អាជ្ញាធរ​ក្រុង​ភ្នំពេញ​ឈូស​បំផ្លាញ​ផ្ទះ​អ្នក​បឹង​កក់​មួយ​គ្រួសារ​ដែល​មិន​ទាន់​ទទួល​បាន​សំណង

ដោយ ម៉ៅ សុធានី
2019-07-18
អ៊ីម៉ែល
មតិ
Share
បោះពុម្ព
សកម្មភាព​បូម​ខ្សាច់​របស់​ក្រុមហ៊ុន​ស៊ូកាគូ ​នៅ​ឯ​តំបន់​បឹងកក់ កាល​ពី​ថ្ងៃ​ទី​៣ ខែ​វិច្ឆិកា ឆ្នាំ​២០១០។
សកម្មភាព​បូម​ខ្សាច់​របស់​ក្រុមហ៊ុន​ស៊ូកាគូ ​នៅ​ឯ​តំបន់​បឹងកក់ កាល​ពី​ថ្ងៃ​ទី​៣ ខែ​វិច្ឆិកា ឆ្នាំ​២០១០។
Photo: RFA

សាលា​រាជធានី​ភ្នំពេញ​ ប្រើ​កម្លាំង​សមត្ថកិច្ច​ចម្រុះ​ មាន​ប៉ូលិស កង​រាជ​អាវុធ​ហត្ថ និង​សន្តិសុខ​ខណ្ឌ​ដូន​ពេញ ជាច្រើន​នាក់ ចុះ​រុះរើ​ផ្ទះ​សម្បែង​ពលរដ្ឋ​ក្រីក្រ​មួយ​គ្រួសារ ដែល​​ក្រាញ​ននៀល​រស់​នៅ​កណ្ដាល​វាល​ខ្សាច់ ក្នុង​តំបន់​បឹង​កក់ រង់​ចាំ​ដំណោះ​ស្រាយ​ជាង ១០ឆ្នាំ​មក​នេះ។ សង្គម​ស៊ីវិល​ផ្នែក​សិទ្ធិមនុស្ស​ថា ទង្វើ​របស់​អាជ្ញាធរ គឺ​ផ្ទុយ​ទៅ​នឹង​ច្បាប់​ដែល​គាំពារ​សិទ្ធិ​ជា​មូលដ្ឋាន​របស់​ពលរដ្ឋ​ ក្នុង​ការ​តាំង​ទីជម្រក​ឲ្យ​បាន​សមរម្យ​ ហើយ​គឺ​ជា​រឿង​ដែល​មិន​អាច​ទទួល​បាន។

លោក ឃិន ចន្ថា ឲ្យ​ដឹង​ថា អាជ្ញាធរ​បាន​ប្រើ​គ្រឿង​ចក្រ​ឈូស​បំផ្លាញ​ផ្ទះ​គាត់​ កប់​ចូល​ទៅ​ក្នុង​ដីខ្សាច់​​​ដើម្បី​បំបាត់​ភស្តុតាង កាល​ពី​ថ្ងៃ​ទី​៤ ខែ​កក្កដា នៅ​ពេល​ដែល​លោក ទៅ​ជួប​អភិបាល​ខណ្ឌ​ដូនពេញ ពិភាក្សា​គ្នា​អំពី​រឿង​សំណង​ តាម​ការ​អញ្ជើញ​របស់​សាលា​ខណ្ឌ។ ចំណែក ប្រពន្ធ និង​កូន​គាត់​៤​នាក់​ទៀត​ ត្រូវ​អាជ្ញាធរ ​នាំ​ខ្លួន​យក​ទៅ​ដាក់​ចោល​ក្នុង​ដី​ឡូតិ៍​មួយ​កន្លែង​ ក្បែរ​ប៉ុស្តិ៍​កង​រាជ​អាវុធ​ហត្ថ​ប្រចាំការ​នៅ​តំបន់​បឹង​កក់។ ផ្ទះ​របស់​បុរស​វ័យ​៥៥ឆ្នាំ​រូប​នេះ ​ដែល​នៅ​សល់​ត្រឹម​តែ​សសរ​ធ្នឹម​ឈរ​ភ្ជាប់​នឹង​ដំបូល​ស័ង្កសី គឺ​ស្ថិត​នៅ​ប៉ែក​ខាង​ត្បូង​ជាប់​របង​វិហារ​ឥស្លាម​បឹង​កក់។

លោក ឃិន ចន្ថា ហៅ​ទង្វើ​របស់​អាជ្ញាធរ​ខណ្ឌ​ដូនពេញ និង​សាលា​រាជធានី​ភ្នំពេញ ថា​ជា​ការ​ឃុបឃិត​គ្នា​ ប្រើ​ល្បិច​កល ​ប្លន់​យក​ដី​ធ្លី​របស់​គាត់​ យក​ទៅ​ប្រគល់​ឲ្យ​ក្រុមហ៊ុន ស៊ូកាគូ របស់​លោក​ឧកញ៉ា ឡាវ ម៉េង​ឃីន ខណៈ​ដែល​គ្រួសារ​គាត់​ នៅ​មិន​ទាន់​ទទួល​បាន​ដំណោះស្រាយ​សមរម្យ​ណាមួយ ពី​ខាង​សាលាក្រុង ក្នុង​រយៈពេល​ជាង​១០​ឆ្នាំ​មក​នេះ៖ «ខ្ញុំ​យល់​ថា សាលា​ក្រុង​ប្រើ​អំពើ​ព្រៃ​ផ្សៃ យង់ឃ្នង ល្មើស​នឹង​បទ​បញ្ជា​សម្ដេច។ សម្ដេច​មិន​ឲ្យ​ដើរ​ឆក់​ប្លន់​ដី​ប្រជាពលរដ្ឋ​អ៊ីចឹង​ទេ ឲ្យ​ដោះស្រាយ​ដោយ​ថ្លៃ​ថ្នូរ។ តែ​សាលា​ក្រុង ដើម្បី​ផលប្រយោជន៍​ផ្ទាល់​ខ្លួន ចេះ​តែ​ឆក់​ប្លន់​អ៊ីចឹង​ យក​ទៅ​ធ្វើ​មាន​ធ្វើ​បាន»

កាល​ពី​ខែ​វិច្ឆិកា ឆ្នាំ២០១៨ សាលា​រាជធានី​ភ្នំពេញ សម្រេច​ផ្ដល់​ដី​មួយ​កន្លែង ដែល​មាន​ទទឹង ១០ម៉ែត្រ និង​បណ្ដោយ ១៨ម៉ែត្រ ជូន​គ្រួសារ​លោក ឃិន ចន្ថា នៅ​តំបន់​បឹង​កក់ ប៉ុន្តែ​លោក​បដិសេធ​មិន​ទទួល​យក។

ចំពោះ​សំណង​ដែល​គ្រួសារ​លោក ឃិន ចន្ថា ចង់​បាន​ពី​សាលា​រាជធានី​ភ្នំពេញ គឺ​ស្រប​ទៅ​តាម​ចំណារ​លិខិត​របស់​អគ្គនាយក​រដ្ឋបាល​នៃ​ក្រសួង​ដែន​ដី​នគរូបនីយកម្ម និង​សំណង់ លោក សេង ឡូត ដែល​បាន​សុំ​កិច្ច​អន្តរាគមន៍​ទៅ​អភិបាល​ក្រុង​​ភ្នំពេញ កាល​ពី​ថ្ងៃ​ទី១៨ ឧសភា ឆ្នាំ២០១៨។ នៅ​ក្នុង​លិខិត​នោះ គឺ​សុំ​ផ្ដល់​សំណង​សមរម្យ​ និង​ផ្ដល់​ទឹក​ប្រាក់​ចំនួន ១ម៉ឺន​ដុល្លារ​សហរដ្ឋ​អាមេរិក ដល់​ពួក​គាត់ ដែល​មាន​ដី​កម្មសិទ្ធិ​ចំនួន ៣ប្លង់​នៅ​ក្បែរ​លោកស្រី គឹម វន្នី ដែល​ត្រូវ​បាន​ក្រុមហ៊ុន ស៊ូកាគូ បូម​ខ្សាច់​ពន្លិច​ដី​ និង​ផ្ទះ​កាល​ពី ១០ឆ្នាំ​មុន។

លោក ឃិន ចន្ថា នៅ​តែ​ប្រកាន់​ជំហរ​ទាមទារ​សំណង​ដដែល​នេះ ពី​សាលា​រាជធានី​ភ្នំពេញ៖ «ខ្ញុំ​នៅ​តែ​ទាមទារ​ដដែល​វិញ គឺ​ក្បាលដី ១០ម៉ែត្រ ដី​ពីរ​ឡូត៍​ហ្នឹង ហើយ​នឹង​លុយ ១៥ម៉ឺន។ ហើយ​ជំងឺ​ចិត្ត​ ខ្ញុំ​មិន​ទាន់​គិត​ទេ។ ខ្ញុំ​ចង់​ទារ​៥ម៉ឺន ព្រោះ​អី​ផ្ទះ​គ្រប់​គ្នា​ ចេះ​ដោះស្រាយ​ឲ្យ ទទួល​យក​បាន​។ តែ​ខ្ញុំ​មួយ​ក៏​ធ្វើ​បាប​គ្នា​ម្ល៉េះ ឃើញ​ខ្ញុំ​ក្រ​ដើរ​រើស​អេត​ចាយ ក៏​មក​ជាន់​ខ្ញុំ​មាំ​ម្ល៉េះ សាលា​ក្រុង​ហ្នឹង ខ្ញុំ​ឆ្ងល់​ណាស់»

ជុំវិញ​ដំណោះ​ស្រាយ​សម្រាប់​ពលរដ្ឋ​មួយ​​គ្រួសារ​ចុង​ក្រោយ​គេ​នៅ​តំបន់​បឹង​កក់​នេះ អាស៊ី​សេរី​មិន​អាច​សុំ​ការ​បក​ស្រាយ​ពី​អ្នក​នាំ​ពាក្យ​សាលា​ក្រុងភ្នំពេញ លោក ម៉េត មាស​ភក្តី បាន​ទេ ដោយ​សារ​តែ​ពុំ​មាន​អ្នក​ទទួល​ទូរស័ព្ទ។ សាលា​រាជធានី​ភ្នំពេញ​បញ្ជាក់​នៅ​ក្នុង​កំណត់​ហេតុ​របស់​ខ្លួន​ ថា បើ​សិន​ជា​លោក​ ឃិន ចន្ថា​ មិន​ទទួល​យក​ទេ សាលា​រាជធានី​ភ្នំពេញ​មិន​ទទួល​ខុសត្រូវ​ក្នុង​ការ​ខាតបង់​ផល​ប្រយោជន៍​របស់​លោក ទៅ​ថ្ងៃ​ក្រោយ​ឡើយ។

អ្នកនាំពាក្យ​នៃ​សមាគម​អាដ​ហុក លោក ស៊ឹង សែនករុណា លើក​ឡើង​ថា​ផ្ទះសម្បែង គឺ​ជា​ទី​ជម្រក​ដ៏​ចាំ​បាច់​សម្រាប់​ប្រជា​ពលរដ្ឋ​ទូទៅ សូម្បី​តែ​សត្វ​ក៏​ត្រូវ​ការ​សំបុក​ដែរ។ លោក ស៊ឹង សែនករុណា យល់​ថា សាលា​រាជធានី​ភ្នំពេញ គួរ​ពិចារណា​ឡើង​វិញ អំពី​ដំណោះ​ស្រាយ​សមរម្យ​ណា​មួយ​ជូន​លោក ឃិន ចន្ថា ព្រោះ​គាត់​រង​ផល​ពី​ប៉ះពាល់​ពី​ការ​បូម​ខ្សាច់​ដើម្បី​អភិវឌ្ឍន៍​តំបន់​បឹង​កក់​ អស់​ជា​ច្រើន​ឆ្នាំ​មក​ហើយ៖ «គាត់​លំបាក​នៅ​ក្នុង​ទី​តាំង​ចាស់​រួច​ទៅ​ហើយ អ៊ីចឹង​យើង​គួរ​តែ​បង្ក​លក្ខណៈ​យ៉ាង​ណា​ ដើម្បី​ឲ្យ​គេ​មើល​ឃើញ​ថា យើង​ក្នុង​នាម​ជា​អាជ្ញាធរ បម្រើ​ប្រជាពលរដ្ឋ​ហ្នឹង​ ត្រូវ​តែ​យក​ចិត្ត​ទុក​ដាក់​ទៅ​លើ​ពលរដ្ឋ​របស់​ខ្លួន ព្រោះ​គាត់​ត្រូវ​ការ​ទី​ជម្រក​ជាទី​កក់​ក្ដៅ ដើម្បី​គ្រួសារ​គាត់​បាន​រស់​នៅ​ក្នុង​សង្គម​ហ្នឹង​គេ​ផង ហើយ​យើង​បញ្ឈប់​នៅ​កាយវិការ រក​ដំណោះ​ស្រាយ​មិន​បាន​ហើយ យើង​ប្រើ​កាយ​វិការ​បោក​បញ្ឆោត​ទៅ​ប្រជា​ពលរដ្ឋ​ខ្លួន​ឯង​នេះ វា​ជា​ធ្វើ​ឲ្យ​ប៉ះពាល់​លើ​ពលរដ្ឋ​ផង ហើយ​ខ្លួន​ជា​មន្ត្រី​ហ្នឹង ក៏​ធ្វើ​ឲ្យ​ប៉ះពាល់​ដល់​មន្ត្រី​ផ្សេងៗ ទៀត​ ដែល​គេ​ធ្វើ​ការ​បាន​ត្រឹម​ត្រូវ​ដែរ»

ជម្លោះដីធ្លី​ដ៏​ចម្រូង​ចម្រាស​នៅ​តំបន់​បឹង​កក់​នេះ លោក ហ៊ុន សែន ​ធ្លាប់​បាន​ប្រកាស​ជា​សាធារណៈ​ បញ្ជា​ទៅ​សាលា​ក្រុង​ភ្នំពេញ ដោះស្រាយ​បញ្ចប់​ជម្លោះ​ឲ្យ​ពលរដ្ឋ តាម​រយៈ​នយោបាយ​ស្បែក​ខ្លា​ដែល​ត្រូវ​ឆ្វៀល​ដី​ឲ្យ​ពលរដ្ឋ​នៅ​តំបន់​បឹង​កក់​ដែល​ចង់​រស់​នៅ និង​អភិវឌ្ឍ​នៅ​ហ្នឹង​កន្លែង តាម​អនុក្រឹត្យ​លេខ​១៨៣ ផ្ដល់​ដី​ទំហំ​ ១២,៤៤​ហិកតារ កាល​ពី​ឆ្នាំ២០១១។

ប៉ុន្តែ​ចំណាក់​ការ​ដោយ​មាន​ដាក់​ចេញ​ជា​អនុក្រឹត្យ​ផង​នោះ ហាក់​គ្មាន​ប្រសិទ្ធភាព ដើម្បី​បញ្ចប់​ជម្លោះ​​បាន​ទាំង​ស្រុង​​ឡើយ ខណៈ​តំណែង​អភិបាល​ក្រុង​ភ្នំពេញ​ ត្រូវ​បាន ​លោក​ ហ៊ុន សែន ដោះ​ដូរ​ដល់​ទៅ​បី​លើក​ ចាប់​តាំង​ពី​លោក កែប ជុតិមា មក​ដល់​លោក ប៉ា សុជាតិវង្ស រហូត​មក​ដល់​ពេល​បច្ចុប្បន្ន​នេះ គឺ​លោក ឃួង ស្រេង។

បើ​ទោះ​បី​ជា​ត្រូវ​រស់​នៅ​ក្នុង​ស្ថានភាព​លំបាក​ត​ទៅ​មុខ​ទៀត​ក៏​ដោយ​ លោក ឃឹម ចន្ថា និង​គ្រួសារ​ បញ្ជាក់​ថា ពួក​គាត់​នៅ​តែ​បន្ត​តវ៉ា​ការ​ទាមទារ​ លុះ​ត្រា​តែ​ទទួល​បាន​សំណង​ជា​ដី និង​ថវិកា​មួយ​ចំនួន។ អ្នក​បឹង​កក់​មួយ​គ្រួសារ​នេះ ស្នើសុំ​លោក​នាយក​រដ្ឋមន្ត្រី ហ៊ុន សែន និង​អាជ្ញាធរ​ពាក់ព័ន្ធ​ទាំង​អស់ ជួយ​ដោះ​ស្រាយ​បញ្ចប់​ជម្លោះ​ឲ្យ​គាត់ ដើម្បី​ឲ្យ​កូន​គាត់​មាន​ឱកាស​រៀន​សូត្រ និង​រស់​នៅ​ក្នុង​ភាព​ថ្លៃ​ថ្នូរ ដូច​អ្នក​បឹង​កក់​ផ្សេង​ទៀត ដែល​ទទួល​បាន​ដី​និង​ប្លង់​ហើយ​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល