សហគមន៍ក្រីក្រនៅរាជធានីភ្នំពេញថាអាជ្ញាធរមិនបានយកចិត្តទុកដាក់ដោះស្រាយបញ្ហាលំបាករបស់ខ្លួន

ដោយ ជីវិតា
2024.03.25
សហគមន៍ក្រីក្រនៅរាជធានីភ្នំពេញថាអាជ្ញាធរមិនបានយកចិត្តទុកដាក់ដោះស្រាយបញ្ហាលំបាករបស់ខ្លួន ប្រជាសហគមន៍ក្រីក្របឹងត្របែក រស់នៅតាមបណ្តោយប្រឡាយទឹកក្នុងសង្កាត់ផ្សារដើមថ្កូវ ខណ្ឌចម្ការមន រាជធានីភ្នំពេញ កាលពីថ្ងៃទី០៣ ខែមីនា ឆ្នាំ២០២៤។
រូប៖ ពលរដ្ឋ

សហគមន៍​ក្រីក្រ​នៅ​រាជធានី​ភ្នំពេញ​អះអាង​ថា​រដ្ឋាភិបាល​ និង​អាជ្ញាធរ​មូលដ្ឋាន​នៅ​តែ​មិន​យក​ចិត្ត​ទុក​ដាក់​លើ​ការ​ដោះ​ស្រាយ​បញ្ហា​លំបាក​របស់​ពួក​គាត់​ដូច​ជា​ការ​មិន​​ចេញ​ប្លង់​ដី​ស្រប​ច្បាប់​ និង​កង្វះ​សេវា​សង្គម​ជា​ដើម។ មន្ត្រី​សង្គម​ស៊ីវិល​ថា​រដ្ឋាភិបាល​ និង​អាជ្ញាធរ​មូលដ្ឋាន​គួរ​យក​ចិត្ត​ទុក​ដាក់​ និង​ដោះ​ស្រាយ​បញ្ហា​របស់​ពលរដ្ឋ​ឱ្យ​ទាន់​ពេល។

ពលរដ្ឋ​ជា​ច្រើន​គ្រួសារ​នៅ​សហគមន៍​ក្រីក្រ​បឹង​ត្របែក​ខ្លះ​ប្រកប​មុខរបរ​លក់​លៀស​ហាល និង​ខ្លះ​ដើរ​រើស​សំរាម​ នៅ​តាម​ទី​កន្លែង​នានា​ក្នុង​ទី​ក្រុង​ភ្នំពេញ កំពុង​ព្រួយ​បារម្ភ​ពី​អនាគត​របស់​ខ្លួន​ដោយ​សារ​ខ្វះ​ការ​យក​ចិត្ត​ទុក​ដាក់​ពី​អាជ្ញាធរ​មូលដ្ឋាន​និង​រដ្ឋាភិបាល។

ប្រធាន​សហគមន៍​បឹង​ត្របែក លោកស្រី​ ហួរ​ សៀកលន ឱ្យ​ដឹក​ថា​សហគមន៍​បឹង​ត្របែក​មាន​ពលរដ្ឋ​​ជាង​១រយ​គ្រួសារ​កំពុង​​ជួប​ប្រទះ​បញ្ហា​សំខាន់ៗ រួម​មាន​ក្លិន​ស្អុយ​និង​សំរាម​ដែល​ចេញ​​ពី​ប្រឡាយ កង្វះ​ការ​ជួល​ជុល​ផ្លូវ​ និង​ស្ពាន​នៅ​ក្នុង​សហគមន៍​ជា​ដើម។

លោកស្រី​ ហួរ​ សៀកលន «ដូច​ថា​គាត់​អត់​សូវ​រវល់​យក​ចិត្ត​ទុក​ដាក់​កូន​ចៅ​នៅ​ក្នុង​ស្រុក​ភូមិ​ ពេល​ខ្លះ​ខ្ញុំ​ខឹង​ចង់​និយាយ​ថា​​នៅ​ពេល​ដែល​គាត់​មាន​ធុរៈ​[បោះ​ឆ្នោត] ចង់​ឱ្យ​យើង​ជួយ គាត់​ចុះ​យក​ចិត្ត​យក​ថ្លើម​យើង​ញឹក​ញាប់​តែ​​ពេល​រួច​រាល់​ហើយ​គឺ​គាត់​អត់​រវល់​ អត់​ខ្វល់​តែ​ម្ដង​»​

ចំណែក​តំណាង​ពលរដ្ឋ​នៅ​តំបន់​ក្រីក្រ​សហគមន៍​ស្ទឹង​កំបុត​ក្នុង​សង្កាត់​ស្វាយ​ប៉ាក់​ ខណ្ឌ​ឫស្សីកែវ​ លោក​ ស មករា ​លើក​ឡើង​ថា​សហគមន៍​នេះ​មាន​ជាង​២រយ​គ្រួសារ​ដែល​អាជ្ញាធរ​នៅ​មិន​ទាន់​ចេញ​ប្លង់​កម្មសិទ្ធិ​ដី​ធ្លី​ឱ្យ​នៅ​ឡើយ​ ហើយ​ពួក​គាត់​នៅ​តែ​បន្ត​ស្នើ​ឱ្យ​សាលា​រាជធានី​ភ្នំពេញ​ដោះ​ស្រាយ​រឿង​នេះ។ លោក​ ស មករា បន្ត​ថា​ការ​មិន​ទទួល​បាន​ប្លង់​កម្មសិទ្ធិ​ដី​ធ្លី​នេះ​បាន​ធ្វើ​ឱ្យ​គ្រួសារ​មួយ​ចំនួន​ធ្លាក់​ក្នុង​បំណុល​ដោយ​សារ​តែ​ពួក​គាត់​មិន​អាច​ខ្ចី​លុយ​ពី​ធនាគារ​បាន​ ហើយ​ងាក​ទៅ​ខ្ចី​លុយ​ពី​បុគ្គល​ឯកជន​ដែល​មាន​ការ​ប្រាក់​ខ្ពស់។

លោក​ ស មករា បារម្ភ​ថា​​ប្រជា​សហគមន៍​របស់​លោក​នឹង​អាច​រង​​ការ​បណ្ដេញ​ចេញ​ពី​លំនៅឋាន​ដូច​ជា​សហគមន៍​បឹង​តាមោក ក្រោម​លេស​ថា​​ពួកគាត់​រស់​នៅ​ខុស​ច្បាប់។

លោក​ ស មករា «យើង​ដាក់​ទៅ​រដ្ឋសភា​ៗ រុញ​ទៅ​សាលា​ក្រុង​ យើង​ដាក់​ទៅ​ខុទ្ទកាល័យ​សម្ដេច​នៅ​ទី​ស្ដី​ការ​ក៏​រុញ​ទៅ​សាលា​ក្រុង​ អ៊ីចឹង​កប់​នៅ​សាលា​ក្រុង​ទាំង​អស់​ យើង​ចេញ​តែ​តាម​នៅ​សាលា​ក្រុង​ថា​ពេល​ណា​បាន​ដោះ​ស្រាយ​សំណើ​ដែល​ក្រសួង​ដែន​ដី​គាត់​បញ្ជូន​មក​ ថ្ងៃ​ណា​បាន​ដោះស្រាយ​សំណើ​ដែល​ពួក​ខ្ញុំ​ដាក់​រដ្ឋសភា​ដែល​បញ្ជូន​មក​សាលាក្រុង​ អត់​ដោះ​ស្រាយ​ឱ្យ​»

រីឯ​តំណាង​ពលរដ្ឋ​នៅ​បឹង​តាមោក​ លោកស្រី​ ស៊ា ដាវី​ លើក​ឡើង​ថា​ពលរដ្ឋ​នៅ​បឹង​តាមោក​ជា​ច្រើន​គ្រួសារ​កំពុង​ធ្លាក់​បំណុល​វ័ណ្ឌក​ដោយ​សារ​អាជ្ញាធរ​នៅ​តែ​ព្យាយាម​បណ្ដេញ​ពួកគាត់​ចេញ​លំនៅឋាន​តាម​រយៈ​ការ​ប្រើប្រាស់​អំពើ​ហិង្សា ការ​កាត់​ដី​ឱ្យ​អ្នកមាន​លុយ​មាន​អំណាច​ និង​ការ​ជីក​ប្រឡាយ​មក​ចំ​ផ្ទះ​ពលរដ្ឋ​ជា​ដើម។ លោកស្រី​ ស៊ា ដាវី​ បន្ត​ថា​ក្រៅ​ពី​បញ្ហា​នេះ ពលរដ្ឋ​មិន​អាច​រក​ចំណូល​ពី​បឹង​តាមោក​តាម​រយៈ​ការ​នេសាទ​ត្រី​ ​រក​ខ្យងខ្ចៅ​ និង​បេះ​ផ្កាឈូក​ដូច​មុន​​ទៀត​នោះ​ទេ​ ដោយ​សារ​តែ​ផ្ទៃ​បឹង​នេះ​ត្រូវ​បាន​គេ​បន្ត​ចាក់​ដី​បំពេញ។

លោកស្រី​ ស៊ា ដាវី​«ប៉ុន្តែ​ហេតុអ្វី​បាន​ជា​អភិវឌ្ឍន៍​ត្រូវ​តែ​ឱ្យ​ឧកញ៉ា​​ត្រូវ​តែ​ដេញ​ប្រជាពលរដ្ឋ​ចេញ​ ​វា​អត់​ស្មើ​ភាព​គ្នា​​ ដោយ​យក​លេស​អភិវឌ្ឍន៍​ប្រឡាយ​ អភិវឌ្ឍន៍​ចុះ​តែ​ដី​ពួក​ខ្ញុំ​នេះ​ ដែល​មាន​បង្កាន់​ដី​ភូមិ​ឃុំ​ហេតុ​អី​បាន​ជា​អត់​ស្រប​ច្បាប់​​និរាករណ៍​ចោល​ និរាករណ៍​ចោល​ស្រួល​ៗ​ម្ល៉េះ​អ៊ីចឹង​បង្កើត​ភូមិ​ឃុំ​មក​ធ្វើ​អី​»​

អង្គការ​សមាគម​ធាង​ត្នោត​បាន​ចេញ​របាយការណ៍ ​កាល​ពី​ថ្ងៃ​​ទី៧ ខែ​កញ្ញា ឆ្នាំ​២០២៣ រក​ឃើញ​ថា​មាន​ពលរដ្ឋ​ជិត​២ម៉ឺន​ (១៩ ៥៣៩)​គ្រួសារ ឬ​ស្មើ​ប្រមាណ​សរុប​ជិត​១​ សែន​នាក់​ (៨៩ ៨៧៩នាក់​) នៅ​ទីតាំង​ចំនួន​១៩១ ក្នុង​រាជធានី​ភ្នំពេញ​កំពុង​ស្ថិត​ក្នុង​ភាព​ក្រីក្រ​ដូច​ជា​ការ​គ្មាន​ផ្ទះ​សម្បែង ការ​ធ្វើ​ចំណាក​ស្រុក​ដោយ​បង្ខំ ការ​ជាប់​បំណុល និង​ពលកម្ម​កុមារ។  របាយការណ៍​ឱ្យ​ដឹង​ថា​មួយ​ភាគ​បី​នៃ​ទីតាំង​ចំនួន​១៩១នោះ​ អាច​ស្ថិត​នៅ​លើ​ដី​រដ្ឋ ខណៈ​ដែល​ជិត​ពីរ​ភាគ​បី នៃ​ទីតាំង គឺ​ជា​លំនៅ​ឋាន​ក្រីក្រ​នៅ​រាជធានី​ភ្នំពេញ​មិន​មាន​កម្មសិទ្ធិ​ដី​ធ្លី​ស្របច្បាប់​ដែល​អាច​ធ្វើ​ឱ្យ​ពួកគាត់​ប្រឈម​​​នឹង​ការ​បណ្ដេញ​ចេញ​ដោយ​បង្ខំ។

វិទ្យុ​អាស៊ី​សេរី​មិន​ទាន់​អាច​សុំ​ការ​ឆ្លើយ​តប​រឿង​នេះ​ពី​អ្នកនាំ​ពាក្យ​សាលា​រាជធានី​ភ្នំពេញ លោក​ ម៉េត មាសភក្ដី និង​លោក កើត​ ឆែ​  បានទេ នៅ​ថ្ងៃ​ទី ២៤ ខែ​មីនា។

ទោះ​ជា​យ៉ាង​ណា​ ប្រធាន​គម្រោង​សិទ្ធិ​លំនៅឋាន​ និង​ស្រាវជ្រាវ​នៃ​អង្គការ​សមាគម​ធាង​ត្នោត (STT) លោក ស៊ាង មួយ​ឡៃ មាន​ប្រសាសន៍​ថា​ទោះ​បី​ជា​សហគមន៍​ក្រីក្រ​នៅ​ក្នុង​រាជធានី​ភ្នំពេញ​ និង​អង្គការ​សង្គម​ស៊ីវិល​បាន​ស្នើ​ទៅ​កាន់​រដ្ឋាភិបាល​ជា​ច្រើន​ដង​ក្ដី​ ​ក៏​រដ្ឋាភិបាល​ និង​អាជ្ញាធរ​មិន​ទាន់​ដោះ​ស្រាយ​បញ្ហា​ទាំង​នេះ​នៅ​ឡើយ។ លោក ស៊ាង មួយ​ឡៃ​ បារម្ភ​ថា​បញ្ហា​ទាំង​នេះ​នឹង​កាន់​ធ្ងន់ធ្ងរ​​ ប្រសិន​បើ​រដ្ឋាភិបាល​មិន​ផ្ដល់​ដំណោះ​ដល់​សហគមន៍​ឱ្យ​ទាន់​​ពេល​វេលា។

លោក ស៊ាង មួយ​ឡៃ៖ «អ្វី​ដែល​យើង​ធ្លាប់​បាន​សិក្សា​ ក៏​ដូច​ធ្លាប់​​ផ្ដល់​អនុសាសន៍​កន្លង​មក​​ពាក់​ព័ន្ធ​នឹង​សហគមន៍​ក្រីក្រ​ពាក់​ព័ន្ធ​នឹង​សហគមន៍​ក្រីក្រ​នេះ​ យើង​ឃើញ​ថា​គឺ​ជា​រឿង​មួយ​សំខាន់​ ហើយ​ជា​រឿង​មួយ​ដែល​អាជ្ញាធរ​មូលដ្ឋាន​ក៏​ដូច​ជា​អ្នក​ដឹក​នាំ​ផ្សេងៗ ត្រូវ​យក​ចិត្ត​ទុក​ដាក់​គិតគូរ​ឱ្យ​បាន​ប្រសើរ​ឡើង​ ឱ្យ​បាន​ដិតដល់​ជាង​ប្រជាពលរដ្ឋ​ទូទៅ​ផ្សេងៗ​ ព្រោះ​ពួកគាត់​ជា​ជន​ដែល​ងាយ​រងគ្រោះ​»​

ទីតាំង​ចំនួន​១៩១ក្នុង​រាជធានី​ភ្នំពេញ​ដែល​អង្គការ​សមាគម​​ធាង​ត្នោត​រក​ឃើញ​ពលរដ្ឋ​កំពុង​រស់​នៅ​ក្នុង​ភាព​ក្រីក្រ​រួម​មាន​តំបន់​ច្រាំង​ចំរះ​ តំបន់​ស្ទឹងមានជ័យ​ តំបន់​ផ្លូវ​រថភ្លើង​ និង​តំបន់​បុរី​កីឡា​ជា​ដើម។

ពលរដ្ឋ​ដែល​រស់​នៅ​ក្នុង​សហគមន៍​ក្រីក្រ​អះអាង​ថា​ពួកគាត់​នឹង​មិន​ចាក​ចេញ​ពី​លំនៅឋាន​របស់​ខ្លួន​ទេ លើក​លែង​តែ​អាជ្ញាធរ​ផ្ដល់​សំណង​សមរម្យ​ដែល​ស្រប​តាម​តម្លៃ​ទី​ផ្សារ​ជូន​ពួកគាត់។ ប្រជា​សហគមន៍​​បញ្ជាក់​ថា​ពួកគាត់​នឹង​បន្ត​ដំណើរ​ការ​ផ្លូវ​ច្បាប់ ដោយ​ទទូច​ដល់​រដ្ឋាភិបាល​ឱ្យ​ចេញ​ប្លង់​កម្មសិទ្ធិ​ជូន​ដល់​ពួកគាត់​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។