ពលរដ្ឋនៅសហគមន៍អូរខ្សាច់ចំនួន ៤គ្រួសារ ដែលត្រូវតុលាការខេត្តព្រះសីហនុចេញដីកាឲ្យពួកគេមិនរុះរើលំនៅឋានចេញពីដីដែលកំពុងរស់នៅ ប្រកាសថា ពួកគេមិនចាកចេញទៅណានោះទេ។ ការប្រកាសជំហររបស់ក្រុមពលរដ្ឋដូច្នេះ ខណៈដីការបស់តុលាការ នឹងត្រូវអនុវត្តនៅថ្ងៃទី២៩ ខែមិថុនា គឺបង្គាប់ឲ្យពលរដ្ឋរុះរើផ្ទះចេញ ព្រោះតុលាការបានកាត់ក្តីឲ្យភាគីម្ខាងទៀតជាអ្នកមានអំណាចឈ្នះក្តីលើដីមានជម្លោះ។
ក្រុមពលរដ្ឋនៅតែប្រកាន់ជំហររបស់ខ្លួនថា ពួកគេរស់នៅលើដីស្របច្បាប់របស់ខ្លួនជាង ២៥ឆ្នាំមកហើយនេះ គឺមានការទទួលស្គាល់ពីអាជ្ញាធរមូលដ្ឋានថែមទៀតផង។
ពលរដ្ឋសហគមន៍អូរខ្សាច់ លោកស្រី អេង វ៉ាន់ ជាពលរដ្ឋម្នាក់ក្នុងចំណោមពលរដ្ឋបួនគ្រួសារ ដែលត្រូវតុលាការបង្គាប់ឲ្យរុះរើផ្ទះ អះអាងថា លោកស្រីនឹងយកជីវិតរបស់លោកស្រី និងក្រុមគ្រួសារមកការពារដីផ្ទះដោយមិនចាកចេញទៅណាឡើយ។ ពលរដ្ឋរូបនេះ ចោទសួរថា តើការសម្រេចរបស់តុលាការដែលឲ្យភាគីម្ខាងទៀតឈ្នះក្តី តើសំអាងលើអ្វី? បើដីដែលក្រុមគ្រួសារលោកស្រីកំពុងរស់នៅជាង ២៥ឆ្នាំមកនេះ មានដើមដូង ដើមស្វាយធំៗ ពេញដីដូច្នេះ៖ «»
អាស៊ីសេរីមិនអាចសុំប្រតិកម្មពីសមត្ថកិច្ចអនុវត្តច្បាប់បានទេនៅថ្ងៃអង្គារ ទី២៦ មិថុនា ដោយលោក ជួន ណារិន ស្នងការនគរបាលខេត្តព្រះសីហនុ មិនលើកទូរសព័្ទ។
ពលរដ្ឋសហគមន៍អូរខ្សាច់ទាំងបួនគ្រួសារ ដែលប្រឈមការបណ្តេញចេញនេះ ពួកគេចាញ់ក្តី ឈ្មួញរកស៊ីដីធ្លីមានលុយ និងមានអំណាច ឈ្មោះ ប៉ុន សារឿន អតីតអនុរដ្ឋលេខាធិការក្រសួងបរិស្ថាន និងឈ្មោះ សុខ ងួន មាននាមជាឧកញ៉ា។
ចៅក្រមអនុវត្តនៃសាលាដំបូងខេត្តព្រះសីហនុ លោក តាក់ គឹមសៀ បានចេញដីកាបង្គាប់ឲ្យពលរដ្ឋរុះរើផ្ទះចេញពីដីដោយទុកពេលរយៈមួយខែ គិតចាប់ពីថ្ងៃទី២១ ខែឧសភាដល់ថ្ងៃទី២៩ ខែមិថុនា។ ចៅក្រមសម្រេចបណ្តេញពលរដ្ឋឲ្យចាកចេញពីដីដែលមានប័ណ្ណសម្គាល់សិទ្ធិប្រើប្រាស់ ចុះឆ្នាំ១៩៩៤ ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ដោយសំអាងថា ក្រុមពលរដ្ឋបានចាញ់ក្តីភាគីម្ខាងទៀត តាំងពីសាលាដំបូងខេត្តព្រះសីហនុ សាលាឧទ្ធរណ៍ និងតុលាការកំពូល។ អ្នកសម្របសម្រួលនៃសមាគមសម្ព័ន្ធសហគមន៍កសិករកម្ពុជាក្នុងខេត្តព្រះសីហនុ លោក ញិល ភាព ដែលតាមដានដំណើររឿងនេះ យល់ថា ការសម្រេចរបស់តុលាការ គឺមិនបានពិនិត្យឲ្យគ្រប់ជ្រុងជ្រោយទេ។ ដូច្នេះលោកទាមទារឲ្យមានការបង្កើតក្រុមការងារពិសេសមួយស្រាវជ្រាវករណីនេះឡើងវិញ។ លោក ញិល ភាព យល់ថា ដីការបស់តុលាការ គឺមិនអាចអនុវត្តដីការបស់ខ្លួននៅពេលនេះបានទេ បើមិនដូច្នេះទេ នឹងដុតឲ្យជម្លោះនេះរីករាលដាលកាន់តែខ្លាំង៖ «»
ពលរដ្ឋចោទប្រកាន់ថា ភាគីឈ្នះក្តី ដែលមានទាំងលុយ និងអំណាច ប្រើឥទ្ធិពលរដ្ឋរបស់ខ្លួនជិះជាន់ពលរដ្ឋក្រីក្រ។ ពួកគេលើកឡើងថា ភាគីឈ្នះក្តី ឈ្មោះ ប៉ុន សារឿន អតីតអនុរដ្ឋលេខាធិការក្រសួងបរិស្ថាន និងឈ្មោះ សុខ ងួន មាននាមជាឧកញ៉ាមិនដែលទៅរស់នៅដីជម្លោះទេ ប៉ុន្តែហេតុអីពួកគេទទួលបានប័ណ្ណកម្មសិទ្ធ។ ជាងនេះទៅទៀត ការចេញប័ណ្ណកម្មសិទ្ធិនេះ គឺចេញក្រោយពេលពលរដ្ឋទៅរស់នៅទីនោះ។ តើការចេញប័ណ្ណនេះស្របទៅតាមច្បាប់ភូមិបាលដែរ ឬទេ ព្រោះដីនៅតំបន់មានជម្លោះនោះ គឺស្ថិតក្នុងបរិវេណដីគម្របព្រៃឈើឆ្នាំ២០០២ ដែលរាជរដ្ឋាភិបាលបម្រុងទុកនាពេលកន្លងមក។
ពលរដ្ឋអះអាងថា ពួគេបានចូលទៅរស់នៅតំបន់សហគមន៍អូរខ្សាច់តាំងពីឆ្នាំ១៩៩២ ដែលកាលនោះវាជាកន្លែងប្រឈមមុខគ្នារវាងកងទ័ពរដ្ឋកម្ពុជា និងក្រុមខ្មែរក្រហម ហើយថែមទាំងពលរដ្ឋមានប័ណ្ឌសម្គាល់សិទ្ធិប្រើប្រាស់ ដែលទទួលស្គាល់ដោយអាជ្ញាធរមូលដ្ឋានថែមទៀត ប៉ុន្តែ ពលរដ្ឋគ្មានលទ្ធភាពធ្វើប្លង់កម្មសិទ្ធិដូចភាគីឈ្នះក្តីនោះទេ។ ពលរដ្ឋចោទថា ឈ្មួញមានអំណាច ប្រើប្រព័ន្ធតុលាការ ដើម្បីរឹបយកដីរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។