ពលរដ្ឋ​​មាន​ជម្លោះដីធ្លី​ក្នុង​ខេត្ត​ក្រចេះ​ត្រឡប់​ទៅ​ខេត្ត​វិញ​ក្រោយ​បាន​ការ​សន្យា​ពី​ក្រសួង

​សុ ជីវី
2018-08-23
អ៊ីម៉ែល
មតិ
Share
បោះពុម្ព
អាជ្ញាធរ​រាជធានី​ភ្នំពេញ និង​អាជ្ញាធរ​ខេត្ត​ក្រចេះ​កំពុង​ដោះស្រាយ​ទំនាស់​ដីធ្លី​ជូន​ពលរដ្ឋ​​មក​ពី​ឃុំ​ឃ្សឹម ស្រុក​ស្នួល ខេត្ត​ក្រចេះ នៅ​ថ្ងៃ​ទី ២៩ ខែ​ឧសភា ឆ្នាំ២០១៤។
អាជ្ញាធរ​រាជធានី​ភ្នំពេញ និង​អាជ្ញាធរ​ខេត្ត​ក្រចេះ​កំពុង​ដោះស្រាយ​ទំនាស់​ដីធ្លី​ជូន​ពលរដ្ឋ​​មក​ពី​ឃុំ​ឃ្សឹម ស្រុក​ស្នួល ខេត្ត​ក្រចេះ នៅ​ថ្ងៃ​ទី ២៩ ខែ​ឧសភា ឆ្នាំ២០១៤។
RFA

ប្រជាពលរដ្ឋ​មាន​បញ្ហា​ដីធ្លី​មកពី​ឃុំ​២​ធ្នូ ក្នុង​ខេត្ត​ក្រចេះ​ចំនួន​៣០០​នាក់ បាន​ត្រឡប់​ទៅ​ខេត្ត​វិញ​នៅ​ល្ងាច​ថ្ងៃ​ទី​២៣ ខែ សីហា នេះ បន្ទាប់ពី​បានការ​សន្យា​ពី​អាជ្ញាធរ​ពាក់ព័ន្ធ​ថា​នឹង​ជួប​ប្រជុំ​ដោះស្រាយ​បញ្ហា​ជាមួយ​ពលរដ្ឋ។

ពលរដ្ឋ​៣០០​នាក់​តំណាង​អោយ​៣០០​គ្រួសារ​នៅ​ព្រឹក​ថ្ងៃ​ដដែល​នេះ បាន​នាំ​គ្នា​តវ៉ា​រក​ដំណោះស្រាយ​ជា​ថ្មី​ទៀត​នៅ​ខាង​មុខ​ក្រសួង​ដែនដី នគរូបនីយកម្ម និង​សំណង់ អស់​ជាច្រើន​ម៉ោង​រហូតដល់​ម៉ោង​២​រសៀល​ទើប​អាជ្ញាធរ​ចេញ​មក​ជួប និង​សន្យា​ថា នឹង​ប្រឹងប្រែង​រក​ដំណោះស្រាយ​អោយ​ពលរដ្ឋ។

តំណាង​ពលរដ្ឋ​មួយ​រូប លោក ញ៉ែម សុភឿន បាន​ប្រាប់​អាស៊ីសេរី​តាម​ទូរស័ព្ទ​ក្នុង​ពេល​កំពុង​ធ្វើ​ដំណើរ​ទៅ​ខេត្ត​ក្រចេះ​ថា ពួកគាត់​នឹង​សម្រេច​ត្រឡប់​ទៅវិញ​ព្រោះ​រំពឹង​ថា នឹង​បាន​ដំណោះស្រាយ​ទៅតាម​ការធានា​អះអាង​របស់​អាជ្ញាធរ​ពាក់ព័ន្ធ។ លោក​ថា អាជ្ញាធរ​ប្រាប់​ពលរដ្ឋ​អោយ​ទៅ​ចូលរួម​កិច្ចប្រជុំ​ជាមួយ​ក្រុម​ការងារ ដែល​មាន​ទាំង​ភាគី​ក្រុមហ៊ុន​ចម្ការ​កៅស៊ូ​មេមត់​ចូលរួម​ផង។ បើ​ទោះ​ជា​យ៉ាងណា​លោក មិន​ដឹង​ថា ដំណោះស្រាយ​ពិតប្រាកដ​នោះ​នឹង​មាន​កម្រិត​ណា​នៅឡើយ ដើម្បី​ឆ្លើយតប​នឹង​តម្រូវ​ការ​របស់​ពលរដ្ឋ៖ «ដំណោះស្រាយ​មានការ​សំណូមពរ​ថា ដោះស្រាយ (ផ្ដល់​ដី​អោយ​ពលរដ្ឋ) នៅ​ក្រុមហ៊ុន​មេមត់​នៅ​ឃុំ​២​ធ្នូ ស្រុក​ស្នួល​ដដែល បើ​ផ្សេង​ពី​នោះ​គឺ​ពួក​ខ្ញុំបាទ​មិន​យក​ទេ ព្រោះ​ពួក​ខ្ញុំបាទ​មាន​ដីធ្លី​រស់នៅ​ទីនោះ​តែប៉ុណ្ណោះ បើ​ដូរ​ទៅដល់​ស្រុក​ចិត្រ​បូរី​គឺ​អត់​ព្រម​អត់​យក​។ អភិបាលខេត្ត​ថា លោក​ក៏​មិន​ហ៊ាន​សម្រេច​យ៉ាងណា​ទេ​គឺ​អាស្រ័យ​ទៅ​លើ​ក្រសួង​ដែនដី និង​ក្រសួងពាណិជ្ជកម្ម»

ជាច្រើនលើក​ហើយ​ដែល​ពលរដ្ឋ​ទាំង​៣០០​នាក់ តំណាង​អោយ​៣០០​គ្រួសារ​បាន​នាំគ្នា​តវ៉ា​រក​ដំណោះស្រាយ រួម​ទាំង​ការ​ដាក់​ញត្តិ​ទៅ​ខុទ្ទកាល័យ​លោក ហ៊ុន សែន ផង បន្ទាប់​ពី​កង​កម្លាំង​ចម្រុះ​ប្រដាប់​ដោយ​អាវុធ​បាន​បង្ខំ​បណ្ដេញ​ពួកគាត់​ចេញ​ពី​ដី បាន​ដុត​បំផ្លាញ​ផ្ទះ និង​ផលដំណាំ​របស់​ពួកគាត់​កាលពី​ខែ​មីនា ដើម្បី​រក្សា​ដី​ទុក​អោយ​ក្រុមហ៊ុន​ចម្ការ​កៅស៊ូ​មេមត់។ ក្រុមហ៊ុន​នេះ​បាន​អះអាង​នៅ​ក្នុង​សេចក្ដីថ្លែងការណ៍​កាលពី​ខែ​មីនា ថា​ក្រុមហ៊ុន​មិនដែល​បាន​រំលោភ​យក​ដី​របស់​ពលរដ្ឋ​ទេ គឺ​ក្រុមហ៊ុន​ទៅវិញ​ទេ ជា​អ្នករងគ្រោះ​ពី​កា​រំលោភ​យក​ដី​ដោយ​ពលរដ្ឋ។

កាលពី​ខែ​មីនា​នោះ​ដែរ កម្លាំង​សមត្ថកិច្ច​ចម្រុះ បាន​ប្រើប្រាស់​អាវុធ​បំបែក​ក្រុម​ពលរដ្ឋ​តវ៉ា​បិទ​ផ្លូវ​រារាំង​ការបំផ្លាញ​ផ្ទះ និង​ផលដំណាំ​បណ្ដាល​ឲ្យ​ពលរដ្ឋ​របួស​៣​នាក់ ដោយ​គ្រាប់កាំភ្លើង មួយ​ចំនួន​ទៀត​របួស ដោយ​ការ​វាយដំ និង​៨​នាក់ ត្រូវ​បាន​ចាប់ខ្លួន ប៉ុន្តែ​ត្រូវ​ដោះលែង​មកវិញ។

ពលរដ្ឋ​អះអាង​ថា ភាគច្រើន​ពួកគាត់​បាន​ចូល​ទៅ​រាន​ដី​ព្រៃ​ដាំ​ដំណាំ និង​សង់ផ្ទះ​ជាច្រើន​ឆ្នាំ​មក​ហើយ ប៉ុន្តែ​មិន​ឃើញ​មានការ​ហាមឃាត់​ពី​អាជ្ញាធរ និង​ភាគី​ក្រុមហ៊ុន​ទេ។ ទំហំ​ដី​ដែល​ពួកគាត់​រាន​ព្រៃ​បាន​តូច​បំផុត​គឺ​ជាង​២​ហិកតារ។ ពលរដ្ឋ​អះអាង​ដែរ​ថា​ពួកគាត់​ប្រាថ្នា​ទៅ​រស់នៅ និង​ដាំ​ដំណាំ​លើ​ដី​របស់​គាត់​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល