ប្រជាពលរដ្ឋខេត្តកោះកុង ជាង៣រយគ្រួសារដែលជាក្រុមទី២ មិនទាន់ទទួលបានដំណោះស្រាយពីរបបលោក ហ៊ុន សែន និងក្រុមហ៊ុនស្ករអំពៅនោះ បានចេញមុខតវ៉ា និងអំពៅអំពាវនាវឲ្យរបប លោក ហ៊ុន សែន និងស្ថាប័នពាក់ព័ន្ធជួយដោះស្រាយជម្លោះដីធ្លីរាំរ៉ៃរបស់ពួកគាត់ឲ្យបានឆាប់ ស្របពេលដែលពួកគេកំពុងជួបការលំបាកក្នុងជីវភាព។ សង្គមស៊ីវិលថា អាជ្ញាធរពាក់ព័ន្ធ គួរតែពិចារណាដោះស្រាយជូនប្រជាពលរដ្ឋគ្រប់គ្នា មិនគួរដោះមួយក្រុមទុកមួយក្រុមទុក ហើយចាំទាល់តែពលរដ្ឋងើបតវ៉ានោះទេ។
ការចេញទាមទារដំណោះស្រាយដីធ្លីជាមួយក្រុមហ៊ុនស្ករអំពៅ នៅខេត្តកោះកុងនេះ ដោយសារតែអាជ្ញាធរក្នុងខេត្តកោះកុង និងក្រសួងរៀបចំដែនដី មិនបានដោះស្រាយជម្លោះដីធ្លីជូនពួកគាត់ដូចពលរដ្ឋ មួយក្រុមទៀតដែលដឹកនាំដោយអ្នកស្រី ផាវ ញ៉ើង និងតែងតែចេញតវ៉ាយ៉ាងសកម្មកន្លងមក។ តំណាងពលរដ្ឋរងគ្រោះដីធ្លី គឺលោកស្រី គុជ សុគន្ធ រៀបរាប់ថា ពួកគាត់ទាំង៣០២គ្រួសារមានការ ខកចិត្តយ៉ាងខ្លាំងដែលក្រសួងដែនដី មិនបានដោះស្រាយដីធ្លីជូនឲ្យចប់សព្វគ្រប់ដូចពលរដ្ឋក្រុមទី១។ ពួកគាត់នឹងលើកទៅក្រសួងរៀបចំដែនដីនៅថ្ងៃទី២ ឧសភា តាមការណាត់ជួបរបស់មន្ត្រីនៃក្រសួងរៀបដែនដី។ «»
លោកស្រី គុជ សុគន្ធ រៀបរាប់ថា ដំបូងឡើយ ទំនាស់ដីធ្លីរ៉ាំរ៉ៃដែលបានអូសបន្លាយពេលជាង ១០ឆ្នាំមកនេះ គឺបានប៉ះពាល់លើប្រជាពលរដ្ឋចំនួន ៥៣៧គ្រួសារ ដែលរស់នៅក្នុងភូមិចំនួន៩ នៃឃុំចំនួន ៤គឺមានឃុំជីខក្រោម ឃុំជីខលើ និងឃុំដងពែង និងឃុំកណ្ដោល ស្ថិតក្នុងស្រុកចំនួន២ គឺស្រុកស្រែ អំបិល និងបុទុមសាគរ ខេត្តកោះកុង។ ទំនាស់ដីធ្លីនេះ គឺមានវិវាទជាមួយភាគីក្រុមហ៊ុនលោកឧកញ៉ា ហ៊ុយ ហេង និងក្រុមហ៊ុនឈ្មោះកោះកុងស៊ូ ហ្គើ (Kohkong Sugar) និងក្រុមហ៊ុនកោះកុង ផ្លេនថេសិន (Kohkong Plantation) របស់អ្នកវិនិយោគទុនថៃ ដែលបានទិញភាគហ៊ុនពីលោកឧកញ៉ាលី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។ លោកស្រី គុជ សុគន្ធ រៀបរាប់បន្តថា បន្ទាប់មកនៅដើមឆ្នាំ២០១៦ ប្រជាពលរដ្ឋបានបែកគ្នាជាពីរក្រុម។ ក្រុមទី២នេះ គឺបានលង់ជឿនឹងសម្ដីលួងលោករបស់អាជ្ញាធរឃុំ-ស្រុក និងអាជ្ញាធរខេត្ត ថាកុំឲ្យពួកគាត់តវ៉ាសកម្មដូចក្រុមទី១ ពោលគឺ រង់ចាំអោយអាជ្ញាធរ ដោះស្រាយតាមសម្រួល ប៉ុន្តែទីបំផុតទៅវិវាទដីធ្លីរ៉ាំរ៉ៃរបស់ពួកគាត់ក្រុមទី២នេះ ត្រូវបានរដ្ឋាភិបាល និងក្រុមហ៊ុនស្ករអំពៅមើលរំលង មិនបានដោះស្រាយ ដូចក្រុមទី១ដែលតែងតែចេញតវ៉ានោះឡើយ។ «»
កាលពីថ្ងៃទី២២ ខែមីនា ក្រសួងរៀបចំដែនដី នគរូបនីយកម្ម និងសំណង់ ក្រុមហ៊ុន និងប្រជាពលរដ្ឋបានព្រមព្រៀងគ្នាបញ្ចប់ករណីវិវាទនេះជាស្ថាពរ ដោយក្រុមប្រជាពលរដ្ឋ១៧៥គ្រួសារយល់ព្រមទទួលយកដំណោះស្រាយជាដីទំហំ ៣ហិកតារ និងថវិកាចំនួន២.៥០០ដុល្លារ ក្នុងមួយគ្រួសារ។ ប៉ុន្តែមិនដោះស្រាយចំពោះប្រជាពលរដ្ឋដែលបានដោះស្រាយរួចហើយនោះទេ ហើយក្រុមប្រជាពលរដ្ឋ២០០គ្រួសារផ្សេងទៀត យល់ព្រមទទួលយកដំណោះស្រាយជាដីទំហំ១.៥ហិកតារ ក្នុងមួយគ្រួសារ»។
ទន្ទឹមគ្នានេះ ភាគីក្រុមហ៊ុនយល់ព្រមឲ្យរដ្ឋកាត់ដីទំហំ «៨២៥ហិកតារ» ស្ថិតក្នុងឃុំជីខលើ ស្រុកស្រែអំបិល ខេត្តកោះកុង ចេញពីដីសម្បទានសេដ្ឋកិច្ចដែលក្រុមហ៊ុនបានទទួលសិទ្ធិវិនិយោគពីរាជរដ្ឋាភិបាល ដើម្បីឲ្យរដ្ឋធ្វើប្រទានកម្មជាកម្មសិទ្ធិជូនប្រជាពលរដ្ឋខាងលើ និងផ្ដល់ថវិកាតាមចំនួនខាងលើ ជូនក្រុមប្រជាពលរដ្ឋ១៧៥គ្រួសារ តាមសំណូមពរ។
អាស៊ីសេរីបានទាក់ទងទៅអភិបាលរងខេត្តកោះកុង លោក អ៊ន ភារៈ និងអនុរដ្ឋលេខាធិការក្រសួងរៀបចំដែនដីលោក ទេព ធន ប៉ុន្តែលោកទាំងពីរមិនទទួលទូរស័ព្ទឡើយនៅថ្ងៃទី១ ខែឧសភា។
មន្ត្រីប្រឹក្សាផ្នែកច្បាប់នៃអង្គការលីកាដូ (Licadho) ប្រចាំខេត្តកោះកុង លោក ហ៊ួ អ៊ីន អះអាងថា ពលរដ្ឋទាំងនេះ ជាជនរងគ្រោះពីគម្រោងដីសម្បទានសេដ្ឋកិច្ចស្ករអំពៅដូចគ្នា ដូច្នេះដើម្បីដោះស្រាយ ជម្លោះដីធ្លីនេះចប់ជាស្ថាពរ គឺក្រសួងដែនដី ត្រូវខិតខំដោះស្រាយផ្ដល់ជាសំណង និងដីដល់ពួកគាត់ ទាំង៣០២គ្រួសារនេះដែរ។ «»
លោក ហ៊ួ អ៊ីន បន្ថែមថា រដ្ឋាភិបាល គួរតែផ្ដល់សំណង និងវាស់វែងផ្ដល់ដីស្រែចម្ការ ជូនប្រជាពលរដ្ឋ ដែលរស់នៅក្នុងមូលដ្ឋាននោះ ព្រោះថារដ្ឋាភិបាល អាចផ្ដល់ដីសម្បទានរាប់ម៉ឺនហិកតារអោយក្រុមហ៊ុន ហើយមកដល់ពេលនេះនៅមានដីទំនេរច្រើនហិកតារ ដែលមិនទាន់មានឃើញការអភិវឌ្ឍអ្វីឡើយ។
ប្រជាពលរដ្ឋរងគ្រោះដីធ្លីទាំងនេះ អះអាងថា ពួកគាត់ខំអត់ធ្មត់ដើម្បីរង់ចាំដំណោះស្រាយជាយូរ ណាស់មកហើយ ប៉ុន្តែប្រសិនបើអាជ្ញាធរព្រងើយកន្តើយមិនដោះស្រាយទៀតនោះ គឺពួកគាត់គ្មាន ជម្រើសអ្វីក្រៅពីការចេញតវ៉ានោះឡើយ៕