ស្វាមី​ស្ត្រី​ជាប់​ពន្ធនាគារ​ដោយ​បញ្ហា​ដីធ្លី​នៅ​បន្ទាយមានជ័យ​ស្នើ​ឲ្យ​តុលាការ​ទម្លាក់​បទ​ចោទ

ដោយ ថន ថារ៉ូ
2018-11-02
អ៊ីម៉ែល
មតិ
Share
បោះពុម្ព
សកម្មភាព​សហគមន៍ដីធ្លី​ស្រុកអូរជ្រៅ តវ៉ានៅ​មុខ​សាលា​ដំបូង​ខេត្តបន្ទាយមានជ័យ ទាមទារ​​​ឲ្យ​តុលាការ​ដោះលែង​អ្នក​ស្រី​ ឡុង សុគន្ធី ថ្ងៃទី២៧ មីនា ឆ្នាំ​២០១៨។
សកម្មភាព​សហគមន៍ដីធ្លី​ស្រុកអូរជ្រៅ តវ៉ានៅ​មុខ​សាលា​ដំបូង​ខេត្តបន្ទាយមានជ័យ ទាមទារ​​​ឲ្យ​តុលាការ​ដោះលែង​អ្នក​ស្រី​ ឡុង សុគន្ធី ថ្ងៃទី២៧ មីនា ឆ្នាំ​២០១៨។
រូប​ថត​ដោយ​ប្រជាពលរដ្ឋ

ស្វាមី​ប្រធាន​សហគមន៍​ដីធ្លី​ស្រុក​អូរជ្រៅ ខេត្ត​បន្ទាយមានជ័យ អ្នកស្រី ឡុង សុគន្ធី ដែល​កំពុង​ជាប់ឃុំ​ក្នុង​ពន្ធនាគារ ស្នើ​ឲ្យ​សាលា​កំពូល​ទម្លាក់​ចោល​ការចោទប្រកាន់​លើ​សំណុំរឿង​ភរិយា​របស់ លោក និង​ដោះលែង​អ្នកស្រី​ឲ្យ​បាន​ឆាប់។ ការ​ស្នើសុំ​នេះ ដោយសារ​មេធាវី​ការពារ​ក្ដី​ឲ្យ​ជន​ត្រូវ​ចោទ​បាន​ប្ដឹង​សាទុក្ខ​នឹង​សេចក្ដី​សម្រេច​របស់​សាលាដំបូង​ខេត្ត​បន្ទាយមានជ័យ ដែល​បាន​ផ្ដន្ទាទោស​ឲ្យ​អ្នកស្រី​ជាប់ពន្ធនាគារ​រយៈពេល​១​ឆ្នាំ ហើយ​សាលា​កំពូល​គ្រោង​ជម្រះក្ដី​លើ​សំណុំ​រឿង​នេះ​ក្នុង​ពេល​ឆាប់ៗ។

ស្វាមី​ប្រធាន​សហគមន៍​ដីធ្លី​ស្រុក​អូរជ្រៅ លោក នង នី លើកឡើង​ថា សេចក្ដី​សម្រេច​របស់​សាលាដំបូង​ខេត្ត​បន្ទាយមានជ័យ ផ្តន្ទាទោស​អ្នកស្រី ឡុង សុគន្ធី ដោយ​អយុត្តិធម៌​បំផុត។សហគមន៍​ដីធ្លី​នៅ​ភូមិ​ថ្នល់បត់ ឃុំ​អូរ​បី​ជាន់ ស្រុក​អូរជ្រៅ អ្នកស្រី ឡុង សុគ​ន្ធី ត្រូវ​បាន​ចាប់ខ្លួន​បញ្ជូន​ទៅ​ពន្ធនាគារ កាលពី​ថ្ងៃ​ទី​២៦ មីនា ដោយ​ចោទប្រកាន់​ពី​បទ​ប៉ះពាល់​លើ​កម្មសិទ្ធិឯកជន និង​បទ​ធ្វើ​ឲ្យ​ខូចខាត​ដោយ​ចេតនា ប្រព្រឹត្ត​នៅ​ភូមិ​បឹងស្នោ ឃុំ​ស្លាក្រាម ស្រុក​ស្វាយចេក។ ប៉ុន្តែ​អ្នកស្រី ឡុង សុគន្ធី ធ្លាប់​មាន​ប្រសាសន៍​មុន​ពេល​សមត្ថកិច្ច​បញ្ជូន​ទៅ​ឃុំខ្លួន​ថា អ្នកស្រី​ពុំបាន​រំលោភ​ដីធ្លី​ដូច​ការចោទប្រកាន់​នោះ​ទេ ហើយ​អ្នកស្រី ក៏បាន​ចាត់​ទុក​ការចោទប្រកាន់​នេះ​ថា ជា​ការ​បិទ​សិទ្ធ​សេរីភាព ដើម្បី​កុំ​ឲ្យ​អ្នកស្រី​តវ៉ា​ឲ្យ​អាជ្ញាធរ​ដោះស្រាយ​ទំនាស់​ដី​ក្នុង​សហគមន៍​បន្ត​ទៀត។

កន្លង​មក​សាលាឧទ្ធរណ៍​បាន​តម្កល់​សំណុំរឿង​សហគមន៍​ដីធ្លី​អ្នកស្រី ឡុង សុគន្ធី តាម​សេចក្ដី​សម្រេច​របស់​សាលាដំបូង​ខេត្ត​បន្ទាយមានជ័យ​ទុកជា​បាន។ មេធាវី​ការពារ​ក្ដី​ឲ្យ​ជនជាប់ចោទ​បាន​ប្ដឹង​សាទុក្ខ​ទៅ​សាលា​កំពូល​បន្ត​ទៀត​កាលពី​ថ្ងៃ​ទី​១៩ តុលា ដើម្បី​ស្នើសុំ​ឲ្យ​អ្នកស្រី ឡុង សុគន្ធី នៅ​ក្រៅ​ឃុំ​បណ្ដោះអាសន្ន និង​ដោះលែង​ឲ្យ​មាន​សេរីភាព។

លោក នង នី ឲ្យ​ដឹង​នៅ​ថ្ងៃ​ទី​០១ វិច្ឆិកា​ថា អ្នកស្រី​ឡុង សុគន្ធី គ្រាន់តែ​ជា​តំណាង​សហគមន៍​ដីធ្លី​ក្នុងស្រុក​អូរជ្រៅ ដើម្បី​ទាមទារ​ឲ្យ​អាជ្ញាធរ​ពាក់ព័ន្ធ​ជួយ​ផ្ដល់​យុត្តិធម៌​រឿង​ទំនាស់​ដី​របស់​ពួកគាត់​ប៉ុណ្ណោះ ដោយ​មិន​បាន​ធ្វើ​ខុស​ដូច​ការចោទប្រកាន់​នោះ​ទេ៖ «ចោទប្រកាន់​រឿង​ដីធ្លី​ដដែល​នឹង​ថា​យើង​ទៅ​កាប់​ទៅ​ឆ្ការ​ទៅ​ដក​ហើយ​រស់​នៅ​លើ​ប័ណ្ណ​កម្មសិទ្ធិ​របស់​គេ ប៉ុន្តែ​ជាក់ស្ដែង​វា​មិនមែន​ទេ យើង​មិនបាន​ទៅ​ធ្វើ​ដូច្នេះ​ណា​គេ​ចេះតែ​ចោទ​ទៅ ខ្ញុំ​មិន​ព្រម​បានជា​ខ្ញុំ​ប្ដឹង​ជំទាស់​ទៀត ព្រោះ​ខ្ញុំ​តាំងពី​ប្រពន្ធ​ជាប់ពន្ធនាគារ​មក​ខ្ញុំ​មិនបាន​ទៅ​ធ្វើ​ការងារ​ទេ ដោយសារតែ​រវល់​ឡើង​តុលាការ​ញឹកញាប់ ហើយ​គ្មាន​ប្រពន្ធ​ដែល​ជា​អ្នករក​ចំណូល​សំខាន់​ក្នុង​គ្រួសារ»

មេធាវី​ការពារ​ក្ដី​ឲ្យ​ជនជាប់ចោទ លោក សំ ទិត្យសីហា មានប្រសាសន៍ថា សាលា​កំពូល​នឹង​ជម្រះក្ដី​លើ​សំណុំ​រឿង​នេះ​ក្នុង​ពេល​ឆាប់ៗ ហើយ​លោក​ក៏​សង្ឃឹមថា​សាលា​កំពូល​នឹង​ទម្លាក់​ចោល​ការចោទប្រកាន់​នេះ។ លោក​អះអាង​ទៀត​ថា ថ្មីៗ​នេះ​សាលាខេត្ត​បន្ទាយមានជ័យ​បាន​ចេញ​សេចក្ដី​ថ្លែងការណ៍​មួយ​ទទួល​ស្គាល់​ថា រឿងរ៉ាវ​ដែល​កើត​មាននៅ​ស្រុក​អូរជ្រៅ​នោះ គឺជា​រឿង​ទំនាស់​ដីធ្លី ហើយក៏​បាន​សុំ​ឲ្យ​តុលាការ​ផ្អាក​ការចោទប្រកាន់​ទៅលើ​ពលរដ្ឋ ដើម្បី​ទុក​ពេល​ឲ្យ​អាជ្ញាធរ​ថ្នាក់​ជាតិ​ដោះស្រាយ​ទំនាស់​នេះ​រួចរាល់​សិន៖ «គាត់​ថា​ដី​នឹង​ទី​១​ជាន់​ទៅលើ​គ្នា ហើយ​ទី​២​ដោយសារ​ការបែងចែក​រដ្ឋបាល​រវាង​ភូមិ​ថ្នល់​បត់ និង​ភូមិ​បឹង​ស្នោ ហើយ​ធ្វើ​ឲ្យ​ការបែងចែក​រដ្ឋបាល​មិន​ច្បាស់លាស់​ទើប​ធ្វើ​ឲ្យ​ការគ្រប់គ្រង​ដី​រវាង​ពលរដ្ឋ​ដែល​មាន​ដី​អត់​ប្លង់​នឹង​ត្រួតស៊ីគ្នា។ ដូច្នោះ​ហើយ​ខ្ញុំ​គិត​ថា វា​អយុត្តិធម៌​ចំពោះ​គាត់​ណាស់ ព្រោះ​មិនទាន់​រក​ឃើញ​ថា ដី​ណា​ជា​ដី​ពិតប្រាកដ​របស់​ពលរដ្ឋ ឬ​ដី​ភាគី​ម្ខាង​ទៀត ដូច្នោះ​ហើយ​បាន​ខ្ញុំ​ថា​អយុត្តិធម៌ ពីព្រោះ​គួរ​ទុក​ករណី​នេះ​ឲ្យ​អាជ្ញាធរ​គាត់​ដោះស្រាយ​សិន»

មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​បន្ទាយមានជ័យ​លោក ស៊ុំ ច័ន្ទគា អះអាង​ថា តុលាការ​ខេត្ត​បន្ទាយមានជ័យ​ឃុំខ្លួន​សកម្មជន​ដីធ្លី​រូប​នេះ​ទាំង​អយុត្តិធម៌ ដោយសារតែ​អ្នកស្រី​ជា​ឆ្អឹង​ទទឹង​ក​របស់​ភាគី​ទំនាស់ ដែល​ភាគច្រើន​ជា​អ្នកមាន​លុយ​និង​មានអំណាច​នៅ​ក្នុង​ខេត្ត​បន្ទាយមានជ័យ ព្រោះ​អ្នកស្រី​តែង​ដឹកនាំ​ប្រជាពលរដ្ឋ​តវ៉ា​ឲ្យ​រដ្ឋអំណាច​ដោះស្រាយ​ទំនាស់​ដី​ញឹកញាប់​។​មន្ត្រី​សង្គម​ស៊ីវិល​រូប​នេះ បន្ថែម​ទៀត​ថា សព្វថ្ងៃ​អ្នកស្រី ឡុង សុគន្ធី មាន​ជាប់​បណ្ដឹង​ក្នុង​តុលាការ​រហូតដល់​ទៅ ៩​បណ្ដឹង​ឯណោះ ហើយ​សុទ្ធ​តែ​ជា​បណ្ដឹង​រឿង​ដីធ្លី៖ «ទំនាស់​របស់​គាត់​ដោយ​ភាគី​ម្ខាង​ចេះ​តែ​ធ្វើ​ប្លង់​ទៅ ហើយ​គ្មាន​យន្តការ​ដោះស្រាយ​ណាមួយ​ជាក់លាក់​បែរ​ទៅជា​ទៅ​ចោទប្រកាន់​មក​លើ​ប្រជាពលរដ្ឋ ដាក់​ឈ្មោះ​ថា ក្រុម​អនាធិបតេយ្យ​ទៅ តាមពិត​មិនមែន​គាត់​ជា​មនុស្ស​មួយ​ដែល​ប្រឆាំង​ដើម្បី​លក់​ដី​ធ្វើ​អ្នកមាន​ទេ។ រឿង​នេះ​គ្រាន់តែ​វិមតិសង្ស័យ​ហើយ​ធ្វើការ​ចោទប្រកាន់ វា​ជា​រឿង​អយុត្តិធម៌​ពេក»

អាស៊ីសេរី​ពុំ​អាច​ទាក់ទង​អ្នកនាំពាក្យ​សាលា​កំពូល ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បានទេ​នៅ​ថ្ងៃ​ទី​០១​តុលា ដោយ​ទូរស័ព្ទ​ពុំ​មាន​អ្នកទទួល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល