ប្រជាពលរដ្ឋមានជម្លោះដីធ្លីជាមួយក្រុមចំការកៅស៊ូមេមត់ នៅស្រុកស្នូល ខេត្តក្រចេះ បាននាំ គ្នាឡើងមកតវ៉ាសុំដំណោះស្រាយនៅទីក្រុងភ្នំពេញជាថ្មី ប៉ុន្តែត្រូវអាជ្ញាធរស្រុកឈ្នូល ឃាត់រថយន្ត ពួកគេមិនឲ្យឡើងទៅភ្នំពេញនោះទេ។ រីឯអាជ្ញាធរ បដិសេធការចោទប្រកាន់នេះ ដោយអះអាងថា អាជ្ញាធរគ្រាន់តែត្រួតពិនិត្យបច្ចេកទេសរថយន្តប៉ុណ្ណោះ។ មន្ត្រីសិទ្ធិមនុស្សយល់ថា អាជ្ញាធរគួរតែពន្លឿនដំណោះស្រាយជូនប្រជាពលរដ្ឋឲ្យបានឆាប់តាមការសន្យា ប្រសិនបើមិនចង់ឃើញពួកគាត់ ដើរតវ៉ានៅភ្នំពេញទេនោះ។
ប្រជាពលរដ្ឋមានជម្លោះដីធ្លីជាង ២រយនាក់ មកពីឃុំ ២ធ្នូ ស្រុកស្នួល ខេត្តក្រចេះ សម្តែងការសោកស្តាយ ដែលអាជ្ញាធរស្រុកឈ្នូលឃាត់រថយន្តរបស់ពួកគេមិនឲ្យឡើងទៅតវ៉ានៅមុខក្រសួងរៀបចំដែន និងមុខភូមិគ្រឹះលោក ហ៊ុន សែន ជាថ្មីទៀត ដើម្បីសុំអន្តរាគមន៍ដោះស្រាយវិវាទដីធ្លីជូនពួកគេឲ្យបានឆាប់ ព្រោះអ្នកភូមិទាំងនោះកំពុងខ្វះដីបង្កបង្កើនផល។
តំណាងពលរដ្ឋមានជម្លោះដីធ្លី លោក ភិន ធា រៀបរាប់ថា នៅព្រឹកថ្ងៃទី២១ ខែតុលា អធិការស្រុកស្នូល បានបញ្ជាឲ្យកម្លាំងសមត្ថកិច្ចឃាត់រថយន្តដឹកពលរដ្ឋទៅតវ៉ានៅភ្នំពេញពីរគ្រឿងទុកនៅអធិការស្រុក ហើយទាមទារលុយចំនួន ៣០ម៉ឺនរៀល ដើម្បីអនុញ្ញាតឲ្យទៅផ្ទះវិញ។ លោកបញ្ជាក់ការឃាត់រថយន្តនោះ ពុំមានអំពើហិង្សានោះទេ។ បន្ទាប់ពីឃាត់នោះ ប្រជាពលរដ្ឋបានបំបែកគ្នា និងបានឡើងឡានឈ្នូលផ្សេងៗ ទៀតទៅភ្នំពេញដដែល ដើម្បីត្រៀមតវ៉ាដំណោះស្រាយដីធ្លីនៅព្រឹកថ្ងៃទី២២ ខែតុលា៖ « គេឃាត់ពួកគខ្ញុំពួកឡានយកទៅអធិការ ប៉ុន្តែពួកខ្ញុំបំបែកគ្នាទៅទៀតហើយ ខ្លះមកដល់ហើយ ខ្លះទៀតកំពុងចេញជិតមកដល់។ខ្ញុំទៅតវ៉ានៅភ្នំពេញ ព្រោះចង់ឲ្យក្រសួងដែនដី និងសម្តេច ហ៊ុន សែន ជួយអន្តរាគមន៍ទៅស្រុកខេត្តផង ដើម្បីចែកដីនៅតំបន់ពួកគាត់ចង់បាននោះ ព្រោះគាត់មិនសុំយកទាំងអស់ដែរ សុំតែមួយគ្រួសារ ២ហិកតារកន្លះ និងដីភូមិ ១០អា ក្បាល ២០ បណ្តោយ ៥០អីទៅ។ ពួកខ្ញុំខានដាំដំណាំមួយឆ្នាំហើយ។ បើខានមួយឆ្នាំទៀត ពួកខ្ញុំរកអីដោះបំណុលគេមិនបានទេ សូម្បីចង់ទៅថៃ ក៏ទៅមិនបាន ហើយគ្មានទាំងលុយធ្វើប៉ាស្ព័រទៀត »។
ប្រជាពលរដ្ឋម្នាក់ទៀត រៀបរាប់ថា អាជ្ញាធរនៅខេត្តក្រចេះមិនគួររារាំងពួកគាត់នោះទេ គឺគួរតែជួយ សម្រួលឲ្យពួកគាត់ឆាប់បានដីមកអាស្រ័យផលវិញ។ ពលរដ្ឋរូបនេះ បន្តថា ប្រជាពលរដ្ឋ ៤០គ្រួសារ រស់នៅភូមិជើងក្លេរ ឃុំ ២ធ្នូមានជម្លោះដីធ្លីជាមួយក្រុមហ៊ុនចំការកៅស៊ូមេមត់ តាំងដើមឆ្នាំ ២០១៨ ដោយក្រុមហ៊ុនធ្លាប់ប្រើប្រាស់កម្លាំងទាហានប៉ាញ់ប្រហារលើប្រជាពលរដ្ឋឲ្យរងរបួសជាច្រើននាក់ និងបានឈូសឆាយផ្ទះ រួមទាំងដំណាំពលរដ្ឋចោលទៀតផង។
លោកបន្តថា ពេលនេះអ្នកភូមិមិនមានដីសម្រាប់បង្កបង្កើនផលនោះទេ ខណៈក្រុមហ៊ុនកាយប្រឡាយព័ទ្ធយកដីពួកគាត់អស់ទៅហើយ។ ចំណែកអាជ្ញាធរខេត្តវិញ បានត្រឹមតែឲ្យប្រជាពលរដ្ឋស្ងប់ស្ងាត់ ដើម្បីរង់ចាំដំណោះស្រាយពីមួយថ្ងៃទៅមួយថ្ងៃប៉ុណ្ណោះ៖ « អាជ្ញាធរសន្យាថា ដោះស្រាយឲ្យ តែមួយថ្ងៃទៅមួយថ្ងៃ មួយខែទៅមួយខែ មួយអាទិត្យទៅមួយអាទិត្យទៀត មិនដឹងដោះស្រាយឲ្យថ្ងៃណាទេ។ ប្រជាពលរដ្ឋចេះតែជ្រួលច្រាល ព្រោះគាត់ចង់បានដីដោយសារជំពាក់គេច្រើន ពួកគាត់ចង់បានដីអាស្រ័យផលឆ្នាំនេះវិញ » ។
រីឯអធិការស្រុកឈ្នូល លោក ចាន់ សុខគីង បានច្រានចោលការចោទប្រកាន់របស់ប្រជាពលរដ្ឋ។ លោកអះអាងថា អាជ្ញាធរមិនបានឃាត់រថយន្តពលរដ្ឋ ដែលឡើងទៅតវ៉ានៅភ្នំពេញនោះទេ គឺអាជ្ញាធរគ្រាន់តែអនុវត្តច្បាប់ត្រួតពិនិត្យយានយន្តខុសលក្ខណៈបច្ចេកទេស ព្រោះរថយន្តនោះ បានបើកកាត់គោលដៅប៉ុស្តិ៍ត្រួតពិនិត្យ។ លោកបញ្ជាក់ថា អាជ្ញាធរបានឲ្យម្ចាស់រថយន្តបំពេញបែបបទ និងអនុញ្ញាតយករថយន្តត្រឡប់ទៅផ្ទះវិញហើយ៖ « សូមជម្រាបជូនឲ្យច្បាស់ថា វា គឺជាការអនុវត្តច្បាប់ត្រួតពិនិត្យលក្ខណៈបច្ចេកទេសយានយន្ត អ៊ីចឹងរថយន្តដែលធ្វើចរាចរណ៍លើដងផ្លូវ ខុសលក្ខណៈច្រើនចំណុច។ ដូច្នេះនគរបាល និងក្រុមការងារ បានធ្វើការត្រួតពិនិត្យ និងជម្រាបជូនពួកគាត់អំពីអ្វី ដែលពួកគាត់ខ្វះខាត ដូចជារថយន្តគាត់ខ្វះលក្ខណៈបច្ចេកទេស និងប័ណ្ណបើកបរ ដែលអាចបង្កឲ្យមានបញ្ហាកើតឡើង។ដូច្នេះក្រុមការងារអនុវត្តច្បាប់ មិនបានដឹងថា ពួកគាត់ឡើងជាពលរដ្ឋ ដែលឡើងទៅតវ៉ានោះទេ »។
កាលពីថ្ងៃទី០៨ ខែមីនា អ្នកភូមិជាច្រើននាក់បានរងរបួសដោយសារប៉ះទង្គិចគ្នា ជាមួយក្រុមសមត្ថកិច្ច ចម្រុះប្រដាប់ដោយកាំភ្លើង ដែលចុះការពារគ្រឿងចក្រក្រុមហ៊ុន ខណៈពលរដ្ឋទាំងនោះ បានតវ៉ាបិទផ្លូវជាតិលេខ ៧៦A។ កាលនោះក្រុមអ្នកភូមិចោទក្រុមហ៊ុនចម្ការកៅស៊ូមេមត់ថា បានរំលោភយកដីធ្លីទំហំពី ៣ ទៅ ៤ហិកតារក្នុងមួយគ្រួសារ និងបំផ្លាញដំណាំ ផ្ទះសម្បែង ព្រមទាំងប្រើអំពើហិង្សាទៅលើពលរដ្ឋទៀតផង។
អាស៊ីសេរី បានព្យាយាមទាក់ទងទៅមេឃុំ ២ធ្នូរ លោក ប៉ឹង វិន និងអភិបាលរងស្រុកឈ្នូល លោក សាន់ ណាល់ ព្រមទាំងអភិបាលស្រុកស្នូល លោក គង់ គឹមនី ជាច្រើនដង នៅថ្ងៃទី២១ ខែតុលា ប៉ុន្តែមិនទទូលទូរស័ព្ទ និងបានចុចបិទវិញ។
អ្នកនាំពាក្យសមាគម៍ការពារសិទ្ធិមនុស្ស អាដហុក លោក ស៊ឹង សែនកុរណា មានប្រសាសន៍ថា ទំនាស់ដីធ្លីក្លាយជាជម្លោះរាំរ៉ៃ រហូតផ្ទុះអំពើហិង្សាមួយលើករួចទៅហើយ កាលពីដើមឆ្នាំ២០១៨។ ដូច្នេះ អាជ្ញាធរមិនគួររារាំងពលរដ្ឋនោះទេ គួរតែចូលរួមជួយដោះស្រាយបញ្ចប់ជម្លោះដីធ្លីជូនប្រជា ពលរដ្ឋ ដើម្បីឲ្យពួកគាត់បានអាស្រ័យផលលើដីនោះឡើងវិញ ព្រោះពលរដ្ឋទាំងនោះពឹងផ្អែកដី ដើម្បីធ្វើកសិកម្មចិញ្ចឹមជីវិត៖ « ការដែលមិនទាន់ដោះស្រាយជូនពួកគាត់នេះហើយ ទើបពួកគាត់មិនអាចចេះតែបន្តរង់ចាំ ហើយបន្តធ្វើការទាមទារ ដោយសារគាត់គ្មានទំនុកចិត្តពីរឿងដោះស្រាយរបស់អាជ្ញាធរស្រុក និងខេត្ត »។
ប្រជាពលរដ្ឋឲ្យដឹងថា ពួកគាត់ជាអ្នកចំណាកស្រុកពីខេត្តផ្សេងៗ ដែលគ្មានដីសម្រាប់រស់នៅ និងបង្កបង្កើនផលនោះទេ ហើយក៏បានកាប់រានយកដីនៅតំបន់ដីជម្លោះនោះ តាំងពីឆ្នាំ២០១០ និងខ្លះ ឆ្នាំ២០១៤ ដោយពេលនោះអាជ្ញាធរមិនបានរារាំងទេ និងថែមទាំងសន្យាថា នឹងជួយវាស់វែង ចែកដីជូនពួកគាត់ថែមទៀត ព្រោះអាជ្ញាធរមួយចំនួន ក៏មានដីទីនោះដែរ។ លុះដើមឆ្នាំ២០១៨ ក្រុម ចម្ការកៅស៊ូមេមត់ បានចូលឈូសឆាយ និងបានកាយប្រឡាយព័ទ្ធយកដីនោះតែម្តង។
ប្រជាពលរដ្ឋរងគ្រោះដីធ្លី អះអាងថា ពួកគាត់នឹងបន្តតវ៉ានៅថ្ងៃទី២២ ខែតុលា នៅមុខក្រសួងដែនដី និងផ្ទះលោក ហ៊ុន សែន ដើម្បីសុំឲ្យជួយដោះស្រាយជូនពួកគាត់ឲ្យបានឆាប់ ហើយបើប្រសិនបើ មិនដោះស្រាយជូនពួកគាត់ គឺពួកគាត់មិនព្រមត្រឡប់ទៅផ្ទះវិញឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។