ក្រុមពលរដ្ឋប្រមាណ ៣០នាក់តំណាងឲ្យពលរដ្ឋជាង១០០គ្រួសារ ប្រមូលផ្ដុំគ្នាធ្វើសន្និសីទកាសែត លើដីមានជម្លោះជាមួយក្រុមហ៊ុនOCIC ដោយស្នើសុំឲ្យមួយ ជួបប្រជុំគ្នារកដំណោះស្រាយ។
តំណាងប្រជាពលរដ្ឋជាង ១០០គ្រួសារ លោក ជា សុផាត ប្រាប់អាស៊ីសេរី នៅថ្ងៃទី៨ ធ្នូ ថា អស់ពេលជាង ៦ឆ្នាំមកហើយ ដំណោះស្រាយសម្រាប់អ្នកជ្រោយចង្វារ នៅមិនទាន់ទទួលបាននៅឡើយ ទោះបីជាមានចំណារពីក្រសួងដែនដី ក្រសួងមហាផ្ទៃ និងរដ្ឋសភា ជាច្រើនដង តម្រូវឱ្យសាលារាជធានីភ្នំពេញ ជាអ្នកដោះស្រាយជូនពលរដ្ឋក៏ដោយ។ ទំនាស់ដីធ្លីនេះ កើតឡើងលើផ្ទៃដីទំហំជាង១០០ហិកតារ ស្ថិតក្នុងសង្កាត់បីនៃខណ្ឌជ្រោយចង្វារ គឺសង្កាត់ព្រែកតាសេក សង្កាត់ព្រែកលាភ និងសង្កាត់ជ្រោយចង្វារ។
លោក ជា សុផាត លើកឡើងថា ពេលលោក ប៉ា សុជាតិវង្ស កាន់តំណែងជាអភិបាលក្រុងភ្នំពេញ អតីតអភិបាលក្រុងរូបនេះ ព្យាយាមឲ្យប្រជាពលរដ្ឋទទួលយកសំណង ១០ភាគរយនៃផ្ទៃដៃទាំងមូលដែលពួកគាត់កាន់កាប់ ក៏ប៉ុន្តែប្រជាពលរដ្ឋក្នុងតំបន់មានជម្លោះ ថាមិនអាចទទួលយកសំណងបែបនេះបានទេ។ ចំណែកលោក ឃួង ស្រេង ដែលឡើងកាន់តំណែងជាអភិបាលក្រុងភ្នំពេញសព្វនេះ ក៏នៅមិនទាន់អាចផ្ដល់ដំណោះស្រាយជូនពួកគាត់បានដែរ។
លោក ជា សុផាត បញ្ជាក់ថា ដំណោះស្រាយដែលពលរដ្ឋចង់បាននៅពេលនេះ គឺស្នើឲ្យសាលាក្រុងភ្នំពេញ ឆ្វៀលដីជាលក្ខណៈស្បែកខ្លា បើប៉ះចំដីផ្ទះរបស់ពលរដ្ឋ សុំឲ្យអាជ្ញាធរកាត់តំបន់ដែលក្រុមហ៊ុនកំណត់ចាប់ពីទីស្នាក់ការគណបក្សប្រជាជនកម្ពុជា សង្កាត់ជ្រោយចង្វារ តាមដងទន្លេសាប ដល់សង្កាត់ព្រែកតាសេក ចេញពីគម្រោងអភិវឌ្ឍន៍ ហើយសុំឲ្យធ្វើប្លង់កម្មសិទ្ធិជូនពលរដ្ឋ និងត្រូវទិញដីពីពលរដ្ឋ ទៅតាមតម្លៃទីផ្សារ បើសិនក្រុមហ៊ុនចង់បានដីនោះបញ្ចូលក្នុងគម្រោង៖ «ខ្ញុំជឿជាក់ថា បើសិនជាខាង អាជ្ញាធរដែនដី ឬក៏ខាងក្រុមហ៊ុន មានគោលការណ៍ឬក៏ចង់ដោះស្រាយឱ្យពួកខ្ញុំហ្នឹង ត្រូវយកបញ្ហាមកដាក់លើតុ ចរចាគ្នាដើម្បីរកដំណោះស្រាយមួយថាតើ អាចឲ្យពួកខ្ញុំប៉ុន្មាន ពួកខ្ញុំអាចទទួលយកបានប៉ុន្មាន និយាយគ្នាដោយសន្តិវិធីទៅ រកចំណុចកណ្ដាលមួយថាតើពួកខ្ញុំទទួលយកបានដែរឬអត់។ ប៉ុន្តែប្រសិនបើយកតែរបៀបចំណាត់ការដូចសព្វថ្ងៃ អាងតែអំណាច អាងតែខ្លួនជាអ្នកធំ អាជ្ញាធរមិនមែនជាអាជ្ញាកណ្ដាល ជាឈ្មួញកណ្ដាល អាហ្នឹងគឺថាអត់ចប់បញ្ហាពួកខ្ញុំ។ ខ្ញុំនៅតែធ្វើការតស៊ូមតិរហូត»។
ឆ្លើយតបនឹងការទាមទារពីពលរដ្ឋនេះ អភិបាលរាជធានីភ្នំពេញ លោក ឃួង ស្រេង លើកទឹកចិត្តឲ្យពលរដ្ឋដែលមានជម្លោះដីធ្លីនៅតំបន់ជ្រោយចង្វារ ដាក់ញត្តិនៅសាលាក្រុងភ្នំពេញ ដើម្បីឲ្យលោករកពេលវេលាសមស្របណាមួយ ជួបប្រជុំគ្នា និងផ្ដល់ជាដំណោះស្រាយជូនពលរដ្ឋ៖ «ខ្ញុំអត់អាចនិយាយតាមហ្នឹងបានទេ តែអ្វីដែលគាត់ចង់បានវាមិនអាចបំពេញឲ្យគាត់គ្រប់បំណងពួកគាត់បានទេ ព្រោះថារឿងដោះស្រាយផលប៉ះពាល់។ ខ្ញុំនឹងដោះស្រាយកិច្ចការហ្នឹង បាទ ! ទាល់តែឲ្យសហគមន៍ហ្នឹងដាក់ញត្តិដាក់លិខិតអីត្រឹមត្រូវមក ចាំខ្ញុំអញ្ជើញគាត់ហៅដោះស្រាយ»។
ចំពោះជម្លោះដីធ្លីដ៏រ៉ាំរ៉ៃរវាងអ្នកជ្រោយចង្វារ និងក្រុមហ៊ុនOCIC របស់លោកឧកញ៉ា ពុង ខៀវសែ អូសបន្លាយជាង ៦ឆ្នាំនេះ មន្ត្រីស៊ើបអង្កេតជាន់ខ្ពស់ នៃសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា យល់ថា ដំណោះស្រាយពិតជាមាន ប្រសិនបើអាជ្ញាធរមានឆន្ទៈពិតប្រាកដក្នុងការបញ្ចប់ជម្លោះនោះ៖ «បើសិនជាខាងសាលាក្រុងលោកមានឆន្ទៈ ស្មោះត្រង់ក្នុងការដោះស្រាយបញ្ហានេះពិតមែននោះ គួរតែបញ្ជូនមន្ត្រីជំនាញរបស់ខ្លួន ជាមួយនឹងប្រជាពលរដ្ឋដើម្បីដោះស្រាយបញ្ហាហ្នឹងជាមួយប្រជាពលរដ្ឋផងទៅ ជៀសវាងយើងទទួលតួនាទីបម្រើប្រជាពលរដ្ឋ ហើយចេះតែឲ្យប្រជាពលរដ្ឋធ្វើនេះ ធ្វើនោះ ហើយបញ្ហារបស់គាត់នៅតែដដែល ហើយដោះស្រាយមិនបាន»។
កាលពីឆ្នាំ២០១២ ក្រុមហ៊ុន OCIC របស់លោកឧកញ៉ា ពុង ខៀវសែ ចាប់ដំណើរការសាងសង់ក្រុងរណបក្នុងខណ្ឌជ្រោយចង្វារ ក្រោយពីទទួលបានសិទ្ធិអភិវឌ្ឍន៍ ពីសាលាក្រុងភ្នំពេញលើផ្ទៃដីសរុបប្រមាណ ៣៨៧ហិកតារ។ គម្រោងអភិវឌ្ឍន៍នេះស្ថិតនៅភាគខាងកើតទីក្រុងភ្នំពេញ ជាប់ច្រាំងទន្លេខាងកើតឈៀងខាងឆ្វេង ស្ពានមិត្តភាពកម្ពុជា-ជប៉ុន និងស្ពានមិត្តភាពកម្ពុជា-ចិន។
បច្ចុប្បន្ននេះ តំណាងសហគមន៍ជ្រោយចង្វារ លោក ជា សុផាត ឲ្យដឹងថា ខាងក្រុមហ៊ុននៅតែបន្តការឈូសឆាយដីធ្លីពលរដ្ឋរហូតមកដល់ពេលនេះ ដោយគ្មានការផ្អាកមួយថ្ងៃណាឡើយ ហើយដីធ្លីរបស់គាត់ជាង ៤ពាន់ម៉ែត្រការ៉េ ត្រូវបានក្រុមហ៊ុន យកទៅសាងសង់ធ្វើជាភោជនីយដ្ឋាន ហើយនឹងផ្ទះពលរដ្ឋ៨ខ្នង ត្រូវបានក្រុមហ៊ុនឈូសកម្ទេចចោល។ តំណាងពលរដ្ឋរស់នៅតំបន់ជ្រោយចង្វារ លោក ជា សុជាត ស្នើសុំប្រមុខដឹកនាំ លោក ហ៊ុន សែន ជួយអន្តរាគមន៍ដោះស្រាយបញ្ចប់ជម្លោះដីធ្លីជូនពួកគាត់ ដែលភាគច្រើនជាមន្ត្រីរាជការនៅតាមក្រសួងស្ថាប័ននានា មានប៉ូលីស ទាហាន និងគ្រូបង្រៀនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។