ភរិយា​ពលរដ្ឋ​ម្នាក់​ដែល​បាត់​ខ្លួន​ស្នើសុំ​ឱ្យ​ជួយ​ស្វែងរក​ប្ដី និង​ដោះស្រាយ​បញ្ចប់​ជាមួយ​ក្រុមហ៊ុន

ដោយ ថ​ន ថារ៉ូ
2019-03-20
អ៊ីម៉ែល
មតិ
Share
បោះពុម្ព
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
រូបថត៖ សមាគម អាដហុក (ADHOC)

ភរិយា​ពលរដ្ឋ​ម្នាក់​ដែល​បាត់​ខ្លួន​បាន ដាក់ពាក្យ​ស្នើសុំ​កិច្ច​អន្តរាគមន៍​ពី​អភិបាលខេត្ត​ព្រះវិហារ និង​អ្នកតំណាងរាស្ត្រ​បក្ស​កាន់អំណាច​ប្រចាំ​ខេត្ត ឱ្យ​ជួយ​ស្វែងរក​ប្ដី​របស់​គាត់ ក្រោយពី​មាន​ក្រុម​ទាហាន​ចាប់​យក​ទៅ​ឃុំខ្លួន​នៅ​ការិយាល័យ​បរិស្ថាន កាលពី​២​ខែ​មុន។ ក្រោយពី​ធ្វើការ​ចុះ​ស៊ើបសួរ អង្គការ​ផ្នែក​សិទ្ធិមនុស្ស យល់ថា ក្រុម​ទាហាន​និង​មន្ត្រី​បរិស្ថាន​ខេត្ត​ព្រះវិហារ គឺជា​អ្នកទទួលខុសត្រូវ​រឿង​បាត់​ខ្លួន​ពលរដ្ឋ​ម្នាក់​នេះ

លោកស្រី ភឹម ម៉ៅ ត្រូវជា​ភរិយា​របស់​ជន​បាត់​ខ្លួន ប្រាប់​អាស៊ីសេរី​ថា ជាង​២​ខែ​មកនេះ លោកស្រី និង​កូនប្រសា​ស្រី បាន​ដើរ​រក​លោក ស៊ុំ ម៉ឺន គ្រប់កន្លែង​អស់ហើយ ប៉ុន្តែ​នៅតែ​រក​មិន​ឃើញ។ ស្ត្រី​វ័យ​ជាង ៥០​ឆ្នាំ​រូប​នេះ ក៏​សម្រេច​ដាក់ពាក្យ​បណ្ដឹង​ទៅ​អភិបាល​ខេត្ត​ព្រះវិហារ និង​អ្នក​តំណាងរាស្ត្រ​ប្រចាំ​ខេត្ត​ព្រះវិហារ លោក សួស យ៉ារ៉ា ស្នើសុំ​ជួយ​ស្វែងរក​ប្ដី​គាត់​ដែល​បាត់​ខ្លួន ព្រមទាំង​ជួយ​ដោះស្រាយ​បញ្ចប់​ជម្លោះដីធ្លី​ជាមួយ​ក្រុមហ៊ុន​មេត្រីភាព។

នៅ​ក្នុង​ពាក្យបណ្ដឹង​ដែល​ដាក់​ចូល​រដ្ឋបាល​ខេត្ត​ព្រះវិហា​រ និង​ទីស្នាក់ការ​រដ្ឋសភា​មណ្ឌល​ខេត្ត​ព្រះវិហារ កាលពី​ថ្ងៃ​ទី១៨ មីនា លោកស្រី ភឹម ម៉ៅ សរសេរ​ថា លោក លុយ សម្បត្តិ (​ហៅ រឹម ខេន​) ខាង​កងពល​លេខ​៦ វារៈ​អន្តរាគមន៍​តូច​២៦១ បាន​ចាប់ខ្លួន​ប្ដី​គាត់ ឈ្មោះ ស៊ុំ ម៉ឺន វ័យ ៥៤​ឆ្នាំ កាលពី​ថ្ងៃ​ទី​២០ ខែ​មករា ហើយ​បណ្ដាល​ឱ្យ​បាត់​ខ្លួន​មកដល់ពេលនេះ។ លោកស្រី ភឹម ម៉ៅ បញ្ជាក់​ថា នៅ​ពេល​ចាប់ខ្លួន​នោះ ក្រុម​ទាហាន​បាន​ប្រើ​ហិង្សា​ទៅលើ​ប្ដី និង​កូន​គាត់ ខណៈ​អ្នក​ទាំងពីរ បើក​គោយន្ត​ដឹក​ឥវ៉ាន់​ចាប់ហួយ មក​ដល់​ត្រង់​ស្ពាន​ទី​២ ក្នុង​ភូមិ​ស្រែ​ក្រសាំង ឃុំ​ត្រពាំង​ប្រសាទ ស្រុក​ត្រពាំង​ប្រសាទ ខេត្ត​ឧត្តរមានជ័យ៖ «ខ្ញុំ​អត់​ដឹង​ដែរ​លោកគ្រូ ត្រង់​ហ្នឹង​ខ្ញំ អត់​ដឹង​ថា រឿង​ស្លាប់​ឬក៏​រស់ គឺ​គេ​យក​ទៅ​វា​បាត់​ឈឹង ខ្ញុំ​អត់​ដឹង​លោកគ្រូ​។ អ៊ីចឹង​! បាន​ខ្ញុំ​ចង់​ឱ្យ​ខាង​តុលាការ និង​ខាង​ចៅហ្វាយ​ខត្ត ដោះស្រាយ​ឱ្យ​ខ្ញុំ​ផង​។ ខ្ញុំ​ដើរ​រក​មនុស្ស​ឡើង​អស់ខ្យល់​ហើយ ឡើង​អស់​អា​លីង​ពី​ខ្លួន​ហើយ ខ្ញុំ​អត់​មាន​អី​សោះ​។ ម្សិលមិញ ខ្ញុំ​ចងការ​គេ មក​ហ្នឹង​បាន​៣០​ម៉ឺន ដើម្បី​ឱ្យ​លោកគ្រូ និង​ខាង​ខេត្ត​ជួយ​ដោះស្រាយ​ឱ្យ​ខ្ញុំ​និង​ប្រជាជន​ពួក​ខ្ញុំ​ផង ព្រោះ​ខ្ញុំ​វា​ក្រ វា​អត់​អី​សោះ»

ទាក់ទង​នឹង​ការចោទប្រកាន់​នេះ លោក លុយ សម្បត្តិ ប្រាប់​អាស៊ីសេរី​ថា ខាង​ក្រុម​ទាហាន​របស់​លោក មិនដែល​ចុះ​ចាប់​ពលរដ្ឋ​ពាក់ព័ន្ធ​នឹង​រឿង​ដីធ្លី​នោះ​ឡើយ​។ មន្ត្រី​យោធា​រូប​នេះ បញ្ជាក់​ថា​មានតែ​ខាង​មន្ត្រី​បរិស្ថាន ដែល​ចាប់ខ្លួន​ពលរដ្ឋ ព្រោះថា​ពលរដ្ឋ​ទាំងនោះ ចូល​រុករាន​កាប់​ព្រៃឈើ ក្នុង​ដែន​ជម្រក​សត្វព្រៃ​៖ «មិន​ពិត​ទេ​! រឿង​ពាក់ព័ន្ធ​ជម្លោះដីធ្លី​គឺ​គ្មាន​ទេ​។ មានតែ​ដី​គាត់​ទៅ​រុករាន​ដី​គូលែន​ព្រហ្ម​ទេព គ្រប់គ្រង​ដោយ​បរិស្ថាន​។ អ៊ីចឹង​! ខាង​បរិស្ថាន​គេ​ចាប់ចង​ទេ អត់​មាន​ពាក់ព័ន្ធ​នឹង​កងទ័ព​ទេ​។ កងទ័ព​គ្មាន​សិទ្ធិ​អី​ទៅ​ចាប់​ប្រជាពលរដ្ឋ ទន្ទ្រាន​ដៃ​ព្រៃ​បរិស្ថាន បើ​ខាង​កងកម្លាំង​ទាហាន​នេះ គឺ​គ្មាន​ទេ​បង​។ អ៊ីចឹង​! បង​អាច​ទំនាក់ទំនង​ឡើង​មក បើ​បង​ចង់​ដឹង​អី មក​ជួប​ខាង​អាជ្ញាធរ​មូលដ្ឋាន ដូចជា​ខាង​ស្រុក​ខេត្ត ដូចជា​មន្ត្រី​ណា​ដែល​ពាក់ព័ន្ធ​។ អ៊ីចឹង​ខាង​ខ្ញុំ អត់​មាន​ពាក់ព័ន្ធ​ទេ​បង»

ចំណែក អនុប្រធាន​ការិយាល័យ​ដែន​ជម្រក​សត្វព្រៃ​គូលែន​ព្រហ្ម​ទេព លោក សោម សុផាត វិញ អាស៊ីសេរី មិន​អាច​សុំ​ការ​បំភ្លឺ​ពី​មន្ត្រី​បរិស្ថាន​រូប​នេះ​បាន​នៅឡើយ ដោយ​ហៅ​ទូរស័ព្ទ​ចូល តែ​គ្មាន​អ្នក​ទទួល។

ទោះបីជា​មានការ​លើកឡើង​យ៉ាង​នេះ​ក្ដី អ្នក​សម្របសម្រួល​សមាគម​អាដហុក (Adhoc) ប្រចាំ​ព្រះវិហារ លោក ឡោ ចាន់ យល់ថា ទាំង​ខាង​ក្រុម​ទាហាន​កងពល​លេខ​៦ និង​ខាង​មន្ត្រី​បរិស្ថាន គឺជា​អ្នក​ទទួលខុស​រឿង​នេះ​។ ការ​សំអាង​របស់​មន្ត្រី​សិទ្ធិមនុស្ស​រូប​នេះ ដោយសារតែ​លោក​បាន​សាកសួរ​ទៅ កូនប្រុស​លោក ស៊ុំ មឺន ដែល​ស្ថិត​នៅ​ក្នុង​ហេតុការណ៍​នៃ​ការ​ចាប់​ខ្លួន​ពី​សំណាក់​ក្រុម​ទាហាន ហើយ​នឹង​មន្ត្រី​បរិស្ថាន​ខេត្ត​ព្រះវិហារ៖ «មាន​ភស្តុតាង​សាក្សី​ជាច្រើន​បញ្ជាក់​ថា ខាង​កងពល​លេខ​៦ វារៈ​អន្តរាគមន៍​តូច​២៦១ ជា​អ្នក​ចាប់​។ ជាពិសេស កូន​គាត់​ដែល​កំពុង​ជាប់ពន្ធនាគារ​សព្វថ្ងៃ​នេះ ជា​សាក្សី​មួយ​ដ៏​សំខាន់​ដែរ នៅ​ក្នុង​ការ​ដឹង​ថា នរណា​ជា​អ្នក​ចាប់​។ ហើយ​បើ​មិនមែន​ក្រុម​យោធា មិនមែន​ក្រុម​ទាហាន​កងពល​លេខ​៦​ជា​អ្នក​ចាប់​ទេ កូន​គាត់​ជាប់​ពន្ធនាគារ​សព្វថ្ងៃ​នេះ​បញ្ជាក់​ថា គឺ​ខាង​កងពល​ជា​អ្នក​ចាប់​ទៅវិញ​។ អ៊ីចឹង​ហើយ ខ្ញុំ​បាន​សួរ​បរិស្ថាន​ច្បាស់​ណាស់ គឺ​គាត់​បាន​ទទួល​ពី​កងពល​លេខ​៦​ហ្នឹងឯង»

គិតដល់​ពេល​នេះ លោក ម៉ឺន មៀន វ័យ ២៣​ឆ្នាំ ដែល​ត្រូវជា​កូនប្រុស​លោកស្រី ភឹម ម៉ៅ និង​ពលរដ្ឋ​១៣​ទៀត កំពុង​ជាប់ឃុំ​ក្នុង​ពន្ធនាគារ​ព្រះវិហារ​នៅឡើយ ខណៈ​លោក ស៊ុំ ម៉ឺន នៅតែ​បាត់​ខ្លួន​រក​មិន​ទាន់​ឃើញ។ លោកស្រី ភឹម ម៉ៅ ក៏​ស្នើ​ដល់​អាជ្ញាធរ​ខេត្ត ជួយ​ពន្លឿន​ដំណោះស្រាយ​រឿង​ដីធ្លី​ឱ្យ​ពលរដ្ឋ​ជាង ៣៣០​គ្រួសារ ព្រោះថា​ចាប់តាំង​ពី​អាជ្ញាធរ​ដាក់​ចេញ​វិធានការណ៍ ៥​ចំណុច​រួចមក ពួកគាត់​នៅ​មិនទាន់​ឃើញ​មាន​ដំណោះស្រាយ​សម្រាប់​ពួកគាត់​នៅឡើយ​ទេ ៖«​ចាស​! ចង់​ឱ្យ​ដោះស្រាយ​រឿង​ដីធ្លី​ប្រជាពលរដ្ឋ ធ្វើ​មិច​ដោះស្រាយ​ឱ្យ​ប្រជាពលរដ្ឋ​ហ្នឹង ឱ្យ​រួច​ផង ឱ្យ​បាន​វាស់វែង​ផង ឱ្យ​កូនចៅ​បាន​ប៉ុណ្ណា ឱ្យ​ដឹង​ទៅ​។ ដី​ហ្នឹង​ប្រហែល​ជា​មាន​ចំនួន ៣.៥០០​ហិកតារ ដី​ដែល​ប្រជាពលរដ្ឋ​ធ្វើ​រាល់ថ្ងៃ​នេះ។ ចំនួន​ប្រជាពលរដ្ឋ​ដែល​៣៣៩​គ្រួសារ​ទេ​។ ហ្នឹង​ជួយ​វាស់វែង​ត្រង់ណា​ឱ្យ​ក្រុមហ៊ុន ជួយ​វិនិច្ឆ័យ​ឱ្យ​ប្រជាពលរដ្ឋ​ផង ខ្ញុំ​ចង់​បានតែ​ប៉ុណ្ណឹង​ទេ អត់​ចង់បាន​អី​ទេ»

ជុំវិញ​សំណើ​របស់​ពលរដ្ឋ​នេះ អភិបាល​ខត្ត​ព្រះវិហារ លោក អ៊ុន ចាន់ដា បដិសេធ​ផ្ដល់​សម្ភាសន៍​ដល់​អាស៊ីសេរី​តាម​ទូរស័ព្ទ ដោយ​លោក​តម្រូវ​ឱ្យ​អាស៊ីសេរី​ចុះទៅ​ជួប​សម្ភាសន៍​ផ្ទាល់​វិញ។

ក្រុមហ៊ុន​មេត្រីភាព របស់​ឧកញ៉ា អាន ម៉ារ៉ាឌី ទទួល​សិទ្ធិ​វិនិយោគ ពី​របប​ក្រុងភ្នំពេញ​លើ​ផ្ទៃដី​ចំនួន​ជាង ៨ ពាន់​ហិកតារ (.៥២៥) កាលពី​ឆ្នាំ​២០១២ ដោយ​វិនិយោគ​ដាំ​ដំណាំ​ឧស្សាហកម្ម​កៅស៊ូ ឋិត​នៅ​ឃុំ​យាង ស្រុក​ជាំ​ក្សាន្ត ខេត្ត​ព្រះវិហារ ជាប់​ព្រំប្រទល់​ខេត្ត​ឧត្តរមានជ័យ​។ ពលរដ្ឋ​រស់នៅ​តំបន់​នោះ​ចោទ​ថា ក្រុមហ៊ុន​នេះ​បាន​ធ្វើ​អាជីវកម្ម​ឈើ​ខ្នាត​ធំ តាំងពី​ឆ្នាំ​២០១១ ដោយ​កាប់​ឈើ​មូល​ធំៗ​ធ្វើ​អាជីវកម្ម​គ្រប់​ប្រភេទ ក្នុង​នោះ​មាន​ដើមឈើ​ផលិត​ជ័រទឹក​របស់​អ្នកស្រុក រាប់ពាន់​ដើម​។ ពួកគេ​ថា មក​ទល់​ពេល​នេះ​ព្រៃ​នៅ​តំបន់​នោះ នៅ​សល់​តែ​ដើមឈើ​តូចៗ គ្មាន​តម្លៃ​លើ​ទីផ្សារ​អាច​ប្រើប្រាស់​បាន​។ រីឯ​ក្រុមហ៊ុន​នៅ​មិនទាន់​បាន​ដាំ​កៅស៊ូ​នៅឡើយ​ទេ​។ លើស​ពី​នេះ ក្រុមហ៊ុន​នេះ បាន​ជួល​ក្រុម​ទាហាន​វារៈ ២៦១ នៅ​ខេត្ត​ឧត្តរមានជ័យ ឱ្យ​ការពារ​អាជីវកម្ម​ឱ្យ​ខ្លួន ហើយ​ក្រុម​ប្រដាប់​អាវុធ​នេះ​តែងតែ​ធ្វើទុក្ខបុកម្នេញ​ពលរដ្ឋ ដោយ​ប្រើ​គ្រឿងចក្រ​ឈូស​បំផ្លាញ​ចម្ការ ហើយ​ដុត​ខ្ទម​និង​ផ្ទះ​ពួកគាត់​ថែម​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល