​ជា​អ្នកនាំពាក្យ​គណបក្ស​ប្រជាជន​កម្ពុជា លោក សួស យ៉ារ៉ា អភិបាលខេត្ត លោក អ៊ុន ចាន់ដា និង​អាជ្ញាធរ​ជាតិ​ព្រះវិហារ បាន​ទេ នៅ​ថ្ងៃ​ទី​៣០ មេសា។ ប៉ុន្តែ កាលពី​ថ្ងៃ​ទី​៤ ខែ​តុលា ឆ្នាំ​២០១៤ អតីត អភិបាលខេត្ត​ព្រះវិហារ លោក អុំ ម៉ារ៉ា និង លោក លោក ជុច ភឿន ប្រធាន​អាជ្ញាធរ​ជាតិ​ប្រាសាទ​ព្រះវិហារ និង​ជា​រដ្ឋលេខាធិការ​ក្រសួង​វប្បធម៌ និង​វិចិត្រសិល្ប ធ្លាប់​បាន​កោះហៅ​តំណាង​ពលរដ្ឋ​មាន​ជម្លោះដីធ្លី ចំនួន​៤​នាក់ ទៅ​ជួប​សំណេះសំណាល​គ្នា​ម្ដង ក្នុង​ពិធី​ស្រង់​ព្រះ​នៅ​វត្ត​មរតក​តេជោ​បុរី​ស្វារៈ ក្នុង​ឃុំ​ស្រអែម។ តែ​ជម្លោះ​នៅតែ​បន្ត​រហូតដល់​សព្វថ្ងៃ។

អ្នកគ្រប់គ្រង​បច្ចេកទេស​ការិយាល័យ​ស៊ើបអង្កេត​នៃ​អង្គការ​លីកាដូ (Licadho) លោក អំ សំអាត សង្កេត​ឃើញ​ថា ករណី​ជម្លោះ​ពលរដ្ឋ​ជាមួយ​អាជ្ញាធរ​ជាតិ​ព្រះវិហារ និង​អាជ្ញាធរ​ខេត្ត​នេះ ជា​ជម្លោះ​រ៉ាំរ៉ៃ យូរ​មក​ហើយ។ លោក​ថា មូលហេតុ​ដែល​ធ្វើ​ឲ្យ​ជម្លោះ​នេះ​ដោះស្រាយ​មិន​ចេញ ដោយសារ​ពលរដ្ឋ​ដែល​អះអាង​ថា កន្លែង​ថ្មី​ដែល​អាជ្ញាធរ​រៀបចំ​ឲ្យ​ទៅ​នៅ ពិបាក​រស់នៅ គ្មាន​ហេដ្ឋារចនាសម្ព័ន្ធ​ត្រឹមត្រូវ និង​ចង់​ឲ្យ​អាជ្ញាធរ​អភិវឌ្ឍន៍​នៅ​នឹង​កន្លែង​វិញ។ សង្គម​ស៊ីវិល អំពាវនាវ​ឲ្យ​ក្រសួង​ដែនដី គួរតែ​ចេញមុខ​ដោះស្រាយ​បញ្ចប់​ករណី​ជម្លោះ​នេះ ឲ្យ​បាន​ឆាប់ ជៀសវាង​ការ​អូស​បន្លាយ​រ៉ាំរ៉ៃ​បន្ត​ទៀត។ «»

ក្រុម​ពលរដ្ឋ សហគមន៍​រងគ្រោះ​ដីធ្លី​ខេត្ត​ព្រះវិហារ រៀបរាប់​ថា ពួកគាត់​បាន​ដើរ​ទាមទារ​រក​ដំណោះស្រាយ​រាប់​ឆ្នាំ​មក​នេះ ទទួល​បាន​លិខិត​អន្តរាគមន៍​ចំនួន ២៥​ច្បាប់​ហើយ ជា​លិខិត​របស់​ព្រះបរមរាជវាំង រដ្ឋសភា ខុទ្ទកាល័យ​លោកនាយក​រដ្ឋមន្ត្រី ហ៊ុន សែន ក្រសួង​មហាផ្ទៃ ជាដើម ប៉ុន្តែ​នៅ​តែ​មិន​ទទួល​បាន​ដី​មកវិញ។ ពួកគេ​រំពឹង​ថា មានតែ​ការ​ចេញ​មុខ​អន្តរាគមន៍​ដោយ​ផ្ទាល់ ពី​រដ្ឋមន្ត្រី​ដែនដី លោក ជា សុផារ៉ា ទេ ទើប​អាច​ឲ្យ​អ្នក​ភូមិ​ទទួល​បាន​ដំណោះស្រាយ​សមរម្យ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល