ជនជាតិ​ដើម​ភាគតិច​ជាង​ ១រយ​នាក់​បាន​លើក​គ្នា​ឃ្លាំមើល​ការ​ដោះ​ស្រាយ​វិបត្តិ​ដីធ្លី​នៅ​តំបន់​ភ្នំ​ដោះ​ក្រមុំ​

ដោយ វ៉ែន សុមេធ
2019-03-20
អ៊ីម៉ែល
មតិ
Share
បោះពុម្ព
ជនជាតិ​ដើម​ភាគ​តិច​ខេត្ត​មណ្ឌលគិរី បាន​លើក​គ្នា​ចុះ​ពិនិត្យ​មើល​ការ​ដោះ​ស្រាយ​វិបត្តិ​ដីធ្លី​នៅ​ភ្នំ​ដោះក្រមុំ​របស់​អាជ្ញាធរ​ខេត្ត​នេះ កាល​ពី​ព្រឹក​ថ្ងៃ​ទី១៩ ខែ​មីនា ឆ្នាំ២០១៩។
ជនជាតិ​ដើម​ភាគ​តិច​ខេត្ត​មណ្ឌលគិរី បាន​លើក​គ្នា​ចុះ​ពិនិត្យ​មើល​ការ​ដោះ​ស្រាយ​វិបត្តិ​ដីធ្លី​នៅ​ភ្នំ​ដោះក្រមុំ​របស់​អាជ្ញាធរ​ខេត្ត​នេះ កាល​ពី​ព្រឹក​ថ្ងៃ​ទី១៩ ខែ​មីនា ឆ្នាំ២០១៩។
រូបភាព៖ សហគមន៍

ជនជាតិ ដើម​ភាគតិច​រស់​នៅ​ខេត្ត​មណ្ឌលគិរី​ ជាង​ ១រយ​នាក់​ បាន​លើក​គ្នា​ទៅ​ឃ្លាំ​មើល​ការ​ចុះ​ដោះ​ស្រាយ​វិបត្តិ​ដីធ្លី​នៅ​តំបន់​ភ្នំ​ដោះ​ក្រមុំ​ ដែល​ជា​មជ្ឈមណ្ឌល​វប្បធម៌​ជនជាតិ​ដើម​ភាគតិច​នៅ​ពេល​អាជ្ញាធរ​ខេត្ត​នេះ​​ចុះ​វាស់​វែង​បោះ បង្គោល​នៅ​ថ្ងៃ​ទី​១៩ មីនា​ដែល​ជា​ថ្ងៃ​កំណត់។ សហគមន៍​ថា​ ពួក​គេ​មិន​ទុក​ចិត្ត​លើ​យន្តការ​របស់​​អាជ្ញាធរ​ខេត្ត​ក្នុង​ការ​ដោះស្រាយ​ដីធ្លី​នៅ​តំបន់​នោះ​ទេ​ ព្រោះ​មិន​ផ្អែក​តាម​សេចក្ដី​សម្រេច​របស់​គណៈរដ្ឋមន្ត្រី​ និង​អនុសាសន៍​លោក​ ហ៊ុន​ សែន។ ចំណែក​អាជ្ញាធរ​ខេត្ត​បាន​រំសាយ​ការ​ចុះ​ដោះ​ស្រាយ​នោះ។

សហគមន៍​ជនជាតិ​ដើម​ភាគតិច​ព្នង​ខេត្ត​មណ្ឌលគិរី​អះអាង​ថា​ អាជ្ញាធរ​ពាក់ព័ន្ធ​ខេត្ត​នេះ​គ្មាន​ជំហរ​ច្បាស់​លាស់​ដោះស្រាយ​វិបត្តិ​ដីធ្លី​នៅ​តំបន់​ភ្នំ​ដោះ​ក្រមុំ​ឲ្យ​រួចរាល់​នៅ​ឡើយ​ទេ​ ដែល​នាំ​ឲ្យ​ពួក​គាត់​ភ័យ​ព្រួយ​ និង​មិន​ទុក​ចិត្ត​ដោយ​ខ្លាច​ក្រែង​អាជ្ញាធរ​ពាក់ព័ន្ធ​ ដោះ​ស្រាយ​បែប​បន្លំ​ភ្នែក​ថ្នាក់​ដឹក​នាំ​រដ្ឋ​ និង​លម្អៀង។

