ពលរដ្ឋជាង ១រយនាក់ រស់នៅភូមិចំនួន ៤ភូមិ នៃឃុំរម្យទម ស្រុករវៀង ខេត្តព្រះវិហារ បានឃាត់គ្រឿងចក្រ ក្រុមហ៊ុនសម្បទានសេដ្ឋកិច្ចឆៃណា គ្រុប (CHINA Group) ដែលពួកគេចោទ ថា ក្រុមហ៊ុននេះបានឈូស ឆាយផ្លូវក្រវាត់ព្រំ ដីប៉ះពាល់ដីស្រែចម្ការ និងព្រៃជំនឿរបស់សហគមន៍ចំនួន ៤ភូមិ។
ក្រុមប្រជាពលរដ្ឋដែលមកពីភូមិត្រពាំងទន្ទឹម ភូមិទួលរវៀង ភូមិអូរទ្រឡូក និងភូមិរំដេង នៃឃុំរម្យទម របស់ស្រុករវៀង នៅរសៀលថ្ងៃទី១៦ ខែ ធ្នូ បានឃាត់គ្រឿងចក្ររបស់ក្រុមហ៊ុនចំនួន ២ គ្រឿង ក្នុងបំណងទាមទារឱ្យអាជ្ញាធរមូលដ្ឋាន និងតំណាងក្រុមហ៊ុនឆៃណា គ្រុប បញ្ឈប់សកម្មភាពឈូសឆាយធ្វើផ្លូវក្រវាត់ព្រំដីជាបន្ទាន់។ អ្នកភូមិថា សកម្មភាពឈូសឆាយនេះ បង្កផលប៉ះពាល់ដីស្រែចម្ការ ព្រៃជំនឿ ដីត្រៀម បម្រុងរបស់សហគមន៍ និងកន្លែងរករ៉ែមាសលក្ខណៈគ្រួសារ របស់ពលរដ្ឋជាច្រើនជំនាន់មកហើយ។
តំណាងពលរដ្ឋរស់នៅភូមិរំដេង លោក ទុយ ឆេង ឲ្យដឹងថា សកម្មភាពឈូសឆាយនោះក្រុមហ៊ុន និងអាជ្ញាធរមិនបានពិភាក្សាជាមួយតំណាងសហគមន៍នោះទេ។ លោកថា ផ្លូវក្រវាត់ព្រំ ដីដែលក្រុមហ៊ុនឈូស ឆាយមានផ្នែកខ្លះប៉ះពាល់ដីស្រែអ្នកភូមិជាច្រើនគ្រួសារ និងមានផ្នែកខ្លះទៀត ប៉ះពាល់ដីព្រៃអារក្ស ព្រៃជំនឿ និង ព្រៃស្រោង ដែលជាតំបន់ជម្រកសត្វព្រៃកម្ររស់នៅទៀតផង៖ «បើគិតជាផលប៉ះពាល់ប្រយោជន៍របស់ពលរដ្ឋ ដំណាំដាំដុះ ដីចម្ការស្រែ ស្មានតិចបំផុតគឺ ៣រយហិកតារ។ បាត់ទាំងដីចម្ការ បាត់ទាំងព្រៃធម្មជាតិ បាត់ទាំងកន្លែងជម្រកសត្វសព្វមុខដែលរស់នៅក្នុងព្រៃហ្នឹងទាំងអស់»។
បុរសដដែលបន្ថែមថា វត្តមានក្រុមហ៊ុនចិននៅតំបន់នោះមិនដឹងថា អភិវឌ្ឍន៍អ្វីឲ្យពិតប្រាកដនោះទេ ព្រោះកន្លងទៅ អ្នកភូមិប្រទះឃើញ ក្រុមហ៊ុននេះបានធ្វើអាជីវកម្មឈើទ្រង់ទ្រាយធំតាំងពីឆ្នាំ២០១៤ រហូតមកទល់ពេលនេះ ពួកគាត់ភ្ញាក់ផ្អើលនៅគ្រាដែលក្រុមហ៊ុនឈូសឆាយកំណត់ព្រំដីវិយោគ មិនបានពិភាក្សាជាមួយសហគមន៍មូលដ្ឋាន៖ «ព្រៃចែងមែង និងព្រៃត្រពាំងកាប់ចោរ។ ព្រៃនេះផ្ដល់ប្រយោជន៍ច្រើន ស្វាយចន្ទី ដំណាំសព្វមុខ និង ស្រូវ ហើយសំខាន់បំផុតគឺជីកមាសជា របរចិញ្ចឹមជីវិតប្រចាំថ្ងៃ។ កេរដំណែលពីដូនតាគាត់មក គឺទម្លាប់អ៊ីចឹង»។
