សាលាឧទ្ធរណ៍​បដិសេធ​សំណើ​សុំ​នៅ​ក្រៅ​ឃុំ​របស់​ពលរដ្ឋ​មាន​ជម្លោះ​ដីធ្លី​នៅ​ខេត្ត​ព្រះ​វិហារ

ដោយ ថន ថារ៉ូ
2019-03-29
អ៊ីម៉ែល
មតិ
Share
បោះពុម្ព
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
រូបថត៖ សមាគម អាដហុក (ADHOC)

សាលា​ឧទ្ធរណ៍​បដិសេធ​សំណើ​នៅ​ក្រៅ​ឃុំ​បណ្ដោះ​អាសន្ន​របស់​មេធាវី​ការ​ពារ​ក្ដី​ឱ្យ​ពលរដ្ឋ​ម្នាក់ ​ដែល​កំពុង​ជាប់​ឃុំ​ក្នុង​ពន្ធនាគារ​ ក្នុង​ជម្លោះ​ដីធ្លី​ នៅ​ខេត្ត​ព្រះ​វិហារ។ ការ​សម្រេច​នេះ គឺ​ធ្វើ​ឡើង​នៅ​ក្នុង​សវនាការ​អសាធារណៈ​មួយ ដែល​គ្មាន​វត្តមាន​ជនជាប់ចោទ និង​មេធាវី​ការពារ​ក្ដី។ សង្គម​ស៊ីវិល​ ចាត់​ទុក​ការ​សម្រេច​នេះ មិន​ឈរ​លើ​គោលការណ៍​យុត្តិធម៌ ព្រោះថា​សវនាការ​ត្រូវ​មាន​វត្តមាន​គ្រប់​ភាគី​ពាក់​ព័ន្ធ​ចូល​រួម ​ក្នុង​ពេល​តតាំង​ក្ដី។

មន្ត្រី​អង្កេត​ជាន់​ខ្ពស់​របស់​សមាគម​សិទ្ធិ​មនុស្ស​អាដហុក (Adhoc) ​លោក យី សុខសាន្ត​ ដែល​បាន​តាម​ដាន​ការ​កាត់​សេចក្ដី​នេះ ឱ្យ​ដឹង​ថា សាលាឧទ្ធរណ៍​បាន​ជូន​ដំណឹង​មេធាវី​ នៅ​ថ្ងៃ​ទី​២៦ មីនា ហើយ​បើក​ការ​ជំនុំ​ជម្រះ​មួយ​ថ្ងៃ​បន្ទាប់ ដែល​ជា​ហេតុ​ធ្វើ​ឱ្យ​មេធាវី ​លោក សំ ទិត្យសីហា ខកខាន​មិន​បាន​ចូល​រួម​សវនាការ ខណៈ​មេធាវី​រូប​នេះ​ជាប់​រវល់​នៅអម​កូន​ក្ដី​បី​នាក់​ទៀត​នៅ​ខេត្ត​ព្រះ​វិហារ។ លោក យី សុខសាន្ត បន្ត​ថា សាលាឧទ្ធរណ៍​បដិសេធ​ សំណើ​មេធាវី​ដែល​សុំ​ពន្យារ​ពេល​សវនាការ ក្រោម​ហេតុផល​ថា លិខិត​ដែល​មេធាវី​ផ្ញើ​ជូន​អង្គ​ជំនុំ​ជម្រះ ​តាម​រយៈ​សារ​អេឡិចត្រូនិក​ មិន​មែន​ជា​ច្បាប់​ដើម។

មន្ត្រី​ឃ្លាំ​មើល​ផ្នែក​សិទ្ធិ​មនុស្ស​រូប​នេះ យល់​ថា ​តុលាការ​គួរ​ពិចារណា​ដោះ​លែង​ពលរដ្ឋ​ឱ្យ​មាន​សេរីភាព​ឡើង​វិញ ប្រសិន​បើ​រក​មិន​ឃើញ​ភស្តុតាង​ដាក់​បន្ទុក​នោះ​ទេ ៖ «យើង​គិត​ថា​តម្លៃ​នៃ​សិទ្ធិមនុស្ស នៅ​ពេល​ដែល​យក​មនុស្ស​អត់​មាន​ទោស ហើយ​មិន​មាន​ភស្តុតាង​ត្រឹមត្រូវ​ហើយ ​ចាប់​ឃុំ​ខ្លួន​ដើម្បី​ទុក​ ហើយ​ដើរ​រក​ភស្តុតាង អា​ហ្នឹង​វា​អយុត្តិធម៌​ណាស់ ហើយ​បង្ក​ការ​ឈឺចាប់​ដល់​ជន​រងគ្រោះ​។ ខ្ញុំ​ស្នើ​សុំ​ថា បើ​គ្មាន​ភស្តុតាង​ដាក់​បន្ទុក​ទេ តុលាការ​គួរ​ដោះលែង​ពួក​គាត់​ឱ្យ​មាន​សេរីភាព។ កាល​ណា​ពួក​គាត់​មាន​សេរីភាព ទី​១ ពួកគាត់​បាន​ជួប​ជុំ​គ្រួសារ ហើយ​រកស៊ី​ទទួល​ទាន​ជួយ​គ្រួសារ​គាត់​បាន។ ហើយ​ទី​២ យើង​មិន​ខ្ជះខ្ជាយ​ចំណាយ​ថវិកា​ចិញ្ចឹម​គាត់​នៅ​កន្លែង​ឃុំឃាំង​ផង»

ប្រធាន​ចៅ​ក្រម​ជំនុំ​ជម្រះ​នៃ​សាលា​ឧទ្ធរណ៍ លោក ប្លង់ សំណាង កាល​ពី​ព្រឹក​ថ្ងៃ​ទី២៧ មីនា ​សម្រេច​បន្ត​ឃុំ​ខ្លួន​ពលរដ្ឋ​ម្នាក់​ឈ្មោះ ម៉ឺន មាន វ័យ​២៦​ឆ្នាំ ​ជា​កូនប្រុស​លោក ស៊ុំ ម៉ឺន ដែល​កំពុង​បាត់​ខ្លួន តាម​បណ្ដឹង​របស់​ព្រះ​រាជអាជ្ញា​សាលា​ដំបូង​ខេត្ត​ព្រះ​វិហារ លោក ទី សុវិនថាល់ ក្រោម​ហេតុផល​ថា​រក្សា​ទុក​ជន​ជាប់​ចោទ ​ដើម្បី​បន្ត​ការ​ស៊ើប​អង្កេត។

កាលពី​ថ្ងៃ​ទី២០ មករា លោក ស៊ុំ ម៉ឺន វ័យ​៥៤​ឆ្នាំ និង​កូន​ប្រុស​ឈ្មោះ ម៉ឺន មាន វ័យ​២៦​ឆ្នាំ ត្រូវ​បាន​អាជ្ញាធរ​ចាប់ខ្លួន នៅ​ពេល​ពួកគេ​បើក​គោយន្ត​ដឹក​ឥវ៉ាន់​លក់​ដូរ​សំដៅ​ទៅ​ផ្ទះ ដោយ​ធ្វើដំណើរ​តាម​ផ្លូវ​ឆ្លងកាត់​រនាំង​ក្រុមហ៊ុន​មេត្រី​ភាព។ ក្នុង​ពេល​ចាប់​ខ្លួន​នោះ លោកស្រី ភឹម ម៉ៅ ​ប្រាប់​ថា អាជ្ញាធរ​ដែល​មាន​កម្លាំង​ទាហាន​ចូលរួម​ផង បាន​យក​ស្វៃកាំភ្លើង​វាយ​ធ្វើ​បាប​ប្ដី​និង​កូន​ប្រុស​គាត់។

ប្រធាន​គ្រប់គ្រង​ការិយាល័យ​ស៊ើប​អង្កេត​សិទ្ធិមនុស្ស​នៃ​អង្គការ​លីកាដូ (Licadho) លោក អំ សំអាត យល់​ថា អាជ្ញាធរ​គួរ​ពន្លឿន​វិធានការណ៍​ដោះស្រាយ​បញ្ហា​ដែល​បាន​ដាក់​ចេញ​កន្លង​មក ដើម្បី​បញ្ចប់​ការ​ចាប់​ខ្លួន​ និង​ឃុំ​ខ្លួន​ពលរដ្ឋ​តទៅ​ទៀត ៖ «ខ្ញុំ​គាំទ្រ​នូវ​ប្រសាសន៍​អភិបាល​ខេត្ត​ព្រះ​វិហារ​ទី១ គាត់​សុំ​តុលាការ​បញ្ឈប់​ការ​ចេញ​ដីកា​ចាប់​ប្រជាពលរដ្ឋ​បន្ត​ទៅ​ទៀត ហើយ​ចាត់​វិធានការណ៍​ដោះស្រាយ​បញ្ហា​ដីធ្លី​ហ្នឹង ហើយ​ឈប់​ឱ្យ​មាន​ការ​ចោទ​ប្រកាន់​ហ្នឹង។ ហើយ​យល់​ល្អ​អ្នក​ដែល​ជាប់​ឃុំ​ហ្នឹង គួរ​តែ​មាន​ការ​អនុញ្ញាត​ឱ្យ​នៅ​ក្រៅ​ឃុំ ដើម្បី​រួម​គ្នា​ធ្វើ​ការ​ដោះស្រាយ ដើម្បី​បញ្ចប់​វិបត្តិ​ដីធ្លី​នៅ​ក្នុង​ឃុំ​យាង ស្រុក​ជាំក្សាន្ត​ហ្នឹង​ទៅ»

ក្នុង​វិវាទ​ដីធ្លី​រវាង​ពលរដ្ឋ​ជាង ៣៣០​គ្រួសារ​ជាមួយ​នឹង​ក្រុមហ៊ុន​មេត្រីភាព​របស់​ឧកញ៉ា អាន ម៉ារឌី មាន​ពលរដ្ឋ ១៤​នាក់​ត្រូវ​បាន​អាជ្ញាធរ​ចាប់ និង​ឃុំ​ខ្លួន​បណ្ដោះអាសន្ន​នៅ​ពន្ធនាគារ​ខេត្ត​ព្រះវិហារ ម្នាក់​កំពុង​បាត់​ខ្លួន ហើយ​អ្នក​ភូមិ​ខ្លះ​ទៀត កំពុង​រត់​គេច​ចេញ​ពី​ការ​តាម​ចាប់​របស់​អាជ្ញាធរ។ ក្រៅ​ពី​នេះ​ពលរដ្ឋ​ថា កង​អន្តរាគមន៍​វីរ​យោធា​លេខ​២៦១ ឬ​ហៅ​ថា ក្រុម​​​កងកម្លាំង​ទាហាន​កងពល​លេខ៦ ដែល​ឈរ​ជើង​ការ​ពារ​ដី​ឱ្យ​ក្រុមហ៊ុន បាន​​ឈូស​កម្ទេច​ផល​ដំណាំ និង​ដុត​ផ្ទះ​ពលរដ្ឋ​អស់​ជាច្រើន​ខ្នង។

កាល​ពី​ថ្ងៃ​ទី៦ ខែ​កុម្ភៈ អភិបាល​ខេត្ត​ព្រះវិហារ លោក អ៊ុន ចាន់ដា បាន​សម្រេច​ដាក់​ចេញ​វិធានការ​៥​ចំណុច ដើម្បី​ដោះស្រាយ​វិវាទ​ដី​ធ្លី​នេះ​។ វិធានការ​ទាំង​នោះ​រួមមាន បង្កើត​ក្រុមការងារ វាស់វែង​និង​ដោះស្រាយ​ផល​ប៉ះពាល់​ជាក់ស្ដែង ជំរុញ​ឱ្យ​មានការ​ចុះបញ្ជី​ដី​ក្រុមហ៊ុន​មេត្រីភាព ស្នើ​ឱ្យ​ក្រុមហ៊ុន កំណត់​ព្រំ​ដី ឱ្យ​បាន​ច្បាស់លាស់ និង​ត្រូវ​មាន​កម្លាំង​ការពារ​សន្តិសុខ​របស់​ខ្លួន។ ស្នើ​ឱ្យ​ពលរដ្ឋ ដែល​បាន​អាស្រ័យ​ផល​ហើយ ត្រូវ​រក្សា​ភាព​ស្ងប់ស្ងាត់ និង​បញ្ឈប់​ការ​កាប់​ទន្ទ្រាន​លើ​ដី​មាន​ជម្លោះ​បន្ត​ទៀត ត្រូវ​រង់ចាំ​អាជ្ញាធរ​ពាក់ព័ន្ធ​សម្របសម្រួល និង​ស្នើ​ឱ្យ​តុលាការ​ខេត្ត​នេះ បញ្ឈប់​ការ​ចេញ​ដីកា​កោះហៅ ឬ​ចាប់ខ្លួន​ពលរដ្ឋ​បន្ត​ទៀត។

ក្រុម​អង្គការ​សង្គម​ស៊ីវិល​សង្កេត​ឃើញ​ថា មាន​ភាព​យឺតយ៉ាវ​ក្នុង​ដោះស្រាយ​បញ្ចប់​ជម្លោះ​ឱ្យ​ប្រជា​ពលរដ្ឋ ក្រោយ​ពី​អាជ្ញាធរ​ដាក់​ចេញ​វិធាន​ការណ៍​ដោះស្រាយ​ជម្លោះ​ដីធ្លី ជិត​២​ខែ​មក​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល