តំណាងប្រជាពលរដ្ឋជាង១រយគ្រួសារ (១១៨) នៅតំបន់តាលះ ឃុំរាម ស្រុកព្រៃនប់ បានប្រមូលផ្គុំគ្នាលើកបដាតវ៉ា នៅពីមុខសាលាខេត្តព្រះសីហនុ ស្នើសុំអន្តរាគមន៍លើទំនាស់ដីធ្លី ដែលពួកគាត់អះអាងថា ត្រូវក្រុមហ៊ុន ជៀក ស៊ីន គំរាមរំលោភយក។
វិវាទនេះមន្ត្រីសាលាខេត្តព្រះសីហនុ បានជួបតំណាងពលរដ្ឋ និងស្នើឲ្យរៀបចំដាក់ពាក្យបណ្ដឹងមកកាន់សាលាខេត្ត ជួយដោះស្រាយនៅថ្ងៃចន្ទសប្ដាហ៍ខាងមុខ។
ប្រជាពលរដ្ឋជិត១រយនាក់ តំណាងឲ្យប្រជាពលរដ្ឋមានទំនាស់ដីធ្លីចំនួន ១រយ ១៨គ្រួសារ (១១៨) មានលំនៅឋាន ក្នុងឃុំរាម ស្រុកព្រៃនប់ ដែលឈរលើកបដាតវ៉ាពីមុខសាលាខេត្តព្រះសីហនុ ល្ងាចថ្ងៃសុក្រ ទី២២ ខែឧសភា បានចោទលោក ជៀក គឹមឡុង ប្រធានក្រុមប្រឹក្សាភិបាលក្រុមហ៊ុន ជៀក ស៊ីន អ៊ិនវេសម៉ិន ថាបានមកគំរាមឲ្យពួកគាត់រុះរើផ្ទះ និងដីកសិកម្មធ្លាប់រស់នៅជាយូរឆ្នាំ។
ក្នុងបដាមួយចំនួន របស់ក្រុមប្រជាពលរដ្ឋបានចោទ លោក ឈិត សុខុន អភិបាលខេត្តព្រះសីហនុ លោក ស្រ៊ុន ស្រ៊ន់ អភិបាលរង និងលោក ទិត្យ វុទ្ធី អភិបាលស្រុកព្រៃនប់ ថាបានឃុបឃិតជាមួយ ក្រុមហ៊ុន លោក ជៀក គឹមឡុង រំលោភយកដីពលរដ្ឋដែលពលរដ្ឋខ្លះ បានមកតាំងទីលំនៅលើដីនេះតាំងពីឆ្នាំ១៩៩១មកម្ល៉េះ។
ផ្ដើមពីបញ្ហានេះ ក្រុមប្រជាពលរដ្ឋឃុំរាម ក៏បានសំណូមពរដល់លោកនាយករដ្ឋមន្ត្រី និងព្រះមហាក្សត្រ ព្រះករុណា សម្ដេចព្រះនរោត្តម សីហមុនី ជួយអន្តរាគមន៍ និងពិនិត្យ សកម្មភាពឃុបឃិត រំលោភយកដីពលរដ្ឋ នៅឃុំរាមដោយអនុគ្រោះ។ ជាងនេះ ក្រុមប្រជាពលរដ្ឋក៏បានចោទថាវិវាទដីធ្លីនៅឃុំរាម ក៏មានជាប់ពាក់ព័ន្ធភាពអសកម្ម របស់មន្ត្រីស្ថាប័នតុលាការសាលាដំបូង ខេត្តព្រះសីហនុដែរ៖ «ដីតំបន់នេះ ពីមុនមានទំនាស់ជាមួយ ក្រុមហ៊ុនលោក ខូវ ផល្លាបុត្រ ប៉ុន្តែបន្ទាប់ពីមានការចរចារួចមក ក្រុមហ៊ុននេះបានពុះបែងចែកជូនពលរដ្ឋបានរស់នៅសុខសាន្តជាយូរឆ្នាំមកហើយ។ ប៉ុន្តែឥឡូវនេះបែរជាមានក្រុមហ៊ុន ជៀក គឹមឡុង ផ្សេង បានចូលមកបំពានរំលោភយកដីប្រជាពលរដ្ឋជាង ១រយគ្រួសារនៅឃុំរាមបន្តទៀត ក្នុងរយៈពេល២ខែចុងក្រោយនេះ។ សូមសម្ដេចហ៊ុន សែន ជួយព្រោះកូនចៅបានគាំទ្រការដឹកនាំរបស់សម្ដេច២០ឆ្នាំមកហើយៗ បានបោះឆ្នោតជូនគ្រប់អាណត្តិបោះឆ្នោតកន្លងមក។ ក្រុមហ៊ុន ជៀក គឹមឡុង បានគំរាពលរដ្ឋថា បើហ៊ានចេញមុខតវ៉ានឹងត្រូវជាប់ខ្នោះ ឬជាប់គុកជាដើម»។
បញ្ហានេះដែរ លោក សុខ ចាន់តារា ដែលអះអាងជាតំណាងឲ្យពលរដ្ឋចំនួន ១១៨គ្រួសារ ថ្លែងប្រាប់វិទ្យុអាស៊ីសេរីថា វិវាទដីធ្លី រវាងប្រជាពលរដ្ឋឃុំរាម ជាមួយក្រុមហ៊ុនរបស់លោក ជៀក គឹមឡុង ទើបកើតមានធ្ងន់ធ្ងរ ក្នុងរយៈពេល ២ខែចុងក្រោយនេះទេ។ ហើយថា ជម្លោះនេះបានរីករាលដាលរហូតមានការប្រមូលផ្ដុំតវ៉ានេះ ដោយសារតែក្នុងសប្ដាហ៍នេះ ក្រុមហ៊ុនលោក ជៀក គឹមឡុង បានដើរបិទសេចក្ដីប្រកាស តម្រូវឲ្យប្រជាពលរដ្ឋរុះរើផ្ទះ និងត្រូវចាកចេញពីលើដីកសិកម្ម ដោយគំរាមថា បើពលរដ្ឋណាម្នាក់រឹងទទឹងមិនស្ដាប់តាមការណែនាំ របស់ក្រុមហ៊ុនទេ នឹងត្រូវចាប់ដាក់ខ្នោះ ឬចាប់ដាក់គុកជាដើម។
លោកបានសំណូមដល់ថ្នាក់ដឹកនាំ ខេត្តព្រះសីហនុ ពិសេសលោកនាយករដ្ឋមន្ត្រី ជួយអន្តរាគមន៍ លើវិវាទដីធ្លីនេះ ដើម្បីផ្ដល់យុត្តិធម៌ជូនពលរដ្ឋឃុំរាមរស់នៅសុខសាន្តឡើងវិញ៖ «ខ្ញុំសូមបួងសួងតាមវិទ្យុអាស៊ីសេរីស្នើឲ្យសម្ដេច ហ៊ុន សែន ជួយដល់កូនចៅ ដែលត្រូវក្រុមហ៊ុន ជៀក ស៊ីន របស់លោក ជៀក គឹមឡុង រំលោភយកដីផ្ទះ និងដីកសិកម្ម នៅឃុំរាម ប៉ះពាល់ពលរដ្ឋចំនួន ១១៨គ្រួសារ ដែលពលរដ្ឋធ្លាប់កាន់កាប់តាំងពីឆ្នាំ១៩៩៣មកនោះ ត្រូវបានទៅក្រុមហ៊ុន លោក ជៀក គឹមឡុង ឬបានមកប្រជាពលរដ្ឋ។ ព្រោះក្រុមហ៊ុន ជៀក គឹមឡុង ទើបចូលមកបង្ហាញខ្លួននៅឆ្នាំ២០១៥នេះទេ»។
វិទ្យុអាស៊ីសេរី មិនទាន់អាចទាក់ទង លោក ជៀក គឹមឡុង ប្រធានក្រុមប្រឹក្សាភិបាលក្រុមហ៊ុន ជៀក ស៊ីន អ៊ិនវេសម៉ិន ដើម្បីឆ្លើយបំភ្លឺជុំវិញវិវាទដីធ្លី ជាមួយពលរដ្ឋជាង ១គ្រួសារ នៅឃុំរាមបាននៅឡើយទេ នៅល្ងាចថ្ងៃសុក្រ ទី២២ ខែឧសភា។
ទាក់ទិនបញ្ហានេះ លោក ប៊ួន ណារិទ្ធ មន្ត្រីសម្របសម្រួលអង្គការលីកាដូ ប្រចាំខេត្តព្រះសីហនុ ដែលបានពិនិត្យតាមដានវិវាទដីធ្លីនេះដែរ ក៏បានសំណូមពរដល់ថ្នាក់ដឹកនាំខេត្តព្រះសីហនុ ត្រូវពិនិត្យដោះស្រាយជម្លោះដីធ្លី រវាងពលរដ្ឋឃុំរាម និងក្រុមហ៊ុន លោក ជៀក គឹមឡុង ដោយការទទួលខុសត្រូវខ្ពស់ និងមានឯករាជ្យ។
បន្ថែមលើនេះ លោកស្នើដល់ប្រជាពលរដ្ឋរងគ្រោះនៅឃុំរាម ដែលមានទំនាស់ដីធ្លី សូមមកដាក់ពាក្យបណ្ដឹង នៅការិយាល័យអង្គការលីកាដូ ប្រចាំខេត្តព្រះសីហនុ ដើម្បីជួយពិនិត្យអង្កេត និងចូលរួមរកដំណោះស្រាយ៖ «ពាក់ព័ន្ធដីជម្រកព្រៃឈើ អាជ្ញាធរមុនកាត់ឆ្វៀលដីទៅឲ្យក្រុមហ៊ុនណាមួយ ត្រូវពិនិត្យស្ថានភាពដីនោះឲ្យបានត្រឹមត្រូវ ដើម្បីឲ្យប្រាកដថា ដីនោះមានពាក់ព័ន្ធការកាន់កាប់ របស់ប្រជាពលរដ្ឋដោយសុចរិតស្របតាមលក្ខខណ្ឌភោគៈ៥ដែរឬទេ ? ប៉ុន្តែបើពាក់ព័ន្ធពលរដ្ឋអាជ្ញាធរត្រូវកាត់ឆ្វៀលដីនោះជូនពលរដ្ឋដូចក្រុមហ៊ុនដែរ។ ប៉ុន្តែបើអាជ្ញាធរមិនកាត់ឆ្វៀលឲ្យពលរដ្ឋ តែបែរជាកាត់ឲ្យក្រុមហ៊ុន គឺប្រជាពលរដ្ឋនៅនឹងតែតវ៉ា ហើយទំនាស់ដីធ្លីនឹងបន្តកើតមានជាបន្តបន្ទាប់ទៀត»។
ការប្រមូលផ្ដុំតវ៉ា របស់ប្រជាពលរដ្ឋរងគ្រោះដីធ្លី នៅពីមុខសាលាខេត្តព្រះសីហនុ នាល្ងាចថ្ងៃទី២២ ខែឧសភា ក៏ត្រូវប្រកាសរំសាយ ដោយគ្មានអំពើហិង្សាទេ បន្ទាប់ពីមន្ត្រីសាលាខេត្តព្រះសីហនុ បានអនុញ្ញាតឲ្យតំណាងពលរដ្ឋឃុំរាមចូលជួបរួចមក។ នៅក្នុងជំនួបនោះ មន្ត្រីតំណាងសាលាខេត្តព្រះសីហនុ ក៏បានតម្រូវឲ្យប្រជាពលរដ្ឋដាក់ពាក្យបណ្ដឹង មកកាន់សាលាខេត្តជួយដោះស្រាយ នៅថ្ងៃចន្ទសប្ដាហ៍ខាងមុខ។
ការប្រមូលផ្ដុំ របស់ប្រជាពលរដ្ឋទាំងនេះក៏ឃើញមានកងកម្លាំងកងរាជអាវុធហត្ថ និងកម្លាំងនគរបាលជាច្រើននាក់ ត្រូវបានដាក់ពង្រាយ ដើម្បីការពារខ្លាចមានអំពើហិង្សាកើតឡើង និងជួយសម្រួលចរាចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។