អភិបាលស្រុករវៀង លោក ហោ ប៊ុនហ៊ួ បដិសេធមិនផ្ដល់បទសម្ភាសន៍ដល់អាស៊ីសេរីនៅថ្ងៃទី១៦ ខែធ្នូ។
ចំណែកមេឃុំ រម្យទម លោក សោម មុត ប្រាប់អាស៊ីសេរីថា អាជ្ញាធរឃុំនៅមិនទាន់ទទួលព័ត៌មានករណីនេះនៅឡើយទេ ព្រោះក្រុមពលរដ្ឋមិនបានជូនដំណឹងប្រាប់អាជ្ញាធរមូលដ្ឋាន។ រីឯសកម្មភាពឈូសឆាយផ្លូវកំណត់ព្រំដីវិនិយោគរបស់ក្រុមហ៊ុនក៏អាជ្ញាធរឃុំ មិនបានដឹងដែរ។ តែយ៉ាងណាលោកថា នឹងដោះស្រាយបញ្ហាជូនពលរដ្ឋភ្លាមៗ បើរកឃើញថា ក្រុមហ៊ុននេះ អនុវត្តខុសគោលការណ៍វិនិយោគ៖ «អត់បានប្ដឹងមកខ្ញុំផង បើប្រាប់ខ្ញុំ គឺខ្ញុំនឹងចាត់វិធានការអត់ឲ្យកើតមានអ៊ីចឹងទេ»។
មន្ត្រីសម្របសម្រួលសមាគមអាដហុក (Adhoc) ខេត្តព្រះវិហារ លោក ឡោ ចាន់ មានប្រសាសន៍ថា នៅពេលដែលពលរដ្ឋនាំគ្នាតវ៉ា ជំទាស់សកម្មភាពឈូសឆាយនោះ គឺក្រុមហ៊ុនត្រូវតែផ្អាកជាបន្ទាន់ និងរង់ចាំការដោះស្រាយសិន ដោយផ្អែកតាមបទបញ្ជា ០០១ របស់របបក្រុងភ្នំពេញ។ លោកថា អាជ្ញាធរជាតិគួរតែចុះស៊ើបអង្កេត ពីភាពមិនប្រក្រតីរបស់ក្រុមហ៊ុនសម្បទានសេដ្ឋកិច្ចឆៃណា គ្រុបឡើងវិញ ខណៈដែលក្រុមហ៊ុននេះ រងការចោទថា មិនបានគោរព កិច្ចសន្យាវិនិយោគ រំលោភដីស្រែចម្ការអ្នកស្រុក និងមិនបានកាត់ឆ្វៀលផលប៉ះពាល់៖ «យើងឃើញកន្លែងខ្លះ ក្រុមហ៊ុនអត់បានអនុវត្តរូបមន្តស្បែកខ្លា នៅពេលគាត់ឈូសចេះតែឈូស នៅពេលពលរដ្ឋតវ៉ាស្ងាត់បណ្ដោះអាសន្ន ពេលពលរដ្ឋឈប់ គឺក្រុមហ៊ុនឈូសទៀត។ អ៊ីចឹងហើយយើងឃើញថា ក្រុមហ៊ុនអត់មានអនុវត្តរូបមន្តស្បែកខ្លាគោលការណ៍រដ្ឋាភិបាលបណ្ដាលឲ្យមានបញ្ហារឹតតែខ្លាំង»។
អាស៊ីសេរីនៅមិនទាន់រកប្រភពទាក់ទងតំណាងក្រុមហ៊ុនចិន ឆៃណា គ្រុប ដើម្បីសុំការបញ្ជាក់ជុំវិញការតវ៉ារបស់ក្រុមពលរដ្ឋបាននៅឡើយទេនៅថ្ងៃទី១៦ ធ្នូ។
ក្រុមប្រជាសហគមន៍អះអាងថា បើអាជ្ញាធរជាតិមិនប្រញាប់ ដោះស្រាយក្តីកង្វល់របស់ពលរដ្ឋនោះទេ សកម្មភាពរបស់ក្រុមហ៊ុននេះនឹងធ្វើឲ្យប៉ះពាល់កាន់តែធ្ងន់ធ្ងរ ដល់ធនធានធម្មជាតិ និងតំបន់គោរពបូជាតាមជំនឿរបស់ពួកគាត់ ដូចជា ព្រៃស្រោង ព្រៃជំនឿ ជម្រកសត្វព្រៃ និង កន្លែងរុករករ៉ែមាសលក្ខណៈសហគមន៍ជនជាតិដើមភាគតិចតាំងពីដូចតាមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។