តំណាងជនជាតិចាមថាសាលាក្រុងនឹងសិក្សាធ្វើផ្លូវវាងវិហារឥស្លាមបឹងកក់តាមសំណើ
2017.01.03
តំណាងជនជាតិចាម ដែលជំទាស់មិនឲ្យធ្វើផ្លូវកាត់តាមរបងវិហារបឹងកក់នោះ អះអាងថា សាលារាជធានីភ្នំពេញបានយល់ព្រមទទួលសំណើសិក្សាធ្វើផ្លូវវាងតាមរបងវិហារវិញ បន្ទាប់ពីជួបប្រជុំពិភាក្សាគ្នាជាមួយអភិបាលរាជធានីភ្នំពេញនៅរសៀលថ្ងៃទី៣ ខែមករា។
មន្ត្រីរដ្ឋាភិបាលដែលមិនគាំទ្រគម្រោងធ្វើផ្លូវនេះ លោក អះម៉ាត់ យ៉ះយ៉ា ជារដ្ឋលេខាធិការក្រសួងសង្គមកិច្ច អតីតយុវជន និងយុវនីតិសម្បទា សង្ឃឹម ៧០ភាគរយថា ក្រោយពីសិក្សារួច សាលាក្រុងភ្នំពេញនឹងធ្វើផ្លូវវាងតាមរបងវិហារបឹងកក់៖ «ក្រោយពីខ្ញុំបានឃើញប្លង់ជាផ្លូវការកាត់វិហារបឹងកក់រួចមក ខ្ញុំមានសេចក្តីរីករាយប្រាប់សាលាក្រុងថា ដោយសារនៅខាងលើមានផ្លូវបែកជាបួន គឺយើងអាចធ្វើផ្លូវកាត់តាមរបងវិហារ ហើយយើងកាច់បន្តិចទៅ ហើយយកផ្លូវតាមក្រោយសណ្ឋាគារភ្នំពេញតិចទៅ ម្ល៉ោះហើយយើងអាចដោះស្រាយបញ្ហានេះបានហើយ។ សាលាក្រុងឯកភាពឡើងវិញ នៃការសិក្សាធ្វើផ្លូវកាត់របងវិហារ ដូច្នេះយើងនឹងជួបគ្នាជាបន្តបន្ទាប់ទៀត»។
កាលពីថ្ងៃសុក្រ ទី២៣ ខែធ្នូ ឆ្នាំ២០១៦ សាសនិកឥស្លាម រាប់រយនាក់ នាំគ្នាវាយកម្ទេចរបងបាំងសម្រាប់គ្រឿងចក្រឈូសឆាយធ្វើផ្លូវកាត់ក្នុងបរិវេណវិហារបឹងកក់ ដែលខាងសាលារាជធានីភ្នំពេញ បានធ្វើរបងបាំងនេះកាលពីថ្ងៃទី១៩ ខែធ្នូ ឆ្នាំ២០១៦។ នៅថ្ងៃសុក្រ ទី៣០ ធ្នូ ក្រុមអ្នកជំទាស់ក៏ជួបជុំគ្នាជាថ្មី មានទាំងស្រី ទាំងប្រុស ខ្លះមកពីតាមបណ្ដាខេត្ត អំពាវនាវឲ្យសាលាក្រុង ធ្វើផ្លូវវាងតាមរបងវិហារជាថ្មីម្ដងទៀត។ បន្ទាប់ពីមានការតវ៉ា សាលាក្រុងបានផ្អាកការសាងសង់ផ្លូវកាត់វិហារឥស្លាម បណ្ដោះអាសន្ន ដើម្បីរង់ចាំជជែកគ្នា៕