តំណាង​ពលរដ្ឋ​មាន​ទំនាស់​ដី​ជាមួយ​ឧកញ៉ា​មួយ​នៅ​បាត់ដំបង​បារម្ភ​ពី​សុវត្ថិភាព​ក្រោយ​មាន​បណ្ដឹង

ដោយ មួង ណារ៉េត
2018-10-24
Share
ជម្លោះ​ដី បាត់ដំបង ៦២០ ពលរដ្ឋ​អ្នក​តវ៉ា​រឿង​ដី​ម្នាក់​ក្នុង​ចំណោម​ច្រើន​នាក់​ទៀត ផ្ដល់​បទសម្ភាសន៍​នៅសាលា​​ខេត្ត​បាត់ដំបង ដោយ​អះអាង​ថា ឧកញ៉ា សង ថន បាន​ចូល​រំលោភ​ដី​កម្មសិទ្ធិ​របស់​ប្រជាពលរដ្ឋ នៅ​ថ្ងៃ​២៥ សីហា ២០១៤។
RFA

តំណាង​ប្រជាពលរដ្ឋ​មាន​ទំនាស់​ដីធ្លី​ជាមួយ​ឧកញ៉ា សង ថន ចំនួន​ ៥​នាក់​តំណាង​ឲ្យ​ពលរដ្ឋ​ ២១៥​គ្រួសារ​នៅ​ស្រុក​គាស់ក្រឡ ខេត្ត​បាត់ដំបង បាន​នាំគ្នា​រត់គេច​មិន​ហ៊ាន​ស្នាក់នៅ​ក្នុង​ផ្ទះ​ដោយសារ​ខ្លាច​សមត្ថកិច្ច​តាម​ចាប់​ពួកគាត់។ ការភ័យខ្លាច​នេះ ដោយសារតែ​ពលរដ្ឋ​ទាំងនោះ​មិន​បាន​ចូល​បំភ្លឺ​តាម​ដីកា​បង្គាប់​របស់​សាលាដំបូង​ខេត្ត​បាត់ដំបង ឲ្យ​ពួកគាត់​ចូល​បំភ្លឺ​កាលពីដើម​ខែ​តុលា​កន្លង​ទៅ។

ពលរដ្ឋ​មាន​ទំនាស់​ដីធ្លី​នៅ​ស្រុក​គាស់ក្រឡ លើកឡើង​ថា ឧកញ៉ា សង ថន អាង​តែ​មាន​លុយ​រត់​ទៅ​រក​ស្ថាប័ន​តុលាការ ហើយ​ប្ដឹង​បំពាន​រំលោភ​យក​ដី​របស់​ពួកគាត់ ដែល​បាន​កាន់កាប់​ជាច្រើន​ឆ្នាំ​មក​ហើយ​ធ្វើជា​កម្មសិទ្ធិ​របស់​ខ្លួន។

តំណាង​ពលរដ្ឋ​ម្នាក់​រស់នៅ​ភូមិ​តានួត ឃុំ​ព្រះផុស ស្រុក​គាស់ក្រឡ លោក យួម យឿប ឲ្យ​ដឹង​ថ្ងៃ​ទី​២៤ តុលា ថា ពួកគាត់​តំណាង​ឲ្យ​ពលរដ្ឋ​ចំនួន​៥​នាក់ ដែល​តែងតែ​ចេញមុខ​តតាំង​ជាមួយ​លោក ឧកញ៉ា សង ថន ដើម្បី​ការពារ​ដី​របស់​ខ្លួន​នោះ ត្រូវ​បាន​លោក​ឧកញ៉ា​រូប​នេះ​ប្ដឹង​ពួកគាត់​ទៅ​សាលាដំបូង​ខេត្ត​បាត់ដំបង ដើម្បី​រំលោភ​យក​ដី​របស់​ពួកគាត់។ លោក យួម យឿប អះអាង​ថា ពួកគាត់​មិន​ព្រម​ចុះ​ចេញពី​ដី​នោះ​ជាដាច់ខាត បើ​ទោះ​បី​ជា​ប្រឈម​នឹង​ជាប់គុក​ជាប់ច្រវាក់​ក៏ដោយ ព្រោះ​សព្វថ្ងៃ​ពួកគាត់​ក្រីក្រ​គ្មាន​មុខរបរ​ផ្សេង​ក្រៅ​អំពី​ការ​ដាំដុះ​នៅ​លើ​ដី​ទំនាស់​ដើម្បី​រក​ប្រាក់​ចំណូល​ដោះស្រាយ​ជីវភាព​គ្រួសារ​នោះ​ទេ៖ «ខ្ញុំ​ខ្លាច​ប៉ូលិស​ហើយ​ប៉េអិម​គេ​មក​ចាប់​ខ្ញុំ​យក​ទៅ​តុលាការ​ទៀត​ខ្ញុំ​ភ័យ​បាយ​មិនបាន ហើយ​ប្រជាពលរដ្ឋ ២១៥​គ្រួសារ គាត់​សព្វថ្ងៃ​គាត់​គ្មាន​កម្លាំងកំហែង​នឹង​ធ្វើ​ការ​ហើយ​បាន​ក៏​អត់​បាន​ដែរ​អ្នកណា​ក៏​ដូច​អ្នកណា​ដែរ ហើយ​សព្វ​ថ្ងៃជា​មនុស្ស​តេលតាល មនុស្ស​គ្មាន​ម៉ែ​គ្មាន​ឪ​ទេ គ្មាន​អាជ្ញាធរ​ណា​គេ​មើល​ឃើញ​ទេ​សព្វថ្ងៃ​នេះ»

ពលរដ្ឋ​រូប​នេះ​បន្ថែម​ទៀត​ថា សព្វថ្ងៃ​ពួកគាត់​គ្មាន​ទីពឹង​ដើម្បី​តតាំង​ជាមួយ​លោក ឧកញ៉ា សង ថន បាន​ទេ ព្រោះ​គ្មាន​លុយកាក់​តស៊ូ​នៅ​ក្នុង​តុលាការ​ឡើយ ចំណែក​លោក ឧកញ៉ា​រូប​នេះ​វិញ​មានទ្រព្យ​សម្បត្តិ​ស្ដុកស្ដម្ភ​អាច​ធ្វើ​អ្វី​បាន​ទាំងអស់ ហើយ​ធ្វើ​ឲ្យ​មន្ត្រី​តុលាការ​មើល​ខ្មៅ​ឃើញ​ទៅ​ជាស រហូត​តុលាការ​បាន​បង្គាប់​ឲ្យ​ពួកគាត់​ឲ្យ​ចូល​បំភ្លឺ​លើ​សំណុំ​រឿង​នេះ ប៉ុន្តែ​ពួកគាត់​មិន​ហ៊ាន​ចូល​បំភ្លឺ​ទេ ព្រោះ​ខ្លាច​តុលាការ​ចាប់​ដាក់​ពន្ធនាគារ៖ «បាទ​ចាប់ពី​ឆ្នាំ​២០១៥​មក​បាន ខ្ញុំ​ធ្វើ​ក្លាយទៅជា​វាល​ប្រហែល​៧០​ភាគរយ​ហើយ ក៏​លោក​ឧកញ៉ា​នឹង​យក​កាំភ្លើង ដោយមាន​ក្រុម​ស្លៀក​ស៊ីវិល​មក​គំរាម​ប្រពន្ធ​ខ្ញុំ​នៅផ្ទះ ថា​ឈប់​ឲ្យ​ប្ដី​នាង​ឯង​យក​ដី​ខ្ញុំ​ទៀ​តទៅ​ប្រយ័ត​ប្ដី​នាង​ឯង​លែង​បាន​អោប​ប្រពន្ធ​អោប​កូន»

លោក​បន្ត​ទៀត​ថា ពួកគាត់​ចំនួន ២១៥​គ្រួសារ​បាន​កាន់កាប់​ដី​ទំនាស់​ដែល​មាន​ទំហំ​ប្រហែល ១​ពាន់​២០០​ហិកតារ ស្ថិតនៅ​ឃុំ​ព្រះផុស តាំងពី​ឆ្នាំ​២០០៨​មក ពោល​គឺ​តាំងតែ​ដី​នៅ​មាន​ព្រៃ​ដុះពេញ ហើយ​ពួកគាត់​បាន​នាំគ្នា​គាស់កកាយ​ដោយ​កម្លាំង​មនុស្ស​បន្តិច​ម្ដង រហូត​ក្លាយទៅជា​ដី​ទីវាល​ស្រឡះ ហើយក៏​នាំ​បង្កបង្កើនផល​នៅ​លើ​ដី​នោះ​រក​ប្រាក់​ចំណូល​ដោះស្រាយ​ជីវភាព​រហូត​ទល់​សព្វ​ថ្ងៃ។

ចំណែក​ពលរដ្ឋ​មាន​ទំនាស់​ដីធ្លី​ម្នាក់ទៀត​លោក អេង សារ៉ាត់ ថ្លែង​ថា លោក​បាន​កាន់កាប់​ដី​ទំនាស់​នោះ​ចំនួន ៣​ហិកតារ ហើយ​បាន​ដាំ​ដំណាំ​រួមមាន​ពោត ដំឡូង​មី​ធ្វើ​ស្រូវ​តាំងពី​ឆ្នាំ​២០០៨​មក។ លោក​បន្ថែមទៀតថា ដំបូង​ឡើយ​ដាំ​ដុះ​មិនសូវ​បាន​ផល​ទេ ព្រោះ​ធ្វើ​ដី​មិនសូវ​បាន​ស្អាត​ល្អ​និង​សំបូរ​សត្វ​ស៊ី​ផលដំណាំ ប៉ុន្តែ​ចាប់ពី​ឆ្នាំ​២០១៥​មក​ការ​ដាំដុះ​បាន​ផល​ល្អ ជាពិសេស​ដំណាំ​ពោត និង​ដំឡូង​មី ហើយ​អាច​រក​ប្រាក់​ចំណូល​ដោះស្រាយ​ជីវភាព​គ្រួសារ​បាន ដោយ​មិនបាច់​ធ្វើ​ចំណាកស្រុក​នោះ​ទេ៖ «ដល់ពេល​មានរឿង​អ៊ីចឹង​មានតែ​អំពាវនាវ​សុំ​ឲ្យ​សម្ដេច​ហ៊ុន សែន សម្ដេច​ស ខេង និង​អ្នកស្រី​ប៊ុន រ៉ានី សុំ​ជួយ​ខ្ញុំ​ផង ខ្ញុំ​មិន​ដឹង​មាន​អ្នកណា​ពឹង​ទេ សូម​មេ​តា​ជួយ​រក​យុត្តិធម៌​ឲ្យ​ប្រជាពលរដ្ឋ​ផង ព្រោះ​អី​ខ្ញុំ​បង្កបង្កើនផល​ជា​យូរ​ណាស់​មក​ហើយ។ ខ្ញុំ​ខ្លាច​គេ​ចាប់​ដាក់គុក​គេ​យក​ដីធ្លី​រួច​ខ្ញុំ​មិន​ដឹង​នាំ​កូនចៅ​ទៅ​នៅ​កន្លែង​ណា​ទេ ព្រោះ​បើ​អស់​ដី​នោះ​ខ្ញុំ​មិន​មានអី​ជា​ក្ដី​សង្ឃឹម​ក្នុង​ជីវិត​ខ្ញុំ​ទេ»

ពលរដ្ឋ​រូប​នេះ​បន្ថែម​ទៀត​ថា ពួកគាត់​ព្រួយបារម្ភ​ខ្លាច​បាត់បង់​ដី​របស់​ខ្លួន​ទៅជា​កម្មសិទ្ធិ​របស់​លោក​ឧកញ៉ា សង ថន ដោយសារ​ការប្រើប្រាស់​ប្រព័ន្ធ​តុលាការ​រំលោភ​យក​ដី​ពួកគាត់ ហើយ​នៅ​ពេល​នោះ​ពួកគាត់​ច្បាស់​ជា​ដាច់ពោះ​ស្លាប់ ឬមួយ​ក៏​ត្រូវ​ធ្វើ​ចំណាកស្រុក​ទៅ​ប្រទេស​ថៃ​បែក​ប្រពន្ធ​កូន​ជាមិនខាន​ទេ។

លោក​ឧកញ៉ា សង ថន មាន​ប្រសាសន៍ថា ប្រជាពលរដ្ឋ​ដែល​មាន​ទំនាស់​ដី​ជាមួយ​លោក​មាន​មិន​ដល់ ១០​គ្រួសារ​ទេ ហើយ​ពួកគាត់​បាន​រំលោភ​យក​ដី​របស់​លោក​ធ្វើ​កម្មសិទ្ធិ​របស់​ខ្លួន ហើយ​លោក​ក៏បាន​ប្ដឹង​ទៅ​តុលាការ​ដើម្បី​ទាមទារ​យក​ដី​នោះ​មកវិញ ព្រោះ​លោក​បាន​ប្រាប់​ពលរដ្ឋ​ទាំងនោះ​ហើយ ប៉ុន្តែ​ពួកគាត់​មិន​ព្រម​ចុះចេញ​ពី​ដី​ទំនាស់​នោះ​ទេ។ លោក​ឧកញ៉ា រូប​នេះ បន្ថែម​ទៀត​ថា តុលាការ​ក៏​មាន​វិធានការ​លើ​សំណុំ​រឿង​នេះ ដើម្បី​ផ្ដល់​យុត្តិធម៌​ជូន​លោក ប៉ុន្តែ​ប្រជាពលរដ្ឋ​ទាំងនោះ​មិន​ព្រម​ចូល​តាម​ការ​កោះហៅ​របស់​តុលាការ​ចំនួន​២​លើក​ហើយ ទើប​ចុង​ក្រោយនេះ​ខាង​តុលាការ​ក៏បាន​ចេញ​ដី​បង្គាប់​ឲ្យ​ពួកគាត់​ខ្លួន​បំភ្លឺ​តែម្ដង៖ «គាត់​អត់​មានបាន​ទៅកាន់​កាប់​ទេ ដី​របស់ខ្ញុំ​ធ្វើ​ព្រំ​ដី​ខ្ញុំ​ធ្វើ​ផ្លូវ​បើកឡាន​បាន​តាំង​បី​ឆ្នាំ​២០០០​ម្ល៉េះ គាត់​មិន​មាន​ដី​ណា​គាត់​នៅ​ក្បែរ​ដី​ម្ខាង​ផ្លូវ​ម្នាក់។ ដី​ខ្ញុំ​ធ្វើ​ព្រំ​ដី​អាច​បើកឡាន​បាន គាត់​នៅ​ខាងកើត​ខ្ញុំ​នៅ​ខាងលិច​តែ​គាត់​ទើប​ចូល​កាប់​គាស់​គឺ​ដី​ខ្ញុំ​បាន​ឈូស​ឆាយ​ស្អាត​ហើយ​នឹង»

ចំណែក​មេភូមិ​តានួត លោក កន សាត អះអាង​ថា រឿង​នេះ​មិន​បាន​ឲ្យ​ប្រជាពលរដ្ឋ​ទៅ​រស់នៅ​នោះ​ទេ តែ​ពួកគាត់​ក្រីក្រ​ហើយ​នាំគ្នា​ទៅ​កាប់​គាស់​នៅ​លើ​ដី​នោះ​ដោយ​ខ្លួនឯង។ លោក​បន្ថែម​ទៀត​ថា កាលពី​មាន​ទំនាស់​ពី​ដំបូង​មាន​ពលរដ្ឋ​ប្រមាណ​២០០​គ្រួសារ ប៉ុន្តែ​ក្រោយ​មកទៀត​លោក​មិន​បាន​ដឹង​នៅសល់​ពលរដ្ឋ​ប៉ុន្មាន​គ្រួសារ​ទេ៖ «បាទ​មាន​អ្នកណា​គេ​អោយ​គាត់​ទៅ​កាប់​ដី​ទេ ព្រោះ​ដឹង​ថា​ដី​នោះ​ជា​ដី​របស់​គេ ហើយ​អាជ្ញាធរ​បាន​ទៅ​ហាមឃាត់​គាត់​ដែរ ប៉ុន្តែ​មិន​ដឹង​ធ្វើ​មិច​បើ​ពួកគាត់​ខ្វះខាត​មិន​ដឹង​ធ្វើ​មិច។ ពួកគាត់​អ្នកខ្លះ​ក៏​ខ្វះ​ខ្លះ​ក៏​អត់​ដី​ខ្លះ​ក៏​មាន​ដី​ខ្លះ​ដែរ មិនមែន​សុទ្ធតែ​អត់​ដី​ទាំងអស់​គ្នា​ទេ។ ខ្ញុំ​មិន​ដឹង​ថា គាត់​ទៅ​ណា​មក​ណា​ខ្ញុំ​ក្ដាប់​មិនបាន ព្រោះ​គេ​ទៅ​គេ​មក​គេ​មិនដែល​ប្រាប់​ខាង​ភូមិ​ផង»

មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​បាត់ដំបង លោក យិន ម៉េងលី ដែល​បាន​ចុះទៅ​អង្កេត​ផ្ទាល់​នៅ​តំបន់​ដី​មាន​ទំនាស់ អះអាង​ថា ដី​ទំនាស់​សព្វ​ប្រជាពលរដ្ឋ​បាន​ទៅ​រស់នៅ​ហើយ​ដាំ​ដំឡូង​មី ពោត ស្វាយចន្ទី​ស្ទើរ​តែ​រក​ដី​ទំនេរ​មិនបាន។ សង្គម​ស៊ីវិល​រូប​នេះ​បន្ថែម​ទៀត​ថា ប្រជាពលរដ្ឋ​មាន​ទំនាស់​ដី​នេះ​មាន​ជាង​២០០​គ្រួសារ​មិនមែន ១០​គ្រួសារ​ដូច​ការ​លើកឡើង​របស់​លោក​ឧកញ៉ា​នោះ ហើយ​ពួកគាត់​រស់នៅ​ដោយ​ភ័យខ្លាច​ជាពិសេស​អ្នក​ប្លែក​មុខ​ដែល​បើក​រថយន្ត​ឈប់​នៅ​ក្នុង​ភូមិ​របស់​ពួកគាត់៖ «ការ​ព្រួយបារម្ភ​ពិតជា​កើតមាន គាត់​និយាយ​ប្រាប់​ខ្ញុំ​ពេល​ពួកគាត់​ចូលទៅ​តុលាការ​ដំបូង​តុលាការ​ឃុំខ្លួន​៥០​អត់​ឃុំ​៥០​ភាគរយ​នេះ​ជា​ពាក្យ​មួយ​ដែល​ធ្វើ​ឲ្យ​ពួកគាត់​មានការ​ព្រួយបារម្ភ អីចឹង​នៅ​ពេល​សាកសួរ​គឺ​សាកសួរ​មិន​អត់​ចប់​ទេ ពួកគាត់​នៅ​ពេល​គេ​ឲ្យ​សម្រាក​ចេញ​មក​ក្រៅ​ហើយ​ហើយ​នាំគ្នា​ចេញ​មក​ផ្ទះ​ទាំងអស់។ ប៉ុន្តែ​អ្វី​ដែល​ខ្ញុំ​សោកស្ដាយ គឺ​សោកស្ដាយ​ថា ខាង​ភាគី​ឧកញ៉ា​គប្បី​តែ​ប្រើ​យន្តការ​ជាមួយ​អាជ្ញាធរ​ដោះស្រាយ​បញ្ហា​នេះ ប្រសើរ​ជាង​ប្រើប្រាស់​តុលាការ»

ពលរដ្ឋ​អះអាង​ថា ដី​ទំនាស់​នេះ ឧកញ៉ា សង ថន បាន​ប្ដឹង​ពួកគាត់​ទៅ​តុលាការ​នៅ​ឆ្នាំ​២០១៥ ប៉ុន្តែ​ទើបតែ​តុលាការ​បាន​កោះហៅ​ពួកគាត់​ទៅ​បំភ្លឺ​នៅ​ឆ្នាំ​២០១៨​នេះ​ទេ។ ចំណែក​​ដីកា​បង្គាប់​ឲ្យ​ខ្លួន​បំភ្លឺ​ចុងក្រោយ​នេះ ពួកគាត់​មិនបាន​ចូល​បំភ្លឺ ដោយសារ​ខ្លាច​តុលាការ​ឃុំខ្លួន ព្រោះ​លោក សង ថន បាន​ប្រាប់​ពួកគាត់​តុលាការ​អាច​នឹង​ឃុំខ្លួន​ពួកគាត់ ៥០​ភាគរយ​និង​មិន​ឃុំខ្លួន​៥០​ភាគរយ ដូច្នេះ​ពួកគាត់​ក៏​សម្រេចចិត្ត​មិន​ចូល​បំភ្លឺ មិន​មាន​ស្ថាប័ន​ណា​ជួយ​ពួកគាត់​នោះ​ទេ។

លោក យិន ម៉េងលី លើកឡើង​ថា បញ្ហា​នេះ​អាជ្ញាធរ​ខេត្ត​ត្រូវតែ​បង្កើត​គណៈកម្មការ​ដោះស្រាយ​មួយ ហើយ​ហៅ​ភាគី​ពាក់ព័ន្ធ​ទៅ​សម្របសម្រួល​ដោះស្រាយ​ក្រៅ​ប្រព័ន្ធ​តុលាការ​បាន ដោយ​មិនបាច់​បញ្ជូន​ទៅ​តុលាការ​ឡើយ ព្រោះ​ដី​នេះ​មិនទាន់​មាន​ប័ណ្ណ​កាន់កាប់​នៅឡើយ​ទេ ម្យ៉ាងទៀត​ដោះស្រាយ​នៅ​តុលាការ​ច្បាស់​ជា​មាន​អ្នកឈ្នះ​និង​អ្នក​ចាញ់ ហើយ​ភាគី​ដែល​ចាញ់​ច្បាស់​ជា​មិន​សុខចិត្ត​ទេ ហើយ​ពេលនោះ​នឹង​មាន​ការ​តវ៉ា​ឬក៏​ប្ដឹងផ្ដល់​គ្នា​ទៅ​ស្ថាប័ន​កំពូលៗ​ទៀត ដើម្បី​ឲ្យ​ជួយ​ដោះស្រាយ​បន្ត ដែល​នាំ​ឲ្យ​អូស​បន្លាយពេល​កាន់តែ​យូរ និង​ចំណាយ​អស់​ថវិកា​ច្រើន​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល