ពលរដ្ឋ​ខណ្ឌ​ព្រែកព្នៅ​ប្ដឹង​ទៅ​តុលាការ​សុំ​សិទ្ធិ​កាន់​កាប់​ដីធ្លី​ឡើង​វិញ​ពី​ឧកញ៉ា​ម្នាក់

ដោយ ថា កិត្យា
2015-08-03
Share
ជម្លោះ​ដីធ្លី ព្រែកព្នៅ ៦២០ ទីតាំង​ដី​កំពុង​មាន​ជម្លោះ​រវាង​ប្រជាពលរដ្ឋ ១៣​គ្រួសារ និង​លោក​ឧកញ៉ា សុខ ហេង ឋិត​នៅ​ភូមិ​ត្រពាំងពោធិ៍ សង្កាត់​គោករកា ខណ្ឌ​ព្រែកព្នៅ រាជធានី​ភ្នំពេញ។ រូបថត​ថ្ងៃ​ទី​១ ខែ​សីហា ឆ្នាំ​២០១៥
RFA/Tha Kitya

ប្រជាពលរដ្ឋ​ចំនួន ១៣​គ្រួសារ រស់នៅ​ក្នុង​ខណ្ឌ​ព្រែកព្នៅ ប្ដឹង​ទៅ​សាលា​ដំបូង​រាជធានី​ភ្នំពេញ សុំ​កាន់​កាប់​ដី​របស់​ពួក​គាត់​ឡើង​វិញ បន្ទាប់​ពី​តុលាការ​កំពូល ចេញ​សាល​ដីកា​រឹប​អូស​យក​ដី​ពួក​គាត់​កាល​ពី​ថ្ងៃ​ទី​២៧ មីនា កន្លង​ទៅ តាម​បណ្ដឹង​របស់​លោក​ឧកញ៉ា​ម្នាក់​ឈ្មោះ សុខ ហេង។ ពលរដ្ឋ​ចោទ​លោក​ឧកញ៉ា​នោះ​ថា បាន​ក្លែង​បន្លំ​ឯកសារ​យក​ដី​របស់​ពួក​គាត់​ជាមួយ​អ្នក​ភូមិ​ម្នាក់​ទៀត កាល​ពី​ឆ្នាំ​១៩៩៩។

ប្រជាពលរដ្ឋ ១៣​គ្រួសារ​នៅ​ក្នុង​ភូមិ​ត្រពាំងពោធិ៍ សង្កាត់​គោករកា ខណ្ឌ​ព្រែកព្នៅ រាជធានី​ភ្នំពេញ លើក​ឡើង​ថា ទំហំ​ដី ២​ហិកតារ​ដែល​លោក​ឧកញ៉ា សុខ ហេង អះអាង​ថា​ជា​កម្មសិទ្ធិ​របស់​ខ្លួន​នោះ តាម​ពិត គឺ​ពួក​គាត់​បាន​ទិញ​ត​ពី​ប្រជាពលរដ្ឋ​ដទៃ​ទៀត​តាំង​ពី​ឆ្នាំ​២០០៦ និង​ឆ្នាំ​២០០៧ ដែល​មាន​ប្លង់​រឹង និង​ទទួល​ស្គាល់​ពី​អាជ្ញាធរ​ត្រឹមត្រូវ។

ថ្មីៗ​នេះ ពលរដ្ឋ​ទាំង ១៣​គ្រួសារ​នេះ​ប្ដឹង​ទៅ​សាលា​ដំបូង​រាជធានី​ភ្នំពេញ សុំ​សិទ្ធិ​កាន់​កាប់​លើ​ដី​របស់​ពួក​គាត់​ឡើង​វិញ បន្ទាប់​ពី​តុលាការ​កំពូល បាន​ចេញ​សាល​ដីកា​រឹប​អូស​យក​ដី​ពួក​គាត់ កាល​ពី​ថ្ងៃ​ទី​២៧ ខែ​មីនា ឆ្នាំ​២០១៥ តាម​បណ្ដឹង​របស់​ឧកញ៉ា​ម្នាក់​ឈ្មោះ សុខ ហេង។

តំណាង​ឲ្យ​ពលរដ្ឋ​ទាំង ១៣​គ្រួសារ លោក ឈុន ឆៃហេង អះអាង​ថា ឯកសារ​ដែល​លោក​ឧកញ៉ា សុខ ហេង ប្ដឹង​ទៅ​តុលាការ ថា​ជា​ដី​របស់​ខ្លួន​នោះ គឺ​មិន​ពិត​នោះ​ទេ ព្រោះ​ជា​ឯកសារ​ក្លែងក្លាយ​រៀប​គម្រោង​យក​ដី​ពួក​គាត់ ដែល​ក្នុង​ប្លង់​នោះ​ដាក់​តាំង​ពី​ឆ្នាំ​១៩៩៩ មក​ម្ល៉េះ ប៉ុន្តែ​ប្រជាពលរដ្ឋ​មាន​ការ​ភ្ញាក់​ផ្អើល​នៅ​ដើម​ឆ្នាំ​២០១៥ នៅ​ពេល​តុលាការ​បាន​ចេញ​ដីកា​រក្សា​ការពារ​ដី​របស់​គាត់ ហើយ​ក៏​នាំ​គ្នា​ទប់ស្កាត់៖ «ជា​ពលរដ្ឋ​សាមញ្ញ​ណាស់ លុយ​ក៏​គ្មាន​ដូច​គេ អ៊ីចឹង​ប្ដឹង​សុំ​តែ​សិទ្ធិ​កាន់​កាប់​ដី​នេះ​ឡើង​វិញ​ទេ ហើយ​ឲ្យ​តុលាការ​លុប​ចោល​សាល​ដីកា​នោះ។ ប្រជាពលរដ្ឋ​ចង់​បាន​ដី​នោះ​វិញ ព្រោះ​យើង​ខំ​ចំណាយ​កម្លាំង និង​ចំណាយ​លុយ ហើយ​ដល់​ពេល​ចុង​បញ្ចប់ គេ​ក្លែង​ឯកសារ​ថា ជា​ដី​របស់​គេ​វិញ តើ​ប្រជាពលរដ្ឋ​ណា​មិន​បាក់​ទឹក​ចិត្ត»

ប្រវត្តិ​នៃ​ដី​នោះ ត្រូវ​បាន​អ្នក​ភូមិ​ឲ្យ​ដឹង​ថា កាល​ពី​ឆ្នាំ​១៩៩៩ លោក​ឧកញ៉ា សុខ ហេង និង​អ្នក​ភូមិ​ម្នាក់​ឈ្មោះ យិន សារ៉ាក់ បាន​រួម​គំនិត​គ្នា​បន្លំ​ឯកសារ​ដី​ដោយ​គូរ​ប្លង់​រំលោភ​ចូល​ដី​អ្នក​ដទៃ​ទៀត ដើម្បី​យក​ទៅ​ដាក់​នៅ​ធនាគារ​យក​ប្រាក់​រក​ស៊ី ប៉ុន្តែ​ការ​ខ្ចី​លុយ​ពី​ធនាគារ​មិន​បាន​សម្រេច​នោះ​ទេ ដោយសារ​ប្លង់​ដី​ក្លែងក្លាយ ក៏​រក្សា​ទុក​ដោយ លោក សុខ ហេង។ លុះ​នៅ​ឆ្នាំ​២០១២ លោក​ឧកញ៉ា សុខ ហេង បាន​ប្ដឹង​ឈ្មោះ យិន សារ៉ាក់ ដែល​ជា​គូកន​ជាមួយ​គ្នា​ថា បាន​លួច​លក់​ដី​ទំហំ​ពីរ​ហិកតារ​នោះ​ទៅ​ឲ្យ​ពលរដ្ឋ​ទាំង ១៣​គ្រួសារ។ ការ​ប្តឹងផ្តល់​គ្នា​នេះ នៅ​បន្ទាប់​ពី​អ្នក​ទាំង​ពីរ​មាន​ទំនាស់​បែក​បាក់​គ្នា​រឿង​ចែក​ផល​ប្រយោជន៍​មិន​ស្មើ។

វិទ្យុ​អាស៊ីសេរី មិន​អាច​សុំ​ការ​បំភ្លឺ​ពី លោក សុខ ហេង បាន​ទេ នៅ​ថ្ងៃ​ទី​២ ខែ​សីហា។

យ៉ាង​ណា​ក៏ដោយ តាម​អង្គ​ហេតុ​នៅ​ក្នុង​សាល​ដីកា​របស់​តុលាការ​កំពូល បង្ហាញ​ថា កាល​ពី​ថ្ងៃ​ទី​១៦ ខែ​មករា ឆ្នាំ​១៩៩៩ ដើម​ចោទ​ឈ្មោះ សុខ ហេង បាន​ទិញ​ដី​ទំហំ ២​ហិកតារ​ក្នុង​តម្លៃ ២៧៨.០០០​ដុល្លារ​អាមេរិក ស្ថិត​នៅ​ភូមិ​ត្រពាំងពោធិ៍ នោះ ដែល​មាន​កិច្ចសន្យា​លក់​ដី និង​កក់​ប្រាក់​ពី​ឈ្មោះ យិន សារ៉ាក់ យិន ចំរើន និង​ឈ្មោះ សំ ម៉ៅ។

លុះ​ពេល​ថ្មីៗ​នេះ លោក សុខ ហេង ចោទ​ថា ឈ្មោះ យិន សារ៉ាក់ បាន​លួច​លក់​ដី​នោះ​ទៅ​ឲ្យ​អ្នក​ដទៃ​ទៀត។ ទាក់ទិន​បញ្ហា​នេះ តំណាង​ឲ្យ​ពលរដ្ឋ​ទាំង ១៣​គ្រួសារ បដិសេធ​ថា ពួក​គាត់​មិន​បាន​ទិញ​ដី​ពី លោក យិន សារ៉ាក់ និង​មនុស្ស​ពីរ​នាក់​ទៀត​នោះ​ទេ៖ «ប្រសិន​បើ លោក សុខ ហេង ថា​ជា​ដី​របស់​ខ្លួន​តាំង​ពី​ឆ្នាំ​១៩៩៩ មក ម្ដេច​ក៏​មិន​ប្ដឹង​តុលាការ​ឲ្យ​ចាត់​ចែង​ធ្វើ​យ៉ាង​ណា​កុំ​ឲ្យ​មាន​គេ​ទិញ​លក់​ជាច្រើន​នាក់​បែប​នេះ បែរ​ជា​ទើប​មក​ប្ដឹង​នៅ​ឆ្នាំ​២០១២ វិញ។ ធ្វើ​អ៊ីចឹង​អត់​ត្រូវ ហើយ​បើ​តាម​យើង​ពិនិត្យ​មើល​ឯកសារ​ទាំង​នោះ សុទ្ធតែ​ក្លែងក្លាយ​ទាំងអស់ ប៉ុន្តែ​តុលាការ​នៅ​តែ​ចេញ​សាល​ដីកា​បញ្ជាក់​ថា ដី​នោះ​ជា​របស់ សុខ ហេង»

ទន្ទឹម​គ្នា​នេះ លោក យិន សារ៉ាក់ ក៏​បដិសេធ​ចំពោះ​កំណត់​ហេតុ​របស់​តុលាការ ថា​ខ្លួន​គ្មាន​ដី​លក់​ឲ្យ​លោក​ឧកញ៉ា សុខ ហេង ទេ និង​អះអាង​ថា ក្នុង​ឆ្នាំ​១៩៩៩ ដី​នោះ​ក៏​ពុំ​មាន​តម្លៃ​ខ្ពស់​ដូច​ការ​អះអាង​របស់ លោក សុខ ហេង ដែរ។

មិន​ខុស​គ្នា​ប៉ុន្មាន​ឡើយ ឈ្មោះ យិន ចំរើន និង​ឈ្មោះ សំ ម៉ៅ ក៏​ភ្ញាក់​ខ្លួន​ព្រើត ព្រោះ​ពុំ​បាន​ដឹង​ខ្លួន​ថា​មាន​ដី​លក់​ទៅ​ឧកញ៉ា​ម្នាក់​នោះ​ទេ ពោល​គឺ​រាល់​ឯកសារ​មាន​ស្នាម​មេដៃ​ទាំងឡាយ គឺ​សុទ្ធតែ​ក្លែងក្លាយ ក្រោយ​ពី​ក្រសួង​មហាផ្ទៃ ធ្វើ​កោសល្យវិច័យ​រួច​រាល់។

នៅ​ក្នុង​កំណត់​ហេតុ​របស់​តុលាការ​ដដែល លោក យិន សារ៉ាក់ សារភាព​ថា តាម​ពិត​ដំបូង​ឡើយ រូប​គាត់ និង​លោក សុខ ហេង គឺ​ជា​បង​ប្អូន​ធម៌ ហើយ​បាន​រួម​គំនិត​គ្នា​បន្លំ​ឯកសារ​ដី​ដែល​ជា​ដី​របស់​ឪពុក​ម្ដាយ​ខ្លួន ដើម្បី​យក​ទៅ​ដាក់​នៅ​ធនាគារ​យក​ប្រាក់​រក​ស៊ី។ លោក​ថា ដី​នោះ​មាន​កម្មសិទ្ធិ និង​មាន​ម្ចាស់​ផ្សេងៗ​គ្នា​អស់​ហើយ។ លោក​ក៏​សុខ​ចិត្ត​ទទួល​ទោស​ពី​បទ​ក្លែង​លិខិត​ជាមួយ​ឈ្មោះ សុខ ហេង ដែរ ព្រោះ​ខ្លួន​គ្មាន​ដី​ទេ។ ស្រប​គ្នា​នោះ លោក យិន សារ៉ាក់ ក៏​សំណូមពរ​ឲ្យ​បង្វិល​សំណុំ​រឿង​នេះ​ទៅ​តុលាការ​ថ្នាក់​ក្រោម ដើម្បី​បើក​ការ​ស៊ើប​អង្កេត​ឡើង​វិញ​ទៀត​ផង។

ចំពោះ​វិវាទ​ដីធ្លី​នេះ មេ​ភូមិ​ត្រពាំងពោធិ៍ លោក វ៉ាយ វ៉ាន់ ក៏​ទទួល​ស្គាល់​ថា មនុស្ស​ពីរ​នាក់​នោះ​បន្លំ​ឯកសារ​ដែរ៖ «រឿង​ឯកសារ​ហ្នឹង គឺ​បន្លំ​មែន ហើយ​បន្លំ​ឯកសារ​ហ្នឹង គឺ​នៅ​ពេល​ពួក​គេ​ត្រូវ​គ្នា ដល់​ពេល​ឈប់​ត្រូវ​គ្នា ក៏​ប្ដឹង​គ្នា​តែ​ម្តង​ទៅ»

ពលរដ្ឋ​ទាំង​នោះ​អះអាង​ថា មួយ​រយៈ​ចុង​ក្រោយ​នេះ មាន​ពលរដ្ឋ​ខ្លះ​ត្រូវ​បាន​តុលាការ​កោះ​ហៅ​ឲ្យ​ចូល​បំភ្លឺ​រឿង​ដី​ជម្លោះ​នេះ តាម​បណ្ដឹង​របស់​លោក​ឧកញ៉ា សុខ ហេង ប៉ុន្តែ​មាន​ប្រជាពលរដ្ឋ​ខ្លះ​ទៀត មិន​ទាន់​មាន​ឈ្មោះ​ក្នុង​បណ្ដឹង​នៅ​ឡើយ​ទេ។

ទាក់ទិន​បញ្ហា​នេះ​ដែរ លោក​មេធាវី ជូង ជូងី ពន្យល់​ថា ប្រសិន​បើ​ពលរដ្ឋ​ធ្លាប់​បាន​តតាំង​ក្តី​ជាមួយ​ឧកញ៉ា​នោះ គឺ​ពួក​គាត់​អាច​ប្ដឹង​សុំ​ឲ្យ​តុលាការ​សើរើ​រឿង​នេះ​ឡើង​វិញ​បាន។ ដោយឡែក​ភាគី​ថ្មី​ដែល​មិន​ចូល​តុលាការ គឺ​ពួក​គាត់​អាច​ប្ដឹង​សុំ​ឲ្យ​តុលាការ​បញ្ឈប់​ការ​អនុវត្ត​រឹប​អូស​យក​ដី​ពួក​គាត់ ប្រសិន​បើ​ដី​នោះ​ជា​កម្មសិទ្ធិ​របស់​ពួក​គាត់។ រីឯ​ជន​ដែល​ក្លែង​បន្លំ​ឯកសារ​យក​ដី​ពី​ប្រជាពលរដ្ឋ​នោះ បើ​តុលាការ​រក​ឃើញ​ដូច្នេះ​មែន ត្រូវ​ទទួល​ខុស​ត្រូវ​ចំពោះ​មុខ​ច្បាប់៖ «ក្រែង​ពលរដ្ឋ​សំអាង​ថា ជា​ដី​របស់​គាត់​ហើយ​តើ​អី! អ៊ីចឹង​មិន​ចាំបាច់​ប្ដឹង​ទាមទារ​ដី​ទេ ផ្អែក​ទៅ​លើ​ឯកសារ​ដែល​គាត់​មាន​ហ្នឹង គឺ​ពួក​គាត់​ប្ដឹង​សុំ​ឲ្យ​តុលាការ​សម្រេច​បញ្ឈប់​ការ​អនុវត្ត​នោះ​វិញ»

ពលរដ្ឋ​ដាក់​ការ​សង្ស័យ​ថា មូលហេតុ​ដែល លោក សុខ ហេង ហ៊ាន​ចេញ​មុខ​ដណ្ដើម​យក​ដី​ពួក​គាត់​ទាំង​ខុស​ច្បាប់​នេះ គឺ​ដោយសារ​តុលាការ​មិន​ឯករាជ្យ មិន​យុត្តិធម៌ និង​មាន​អ្នក​ធំ​កាង​នៅ​ពី​ក្រោយ​ខ្នង​នៃ​រឿង​នេះ​ទៀត​ផង។

យ៉ាង​ណា​ក៏ដោយ ប្រជាពលរដ្ឋ​ទាំង ១៣​គ្រួសារ ក៏​ព្រមាន​ថា ប្រសិន​បើ​តុលាការ​នៅ​តែ​មិន​ចាត់ការ​តាម​បណ្ដឹង​របស់​ពួក​គាត់​ដែល​បាន​ប្ដឹង​នោះ​ទេ ហើយ​បន្ត​ស៊ី​សំណូក​ពី​លោក​ឧកញ៉ា​ម្នាក់​នោះ ដោយ​នៅ​តែ​បន្ត​ចេញ​សាល​ដីកា​រឹប​អូស​យក​ដី​ពួក​គាត់​ទាំង​អយុត្តិធម៌​ទៀត​នោះ គឺ​ពួក​គាត់​នឹង​ឡើង​តវ៉ា​សុំ​អន្តរាគមន៍​ផ្ទាល់​ពី​លោក​នាយក​រដ្ឋមន្ត្រី ហ៊ុន សែន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល