ប្រជាពលរដ្ឋជនជាតិដើមភាគតិចព្នង នៅខេត្តមណ្ឌលគិរី ចោទប្រកាន់ប្រធានសហគមន៍និងប្រធានភូមិ ថាឃុបឃិតគ្នា ចលនាឲ្យប្រជាពលរដ្ឋទទួលប្រាក់ពីក្រុមហ៊ុនសម្បទានសេដ្ឋកិច្ច សុវណ្ណ រាជសី ហើយកាត់យកដីសហគមន៍ ២៥០ហិកតារ ដើម្បីពង្រីកដីសម្បទាន។ អ្នកភូមិចាត់ទុកថា នេះជាអំពើពុករលួយរំលោភច្បាប់។
តំណាងសហគមន៍ភូមិស្រែអំពិល ឃុំស្រែខ្ទុំ ស្រុកកែវសីមា នៅថ្ងៃអាទិត្យ ទី២៥ ខែឧសភា អំពាវនាវសុំឲ្យអាជ្ញាធរខេត្តមណ្ឌលគិរី ស៊ើបអង្កេតករណីនេះជាបន្ទាន់ ដើម្បីការពារដីធ្លីសហគមន៍សម្រាប់អភិរក្សចុះបញ្ជីជាដីត្រៀមបម្រុង។
ការអំពាវនាវនេះធ្វើឡើងបន្ទាប់ពីគ្រឿងចក្រក្រុមហ៊ុន អមដោយកងកម្លាំងប្រដាប់អាវុធការពារ កាលពីថ្ងៃសៅរ៍កន្លងទៅ បានបាញ់ថ្នាំពណ៌ក្រហមពង្រីកព្រំដីសម្បទាន និងបានឈូសឆាយចូលដីចម្ការវិលជុំប្រជាពលរដ្ឋ បើទោះបីអ្នកភូមិនាំគ្នារារាំងមិនឲ្យគ្រឿងចក្រឈូសឆាយយ៉ាងណាក្តី។
អនុប្រធានសហគមន៍ លោក ក្រើត អ៊ាន អះអាងថា អតីតប្រធានសហគមន៍ភូមិស្រែអំពិល លោក ហួន សី និងប្រធានភូមិ លោក ដួង តាឡុច គឺជាអ្នកចលនាឲ្យប្រជាពលរដ្ឋផ្ដិតមេដៃទទួលប្រាក់ពីក្រុមហ៊ុន ២ម៉ឺនដុល្លារ ក្របី ១ក្បាល និងស្រាសមួយកាន ជាថ្នូរប្រគល់ដីទៅឲ្យក្រុមហ៊ុន ប៉ុន្តែប្រជាពលរដ្ឋប្រមាណ ២០គ្រួសារមិនយល់ព្រមផ្ដិតមេដៃប្រគល់ដីនោះទេ។
លោកបន្តថា នេះគឺជាអំពើពុករលួយលក់ដីធ្លីទ្រព្យសម្បត្តិរដ្ឋខុសច្បាប់៖ «ដួង តាឡុច ទាក់ទងជាមួយអាជ្ញាធរ ហួន សី ទាក់ទងជាមួយលុយពីរម៉ឺនដុល្លារ ពីរនាក់ហ្នឹងបានសហគមន៍ពួកខ្ញុំរលាយ។ ដំបូងអត់ដែលមានប្រគល់ដីទៅឲ្យក្រុមហ៊ុនទេ ឥឡូវនេះគេញុះញង់លុយពីរម៉ឺនដុល្លារ សហគមន៍ពួកខ្ញុំខ្លះចង់បានលុយ»។
វិទ្យុអាស៊ីសេរី នៅថ្ងៃទី២៥ ខែឧសភា មិនអាចទាក់ទងប្រធានសហគមន៍ និងប្រធានភូមិសុំបញ្ជាក់ពីការចោទប្រកាន់នេះបានទេ ក៏ប៉ុន្តែមេឃុំស្រែខ្ទុំ លោក បុត្រ សំអែល បដិសេធថា មិនមានការលក់ដូរដីអ្វីទេ។ លោកជំរុញឲ្យសួរព័ត៌មានទាក់ទិនបញ្ហានេះទៅមន្ត្រីអាជ្ញាធរស្រុក៖ «រឿងនេះសហគមន៍បានឯកភាពគ្នាអស់ហើយ បើលោកចង់ដឹងទូរស័ព្ទទៅអភិបាលស្រុក ដីនេះគ្មានលក់ដូរស្អីទេ»។
ឆ្លើយតបបញ្ហានេះដែរ អភិបាលស្រុកកែវសីមា លោក ស៊ិន វណ្ណវុធ អះអាងដែរថា ដីដែលក្រុមហ៊ុនឈូសឆាយ គឺជាដីសម្បទានរបស់រដ្ឋបានប្រគល់ឲ្យក្រុមហ៊ុន ក៏ប៉ុន្តែដោយសារមានផលប៉ះពាល់ជាមួយប្រជាពលរដ្ឋទើបក្រុមហ៊ុនបានសម្របសម្រួលជាមួយសហគមន៍ផ្ដល់ជាគោលនយោបាយសំណងផលប៉ះពាល់។
លោកទទួលស្គាល់ថា មានប្រជាពលរដ្ឋតិចតួចជាអ្នកជំទាស់បញ្ហានេះ ប៉ុន្តែអ្នកភូមិភាគច្រើនបានយកការសម្របសម្រួលទទួលប្រាក់៖ «ក្រុមហ៊ុនគាត់មាន ស.ជ.ណ របស់រាជរដ្ឋាភិបាល មានទំនាស់តិចតួចជាមួយប្រជាពលរដ្ឋ អ៊ីចឹងទេយើងឲ្យមានការសម្របសម្រួលគ្នា បែងចែកអ្វីដែលមានការប៉ះពាល់ដល់ប្រជាពលរដ្ឋឲ្យក្រុមហ៊ុនចៀសវាង ហើយផ្ដល់ឲ្យប្រជាពលរដ្ឋវិញ»។
សហគមន៍ជនជាតិព្នង ភូមិស្រែអំពិល មានសមាជិកជាង ៦០គ្រួសារ បានចុះបញ្ជីកំណត់អត្តសញ្ញាណ និងចុះបញ្ជីបង្កើតសហគមន៍ផ្លូវការ តាំងពីឆ្នាំ២០១២ ទទួលស្គាល់ដោយក្រសួងមហាផ្ទៃ។
អ្នកឃ្លាំមើលបញ្ហាដីធ្លីព្រៃឈើសមាគមអាដហុក ខេត្តមណ្ឌលគិរី លោក សុក រដ្ឋា កត់សំគាល់ថា ក្រុមសហគមន៍ជនជាតិដើមភាគតិចមានសិទ្ធិអភិរក្ស ថែរក្សា និងអាស្រ័យផលលើដីធ្លីព្រៃឈើរបស់រដ្ឋ ប៉ុន្តែមិនមានសិទ្ធិបែងចែក ឬផ្ទេរទៅឲ្យអ្នកផ្សេងបានឡើយ។
លោកចាត់ទុកការសម្របសម្រួលទទួលប្រាក់ពីក្រុមហ៊ុន ហើយកាត់យកដីត្រៀមបម្រុងសហគមន៍ គឺជាការរំលោភសិទ្ធិរស់នៅរបស់សមាជិកសហគមន៍ និងរំលោភច្បាប់ព្រៃឈើ រួមទាំងច្បាប់ភូមិបាលទៀតផង៖ «អាជ្ញាធរគួរតែមានវិធានការដោះស្រាយរឿងហ្នឹងទៅតាមនីតិវិធីច្បាប់ ហើយឲ្យមានតម្លាភាពសម្រាប់ប្រជាពលរដ្ឋដែលគាត់ចេញមុខតវ៉ាដល់សហគមន៍គាត់ទាំងអស់»។
ក្រុមហ៊ុនសុវណ្ណ រាជសី ទទួលបានដីសម្បទានសេដ្ឋកិច្ចចំនួនជាង ៦.៥០០ហិកតារ នៅស្រុកស្នួល ខេត្តក្រចេះ និងស្រុកកែវសីមា ខេត្តមណ្ឌលគិរី តាំងពីឆ្នាំ២០១១ ប៉ុន្តែកន្លងទៅនេះប្រជាពលរដ្ឋបានតវ៉ាជាច្រើនករណីទៅនឹងការឈូសឆាយបង្កផលប៉ះពាល់ដីធ្លី តំបន់ព្រៃឈើសហគមន៍ជនជាតិដើមនៅតំបន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។