ក្រុមមេធាវីនៃអង្គការសង្គមស៊ីវិលផ្នែកសិទ្ធិមនុស្ស ដាក់បណ្ដឹងទៅសាលាដំបូងខេត្តព្រះវិហារ ស្នើសុំនៅក្រៅបណ្ដោះអាសន្ន ចំពោះពលរដ្ឋ ១៤នាក់ ដែលកំពុងជាប់ឃុំក្នុងពន្ធនាគារជាង ១ខែមកហើយ ក្នុងជម្លោះដីធ្លីជាមួយក្រុមហ៊ុន មេត្រីភាព នៅស្រុកជាំក្សាន្ត ខេត្តព្រះវិហារ។ ចំណែកខាងក្រុមគ្រួសារពួកគាត់ ក៏ទទូចស្នើសុំតុលាការ ដោះលែងអ្នកភូមិទាំងនោះ ឲ្យមានសេរីភាពឡើងវិញ។
អ្នកសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តព្រះវិហារ លោក ឡោ ចាន់ ឲ្យអាស៊ីសេរីដឹងថា មេធាវីម្នាក់មកពីសមាគម អាដហុក (ADHOC) និងម្នាក់ទៀតមកពីមជ្ឈមណ្ឌលអប់រំច្បាប់សម្រាប់សហគមន៍ (CLAC) បានដាក់បណ្ដឹងស្នើសុំតុលាការខេត្តព្រះវិហារ ជាងសប្ដាហ៍មកហើយ នៅមិនទាន់មានការពីឆ្លើយតបពីមន្ត្រីតុលាការនៅឡើយ រឿងស្នើសុំដោះលែងពលរដ្ឋ១៤នាក់ឲ្យបាននៅក្រៅឃុំបណ្ដោះអាសន្ន។ លោក ឡោ ចាន់ សង្កេតឃើញថា ការចាប់ខ្លួនពលរដ្ឋដែលភាគច្រើនជាមេគ្រួសារ ឃុំខ្លួនមកដល់ពេលនេះ បង្កឲ្យក្រុមគ្រួសារពួកគាត់ជួបការលំបាកជាខ្លាំង។ លោក ឡោ ចាន់ យល់ថា តុលាការ អាចដាក់ឲ្យពួកគាត់នៅក្រៅឃុំ ស្ថិតក្រោមត្រួតពិនិត្យរបស់តុលាការបាន៖ «បើសិនជាបន្តនៅឃុំខ្លួនបណ្ដោះអាសន្ន ពួកគាត់នុះធ្វើឲ្យចំណូល ក៏ដូចជាជីវភាពក្រុមគ្រួសារគាត់ដែលកំពុងរស់នៅ ធ្វើឲ្យបាត់បង់ចំណូល ហើយធ្វើឲ្យធ្លាក់ចុះយ៉ាងខ្លាំង។ ហើយជាពិសេសមួយទៀត ក៏ប៉ះពាល់ដល់ការសិក្សារបស់ក្មេងៗ ផងដែរ ពីព្រោះនៅពេលដែលមេគ្រួសារនីមួយៗ ពុំមានលុយកាក់ចាយ ឬក៏ចំណូលក្នុងគ្រួសារ គឺគាត់អាចមានបញ្ហាប្រឈមទៅនឹងការសិក្សា ក៏ដូចជាជីវភាពរបស់ពួកគាត់»។
លោកស្រី ឃុត រ៉ា ដែលត្រូវជាកូនប្រសាស្រីរបស់ពលរដ្ឋម្នាក់ដែលកំពុងបាត់ខ្លួន ចាត់ទុកថា សកម្មភាពរបស់ក្រុមទាហាននិងមន្ត្រីបរិស្ថាន ដែលចាប់ប្ដីលោកស្រី ឈ្មោះ ម៉ឺន មឿន វ័យ ២៦ឆ្នាំ យកទៅឃុំខ្លួនជាង ១ខែកន្លះមកនេះ ថាជារឿងអយុត្តិធម៌ និងមិនអាចទទួលបាន។ លោកស្រីស្នើសុំតុលាការខត្តព្រះវិហារ ដោះលែងពលរដ្ឋឲ្យមានមានសេរីភាពឡើងវិញ ព្រោះជីវភាពពួកគាត់សព្វថ្ងៃនេះ កំពុងប្រឈមនិងការខ្វះខាតជាខ្លាំង ខណៈប្ដីជាប់ឃុំក្នុងពន្ធនាគារ ហើយឪពុកនៅតែបាត់ខ្លួនរកមិនទាន់ឃើញ៖ «បើសិនជាគាត់បំផ្លាញព្រៃឈើបរិស្ថាន កាប់ឆ្ការ។ អាហ្នឹង ខ្ញុំអត់ថា ទេបង។ តែនេះគាត់បើកគោយន្តបើកឥវ៉ាន់ធម្មតា នៅលើផ្លូវហើយគាត់ចាប់ស្ទាក់វាយ ចាប់យកទៅ ហើយគាត់ចោទថាបរិស្ថាន។ ខ្ញុំអត់ដឹងថា ច្បាប់ចែងធ្វើមិច។ សូមសំណូមពរ ឲ្យគាត់ហ្នឹង ដោះលែងប្ដីខ្ញុំមក ហើយនឹងប្រជាពលរដ្ឋដែលនៅក្នុងហ្នឹងទៅ។ បើគាត់ចេញដីកាមិនព្រមដោះលែងអ៊ីចឹង ប្រុងគិតមិច។ គាត់ចង់គិតយ៉ាងតទៅទៀត។ អ៊ីចឹង ! យុត្តិធម៌លើលោកនេះ មានឬអត់ សម្រាប់ប្រជាជនដែលគ្នាអត់ គ្នាខ្សត់ខ្សោយនេះ។ ឬមួយក៏ចង់ជាន់ប្រជាជនឲ្យលិចស្លាប់នៅក្នុងដីតែម្ដង»។
ទោះបីជាយ៉ាងណា ព្រះរាជអាជ្ញានៃតុលាការខេត្តព្រះវិហារ លោក ទី សុវិនថាល់ បដិសេធផ្ដល់សម្ភាសន៍ឲ្យអាស៊ីសេរី រឿងឃុំខ្លួនពលរដ្ឋ ១៥នាក់ ដែលមានម្នាក់បាត់ខ្លួននោះទេ៖ «ប៉ុនហ្នឹងចុះ ខ្ញុំជាប់កិច្ចការងារអី មានរឿងអ្វីដែលត្រូវដោះស្រាយបញ្ហាផ្លូវច្បាប់ មកតុលាការមក។ អាហ្នឹងបានតទល់គ្នាចំពោះមុខច្បាប់»។
ប៉ុន្តែ មន្ត្រីតុលាការរូបនេះ បានប្រាប់សារព័ត៌មានក្នុងស្រុកថា លោកមិនអនុញ្ញាតឲ្យពលរដ្ឋទាំងនោះ បាននៅក្រៅឃុំបណ្ដោះអាសន្នឡើយ ព្រោះថាករណីនេះ តុលាការសម្រេចឃុំខ្លួនពួកគេ ពាក់ព័ន្ធបទល្មើសបរិស្ថាន មិនមែនពាក់ព័ន្ធជម្លោះដីធ្លីនោះទេ។ លោក ទី សុវិនថាល់ ក៏ព្រមានចាត់វិធានការផ្លូវច្បាប់ទៅជនណា ដែលលោកយល់ថា បានផ្ដល់យោបល់ឲ្យពលរដ្ឋម្នាក់រត់គេចខ្លួន ដើម្បីទម្លាក់កំហុសលើអាជ្ញាធរ។
ទោះបីជាយ៉ាងណាក៏ដោយ មន្ត្រីសិទ្ធិមនុស្សនៃសមាគម អាដហុក លោក ឡោ ចាន់ឲ្យដឹងថា ក្រុមមេធាវីការពារឲ្យពលរដ្ឋនឹងបន្តនីតិវិធី ដោយដាក់ពាក្យប្ដឹងទាស់ទៅសាលាឧទ្ធរណ៍បន្តទៀត ទៅតាមនីតិវិធី។
កាលពីខែមករា ក្រុមទាហាននៅកងពលតូចលេខ ៦ ដែលឈរជើងការពារដីឲ្យក្រុមហ៊ុន មេត្រីភាព បានចាប់ខ្លួនពលរដ្ឋ ១៥នាក់ ជាបន្តបន្ទាប់ ក្រោយពីពលរដ្ឋទាំងនោះបានដឹកនាំអ្នកភូមិតវ៉ារឿងវិវាទដីជាមួយក្រុមហ៊ុន នៅក្នុងឃុំយាង ស្រុកជាំក្សាន្ត ខេត្តព្រះវិហារ។ ក្នុងចំណោមពលរដ្ឋ១៥ នាក់ ដែលក្រុមទាហានចាប់យកទៅឃុំខ្លួននោះ មានម្នាក់បាត់ខ្លួនម្នាក់ នៅមិនទាន់រកឃើញរហូតមកដល់ពេលនេះ ឈ្មោះ សំ ម៉ឺន វ័យ ៥៤ឆ្នាំ។ ក្រុមហ៊ុន មេត្រីភាព បានទទួលដីសម្បទានសេដ្ឋកិច្ចពីមេដឹកនាំរបបក្រុងភ្នំពេញ កាលពីខែឧសភា ឆ្នាំ២០១២ ដោយវិនិយោគទៅលើវិស័យកសិ-ឧស្សាហកម្ម និងចិញ្ចឹមសត្វ លើផ្ទៃ ៨.៥០០ហិកតារ។ មកដល់ពេលនេះ ពលរដ្ឋអះអាងថា ពួកគាត់នៅមិនទាន់ឃើញ ក្រុមហ៊ុនធ្វើការអភិវឌ្ឍន៍ដីធ្លីដែលរដ្ឋសម្បទានឲ្យនៅឡើយ បែរជាបន្តឈូសឆាយដីចម្ការ ផលដំណាំពលរដ្ឋអស់ជាច្រើនហិកតារ និងបន្តចុះដុតខ្ទមនឹងផ្ទះពលរដ្ឋអស់ជាច្រើនខ្នង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។