សហគមន៍ជនជាតិដើមភាគតិចរាប់រយគ្រួសារ រស់នៅភូមិចំនួន៣ នៃឃុំដាក់ដាំត្អូញថា អាជ្ញាធរមូលដ្ឋានខេត្តនេះ មិនបានយកចិត្តទុកដាក់ដោះស្រាយក្ដីកង្វល់របស់ពលរដ្ឋ ដែលចង់ឱ្យអាជ្ញាធររួមគ្នាថែរក្សាព្រៃកប់ខ្មោច ព្រៃអារក្ស និងតំបន់រមណីយដ្ឋានទឹកធ្លាក់ជ្រៃធំឱ្យគង់វង្សនោះទេ បើទោះបីជាអ្នកភូមិជាង ១រយនាក់ បានផ្ដិតមេដៃប្ដឹងទាមទារដីទាំងនោះ ជាសម្បត្តិរដ្ឋវិញកាលពីអំឡុង ឆ្នាំ ២០១៧។
កាលពីថ្ងៃទី១៧ ឧសភា ជនជាតិដើមភាគតិចរស់នៅភូមិពូឡេះ ភូមិពូត្រែង និងភូមិពូឆប នៃឃុំដាក់ដាំ ជិត ១រយនាក់ បានលើកគ្នាតវ៉ានៅចំណុច ទឹកធ្លាក់ជ្រៃធំ បំណងទាមទារដី ដែលឈ្មួញមានអំណាច ៤នាក់ ឈូសឆាយហ៊ុមព័ទ្ធព្រៃកប់ខ្មោច និងដីតំបន់ទឹកធ្លាក់ជ្រៃធំអស់ជាច្រើនហិកតារមកវិញ។
តំណាងសហគមន៍ លោក ច្រូត ខ្លើត ឱ្យដឹងនៅថ្ងៃទី១៨ ឧសភា ថា ឈ្មួញបានឈូសឆាយហ៊ុមព័ទ្ធតំបន់ព្រៃកប់សព និងគ្រប់គ្រងតំបន់ទឹកធ្លាក់ជ្រៃធំអស់មួយផ្នែកធំ ធ្វើឱ្យអ្នកភូមិកើតទុកមិនសុខចិត្ត។ លោកថា សូម្បីតែដើមឈើធំៗ ដែលទាក់ទាញភ្ញៀវទេសចរ ក្នុងតំបន់ទឹកធ្លាក់ជ្រៃធំ ក៏ត្រូវគេកាប់ដួល អស់ស្ទើរទាំងស្រុងដែរ។ លោកបន្ថែមថា ពលរដ្ឋជាង ១រយនាក់ ធ្លាប់បានផ្តិតមេដៃ ប្ដឹងសុំឱ្យអាជ្ញាធរមូលដ្ឋាន ដោះស្រាយបញ្ហានេះ តែអាជ្ញាធរពាក់ព័ន្ធបានរុញដាក់គ្នាទៅវិញមក។ «»
អាស៊ីសេរីបានទាក់ទងមេឃុំដាក់ដាំ លោក ចាស់ ណា ដើម្បីសុំការបំភ្លឺរឿងនេះ តែទូរស័ព្ទហៅចូលច្រើនដងគ្មានអ្នកទទួលនៅថ្ងៃទី១៨ ឧសភា។ ប៉ុន្តែអភិបាលស្រុកអូររាំង លោក នង ទុនណ្ណារី មានប្រសាសន៍យ៉ាងខ្លីថា កិច្ចការងារនេះអាជ្ញាធរស្រុកបានសម្របសម្រួលជាច្រើនលើកហើយ តែភាគគីទាំងសងខាង ពុំទាន់ឯកភាពគ្នា ដោយសារមានឯកសាររៀងៗខ្លួន។ លោកថា ពលរដ្ឋដែលបានកាន់កាប់ដីនេះ មានលិខិតទទួលស្គាល់តាំងពីអតីតអភិបាលស្រុកមុនៗ និងមានបោះត្រា មេឃុំតាំងពីឆ្នាំ២០០៦។ លោកបញ្ជាក់ថា អាជ្ញាធរពាក់ព័ន្ធកំពុងខិតខំសម្របសម្រួលដោះស្រាយករណីនេះ ដើម្បីរកចំណុចវិជ្ជមានទាំងសងខាង។ «»
មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក អ៊ាង ម៉េងលី សង្កេតឃើញថា អាជ្ញាធរមូលដ្ឋានខេត្តនេះមិនបានយកចិត្តទុកដាក់ដោះស្រាយ វិបត្តិដីធ្លីនេះទេ និងបានរុញដាក់គ្នាទៅវិញទៅមក។ លោកថា អាជ្ញាធរហាក់មានចេតនាមិនចង់ដោះស្រាយរឿងនេះ ខណៈដែលពលរដ្ឋបានប្ដឹងទាមទារដីទាំងនោះ ជាច្រើនឆ្នាំមកហើយ។ លើសពីនេះ អាជ្ញាធរមូលដ្ឋានហាក់បើកដៃឱ្យភាគីម្ខាង យកគ្រឿងចក្រឈូសឆាយបំពានយកដីមានជម្លោះនោះ។ «»
សហគមន៍ជនជាតិដើមភាគតិចព្នងបន្ថែមថា ពួកគេមានទិសដៅ ចង់ថែរក្សាព្រៃកប់សព ព្រៃអារក្ស និងដើមឈើឋិតក្នុងតំបន់រមណីយដ្ឋានទឹកធ្លាក់ជ្រៃធំឱ្យគង់វង្ស ប៉ុន្តែមិនត្រូវបានអាជ្ញាធរលើកទឹកចិត្ត និងជួយពន្លឿនចុះបញ្ជីដីសមូហភាពនោះទេ បែរជាទុកឱកាសឱ្យឈ្មួញលួចឈូសឆាយរំលោភយកជាសម្បត្តិឯកជនជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។