ពលរដ្ឋ​ពីរ​ក្រុម​នៅ​ភ្នំពេញថ្មី​ដណ្ដើម​កាន់​កាប់​ដី​មួយ​កន្លែង​បន្ទាប់​ពី​ឈ្នះ​ក្តី

ដោយ សេក បណ្ឌិត
2015-01-07
Share
ហួយ តារាវី ជម្លោះ​ដីធ្លី​ភូមិ​រោងចក្រ ៦២០ លោកស្រី ហួយ តារាវី តំណាង​ភាគី​ជម្លោះ​ជាមួយ លោកស្រី ជា សារ៉ុម លើក​បង្ហាញ​បញ្ជី​ឈ្មោះ​សមាជិក​នៅ​កន្លែង​ដី​ទំនាស់​ភូមិ​រោងចក្រ សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ កាល​ពី​ថ្ងៃ​ទី​៦ ខែ​មករា ឆ្នាំ​២០១៥។
RFA/Sek Bandith

ប្រជាពលរដ្ឋ​ពីរ​ក្រុម​នៅ​ភូមិ​រោងចក្រ សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ កំពុង​មាន​ទំនាស់​ជាមួយ​គ្នា​ក្នុង​ការ​ដណ្ដើម​កាន់​កាប់​ដី​មួយ​កន្លែង ដែល​អាជ្ញាធរ​ធ្លាប់​បណ្ដេញ​ពួក​គាត់​ចេញ​កាល​ពី​ជាង ១០​ឆ្នាំ​មុន។

ការ​ដណ្ដើម​គ្នា​កាន់​កាប់​ដី​របស់​ប្រជាពលរដ្ឋ​នេះ កើត​មាន​បន្ទាប់​ពី​តុលាការ​កាត់​ក្តី​ឲ្យ​ឈ្នះ​ភាគី​អ្នក​មាន​លុយ​ម្ខាង​ទៀត ដែល​ចង់​គ្រប់គ្រង​ដី​តំបន់​នោះ​ដែរ។

អាជ្ញាធរ​ខណ្ឌ​សែនសុខ ចុះ​អន្តរាគមន៍​បញ្ឈប់​សកម្មភាព​ចុះ​បោះ​បង្គោល​ចែក​ដី​តាំង​ទី​លំនៅ​របស់​ពលរដ្ឋ​ពីរ​ក្រុម ដែល​ជា​អតីត​អ្នក​ភូមិ​រោងចក្រ ចំនួន ១៦៣​គ្រួសារ លើ​ដី​ទំហំ​ប្រមាណ​ជិត ១​ម៉ឺន​ម៉ែត្រ​ក្រឡា បន្ទាប់​ពី​ឈ្នះ​ក្តី​កាល​ពី​ឆ្នាំ​២០១១។

អ្នក​ភូមិ​ទាំង​ពីរ​ក្រុម សុទ្ធតែ​មាន​បញ្ជី​សមាជិក​រៀងៗ​ខ្លួន ថា​មាន​ចំនួន ១៦៣​គ្រួសារ​ដូច​គ្នា ប៉ុន្តែ​មិន​មាន​ឈ្មោះ​ដូច​គ្នា​ទេ ហើយ​ភាគី​ទាំង​ពីរ​ចោទ​ប្រកាន់​គ្នា​ទៅ​វិញ​ទៅ​មក​ថា បញ្ជី​ឈ្មោះ​នោះ​មិន​ត្រឹមត្រូវ ដោយ​បាន​បន្លំ​ឈ្មោះ​អ្នក​រស់នៅ​ក្នុង​ភូមិ​នោះ​ពិត​ប្រាកដ។

ស្ត្រី​អ្នក​ភូមិ​ម្នាក់​ឈ្មោះ ជា សារ៉ុម ដែល​អះអាង​ថា គាត់​ជា​តំណាង​អ្នក​ភូមិ បាន​ដឹក​នាំ​តវ៉ា​ប្ដឹង​ផ្តល់​ជាមួយ​ភាគី​ជម្លោះ​ម្ខាង​ទៀត គឺ​លោកស្រី កែវ នាម។ លោកស្រី ជា សារ៉ុម បាន​បដិសេធ​ភាគី​ម្ខាង​ទៀត​ដែល​ដឹក​នាំ​ដោយ​ឈ្មោះ អ៊ឹង សៀងប៉ាង ហួយ តារាវី និង ព្រីង សុជាតិ៖ «រឿង​នេះ​ជា​រឿង​ដណ្ដើម មិន​យុត្តិធម៌ បាន​សេចក្តី​ថា​ពួក​នេះ​មិន​ដឹង​មក​ពី​ណា?»

លោកស្រី ជា សារ៉ុម តំណាង​ភាគី​ជម្លោះ​ជាមួយ លោកស្រី ហួយ តារាវី ផ្ដល់​បទសម្ភាសន៍​ដល់​អ្នក​កាសែត​នៅ​កន្លែង​ដី​ទំនាស់​ភូមិ​រោងចក្រ សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ កាល​ពី​ថ្ងៃ​ទី​៦ ខែ​មករា ឆ្នាំ​២០១៥។
លោកស្រី ជា សារ៉ុម តំណាង​ភាគី​ជម្លោះ​ជាមួយ លោកស្រី ហួយ តារាវី ផ្ដល់​បទសម្ភាសន៍​ដល់​អ្នក​កាសែត​នៅ​កន្លែង​ដី​ទំនាស់​ភូមិ​រោងចក្រ សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ កាល​ពី​ថ្ងៃ​ទី​៦ ខែ​មករា ឆ្នាំ​២០១៥។
RFA/Sek Bandith

ចំណែក​ក្រុម​ពលរដ្ឋ​ម្ខាង​ទៀត លោកស្រី ហួយ តារាវី បាន​ចោទ​ប្រកាន់​វិញ​ថា លោកស្រី ជា សារ៉ុម កាល​ពី​មុន​ជា​តំណាង​ប្រជាពលរដ្ឋ​មែន ប៉ុន្តែ​ក្រោយ​មក​ប្រជាពលរដ្ឋ​ជាង ១០០​គ្រួសារ​ជា​សមាជិក បាន​ដក​សេចក្តី​ទុក​ចិត្ត និង​ឈប់​ទទួល​ស្គាល់​ជា​តំណាង ដោយសារ​ពេល​ឈ្នះ​ក្តី​ចង់​យក​ដី​នោះ​តែ​ម្នាក់​ឯង ដោយ​បង្កើត​បញ្ជី​ឈ្មោះ​ថ្មី​យក​ទៅ​ឲ្យ​តុលាការ​នា​ដំណាក់​កាល​ចុង​ក្រោយ ធ្វើ​ឲ្យ​បាត់​ឈ្មោះ​ប្រជាពលរដ្ឋ​ដែល​រស់នៅ​ក្នុង​ភូមិ​ពិត​ប្រាកដ ដែល​ធ្លាប់​រង​ការ​ឈឺ​ចាប់​ដោយ​ការ​បណ្ដេញ​ចេញ ហើយ​បាន​ចូលរួម​តតាំង​ក្តី​នៅ​តុលាការ​ទាំង ៣​ថ្នាក់​នោះ៖ «សូម​ឲ្យ ជា សារ៉ុម បង្ហាញ​មនុស្ស ១៦៣​គ្រួសារ មាន​អត្តសញ្ញាណប័ណ្ណ​យក​មក​ផ្ទៀង​ជាមួយ​បញ្ជី​ឈ្មោះ​ដែល​តុលាការ​ឲ្យ​ឈ្នះ ប្រជាជន​ណា​មាន​មេដៃ​ត្រឹមត្រូវ មាន​អាជ្ញាធរ​ទទួល​ស្គាល់ សូម​ចែក​ដី​ឲ្យ​គេ»

ទាក់ទង​បញ្ហា​នេះ ក្រុម​មន្ត្រី​សិទ្ធិ​មនុស្ស​ដែល​ចុះ​ឃ្លាំ​មើល​រឿង​នេះ យល់​ឃើញ​ថា អាជ្ញាធរ​ខណ្ឌ​ហាក់​ផ្តល់​សិទ្ធិ​ទៅ​ឲ្យ លោកស្រី ជា សារ៉ុម ខ្លាំង​ជាង​គេ និង​មាន​ការ​យឺតយ៉ាវ​ក្នុង​ការ​បែង​ចែក​ដី​ជូន​ពលរដ្ឋ​ដោយ​ផ្អែក​លើ​សាល​ដីកា​ពី​តុលាការ​កំពូល ព្រម​ទាំង​ស៊ើប​អង្កេត​រក​ប្រជាពលរដ្ឋ​ដែល​ធ្លាប់​នៅ​ក្នុង​ភូមិ​នោះ​ពិត​ប្រាកដ។

ទន្ទឹម​គ្នា​នេះ មន្ត្រី​សិទ្ធិ​មនុស្ស​ស្នើ​ឲ្យ​អាជ្ញាធរ​ទទួល​ខុស​ត្រូវ កុំ​ឲ្យ​មាន​អំពើ​ហិង្សា​កើត​ឡើង​រវាង​ភាគី​ទាំង​ពីរ ហើយ​គួរ​ប្រកាន់​ជំហរ​អព្យាក្រឹត្យ​ដោះស្រាយ​ដោយ​យុត្តិធម៌​ជូន​ពួក​គាត់។

ឆ្លើយ​តប​បញ្ហា​នេះ លោក​អភិបាល​រង​ខណ្ឌ​សែនសុខ ដែល​ចុះ​អន្តរាគមន៍​រឿង​នេះ មាន​ប្រសាសន៍​ថា អាជ្ញាធរ​សម្រប​សម្រួល​ឲ្យ​ពលរដ្ឋ​ទាំង​ពីរ​ភាគី​រក្សា​ភាព​ស្ងៀមស្ងាត់​សិន ដោយ​រង់ចាំ​អាជ្ញាធរ​ទទួល​បាន​បញ្ជី​ឈ្មោះ​ពលរដ្ឋ​ដែល​ឈ្នះ​ក្តី​ពិត​ប្រាកដ​ពី​តុលាការ ទើប​ចាប់​ផ្ដើម​ពិនិត្យ​ដោះស្រាយ​តាម​ជាក់ស្តែង៖ «សុំ​ឲ្យ​តុលាការ​បង្ហាញ​បញ្ជី​ឈ្មោះ​ពលរដ្ឋ ១៦៣ ដែល​តម្កល់​ក្នុង​រឿង​ក្តី​នេះ​ឲ្យ​បាន​លឿន ដើម្បី​កំណត់​អត្តសញ្ញាណ​ពលរដ្ឋ​នៅ​តំបន់​នោះ»

តុលាការ​កំពូល បាន​ចេញ​សាល​ដីកា​សម្រេច​ក្តី​ឲ្យ​ប្រជាពលរដ្ឋ​ឈ្នះ ទទួល​បាន​ដី​មក​វិញ​តាំង​ពី​ឆ្នាំ​២០១១ ប៉ុន្តែ​រហូត​មក​ដល់​ពេល​នេះ ពលរដ្ឋ​ទាំង ១៦៣​គ្រួសារ មិន​ទាន់​ចូល​រស់នៅ​លើ​ដី​របស់​ខ្លួន​វិញ​នោះ​ទេ ដោយ​មាន​ជម្លោះ​ផ្ទៃ​ក្នុង និង​មិន​ទាន់​មាន​ការ​ចុះ​អនុវត្ត​សាល​ដីកា​បែង​ចែក​ដី​នោះ​ឲ្យ​ពលរដ្ឋ​ម្ចាស់​ដី​ឡើង​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល