ពលរដ្ឋ​មាន​ជម្លោះ​ដីធ្លី​​ជាមួយ​ក្រុមហ៊ុន មេត្រីភាព ឡើង​​មក​​ភ្នំពេញ ដាក់​​ញត្តិ​​សុំ​​​ឲ្យ​ដោះ​លែង​​ពលរដ្ឋ​​កំពុង​​ជាប់​ឃុំ ១៣​នាក់​​

ដោយ ថន ថារ៉ូ
2019-01-29
អ៊ីម៉ែល
មតិ
Share
បោះពុម្ព
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
រូបថត៖ សមាគម អាដហុក (ADHOC)

ក្រុម​ពលរដ្ឋ​​នៅ​ខេត្ត​ព្រះវិហារ និង​ខេត្ត​ឧត្តរ​មាន​ជ័យ ដែល​មាន​ជម្លោះ​ដីធ្លី​ជាមួយ​ក្រុមហ៊ុន​ឯកជន​ឈ្មោះ មេត្រី​ភាព នាំគ្នា​ឡើង​មក​​ភ្នំពេញ​ ដេក​ចាំ​ដាក់​ញត្តិ​​ជូន​មេដឹកនាំ​របប​ក្រុង​ភ្នំពេញ និង​រដ្ឋមន្ត្រី​​ក្រសួង​ដែន​ដី ឲ្យ​ជួយ​អន្តរាគមន៍​ដោះស្រាយ​ជម្លោះ​ដីធ្លី ទម្លាក់​បទ​ចោទ​លើ​ពលរដ្ឋ​ជាង ​២០​នាក់​ និង​ទាមទារ​ឲ្យ​​ដោះ​លែង​ពលរដ្ឋ​ ១៣​នាក់ ដែល​កំពុង​ជាប់​ឃុំ​ក្នុង​ពន្ធនាគារ​ខេត្ត​ព្រះវិហារ។​​​​​

អ្នក​ភូមិ​​​ប្រាប់​ថា ​ពេល​នេះ ពលរដ្ឋ​ជាង ១០០​គ្រួសារ បាន​ឡើង​មក​ដល់​រាជធានី​ភ្នំពេញ​ ហើយ​ប៉ុន្តែ​គ្មាន​កន្លែង​ស្នាក់​នៅ​ទេ ដោយសារ​​វត្ត​នានា ក្នុង​ក្រុង​ភ្នំពេញ មិន​ហ៊ាន​ទទួល​ឲ្យ​ស្នាក់​នៅ ឬ​ទាល់​តែ​ទៅ​សុំ​អនុញ្ញាត​ពី​ក្រសួង​ដែនដី​​ជាមុន​សិន។

តំណាង​ពលរដ្ឋ​ម្នាក់ មក​ពី​​ខេត្ត​ឧត្តរ​មាន​ជ័យ លោក ឡយ លីហួរ ឲ្យ​ដឹង​ថា ​ការ​ប្រមូល​ផ្ដុំ​គ្នា ឡើង​មក​ភ្នំពេញ គឺ​ដោយសារ​ពួកគាត់​បារម្ភ​ពី​សុវត្ថិភាព ព្រោះ​ប៉ុន្មាន​ថ្ងៃ​ចុងក្រោយ​នេះ កងទាហាន និង​អាជ្ញាធរ​បាន​ចាប់​ខ្លួន​ពលរដ្ឋ​ចំនួន ​៧នាក់ ជា​បន្ត​បន្ទាប់ បញ្ជូន​ទៅ​តុលាការ។ លោក​ថា មក​ដល់​ពេល​នេះ ពលរដ្ឋ​ខ្លះ​កំពុង​លាក់​ខ្លួន មិន​ហ៊ាន​ចេញ​ដើរ​ហើរ​ខាង​ក្រៅ​នៅ​ឡើយ​ទេ៖ «សូម​មេត្តា​ចាក់​ផ្សាយ​ដំណឹង​នេះ ឲ្យ​បាន​ឮ​ដល់​សម្ដេច​​ផង ហើយ​ក៏​សូម​ស្នើសុំ​ដល់​សម្ដេច​នាយករដ្ឋមន្ត្រី​ មេត្តា​យោគយល់ អាណិត អន្តរាគមន៍​ឲ្យ​ពួក​ខ្ញុំ បាន​ទៅ​រស់​នៅ​ស្រុក​​ ដែល​ពួក​ខ្ញុំ​រស់​នៅ​ផង និង​សូម​ជួយ​ផ្ដល់​ប្លង់​កម្មសិទ្ធិ​ដល់​ពួក​ខ្ញុំ​ផង។ សូម​ឲ្យ​លើក (លែង) ការ​ចោទ​ប្រកាន់​លើ​ពួក​ខ្ញុំ​ទាំង ២៥នាក់ ហើយ​និង​សុំ​ឲ្យ​ជួយ​ដោះ​លែង​ប្រជាពលរដ្ឋ​ទាំង ១៣​នាក់ ដែល​គេ​បាន​ចាប់​ទៅ​ផង»

កង​អន្តរាគមន៍​វីរ​យោធា​លេខ​២៦១ ប្រចាំ​ខេត្ត​ឧត្តរ​មានជ័យ ឬ​គេ​​និយម​ហៅ​ថា ក្រុម​​​កងកម្លាំង​ទាហាន​កងពល​លេខ៦ កាល​ពី​ថ្ងៃ​ទី​១៩ មករា បាន​​ឈូស​កម្ទេច​ផល​ដំណាំ ដុត​ផ្ទះ​ពលរដ្ឋ​លើ​ដី​មាន​ជម្លោះ​ជាច្រើន​ខ្នង និង​បាន​ចាប់​ខ្លួន​ពលរដ្ឋ​​ម្នាក់ ឈ្មោះ ឈិន រ៉ន ហើយ​នៅ​ថ្ងៃ​ទី​២០ មករា​ ចាប់​ខ្លួន​​២​នាក់​ទៀត ឈ្មោះ គង់ ម៉ឺន និង​ ឈ្មោះ​ម៉ឺន មាស។

នៅ​ថ្ងៃ​ទី​២៦ មករា កងកម្លាំង ​បាន​ចាប់​ខ្លួន​ពលរដ្ឋ​៣នាក់​បន្ថែម​ទៀត ឈ្មោះ ភាព ភ័ណ្ឌ អាយុ​២០​ឆ្នាំ ឈ្មោះ រឿង ធី អាយុ​២០​ឆ្នាំ និង​ម្នាក់​ទៀត ​មិន​ស្គាល់​ឈ្មោះ តែ​ពលរដ្ឋ​ ​ដឹង​ត្រឹម​ថា ជា​កូន​ប្រុស​របស់​តា​ទ្រី ដែល​ជា​អ្នក​ភូមិ​រស់នៅ​លើ​ដី​មាន​ជម្លោះ​ជាមួយ​គ្នា។ លោក ឡយ លីហួរ ប្រាប់​ថា នៅ​មុន​ពេល​អាជ្ញាធរ​ចាប់​ខ្លួន ពលរដ្ឋ​៧​នាក់​នេះ អាជ្ញាធរ​ធ្លាប់​បាន​ចាប់​ខ្លួន​ពលរដ្ឋ​ពី​មុន​មក​ចំនួន​៦​នាក់​ ដូច្នេះ​សរុប​ពលរដ្ឋ​កំពុង​ជាប់​ឃុំ​នៅ​ពន្ធនាគារ​ខេត្ត​ព្រះវិហារ ក្នុង​ករណី​ដី​ទំនាស់​នេះ មាន​ចំនួន​១៣​នាក់ ខណៈ​ពលរដ្ឋ​ចំនួន​២៥​នាក់​ផ្សេង​ទៀត កំពុង​ជាប់​បណ្ដឹង។

អាស៊ីសេរី​មិន​ទាន់​អាច​ទាក់ទង​ខាង​ភាគី​ក្រុម​ហ៊ុន​ឯកជន​ឈ្មោះ ​មេត្រី​ភាព និង​មេបញ្ជាការ​កង​ពល​លេខ​៦ ដែល​ពលរដ្ឋ​អះអាង​ថា បាន​ចេញ​មុខ​អន្តរាគមន៍​ចាប់​ពលរដ្ឋ​ កន្លង​មក​នោះ​ទេ។ ប៉ុន្តែ ព្រះរាជអាជ្ញា​អម​សាលាដំបូង​ខេត្ត​ព្រះវិហារ លោក ទី សុវិនថាល់ ប្រាប់​អាស៊ី​សេរី​​ថា ការ​ចាប់​ខ្លួន​ពលរដ្ឋ​ទាំង​នោះ ​ដោយសារ ​ជាប់​ពាក់ព័ន្ធ​បទល្មើស​បរិស្ថាន៖ «យល់​ថា គួរ​ចុះ​មក​មើល​ស្ថានភាព​ជាក់ស្ដែង ថា​តើ​ប្រព្រឹត្តិ​បទ​ល្មើស ឬ​មួយ​ក៏​អត់? ទាល់​តែ​ចុះ​មើល​ជាក់ស្ដែង​តែ​ម្ដង គឺ​កាប់​ដុត កាប់។ មិន​មែន​​ត្រឹម​តែ​កាប់​ទេ គឺ​រណា​យន្ត អារ​ ច្រៀក ​ដុត​បំផ្លាញ​ចោល​ហ្មង។ ខ្ញុំ​មិន​ចង់​ឲ្យ​ពួក​គាត់ (ពលរដ្ឋ​ចាប់​ខ្លួន​ទាំង ៧​នាក់) ប្រព្រឹត្តិ​កាន់​តែ​ធ្ងន់ធ្ងរ​ទៅៗ។ អ៊ីចឹង​ អប់រំ​គាត់ ស្រីៗ អត់មាន​ចាប់​ខ្លួន​ទេ។ អត់​មាន​ចាប់​ប្រជាពលរដ្ឋ​ទេ ស្ដាប់​ខ្ញុំ អត់​មាន​ស្ដាប់​ប្រជាពលរដ្ឋ​ទេ គឺ​ចាប់​ជន ដែល​ប្រព្រឹត្តិ​បទ​ល្មើស បំផ្លាញ​ធនធាន​បរិស្ថាន បំផ្លាញ​ហើយ បំផ្លាញ​ទៀត»

ពលរដ្ឋ​បដិសេធ​ចោល ការ​ចោទ​ប្រកាន់​នេះ។ លោក ឡយ លីហួរ រៀបរាប់​ថា ដី​មាន​ជម្លោះ​មាន​ទំហំ​៨ពាន់ ៥រយ ២៥ (៨ ៥២៥) ហិកតារ ស្ថិត​នៅ​​តំបន់​ព្រំ​ប្រទល់ ​ខេត្ត​ព្រះវិហារ ត្រង់​ស្រុក​ជាំ ក្សាន្ត និង​ស្រុក​ត្រពាំង​ប្រាសាទ នៃ​ខេត្ត​ឧត្តរ​មានជ័យ។ លោក រៀបរាប់​ថា ពលរដ្ឋ​ខ្លះ បាន​នាំគ្នា​ចូល​ទៅ​កាប់​រាន​ទន្ទ្រាន​ព្រៃ យក​ដី​រស់នៅ​ និង​ដើម្បី​ដាំដំណាំ បង្ក​បង្កើន ក្នុង​កំឡុង​ឆ្នាំ​២០១៣ ដោយ​គ្មាន​អាជ្ញាធរ​ពាក់ព័ន្ធ​ណា រារាំង​ឡើយ។ ប៉ុន្តែ​ស្រាប់​តែ​ឆ្នាំ​២០១៨ អាជ្ញាធរ​ និង​ក្រុមហ៊ុន​ឯកជន​ឈ្មោះ​មេត្រីភាព​បាន​ចោទ​ថា ដី​ព្រៃ​នោះ ជា​ដី​របស់​ក្រុមហ៊ុន​ឯកជន​។

អ្នក​សម្រប​សម្រួល​សមាគម​ការពារ​សិទ្ធិ​មនុស្ស​ អាដហុក​ ប្រចាំ​ខេត្ត​ព្រះវិហារ លោក ឡោ ចាន់ យល់​ថា ពលរដ្ឋ​នាំគ្នា​ឡើង​មក​ភ្នំពេញ ដោយសារ​ពួកគាត់ អស់​ជំនឿ​នឹង​អាជ្ញាធរ​មូលដ្ឋាន ដូច្នេះ ក្រោយ​ពេល​មន្ត្រី​ខុទ្ទកាល័យ និង​មន្ត្រី​ក្រសួង​ដែនដី ទទួល​ញត្តិ​របស់​ពលរដ្ឋ​ហើយ ត្រូវ​តែ​ចុះ​ទៅ​សិក្សា និង​ដោះស្រាយ​ជូន​ពលរដ្ឋ​ភ្លាមៗ ដើម្បី​​ចៀសវាង​បញ្ហា​កាន់​តែ​ធ្ងន់ធ្ងរ។ សង្គម​ស៊ីវិល​រក​ឃើញ​ថា ករណី​ជម្លោះ​ដីធ្លី​នេះ ក្រុមហ៊ុន​ទទួល​បាន​ការ​ជ្រោមជ្រែង​ ពី​កង​ពល​យោធា​លេខ​៦៖ «កងពលតូច​អន្តរាគមន៍​វរៈ (លេខ) ២៦១​នេះ គឺ​ឋិត​នៅ​ក្នុង​ខេត្ត​ឧត្តរមានជ័យ​ទេ។ ប៉ុន្តែ​ដោយសារ​ទាហាន​មួយ​ចំនួន គាត់​យក​តួនាទី​របស់​ពួក​គាត់ ដែល​ជា​អ្នក​បម្រើ​រាស្ត្រ ហើយ​គាត់​យក​ទៅ​បម្រើ​ការងារ​ឲ្យ​ក្រុមហ៊ុន​​​ឯកជន​ផង។ វា​ទាក់​ទង នឹង​ផល​ប្រយោជន៍ បាន​គាត់​ទៅ​បម្រើ​ការងារ​ហ្នឹង អ៊ីចឹង​ហើយ បាន​គាត់ (ទាហាន​ខ្លះ នៅ​កងពល​​អន្តរាគមន៍​វរៈ ២៦១) កាង​ឲ្យ​ក្រុមហ៊ុន»

សង្គម​ស៊ីវិល​រូប​នេះ ផ្ដល់​យោបល់​ថា ក្នុង​កំឡុង​ពេល​សិក្សា​ដោះស្រាយ​ទំនាស់​ ក្រសួង​ដែនដី គួរ​ឲ្យ​ភាគី​ក្រុមហ៊ុន​ឯកជន ផ្អាក​សកម្មភាព​សិន បញ្ជា​ឲ្យ​កងពល​លេខ​៦ ដែល​ចូល​អន្តរាគមន៍​ជួយ​ក្រុម​ហ៊ុន បញ្ឈប់​ការ​ប្រើ​អំពើ​ហិង្សា និង​អមនុស្សធម៌​ ព្រោះ​ពលរដ្ឋ​កំពុង​ភ័យខ្លាច​ខ្លាំង និង​ត្រូវ​មាន​ការ​​ដោះលែង ពលរដ្ឋ​កំពុង​ជាប់​ពន្ធនាគារ ដើម្បី​ឲ្យ​ក្រុម​គ្រួសារ មាន​អារម្មណ៍​ស្ងប់​ចិត្ត ក្នុង​ការ​ចរចា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

នេះហេីយរូបភាពអភិវឌ្ឍន៍ពិតរបស់គណបក្សប្រជាជនកម្ពុជាយេីង៕

Jan 29, 2019 09:15 PM

គេហទំព័រ​ទាំងមូល