តំណាង​សហគមន៍​ជន​ជាតិ​ដើម​ភាគ​តិច​ព្នង​ ខេត្ត​មណ្ឌលគិរី​ លោក​ស្រី ផ្លឹក ភីរម្យ ឲ្យ​ដឹង​នៅ​ថ្ងៃ​ទី​ ១៩​ មីនា​ថា​  ជំហរ​របស់​ជន​ជាតិ​ដើម​ភាគ​តិច​ ចង់​ឲ្យ​អាជ្ញាធរ​ខេត្ត​ និង​ស្ថាប័ន​ពាក់ព័ន្ធ​ដោះ​ស្រាយ​វិបត្តិ​ដីធ្លី​ នៅ​តំបន់​ភ្នំ​ដោះ​ក្រមុំ​ផ្អែក​តាម​បទបញ្ជា​ លោក​ ហ៊ុន​ សែន​ ដែល​បញ្ជា​ឲ្យ​អាជ្ញាធរ​ខេត្ត​រឹប​អូស​ដី​នៅ​តំបន់​នោះ​មក​វិញ​។ ពួក​គេ​អះអាង​ថា​ រដ្ឋបាល​ខេត្ត​នេះ​ និង​ សហគមន៍​ជនជាតិ​ដើម​ភាគតិច​នៅ​មិន​ទាន់​ឯកភាព​លើ​ចំណុច​មួយ​ចំនួន​ដែល​ឆ្លើយ​តប​និង​សេចក្ដី​សម្រេច​របស់​គណៈរដ្ឋមន្ត្រី​កាល​ពី​ឆ្នាំ២០០៤​ (..)និង​មិន​ស្រប​តាម​បទ​បញ្ជា​ លោក​ ហ៊ុន​ សែន​​។ លើស​ពី​នេះ​សហគមន៍​នឹង​បន្ត​ដាក់​ញត្តិ​ទៅ​ស្ថាប័ន​ថ្នាក់​ជាតិ​ ប្រសិន​បើ​អាជ្ញាធរ​ខេត្ត​មិន​ដោះ​ស្រាយ​ឲ្យ​បាន​ត្រឹម​ត្រូវ​ និង​យុត្តិធម៌៖ «គិត​មើល​យើង​ថ្ងៃ​នេះ និយាយ​គ្នា​ច្បាស់លាស់​ហើយ សម្រាប់​លិខិត​អញ្ជើញ​របស់​គាត់ រួច​ពលរដ្ឋ​ទាំង ៥ស្រុក គាត់​មក។ អ្នក​រស់​នៅ​ឆ្ងាយៗ គាត់​ចង់​សួរ។ អ្នក​ខ្លះ​ចោល​គោ ក្របី ដើម្បី​ឲ្យ​ស្ដាប់​លើ​ការ​បក​ស្រាយ​របស់​ខេត្ត តែ​ផ្ទុយ​ទៅ​វិញ ដល់​ពេល​ជួប​ជាក់ស្ដែង​ពួក​គេ​រំសាយ​បាត់»

កាល​ពី​ចុង​ខែ​កុម្ភៈ​ ឆ្នាំ​ ២០១៩​  លោក​ ហ៊ុន​ សែន​ បាន​បញ្ជា​ឲ្យ​អភិបាលខេត្ត​មណ្ឌលគិរី និង​ស្ថាប័ន​ពាក់ព័ន្ធ​ទប់​ស្កាត់​ការ​ទន្ទ្រាន​ដី​នៅ​តំបន់​ភ្នំ​ដោះ​ក្រមុំ និង​ត្រូវ​រឹប​អូស​មក​វិញ ហើយ​ត្រូវ​ផ្ដល់​លទ្ធភាព ឲ្យ​អាជ្ញាធរ​រដ្ឋ​ប្រើ​ប្រាស់​ថវិកា​ធ្វើ​របង​ហ៊ុមព័ទ្ធ។

លេខាធិការ​គណៈកម្មការ គ្រប់គ្រង​ភ្នំ​ដោះ​ក្រមុំ​ លោក ក្រើង​ តុលា​ អះអាង​ថា​ វិវាទ​ដីធ្លី​នេះ​កើត​មាន​ឡើង​ជាង​ ១០​ ឆ្នាំ​មក​ហើយ​ មិន​ឃើញ​អាជ្ញាធរ​ពាក់ព័ន្ធ​ណា​ ដោះ​ស្រាយ​ឲ្យ​ដាច់​ស្រឡះ​ទេ​ ផ្ទុយ​ទៅ​វិញ​ការ​រំលោភ​បំពាន​យក​ជា​កម្មសិទ្ធិ​នៅ​តែ​កើត​មាន​។ លោក​ថា​ ពលរដ្ឋ​ជាង​ ១​រយ​នាក់​បាន​នាំ​គ្នា​ពិនិត្យ​មើល​យន្តការ​ដោះ​ស្រាយ​របស់​អាជ្ញាធរ​ខេត្ត​ គឺ​គ្រាន់​តែ​ឃ្លាំ​មើល​ ពុំ​មែន​តវ៉ា​នោះ​ទេ៖ «ថ្នាក់​ក្រោម​ជាតិ ដូច​ជា ឯកឧត្ដម​អភិបាល​ខេត្ត​មុនៗ និង​ប្រធាន​មន្ទីរ​បន្លំ​សម្តេច។ មូលហេតុ​អី ស..ណ របស់​ទឹក​ស្អាត​អត់​បាន​បញ្ជាក់​នៅ​តំបន់​ភ្នំ​ដោះ​ក្រមុំ​ទេ។ បើ​បញ្ជាក់​ថា សុំ​កាត់​ដី​នៅ​ភ្នំ​ដោះ​ក្រមុំ ប្រហែល​ជា​សម្ដេច​គាត់​មិន​ស៊ីញេ​ឲ្យ​ទេ តាម​ខ្ញុំ​យល់»

ឆ្លើយ​តប​រឿង​នេះ​ អ្នក​នាំ​ពាក្យ​សាលា​ខេត្ត​មណ្ឌលគិរី​ លោក​ សុក​ សេរ៉ា មាន​ប្រសាសន៍​ថា​ ការ​ដោះស្រាយ​វិបត្តិ​ដីធ្លី​នៅ​តំបន់​ភ្នំ​ដោះ​ក្រមុំ​​អាជ្ញាធរ​បាន​ឯកភាព​គ្នា​ យក​កំណត់​ហេតុ​កាល​ពី​ឆ្នាំ​ ២០១៦​ ជា​មូលដ្ឋាន​ ដែល​មាន​រដ្ឋលេខាធិការ​ក្រសួង​វប្បធម៌​ តំណាង​សហគមន៍​ជនជាតិ​ដើម​ភាគតិច​ និង​ គណៈកម្មការ​គ្រប់​គ្រង​ភ្នំ​ដោះក្រមុំ​ បាន​ព្រម​ព្រាង​។ លោក​ថា​ នៅ​ព្រឹក​ថ្ងៃ​ទី​ ១៩​ មីនា​ អាជ្ញាធរ​គ្រោង​បោះ​បង្គោល​ព្រំ​ដី​ ដោយ​ផ្អែក​តាម​កំណត់​ហេតុ​នោះ​ ក៏​ប៉ុន្តែ​ខ្វះ​សមាសភាព​ចូល​រួម​ទើប​អាជ្ញាធរ​ផ្អាក​សិន​ ដោយ​ត្រូវ​រង់​ចាំ​ស្ថាប័ន​ពាក់ព័ន្ធ​ រួម​ទាំង​តំណាង​សហគមន៍​ជនជាតិ​ដើម​ភាគ​តិច​ចូល​រួម​ដែរ«យើង​ហៅ​ទាំង​អស់​គ្នា យើង​ដាក់​ថ្ងៃ​កំណត់​ហើយ សូម​ឲ្យ​ប្រមូល​សមាសភាព​ទាំង​អស់​ចូលរួម​ទាំង​អស់​គ្នា ទាំង​បង​ប្អូន​ជន​ជាតិ​យើង​ផង ទាំង​គណៈកម្មការ​ភ្នំ​ផង ទាំង​ថ្នាក់​ក្រសួង​ផង យើង​ដោះ​ស្រាយ​ទៅ​តាម​គោលការណ៍ ដែល​សម្ដេច​លោក​ដាក់​បទ​បញ្ជា​មក និង​ទៅ​តាម​សភាពការណ៍​ជាក់​ស្ដែង។ យើង​សម្របសម្រួល​គ្នា​នៅ​ទី​កន្លែង និង​ដើរ​មើល​នៅ​ទីកន្លែង​ទាំង​អស់​គ្នា»

កាល​ពី​ចុង​ឆ្នាំ២០១៦​ សហគមន៍​ជនជាតិ​ដើម​ភាគតិច​ អាជ្ញាធរ​ខេត្ត​ និង​រដ្ឋលេខាធិការ​ក្រសួង​វប្បធម៌​បាន​ឯកភាព​គ្នា​ កាត់​ចេញ​ដី​ប្រមាណ​ ៨០អា​ ប្រគល់​ជូន​មន្ទីរ​ចំនួន៤ ប្រើប្រាស់​ជា​កម្មសិទ្ធិ​រដ្ឋ​ ថែម​ទាំង​សម្រេច​កាត់​ចេញ​ដី​ពលរដ្ឋ​ ១១គ្រួសារ និង​ដី​មួយ​ផ្នែក​របស់​នគរបាល​ ដែល​ធ្វើ​របង​ចូល​បរិវេណ​ដី​ភ្នំ​ដាក់​បញ្ចូល​ជា​តំបន់​ភ្នំ​ដោះ​ក្រមុំ​វិញ។

អគ្គលេខាធិការ​សម្ព័ន្ធ​ជន​ជាតិ​ដើម​ភាគតិច​កម្ពុជា​ លោក​ យន់​ ឡូរ៉ង់ សង្កេត​ឃើញ​ថា ភាព​មិន​ច្បាស់​លាស់​ក្នុង​ការ​ដោះស្រាយ​ដីធ្លី​នៅ​តំបន់​នោះ​ ដែល​ផ្អែក​តាម​កំណត់​ហេតុ​ កាល​ពី​ឆ្នាំ២០១៦ របស់​អាជ្ញាធរ​ពាក់ព័ន្ធ​ នៅ​តែ​មិន​អាច​បញ្ចប់​ជម្លោះ​ដីធ្លី​នៅ​ទី​នោះ​នៅ​ឡើយ​ទេ។ លោក​ថា ជំហរ​ដើម​របស់​ជនជាតិ​ដើម​ភាគតិច​ចាត់​ទុក​ថា ដី​ដែល​ត្រូវ​បាន​រំលោភ​ដោយ​បុគ្គល​ឯកជន មន្ទីរ​រដ្ឋ​ចំនួន ៤ និង​ក្រុមហ៊ុន​ទឹក​ស្អាត​ គឺ​ផ្ទុយ​ពី​សេចក្ដី​សម្រេច​របស់​ទីស្ដីការ​គណៈរដ្ឋមន្ត្រី (..) ដែល​គ្មាន​ការ​បក​ស្រាយ​ និង​ពន្យល់​ណា​មួយ​ច្បាស់​លាស់​នៅ​ឡើយ​ទេ៖ «ការ​ទំនាក់ទំនង​ព័ត៌មាន​វា​ដាច់ អ៊ីចឹង​វា​ពិបាក​សម្រេច​ចិត្ត​ឲ្យ​មាន​ការ​ចូលរួម​ពី​សហគមន៍។ អ៊ីចឹង​បាន​សហគមន៍​ទាមទារ​ឲ្យ​មាន​តំណាង​ពី ៥ស្រុក ដែលគាត់ទុកចិត្ត វា​ងាយ​ឲ្យ​គាត់​សម្រេច​ចិត្ត​ដឹង​ឮ​ទាំង​អស់​គ្នា»

តែ​ទោះ​យ៉ាង​ណា​ សហគមន៍​ជនជាតិ​ដើម​ភាគតិច​ និង​ លេខាធិការ​គ្រប់គ្រង​ភ្នំ​ដោះក្រមុំ​ បន្ថែម​ថា​ ពួក​គេ​មិន​ឯកភាព​ឲ្យ​មាន​ការ​ដោះស្រាយ​ជម្លោះ​ដីធ្លី​នៅ​តំបន់​នោះ​ ផ្អែក​តាម​កំណត់​ហេតុ​ព្រមព្រៀង​កាល​ពី​ឆ្នាំ​ ២០១៦​នោះ​ទេ​ ព្រោះ​កិច្ច​ព្រមព្រៀង​នោះ​ គ្មាន​ឥទ្ធិពល​បញ្ចប់​ជម្លោះ​ឲ្យ​ដាច់​ស្រឡះ​នៅ​ឡើយ​ទេ​ជាង​ ១០​ឆ្នាំ​មក​ហើយ។

ភ្នំ​ដោះ​ក្រមុំ មាន​ទីតាំង​នៅ​កណ្ដាល​ក្រុង​សែនមនោរម្យ ខេត្ត​មណ្ឌលគិរី។ កាល​ពី​ឆ្នាំ​២០០៤ ទីស្ដីការ​គណៈរដ្ឋមន្ត្រី​បាន​សម្រេច​ចាត់​ទុក​តំបន់​ភ្នំ​នេះ​ជា​មជ្ឈមណ្ឌល​​វប្បធម៌​ជនជាតិ​ដើម​ភាគ​តិច​មាន​ទំហំ​ដី​ជាង ១០២​ហិកតារ រហូត​បច្ចុប្បន្ន​ផ្ទៃដី​ភ្នំ​ដោះ​ក្រមុំ​នៅ​សល់​ប្រមាណ​តែ ៨៧ហិកតារ​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល