ប្រជាសហគមន៍ឡពាងប្រមាណ ៤៥នាក់ ប្រមូលផ្ដុំគ្នាមុខសាលាដំបូងរាជធានីភ្នំពេញ នៅថ្ងៃទី៦ ឧសភា ខណៈអ្នកភូមិគ្នាឯង ៣នាក់ ត្រូវចូលខ្លួនបំភ្លឺម្នាក់ម្ដងៗ ក្នុងសំណុំរឿងរដ្ឋប្បវេណី ប្ដឹងសុំកាន់កាប់ដីពីអ្នកស្រី ជា ខេង មកវិញ។ អ្នកភូមិឡពាងជាស្ត្រី ៣នាក់នោះ មានឈ្មោះ កែវ សុខា អាយុ ៣៧ឆ្នាំ ស៊ុំ ថុន អាយុ ៥៨ឆ្នាំ និងឈ្មោះ យ៉ង់ ប៊ុត អាយុ ៦៤ឆ្នាំ។
តំណាងសហគមន៍ឡពាង លោកស្រី អ៊ុំ សុភី ឲ្យដឹងថា ចៅក្រមលោក លាង សំណាត់ សម្រេចឲ្យអ្នកភូមិ ៣នាក់ដាក់ពន្យារពេលចូលខ្លួនបំភ្លឺ ដោយសារភាគីពលរដ្ឋមិនទាន់មានមេធាវីការពាររឿងក្ដីនៅឡើយ។ ចំណែកមេធាវីតំណាងឲ្យអ្នកស្រី ជា ខេង គឺលោក ផាត់ ពៅសៀង មិនមានវត្តមាននៅតុលាការ៖ «ចាស៎ ! សូមអំពាវនាវដល់អង្គការក្រៅរដ្ឋាភិបាល ជួយផ្ដល់មេធាវីផ្នែករដ្ឋប្បវេណីឲ្យពួកខ្ញុំឡពាងផង។ ខ្ញុំអត់មានមេធាវីការពារទេ។ ពីមុនខ្ញុំតាមស៊ើបសួរអត់មានមេធាវីសម្រាប់យើងត្រៀមទុក ពេលមេធាវីខាង អាដហុក គាត់ឈប់ទៅ យើងអាចរកមេធាវីផ្សងបាន។ ប៉ុន្តែគេអត់ទាន់ឆ្លើយតបមកពួកយើង។ ហើយឥឡូវហ្នឹងយើងដាក់ពាក្យពន្យារពេល រកមេធាវីបន្តទៀត ដោយសារតែយើងគ្មានមេធាវី។ ខ្ញុំសូមអំពាវនាវដល់អង្គការក្រៅរដ្ឋាភិបាលជួយផ្ដល់មេធាវីរដ្ឋប្បវេណីដល់ពួកខ្ញុំផង»។
កាលពីថ្ងៃទី២៩ មេសា អ្នកឡពាងបានទៅជំនួយផ្នែកពីអ្នករាយការណ៍ពិសេសនៃអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rohna Smith) ក្នុងកំឡុងពេលអ្នកស្រីបំពេញទស្សនកិច្ចនៅកម្ពុជា។ អ្នកស្រី រ៉ូណា ស្មីត ឆ្លើយតបថា នឹងយកសំណើពលរដ្ឋទៅពិភាក្សា ថាតើអាចផ្ដល់មេធាវីបាន ឬយ៉ាងណា។
គិតមកដល់ពេល មានអ្នកភូមិឡពាង ១៣នាក់ហើយ ដែលតុលាការក្រុងភ្នំពេញកោះឲ្យទៅឆ្លើយបំភ្លឺជាបន្តបន្ទាប់ ចាប់តាំងពីចុងខែមីនា ក្នុងសំណុំរឿងប្ដឹងមោឃភាពកិច្ចព្រមព្រៀងឆ្នាំ២០១៤ និងរឿងសុំសិទ្ធិគ្រប់គ្រងដី។ ក្រៅពីនេះ តុលាការក្រុងភ្នំពេញ ក៏បង្គាប់ឲ្យអ្នកភូមិឡពាងជាង ៥០គ្រួសារ បង់ប្រាក់ប្រដាប់ក្ដីក្រៅពន្ធចូលតុលាការ ក្នុងមួយគ្រួសារ ៤០ម៉ឺនរៀល ក្នុងរឿងដីធ្លីដ៏រ៉ាំរ៉ៃជាមួយក្រុមហ៊ុន ខេ.ឌី.ស៊ី (KDC) ជាង ១៣ឆ្នាំមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។