ក្រសួង​ដែនដី​នឹង​កោះ​ហៅ​ក្រុមហ៊ុន​ស្ករ​អំពៅ​ចំនួន​ពីរ​តាម​បណ្ដឹង​ពលរដ្ឋ​ខេត្ត​កោះកុង

ដោយ សន ចាន់រដ្ឋា
2017-01-18
Share
ជម្លោះ​ដីធ្លី ក្រុមហ៊ុន​ស្ករ​អំពៅ កោះកុង ២០១៧ ៨៥៥ ពលរដ្ឋ​មាន​ទំនាស់​ដីធ្លី​នឹង​ក្រុមហ៊ុន​ស្ករ​អំពៅ កោះកុង ផ្លេនថេស៊ិន (Koh Kong Plantation) និង​ក្រុមហ៊ុន​ស្ករ​អំពៅ កោះកុង ស៊ូហ្គើរ (Koh Kong Sugar) លើក​បដា​តវ៉ា​នៅ​ក្រសួង​រៀបចំ​ដែនដី នគរូបនីយកម្ម និង​សំណង់ ថ្ងៃ​ទី​១៨ ខែ​មករា ឆ្នាំ​២០១៧។ RFA/Sorn Chanratha
RFA/Sorn Chanratha

ក្រសួង​រៀបចំ​ដែនដី នគរូបនីយកម្ម និង​សំណង់ កំណត់​យក​ថ្ងៃ​ទី​២០ ខែ​មករា ឆ្នាំ​២០១៧ ដើម្បី​ជជែក​រក​ដំណោះស្រាយ​ជាមួយ​ក្រុមហ៊ុន​ស្ករ​អំពៅ​ចំនួន​ពីរ​នៅ​ខេត្ត​កោះកុង តាម​បណ្ដឹង​របស់​ពលរដ្ឋ​ប្រមាណ ១៧០​គ្រួសារ។

ក្រុមហ៊ុន​ទាំង​ពីរ​ដែល​នឹង​ជួប​ពិភាក្សា​នេះ គឺ​ជា​អតីត​ក្រុមហ៊ុន​របស់​ឧកញ៉ា លី យ៉ុងផាត់ និង​ក្រុមហ៊ុន​របស់​ឧកញ៉ា ហេង ហ៊ុយ ដែល​ពលរដ្ឋ​ប្រមាណ ១៧០​គ្រួសារ​អះអាង​ថា ក្រុមហ៊ុន​ទាំង​ពីរ​នេះ​បាន​ឈូស​ឆាយ​បំផ្លាញ​ដីធ្លី និង​ផ្ទះ​សម្បែង​របស់​ពួក​គេ​កាល​ពី​ឆ្នាំ​២០០៦។

យោង​តាម​លិខិត​ចុះ​ថ្ងៃ​ទី​១៣ ខែ​មករា ឆ្នាំ​២០១៧ ដែល​ដាក់​ទៅ​ក្រុមហ៊ុន​ស្ករ​អំពៅ កោះកុង ផ្លេនថេស៊ិន (Koh Kong Plantation) និង​ក្រុមហ៊ុន​ស្ករ​អំពៅ កោះកុង ស៊ូហ្គើរ (Koh Kong Sugar) ឲ្យ​ដឹង​ថា ក្រសួង​បាន​ចាត់​តាំង​លោក ទេព ធន ជា​អនុរដ្ឋលេខាធិការ និង​ក្រុម​ការងារ​ដោះស្រាយ​វិវាទ​ដីធ្លី​ទី​៨ ដើម្បី​ពិនិត្យ​ទីតាំង​វិវាទ និង​ជួប​ពិភាក្សា​ជាមួយ​តំណាង​ក្រុមហ៊ុន​ទាំង​ពីរ។

ក្រៅ​ពី​លិខិត​ដាក់​ទៅ​ក្រុមហ៊ុន​ទាំង​ពីរ​ដើម្បី​ជួប​ពិភាក្សា ក្រសួង​រៀបចំ​ដែនដី នគរូបនីយកម្ម និង​សំណង់ ក៏​បាន​ផ្ញើ​លិខិត​មួយ​ផ្សេង​ទៀត ដើម្បី​អញ្ជើញ​ពលរដ្ឋ​ចំនួន ១៥​គ្រួសារ ដើម្បី​ជួប​ពិភាក្សា​រក​ដំណោះស្រាយ​ជាមួយ​ក្រុមហ៊ុន​ឧកញ៉ា ហេង ហ៊ុយ នៅ​រសៀល​ថ្ងៃ​ទី​២០ ខែ​មករា ឆ្នាំ​២០១៧។

តំណាង​ពលរដ្ឋ​មាន​ទំនាស់​ដីធ្លី លោកស្រី ផាវ ញ៉ឺង ថ្លែង​ថា ការ​រៀបចំ​ជំនួប​រវាង​ពលរដ្ឋ​ទាំង ១៥​គ្រួសារ​ក្នុង​ចំណោម ១៧៥​គ្រួសារ​ជាមួយ​ក្រុមហ៊ុន គឺ​ជា​ផ្នែក​មួយ​នៃ​ដំណើរ​ការ​ដោះស្រាយ។ តែ​លោកស្រី​យល់​ថា ប្រសិន​បើ​ការ​ជួប​នេះ​គ្រាន់​តែ​ជា​ការ​ជជែក ហើយ​មិន​មាន​ដំណោះស្រាយ​នោះ គឺ​ធ្វើ​ឲ្យ​ពលរដ្ឋ​អស់​ជំនឿ​លើ​ស្ថាប័ន​មួយ​នេះ​ទាំង​ស្រុង៖ «ដំណោះស្រាយ​នេះ​ទៅ​ខេត្ត​តែ​មួយ ភូមិ-ឃុំ ស្រុក​តែ​មួយ ហេតុ​អី​បាន​ជា​ឯកឧត្តម​លើក​សំណើ​នេះ​ទុក​គ្រាន់​តែ​ជជែកបើ​លើក​មុន​ប្រាប់​យើង​ថា​ជជែក​ជាមួយ​ក្រុមហ៊ុន​ម្តង​ហើយ ហេតុ​អី​បាន​ជា​លើក​នេះ​ជជែក​ម្តង​ទៀតបើ​សិន​ណា​នៅ​តែ​ឆ្លើយ​ថា​ជជែកៗៗ គិត​តែ​ជជែក​ពិភាក្សា ហើយ​អត់​មាន​ដំណោះស្រាយ​នោះ តើ​ពួក​យើង​គិត​ម៉េច? ពួក​យើង​បាត់បង់​ជំនឿ​លើ​ក្រសួង​ទាំង​ស្រុង បើ​សិន​ណា​ជា​ធ្វើ​បែប​នេះ»

ក្រុម​ពលរដ្ឋ​មាន​ទំនាស់​ដីធ្លី​ប្រមាណ ១០០​នាក់ ដែល​តំណាង​ឲ្យ​ពលរដ្ឋ ១៧០​គ្រួសារ នៅ​ព្រឹក​ថ្ងៃ​ទី​១៨ ខែ​មករា ក៏​បាន​នាំ​គ្នា​ធ្វើ​ដំណើរ​ចេញ​ពី​វត្ត​សាមគ្គីរង្សី ឆ្ពោះ​ទៅ​កាន់​ក្រសួង​រៀបចំ​ដែនដី នគរូបនីយកម្ម និង​សំណង់ ដើម្បី​ស្នើ​ឲ្យ​ក្រសួង បង្ហាញ​សំណើ​របស់​ពលរដ្ឋ​ដែល​ក្រសួង​គ្រោង​យក​ទៅ​ជជែក​ជាមួយ​ក្រុមហ៊ុន​នោះ ផ្សព្វផ្សាយ​ជា​សាធារណៈ។

កាល​ពី​ថ្ងៃ​ទី​៥ ខែ​មករា ឆ្នាំ​២០១៧ លោក ទេព ធន អនុរដ្ឋលេខាធិការ​ក្រសួង​រៀបចំ​ដែនដី នគរូបនីយកម្ម និង​សំណង់ បាន​សន្យា​ថា នឹង​យក​សំណើ​ពលរដ្ឋ​ដែល​ស្នើសុំ​សំណង​ជា​ដី​ទំហំ ២​ហិកតារ​ក្នុង​មួយ​គ្រួសារ និង​ការ​សង់​ផ្លូវ​មួយ​ខ្សែ​ប្រវែង ៩០​ម៉ែត្រ ទៅ​ជជែក​ជាមួយ​ក្រុមហ៊ុន។ ដោយឡែក​សំណើ​សុំ​សំណង​លើ​ការ​ខូចខាត​ជា​ថវិកា​ចំនួន ៥​ពាន់​ដុល្លារ​នោះ នៅ​មិន​ទាន់​ទទួល​បាន​ការ​ឆ្លើយតប​យ៉ាង​ណា​នោះ​ទេ។

ទាក់ទង​នឹង​សំណើ​សុំ​សំណង​ជា​ប្រាក់ ៥​ពាន់​ដុល្លារ​នេះ លោក ទេព ធន បាន​ឲ្យ​អាស៊ីសេរី​ដឹង​កាល​ពី​ថ្ងៃ​ទី​៩ ខែ​មករា ថា លោក​មិន​សូវ​មាន​សង្ឃឹម​ថា ក្រុមហ៊ុន​នឹង​ចេញ​សង​នោះ​ឡើយ ដោយសារ​ដី​ដែល​ប៉ះពាល់ គឺ​ជា​ដី​របស់​រដ្ឋ ដែល​បាន​ជួល​ទៅ​ឲ្យ​ក្រុមហ៊ុន​ឯកជន​ទៅ​ហើយ។

ទោះ​យ៉ាង​ណា ក្រុម​ពលរដ្ឋ​នឹង​រង់ចាំ​មើល​លទ្ធផល បន្ទាប់​ពី​ការ​ជួប​ចរចា​គ្នា​នៅ​ថ្ងៃ​ទី​២០ ខែ​មករា ខាង​មុខ​សិន។

តំណាង​ពលរដ្ឋ លោកស្រី ផាវ ញ៉ឺង អះអាង​ថា បើ​ទោះ​បី​ជា​ក្រុមហ៊ុន​យល់ព្រម​ផ្តល់​សំណង​ដល់​ពលរដ្ឋ​ប្រមាណ ១៥​គ្រួសារ​នោះ​ក៏ដោយ ក៏​ពលរដ្ឋ​នឹង​នៅ​តែ​រួម​គ្នា​តវ៉ា​រហូត​ទាល់​តែ​ពលរដ្ឋ​ទាំងអស់​ទទួល​បាន​ដំណោះស្រាយ។

លោកស្រី ផាវ ញ៉ឺង ឲ្យ​ដឹង​បន្ទាប់​ពី​ចូល​ជួប​ជាមួយ​តំណាង​ក្រសួង​រៀបចំ​ដែនដី នៅ​ព្រឹក​ថ្ងៃ​ទី​១៨ ខែ​មករា ថា ប្រសិន​បើ​ការ​ជួប​ចរចា​នោះ​បាន​លទ្ធផល​យ៉ាង​ណា តំណាង​ក្រសួង​នឹង​យក​លទ្ធផល​នោះ​ទៅ​ដាក់​ជូន​រដ្ឋមន្ត្រី​សម្រេច។ ដោយឡែក​ប្រសិន​បើ​ការ​ជួប​នេះ​មិន​ទទួល​បាន​លទ្ធផល​វិជ្ជមាន​ទេ​នោះ ក្រសួង​នឹង​បញ្ជូន​ពាក្យ​បណ្ដឹង​នេះ​ទៅ​តុលាការ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល