ប្រជាពលរដ្ឋមានទំនាស់ដីធ្លីនៅខេត្តកណ្ដាលប្រមាណ២០០នាក់ នៅព្រឹកថ្ងៃទី៩មេសា នាំគ្នាតវ៉ានៅមុខសាលាស្រុកកណ្ដាលស្ទឹង ទាមទារឲ្យអាជ្ញាធរដោះស្រាយករណីក្រុមហ៊ុនបោះបង្គោលលើដីសហគមន៍របស់ពួកគាត់។ ពលរដ្ឋចោទប្រកាន់អាជ្ញាធរមូលដ្ឋានថា ឃុបឃិតគ្នាជាមួយជនខិលខូចលក់ដីសាធារណៈរបស់សហគមន៍ដើម្បីបំពេញប្រយោជន៍ផ្ទាល់ខ្លួន។
សហគមន៍ដីធ្លីនៅស្រុកកណ្ដាលស្ទឹងលើកឡើងថា ផ្ទៃដីដែលមានទំនាស់ប្រមាណ៤០០ហិកតារ នៅឃុំអំពៅព្រៃ គឺជាដីសាធារណៈសម្រាប់ប្រើប្រាស់រួមគ្នារបស់ពលរដ្ឋជាង ២ពាន់គ្រួសារនៅឃុំមួយនេះ ហើយអាជ្ញាធរបានយកដីនេះទៅលក់ដោយស្ងៀមស្ងាត់។
តំណាងពលរដ្ឋនៅឃុំអំពៅព្រៃ លោក ភោគ ផាន់នី ឲ្យដឹងនៅថ្ងៃទី៩ មេសា ថា ពួកគាត់នាំគ្នាផ្ដិតស្នាមមេដៃបានជាង ១ពាន់ ២០០នាក់ ដើម្បីដាក់ទៅអាជ្ញាធរស្រុកឲ្យជួយរកអ្នកពាក់ព័ន្ធដែលបានលក់ដីរួមរបស់ពួកគាត់។ លោកបន្ថែមទៀតថា មូលហេតុដែលពួកគាត់តវ៉ាដោយសារមានក្រុមហ៊ុនចំនួន៥ ប៉ុន្តែមិនស្គាល់ឈ្មោះទាំងអស់ទេ គឺមានក្រុមហ៊ុនមួយឈ្មោះ ប៊ូ ស្រី ហើយបានបោះបង្គោលវាទីលើដីរួមរបស់ពលរដ្ឋនៅឃុំអំពៅព្រៃ ដោយពុំបានប្រាប់ពួកគាត់ឲ្យបានដឹងនោះទេ៖ «ខ្ញុំចង់ឲ្យអាជ្ញាធរត្រូវតែដោះស្រាយជូនពួកខ្ញុំ ដែលពួកខ្ញុំបានដាក់ស្នាមមេដៃរួចហើយនឹង ដើម្បីទាមទារឲ្យមានដំណោះស្រាយ ដោយមានសំណងសមស្របតាមតម្លៃដីលើទីផ្សារ ទើបពួកខ្ញុំស្ងប់ចិត្ត ហើយខាងក្រុមហ៊ុនក៏ទទួលបានអភិវឌ្ឍន៍ដោយសប្បាយរីករាយដែរ»។
ចំណែកពលរដ្ឋនៅឃុំអំពៅព្រៃ ម្នាក់ទៀត លោក យ៉េង យ៉ាន អះអាងថា ដីដែលក្រុមហ៊ុនបោះ បង្គោលនោះ ទំនងដោយសារមានជនខិលខូច និងអ្នកមានអំណាចឃុបឃិតជាមួយអាជ្ញាធរមូលដ្ឋានលក់ទៅឲ្យក្រុមហ៊ុនបាត់ទៅហើយ។ លោកបន្ថែមទៀតថា ពួកគាត់ជាង ២ពាន់គ្រួសារមិនឯកភាពឲ្យអាជ្ញាធរយកដីសាធារណៈនោះ ទៅលក់ឲ្យក្រុមហ៊ុនឯកជននោះឡើយ ព្រោះជាដីរួមរបស់ពលរដ្ឋនៅក្នុងឃុំ ហើយអាជ្ញាធរក៏មិនបានបែងចែកផលលាភពីការលក់ដីដល់ពលរដ្ឋនោះឡើយ៖ «ការធ្វើនេះគឺប្រជាពលរដ្ឋមិនបានទទួលប្រាក់សំណងទេ បានជាពួកខ្ញុំតវ៉ា ហើយបើសិនក្រុមហ៊ុនទៅឈូសឆាយនៅលើដីនោះ សូមឲ្យដោះស្រាយសំណងជូនពលរដ្ឋ»។
អភិបាលរងស្រុកកណ្ដាលស្ទឹង លោក អ៊ូវ សាវឿន មានប្រសាសន៍យ៉ាងខ្លីថា លោកបានហៅតំណាងពលរដ្ឋចំនួន៦នាក់ ដើម្បីសាកសួរអំពីមូលហេតុដែលនាំគ្នាផ្ដិតស្នាមមេដៃនេះ ប៉ុន្តែលោកសុំមិនបញ្ចេញយោបល់ជុំវិញពីការតវ៉ារបស់ពលរដ្ឋនោះទេ៖ «បាទពលរដ្ឋអះអាងថា ដីនោះជាដីរួមហើយពួកគាត់មកសុំឲ្យដោះស្រាយ តែខ្ញុំមិនមានដោះស្រាយអី ព្រោះអាជ្ញាធរបានអញ្ជើញពួកគាត់មកដើម្បីសាកសួរជុំវិញបញ្ហាដែលពួកគាត់ផ្ដិតស្នាមមេដៃទេ»។
ប្រធានសម្ពន្ធសហគមន៍កសិករកម្ពុជា លោក ថេង សាវឿន លើកឡើងថា ជនណាដែលយកដីរួមរបស់ពលរដ្ឋទៅលក់ឲ្យក្រុមហ៊ុនឯកជន ដោយពុំមានការឯកភាពពីប្រជាពលរដ្ឋ គឺជាទង្វើខុសច្បាប់។ លោកអះអាងថា បញ្ហានេះប្រសិនបើអាជ្ញាធរមិនដោះស្រាយឲ្យបានត្រឹមត្រូវនោះទេ គឺអាចនឹងមានការតវ៉ាកាន់តែធំរហូតដល់ថ្នាក់ជាតិជាពុំខាន៖ «អាជ្ញាធរគួរតែចុះសិក្សាស្រាវជ្រាវឲ្យបានច្បាស់លាស់ និងដោះស្រាយដោយសន្តិវិធី ហើយត្រូវដោះស្រាយដោយឈរលើផលប្រយោជន៍រួម ដោយជៀសវាងការឃុបឃិតគ្នាចំពោះតែអ្នកមានលុយ និងមានអំណាច»។
តំណាងពលរដ្ឋឲ្យដឹងថា ដីដែលមានបញ្ហានោះ គឺក្រុមហ៊ុនទិញដើម្បីយកទៅអភិវឌ្ឍន៍ធ្វើព្រលានយន្តហោះ ប៉ុន្តែមិនដឹងថានឹងដំណើរនៅពេលណានៅឡើយទេ។ ក្រុមអ្នកតវ៉ាអះអាង អាជ្ញាធរបានសន្យាជាមួយពួកគាត់ថា នឹងហៅភាគីពាក់ព័ន្ធដោះស្រាយបន្តនៅក្រោយបុណ្យចូលឆ្នាំខ្មែរ។ ពលរដ្ឋបញ្ជាក់ថា ប្រសិនបើអាជ្ញាធរ មិនដោះស្រាយជូនពួកគាត់ទេ ពួកគាត់នឹងតវ៉ាជាថ្មីទៀតក្នុងពេលឆាប់ៗ៕