ពលរដ្ឋ​មាន​ជម្លោះ​ដី​ជាមួយ​អតីត​អភិបាលស្រុក​ឱរ៉ាល់​ឡើង​​សុំ​កិច្ច​អន្តរាគមន៍​ពី​ក្រសួង​ដែនដី

ដោយ វ៉ែន សុមេធ
2018-06-13
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា ថ្លែង​ពេល​ជួប​អ្នក​ប៊ូឌីង នៅ​ទីស្ដីការ​ក្រសួង នៅ​ថ្ងៃ​ទី៧ ខែ​មេសា ឆ្នាំ​២០១៧។
រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា ថ្លែង​ពេល​ជួប​អ្នក​ប៊ូឌីង នៅ​ទីស្ដីការ​ក្រសួង នៅ​ថ្ងៃ​ទី៧ ខែ​មេសា ឆ្នាំ​២០១៧។
Photo: RFA

ពលរដ្ឋ​មាន​ជម្លោះដីធ្លី ជាមួយ​អតីត​អភិបាលស្រុក​ឱរ៉ាល់ និង​អតីត​នាយរង​សេនាធិការ​ភូមិភាគ​៣ នៅ​ខេត្ត​កំពង់ស្ពឺ បាន​លើកគ្នា​មក​តវ៉ា​នៅ​ក្រសួង​រៀបចំ​ដែនដី​ជាថ្មី ដើម្បី​សុំ​កិច្ច​អន្តរាគមន៍ ករណី​ដី​ជម្លោះ​រ៉ាំរ៉ៃ​របស់​ពួកគាត់។ សង្គម​ស៊ីវិល ផ្ដល់​យោបល់​ថា អាជ្ញាធរ​គួរ​សហការ​គ្នា​ជាមួយ​ពលរដ្ឋ សិក្សា​រួមគ្នា ដើម្បី​បញ្ចប់​ដំណោះស្រាយ​អូស​បន្លាយ​ជាង ១០​ឆ្នាំ​មកនេះ។

ពលរដ្ឋ​ជាច្រើន​គ្រួសារ នៅ​ឃុំ​សង្កែសា​ប ស្រុក​ឱរ៉ាល់ ខេត្ត​កំពង់ស្ពឺ នៅ​ព្រឹក​ថ្ងៃទី​១៣ មិថុនា បាន​ប្រមូល​ផ្ដុំគ្នា លើក​បដា​រូបលោក​នាយករដ្ឋមន្ត្រី ហ៊ុន សែន និង​ភរិយា ឈរ​តម្រៀប​គ្នា​តវ៉ា​នៅមុខ​ក្រសួង​រៀបចំ​ដែនដី នគរូបនីយកម្ម និង​សំណង់ ក្នុង​គោលបំណង​ស្នើសុំ​រដ្ឋមន្ត្រី លោក ជា សុផារ៉ា ឲ្យ​ពន្លឿន​ស្វែងរក​ដំណោះស្រាយ​ទំនាស់​ដីធ្លី​របស់​ពួកគាត់។

តំណាង​ពលរដ្ឋ​មាន​ជម្លោះដីធ្លី នៅ​ឃុំ​សង្កែ​សាទប លោក ម៉ម សុវណ្ណ រៀបរាប់​ថា ជាង​១០​ឆ្នាំ​មក​នេះ ពលរដ្ឋ​បាន​ឡើង​មក​ដាក់​ញត្តិ នៅ​ក្រសួង​រៀបចំ​ដែនដី ជាង​១០​ដង​ហើយ ខណៈ​ដែល​ញត្តិ ជាច្រើន​ទៀត ត្រូវ​បាន​ពលរដ្ឋ​យក​ទៅ​នៅ​តាម​ក្រសួង ស្ថាប័នរដ្ឋ ខុទ្ទកាល័យ​លោកនាយក​រដ្ឋមន្ត្រី ហ៊ុន សែន ប៉ុន្តែ នៅ​មិន​ទាន់​មាន​ដំណោះស្រាយ​ទេ។ ពលរដ្ឋ​រូប​នេះ ឲ្យ​ដឹង​ថា ដី​ដែល​មាន​ជម្លោះ មាន​ទំហំ ៣.៧៥៩ហិកតារ ត្រូវ​បាន​អតីត​អភិបាលស្រុក​ឱរ៉ាល់ ឈ្មោះ ចែម សារីម និង​អតីត​នាយរង​សេនាធិការ​ភូមិភាគ​៣ ឈ្មោះ ប៉ូ សាគីន សហការ​គ្នា​លួច​លក់​ឲ្យ​ក្រុមហ៊ុន​ស្ករអំពៅ​របស់​ឧកញ្ញ៉ា លី យ៉ុងផាត់ សមាជិក​ព្រឹទ្ធិ​សភា​របប​ក្រុងភ្នំពេញ តាំងពី​អំឡុង​ឆ្នាំ​២០០៥។

លោក ម៉ម សុវណ្ណ អះអាង​ថា ច្រើន​ឆ្នាំ​មកនេះ អ្នកភូមិ​ជាច្រើន​នាក់​រួម​ទាំង​រូបលោក បាន​ក្លាយ​ជា​ជនរងគ្រោះ ដោយសារតែ​សកម្មភាព​ចេញ​តវ៉ា​ដី​នេះ។ លោក​រំលឹក​ថា កាលពី​ឆ្នាំ​២០០៥ អាជ្ញាធរ​បាន​ចោទ​ប្រកាន់​គាត់ គឺ​ជា​មេទ័ព​ស្រមោល មាន​ផែនការ​ផ្ដួល​រំលំ​រដ្ឋាភិបាល ចំណែក​ថ្មីៗ​នេះ អាជ្ញាធរ បាន​ចោទប្រកាន់ គាត់​ថា ជា​សកម្មជន​របស់​គណបក្ស​ប្រឆាំង ដើរ​ញុះញង់ ធ្វើ​សកម្មភាព​បដិវត្ត​ពណ៌ ចង់​ផ្ដួល​រំលំ​របប​ក្រុងភ្នំពេញ៖ «ថា​ខ្ញុំ​នេះ​អា​យួន រហូត​សព្វថ្ងៃ​នេះ ចោទ​ខ្ញុំ​ថា ជា​គណបក្ស​សង្គ្រោះជាតិ ដើរ​បំផុស ចលនា​និង​បង្កើត​អបគមន៍​រួម​ក្នុង​ការ​ផ្ដួល​រលំ រាជរដ្ឋាភិបាល មនុស្ស​ខ្ញុំ​ជា​ជនជាតិ​ខ្មែរ​ដែរ​តែ​ខ្ញុំ​មាន​ស្រុកកំណើត​នៅ​ទឹកដី​កម្ពុជា​ក្រោម»

ពលរដ្ឋ​អះអាង​ថា អាជ្ញាធរ​ខេត្ត​កំពង់ស្ពឺ ធ្លាប់​បាន​ធ្វើ​សកម្មភាព​ដុត​ផ្ទះ អារ​រំលំ​ផ្ទះ រុះ​យក​ឈើ​ល្អៗ​ពី​ផ្ទះ​របស់​ពលរដ្ឋ រឹបអូស​យក​គ្រឿង​សង្ហារិម ត្បាល់កិន​ម្សៅ​ធ្វើ​នំ​លក់​របស់​អ្នកភូមិ ជាដើម ដើម្បី​បង្ខំ​ឲ្យ​ពលរដ្ឋ​ចាក​ចេញពី​លំនៅឋាន។ ពលរដ្ឋ​ហៅ​សកម្មភាព​ទាំងនោះ ជា​សកម្មភាព​ឆក់​ប្លន់​ទ្រព្យសម្បត្តិ​របស់​អ្នកភូមិ។

អាស៊ីសេរី មិន​អាច​រក​ប្រភព ដើម្បី​សុំ​ការ​បំភ្លឺ ពី​អតីត​អភិបាលស្រុក​ឱរ៉ាល់ ឈ្មោះ ចែម សារីម និង​អតីត​នាយរង​សេនាធិការ​ភូមិភាគ​៣ ឈ្មោះ ប៉ូ សាគីន ជុំវិញ​ការ​ចោទ​របស់​ពលរដ្ឋ​បាន​ទេ នៅ​ថ្ងៃ​ទី​១៣ មិថុនា។ តែ​យ៉ាងណា ពលរដ្ឋ​ប្រាប់​ថា មន្ត្រី​ក្រសួង​រៀបចំ​ដែនដី បាន​មក​ទទួល​យក​ញត្តិ​របស់​ពលរដ្ឋ និង​បាន​សន្យា​ដោះស្រាយ​ឲ្យ តែ​មិន​បាន​កំណត់​រយៈពេល​ដោះស្រាយ​នៅ​ថ្ងៃ​ណា​ទេ។

អ្នក​សម្របសម្រួល​សមាគម​សិទ្ធិមនុស្ស​អាដហុក (Adhoc) ប្រចាំ​ខេត្ត​កំពង់ស្ពឺ លោក រ័ត្ន ថាវី សង្កេត​ឃើញ​ថា មូលហេតុ​ដែល​បណ្ដាល​ឲ្យ​ជម្លោះដីធ្លី​ពលរដ្ឋ​នៅ​ឃុំ​សង្កែ​សាទប អូស​បន្លាយ​រាប់​ឆ្នាំ​មក​នេះ ដោយសារតែ ពលរដ្ឋ​ខ្វះខាត​ឯកសារ​កាន់កាប់​ដី​ផ្លូវច្បាប់ ក្រោយ​ពេល​ដែល​របប​ក្រុង​ភ្នំពេញ បាន​ធ្វើ​សម្បទាន​សេដ្ឋកិច្ច​ឲ្យ​ក្រុមហ៊ុន​វិនិយោគ​ដាំ​ដំណាំ​អំពៅ៖ «យើង​មើល​ទៅ​បន្ទាប់ ពី​មាន​ការ​ចុះ​បំពេញ​បែបបទ សាលាកប័ត្រ​ដី​ជូន​ឲ្យ​ក្រសួង​ដែនដី​រួចមក ឃើញ​ថា វិវាទ​ដី​មានការ​កើន​​ឡើង​ច្រើន​ជាមុន អ៊ីចឹង​យើង ប្រហែល​អាច សន្និដ្ឋាន​បាន​ថា មន្ត្រី​ទាំងនោះ​កំពុង​គិតគូរ​រក​ដំណោះស្រាយ​ហើយ​កំពុង​គិត​ថា​ដោះ ដោយ​របៀប​ណា»

សង្គម​ស៊ីវិល ផ្ដល់​អនុសាសន៍​ថា ដើម្បី​បញ្ចប់​ជម្លោះ​រ៉ាំរ៉ៃ​របស់​ពលរដ្ឋ​នៅ​ឃុំ​សង្កែសាទប ជាមួយ​ក្រុមហ៊ុន​ស្ករអំពៅ មន្ត្រី​ក្រសួង​រៀបចំ​ដែនដី និង​អាជ្ញាធរ គួរ​សហការ​គ្នា​ជាមួយ​ពលរដ្ឋ ដើម្បី​សិក្សា​ពី​ផល​ប៉ះពាល់​រួម រក​តួលេខ​ម្ចាស់​ដី​ពិតប្រាកដ ហើយ​គួរ​ផ្ដល់​សំណង​ជូន​ពួកគាត់ ជា​ការ​ផ្ដល់​ដី​នៅ​កន្លែង​ផ្សេង ដែល​មាន​ហេដ្ឋារចនាសម្ព័ន្ធ​ល្អ ឬ​គួរ​ផ្ដល់​កញ្ចប់​ថវិកា​ណាមួយ ដែល​ពលរដ្ឋ​អាច​ទទួល​យក​បាន ជៀសវាង​ការ​ទុក​ជម្លោះ​នេះ អូស​បន្លាយ​តទៅទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល