ពលរដ្ឋជាង ១០០គ្រួសារ (១៥៤) រស់នៅឃុំរម្យទម ស្រុករវៀង ខេត្តព្រះវិហារចោទក្រុមហ៊ុន សម្បទានសេដ្ឋកិច្ច គីម ជាធួន (Kim Gia Thuan group Co.,Ltd) ថា ឈូសឆាយបំពានដីស្រែ និងដីចម្ការវិលជុំ របស់ពួកគាត់អស់ជាច្រើនហិកតារ។ អ្នកភូមិថា ពលរដ្ឋជាច្រើនគ្រួសារ បានខកខានធ្វើកសិកម្មនៅឆ្នាំនេះ ដោយសារដីស្រែរបស់ពួកគេ ត្រូវបានក្រុមហ៊ុនរំលោភយក។
ពលរដ្ឋ ២៣គ្រួសារ តំណាងឱ្យពលរដ្ឋ ជាង ១០០គ្រួសារ រស់នៅភូមិអូរទ្រលោក ឃុំរម្យទម ស្រុករវៀង បានទៅដល់ទីស្នាក់ការសមាគមអាដហុក (Adhoc) ខេត្តព្រះវិហារ កាលពីថ្ងៃទី១២ សីហា ដើម្បីពិភាក្សាផ្នែកច្បាប់ ទាក់ទិនករណី ក្រុមហ៊ុនសម្បទានសេដ្ឋកិច្ច គីម ជាធួន យកគ្រឿងចក្រឈូសឆាយដីស្រែ ចម្ការរបស់អ្នកភូមិដោយបំពានច្បាប់។ អ្នកស្រុកថា ពួកគាត់បានពឹងអាជ្ញាធរឃុំ និងអាជ្ញាធរស្រុកឱ្យជួយអន្តរាគមន៍ ដោះស្រាយរឿងនេះ តែគ្មានប្រសិទ្ធភាព។
តំណាងពលរដ្ឋ រស់នៅភូមិអូរទ្រលោក លោក អេត ថុន ឱ្យដឹងនៅថ្ងៃទី១៣ សីហា ថា បច្ចុប្បន្នក្រុមហ៊ុន នៅតែបន្តឈូសឆាយដីស្រែរបស់ពួកគាត់ និងដីព្រៃរេចរឹលមួយចំនួន អស់ប្រហែលជាង ១ពាន់ហិកតារ។ លើសពីនេះ អ្នកភូមិកំពុងដេកភ័យខ្លាចក្រែងបាត់បង់ទីកន្លែងធ្វើកសិកម្ម និងវាលស្មៅចិញ្ចឹមគោក្របីទាំងស្រុង។ លោកថា គ្រួសារលោកមានដីស្រែ ៣ហិកតារ ត្រូវបានក្រុមហ៊ុនរំលោភយកអស់ កាលពីខែមុន ធ្វើឱ្យគ្រួសារលោក ខ្វះខាតដីធ្វើកសិកម្មចិញ្ចឹមជីវិតនៅឆ្នាំនេះ៖ «មានដីស្រែខ្លះ និងដីចម្ការខ្លះ ភាគច្រើនដីស្រែ។ ច្រើនដែរដាច់រហេតរហូតអស់ហើយចូលចង់ ១ពាន់ហិកតារជាងហើយដឹង។ រាល់ថ្ងៃនៅតែវ៉ៃបន្តបន្ទាប់។ មិនងាយទេបង រឿងអយុត្តិធម៌ដោយសារយើងជាពលរដ្ឋទៅទាមទារ គេអត់ដោះស្រាយឱ្យ។ ខាងអាជ្ញាធរភូមិ និងឃុំដូចព្រងើយកន្តើយ ប្រាប់គេដែរ តែគេអត់យកចិត្តទុកដាក់»។
អាស៊ីសេរីបានព្យាយាមទាក់ទង តំណាងក្រុមហ៊ុនសម្បទានសេដ្ឋកិច្ច គីម ជាធួន លោក ឈាង ឆេង ដើម្បីសុំការបំភ្លឺជុំវិញការចោទប្រកាន់នេះ តែទូរស័ព្ទហៅចូលច្រើនដងគ្មានអ្នកទទួលនៅថ្ងៃទី១៣ ខែសីហា។
ក្រុមហ៊ុនសម្បទានសេដ្ឋកិច្ច គីម ជាធួន ទទួលសិទ្ធិវិនិយោគដីកសិកម្មពីរដ្ឋាភិបាល ទំហំជាង ៨ពាន់ ៦រយហិកតារ (៨.៦៩២) ឋិតក្នុងស្រុករវៀង ខេត្តព្រះវិហារ កាលពីឆ្នាំ២០១២។ ក្រុមហ៊ុននេះ ទទួលសិទ្ធិវិនិយោគបន្តពីក្រុមហ៊ុន សម្បទានសេដ្ឋកិច្ច ខេមបូឌា អាហ្គ្រោអ៊ិនដាសស្ទ្រី គ្រុប (Cambodia Agro-Industry Group Co.,Ltd) វិនិយោគដំណាំឧស្សាហកម្ម អាកាសា និងអំពៅ។
មេឃុំរម្យទម លោក សោម មុត អះអាងថា អាជ្ញាធរឃុំមិនទាន់ទទួលពាក្យបណ្តឹងជាផ្លូវការណាមួយ ពីក្រុមពលរដ្ឋនៅឡើយទេ មកទល់ពេលនេះ។ តែលោកថា កន្លងទៅមានពលរដ្ឋជាង ១០០នាក់ បានតវ៉ា ដោយស្នើឱ្យអាជ្ញាធរឃុំជួយ ដោះស្រាយរឿងនេះដែរ។ រីឯអាជ្ញាធរឃុំបានចុះពិនិត្យទីតាំងដីជាក់ស្ដែង ក្នុងតំបន់មានជម្លោះនោះ ពុំឃើញមានការឈូសឆាយរំលោភបំពានដីស្រែ ដូចពលរដ្ឋលើកឡើងទេ៖ «ឱ្យតែដីបងប្អូនណា ដែលមានពាក់ព័ន្ធជាមួយក្រុមហ៊ុន ដល់ខ្ញុំជួយយ៉ាងម៉េច ? គាត់បានមកតវ៉ា។ មកតវ៉ានេះ ដើម្បីកុំឱ្យក្រុមហ៊ុនធ្វើតែម្ដង ទុកឱ្យគោក្របីស៊ី គាត់និយាយអ៊ីចឹង ១០០នាក់ជាង។ ខ្ញុំចុះទៅសម្របសម្រួលជាមួយអភិបាលរងស្រុកដែរ គាត់មិនចង់ឱ្យក្រុមហ៊ុនធ្វើនៅតែកន្លែងនោះតែម្ដង បើប៉ះពាល់អត់មានទេ ខ្ញុំចុះទៅ ២ដងហើយ»។
មន្ត្រីសម្របសម្រួលសមាគមអាដហុក ខេត្តព្រះវិហារ លោក ឡោ ចាន់ ដែលចុះអង្កេតរឿងនេះ រកឃើញថា មកទល់ពេលនេះ ក្រុមហ៊ុនមិនទាន់ដាំដំណាំផ្នែកណាមួយ លើផ្ទៃដីដែលរដ្ឋាភិបាលផ្ដល់សិទ្ធិឱ្យវិនិយោគនៅឡើយទេ។ លោកពន្យល់ថា រដ្ឋាភិបាលមានសិទ្ធិដកអាជ្ញាប័ណ្ណក្រុមហ៊ុននេះ ប្រសិនបើក្រុមហ៊ុនអនុវត្តខុសគោលការណ៍វិនិយោគ៖ «រយៈពេល ៧ឆ្នាំហើយ ផ្ទៃដីទើបតែឈូសបាន ៥០០ ទៅ ៦០០ ហិកតារ អត់គិតថា អាហ្នឹងជាការយឺតយ៉ាវ ឬមិនគ្រប់តាមកុងត្រារបស់ ក្រុមហ៊ុនជាមួយក្រសួងទេ ? អ៊ីចឹងការយឺតយ៉ាវហ្នឹង បើយើងនិយាយពីគោលការណ៍វិញគឺ រដ្ឋាភិបាលមានសិទ្ធិដកហូតក្រុមហ៊ុន ដែលមិនគោរពលក្ខខណ្ឌរវាងរដ្ឋាភិបាលជាមួយក្រុមហ៊ុន»។
មន្ត្រីអង្គការសង្គមស៊ីវិលរូបនេះបន្ថែមថា សកម្មភាពឈូសឆាយរបស់ក្រុមហ៊ុន នឹងរីករាលដាលកាន់តែធំឡើង បង្កប៉ះពាល់កាន់តែធ្ងន់ដល់ពលរដ្ឋផ្សេងទៀតរាប់រយគ្រួសារ ប្រសិនបើអាជ្ញាធរមិនពន្លឿនដោះស្រាយករណីនេះទេ។ លោកថា ការតវ៉ា និងពាក្យបណ្ដឹងរបស់ពលរដ្ឋអាជ្ញាធរខេត្ត និងអាជ្ញាធរជាតិ គួរចុះស៊ើបអង្កេតឱ្យច្បាស់លាស់ ដើម្បីរកយុត្តិធម៌ជូនពលរដ្ឋរងគ្រោះ មិនគួរពន្យារពេលនោះទេ។
អ្នកភូមិថា មកទល់ពេលនេះ មានតំណាងពលរដ្ឋ ៥នាក់ហើយ ដែលត្រូវបានតុលាការកោះហៅ បន្ទាប់ពីទទួលពាក្យបណ្ដឹងពីក្រុមហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។