ប្រជាពលរដ្ឋប្រមាណ ៣០០គ្រួសារ ដែលរងគ្រោះក្នុងជម្លោះដីធ្លីជាមួយក្រុមហ៊ុនចម្ការកៅស៊ូ ក្នុងស្រុកត្រពាំងប្រាសាទ ខេត្តឧត្ដរមានជ័យ ស្នើសុំអាជ្ញាធរឱ្យដោះលែងសមាជិកគ្រួសារ និងសាច់ញាតិរបស់ពួកគេ ដែលកំពុងជាប់ឃុំក្នុងពន្ធនាគារ។ មន្ត្រីសង្គមស៊ីវិល ជំរុញឱ្យអាជ្ញាធរបញ្ឈប់ការចាប់ខ្លួន និងឃុំឃាំងពលរដ្ឋក្នុងជម្លោះដីធ្លី និងដោះស្រាយជូនប្រជាពលរដ្ឋដោយផ្អែកលើគោលការណ៍យុត្តិធម៌ និងគុណធម៌។
ប្រជាពលរដ្ឋជាង ៣០០គ្រួសារ នៅស្រុកត្រពាំងប្រាសាទ ខេត្តឧត្តរមានជ័យ ប្រឈមនឹងជីវភាពលំបាក និងបែកបាក់គ្រួសារ បន្ទាប់ពីអាជ្ញាធរបណ្ដេញចេញដោយបង្ខំ ហើយចាប់ខ្លួនសមាជិកគ្រួសារយកទៅឃុំឃាំងនៅពន្ធនាគារ ក្នុងជម្លោះដីធ្លីជាមួយក្រុមហ៊ុនចម្ការកៅស៊ូ សុខ សំណាង។
ពលរដ្ឋរងគ្រោះក្នុងជម្លោះដីធ្លី នៅស្រុកត្រពាំងប្រាសាទ ខេត្តឧត្តរមានជ័យ ដែលសុំមិនបញ្ចេញឈ្មោះ ប្រាប់វិទ្យុអាស៊ីសេរី នៅថ្ងៃទី១៣ មករា ថា លោកស្រីនៅតែបន្តរស់នៅលាក់ខ្លួន និងមិនហ៊ានវិលត្រឡប់ទៅផ្ទះវិញឡើយ ដោយសារខ្លាចអាជ្ញាធរចាប់ខ្លួន។ លោកស្រីបន្តថា កូនបង្កើត និងកូនប្រសាលោកស្រីម្នាក់ កំពុងជាប់ឃុំក្នុងពន្ធនាគារ ហើយមកដល់ពេលនេះ លោកស្រីមិនទាន់ដឹងពីស្ថានភាពពួកគេឡើយទេ។ លោកស្រីស្នើដល់អាជ្ញាធរឱ្យដោះលែងកូនៗ និងអ្នកជាប់ឃុំដទៃទៀត ព្រមទាំងបញ្ឈប់ការគំរាមកំហែងតាមចាប់ខ្លួនអ្នកភូមិ ដើម្បីឱ្យពួកគេវិលមកជួបជុំគ្រួសារ និងកសាងជីវិតសាជាថ្មី។
«សុំឱ្យសម្ដេចគាត់ជួយដោះលែងគាត់ឱ្យរួចពីពន្ធនាគារ។ ខ្ញុំស្រណោះអាគ្នាអស់ផ្ទះអស់សំបែង អស់ដំឡូងអស់អីហើយ ចាប់គ្នាដាក់ពន្ធនាគារទៀត។ ស្នើសុំឱ្យដកពាក្យបណ្ដឹងចេញឱ្យគ្នារួចឱ្យបានមើលកូនមើលចៅ»។
កាលពីថ្ងៃទី១០ ខែធ្នូ ឆ្នាំ២០២២ កងកម្លាំងចម្រុះប្រដាប់ដោយអាវុធ និងដំបង បានចូលទៅវាយដំពលរដ្ឋ ដែលមានទំនាស់ដីធ្លីជាមួយក្រុមហ៊ុនចម្ការកៅស៊ូ សុខ សំណាង ទាំងកំរោល ខណៈពលរដ្ឋទាំងនោះមិនបានតវ៉ា ឬប្រឆាំងតបតអ្វីឡើយ។ ក្រុមអាជ្ញាធរបានដុតកម្ទេចផ្ទះសម្បែង រឹបអូសទ្រព្យសម្បត្តិដូចជាម៉ូតូ គោយន្ត ម៉ាស៊ីនបូមទឹក និងចាប់ខ្លួនពលរដ្ឋចំនួន ៨នាក់ យកទៅឃុំឃាំងនៅពន្ធនាគារ។ អង្គការ លីកាដូ បញ្ជាក់ថា មានអ្នកភូមិទាំង ១៩នាក់ កំពុងជាប់ឃុំបណ្ដោះអាសន្ននៅក្នុងពន្ធនាគារខេត្តឧត្ដរមានជ័យ ដើម្បីរង់ចាំសវនាការ។ ទោះជាយ៉ាងណាក្ដី ប្រជាពលរដ្ឋអះអាងថា អ្នកភូមិដែលអាជ្ញាធរចាប់ខ្លួន និងកំពុងជាប់ឃុំក្នុងពន្ធនាគារទាំងអស់មានចំនួន ២៧នាក់។
វិទ្យុអាស៊ីសេរីមិនអាចទាក់ទងប្រធានលេខាធិការដ្ឋានរដ្ឋបាលតុលាការខេត្តឧត្ដរមានជ័យ លោក ហែល ឆេងហុង និងអភិបាលខេត្តឧត្ដរមានជ័យ លោក ប៉ែន កុសល្យ ដើម្បីសាកសួររឿងនេះបាននៅឡើយទេ នៅថ្ងៃទី១៣ មករា។ ចំណែកតំណាងក្រុមហ៊ុន សុខ សំណាង លោក ឃុត ចន្ថា ក៏វិទ្យុអាស៊ីសេរីមិនអាចទាក់ទងបានដូចគ្នា។
ករណីបណ្ដេញចេញដោយបង្ខំ កាលថ្ងៃទី១០ ធ្នូ បណ្ដាលឱ្យប្រជាពលរដ្ឋ ដែលរួចពីការចាប់ខ្លួននៅពេលនោះ ភ័យតក់ស្លុត រត់គេចខ្លួនចោលផ្ទះសំបែង របស់របរ លុយកាក់ បែកបាក់គ្រួសារ និងខ្លះរងរបួសផងដែរ។ ស្របពេលលំនៅឋានត្រូវបានអាជ្ញាធរដុតបំផ្លាញ និងរឹបអូសទ្រព្យសម្បត្តិអស់ កាន់តែធ្វើឱ្យពួកគេប្រឈមនឹងជីវភាពខ្វះខាត និងជំពាក់បំណុលធនាគារ។
បច្ចុប្បន្នដីដែលកំពុងមានជម្លោះនេះ ត្រូវក្រុមហ៊ុន សុខ សំណាង ជួលទៅឱ្យពលរដ្ឋ ដែលមកពីបណ្ដាខេត្ត ក្នុងតម្លៃ ១លានរៀលក្នុងមួយហិកតារ រយៈពេលមួយឆ្នាំ។ ទោះយ៉ាងណាក្ដី ប្រជាពលរដ្ឋរងគ្រោះជាង ៣០០គ្រួសារ អះអាងថា ដីទាំងនោះជាដី ដែលពួកគាត់នាំគ្នាកាប់ឆ្ការ និងតាំងទីលំនៅ ដោយមានការសម្របសម្រួលពីអាជ្ញាធរក្នុងតំបន់តាំងពីឆ្នាំ២០១២ មកម្ល៉េះ។
ជុំវិញរឿងនេះ មន្ត្រីសម្របសម្រួលនៃសមាគមអាដហុក (Adhoc) ប្រចាំខេត្តឧត្តរមានជ័យ លោក ស្រី ណារ៉េន ឱ្យដឹងថា មកទល់ពេលនេះពលរដ្ឋរងគ្រោះ ដែលរត់ភៀសខ្លួនកំពុងធ្លាក់ក្នុងភាពក្រីក្រជាងមុន ដោយសារគ្មានការងារធ្វើ បាត់បង់ដីធ្លីមុខរបរ និងគ្មានទ្រព្យសម្បត្តិជាប់ខ្លួននោះឡើយ។ លោកទទូចឱ្យអាជ្ញាធរ និងតុលាការបញ្ឈប់ការតាមចាប់ពលរដ្ឋទាំងនោះ និងដោះលែងអ្នកកំពុងជាប់ឃុំ ហើយងាកមកដោះស្រាយដោយសន្តិវិធី ប្រកបដោយភាពយុត្តិធម៌ និងសមស្របសម្រាប់ពលរដ្ឋ ដើម្បីឱ្យពួកគាត់មានឱកាសប្រកបរបរចិញ្ចឹមជីវិត។
លោក ស្រី ណារ៉េន៖«បើយើងមានការដោះស្រាយក្រៅប្រព័ន្ធតុលាការ មានការសម្របសម្រួលទាក់ទងនឹងវិវាទដីធ្លីហ្នឹង ក៏ជាការល្អដែរ ពីព្រោះរដ្ឋាភិបាលកន្លងមក ក៏លោកមានយន្តការដោះស្រាយមួយក្រៅប្រព័ន្ធតុលាការ។ ឃើញសមាជិករបស់រដ្ឋាភិបាលមួយចំនួន លោកយកយន្តការដោះស្រាយក្រៅប្រព័ន្ធតុលាការហ្នឹងមកសម្របសម្រួលសម្បទានឱ្យគ្នា។ ខ្ញុំចង់បញ្ជាក់ទាក់ទងតែរឿងដីធ្លីមួយទេ បើសិនជាអាចធ្វើការសម្បទានគ្នាបានក្រៅប្រព័ន្ធតុលាការដោយគុណធម៌ ហ្នឹងក៏ជារឿងល្អដែរ ដើម្បីកុំឱ្យគាត់(ពលរដ្ឋ)ខាតពេលវេលា ជួបការលំបាកច្រើន»។
កន្លងទៅលោកនាយករដ្ឋមន្ត្រី ហ៊ុន សែន ធ្លាប់ប្រកាសឱ្យមន្ត្រីក្រោមឱវាទនៅតាមរដ្ឋបាលខេត្តនីមួយៗ ដោះស្រាយបញ្ហាដីធ្លីជូនប្រជាពលរដ្ឋ ដោយមិនត្រូវមានការប្រើប្រាស់អំពើហិង្សា ឬចាប់ខ្លួនដាក់ពន្ធនាគារនោះឡើយ។ ទោះជាយ៉ាងណាក្ដី ក៏បញ្ហាជម្លោះដីធ្លីនៅកម្ពុជា នៅតែអូសបន្លាយ និងកើនឡើងជាបន្តបន្ទាប់ ហើយប្រជាពលរដ្ឋនៅតែបន្តរងគ្រោះពីការប្រើអំពើហិង្សា និងការចាប់ឃុំខ្លួន ទោះបីប្រជាពលរដ្ឋនាំគ្នាតវ៉ារកដំណោះស្រាយដល់ផ្ទះលោក ហ៊ុន សែន ក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។