សកម្មភាពឈូសឆាយដីព្រៃរបស់រដ្ឋនៅចំណុចឃុំស្វាយស ស្រុកក្រគរ ខេត្តពោធិ៍សាត់ នៅតែបន្តកើតមានដោយគ្មានការទប់ស្កាត់។ តំណាងពលរដ្ឋនាំគ្នាផ្ដិតមេដៃប្ដឹងមេភូមិ និងអ្នកពាក់ព័ន្ធជាច្រើននាក់ទៀតទៅតុលាការ ដោយចោទជនទាំងនោះថា បានបំផ្លាញដីព្រៃរបស់រដ្ឋ ដើម្បីផ្ដន្ទាទោសនិងស្នើឲ្យដីព្រៃនោះសម្រាប់ប្រជាពលរដ្ឋប្រើប្រាស់ឡើងវិញ។
តំណាងពលរដ្ឋនៅឃុំឈើតុំ ស្រុកក្រគរ ខេត្តពោធិ៍សាត់ ប្ដឹងមេភូមិក្បាលទាហាន អនុប្រធានភូមិអន្សាចំបក់ ជំនួយការ និងប្រជាការពារភូមិនេះទៅតុលាការទាក់ទងរឿងកាប់រុករានដីព្រៃរបស់រដ្ឋទំហំជាង ៤០ហិកតារនៅចំណុចភ្នំតាកុច បឹងកណ្ដាលទួល និងច្រាបផ្ចឹក ឋិតនៅក្នុងឃុំស្វាយស។
តំណាងពលរដ្ឋម្នាក់ក្នុងចំណោមតំណាង ៥នាក់ ដែលបានដាក់ពាក្យបណ្ដឹងទៅតុលាការកាលពីថ្ងៃទី១៤ ខែកក្កដា ឆ្នាំ២០១៥ គឺលោក ម៉េង ប៊ុនរឿន ឲ្យដឹងនៅថ្ងៃទី១៧ ខែកក្កដា ថា ក្រុមពលរដ្ឋមានភស្តុតាងជារូបភាពបង្ហាញពីសកម្មភាពឈូសឆាយដីព្រៃរបស់រដ្ឋ និងមានស្នាមមេដៃអ្នកភូមិក្បាលទាហាន និងភូមិបំណក់ នៃឃុំឈើតុំ ចំនួន ២៣០នាក់ គាំទ្រលើពាក្យបណ្ដឹងនេះដែរ៖ «ពួកខ្ញុំមានភស្តុតាងអីច្បាស់លាស់ ព្រោះឃើញគេយកស្រូវទៅព្រោះលើដីនោះ យកដំឡូងទៅដាំ ហើយពួកខ្ញុំបញ្ជាក់ច្បាស់ថា ដីទាំងនេះជារបស់អ្នកដែលមានឈ្មោះទាំងប៉ុន្មានហ្នឹងឯង»។
នៅក្នុងពាក្យបណ្ដឹងរបស់ពលរដ្ឋដាក់ចូលសាលាដំបូងខេត្តពោធិ៍សាត់ បានចោទមនុស្ស ៤នាក់ ថាបានបើកដៃឲ្យមានសកម្មភាពរុករានដីព្រៃ គឺទី១ ឈ្មោះ នៅ វង្ស ជាអនុប្រធានភូមិអន្សាចំបក់ ទី២ លោក គល់ សុគុណ ជាមេភូមិក្បាលទាហាន ទី៣ ឈ្មោះ សេង ហៀង និងទី៤ ឈ្មោះ ញ៉ាំង ញិន ជាជំនួយការភូមិ និងជាប្រជាការពារភូមិអន្សាចំបក់។
ប្រតិកម្មតបទៅនឹងការចោទប្រកាន់នេះ មេភូមិក្បាលទាហាន លោក គល់ សុគុណ ថ្លែងថា រូបលោកកំពុងត្រៀមពាក្យបណ្ដឹងមួយដែរ ដើម្បីដាក់ជូនអាជ្ញាធរឃុំ ឬស្រុកដែលជាខ្សែបណ្ដោយរបស់លោក។ លោកថា កម្មវត្ថុនៃបណ្ដឹងនេះ គឺចង់ឲ្យអ្នកដែលចោទប្រកាន់រូបលោកបង្ហាញពីភស្តុតាង ឬសាក្សីណាដែលចង្អុលបង្ហាញថា រូបលោកមានជាប់ពាក់ព័ន្ធរឿងលក់ដី ឬរុករានដីព្រៃនេះ៖ «បើខ្ញុំប្ដឹងទៅខ្ញុំត្រូវប្ដឹងតាមខ្សែបណ្ដោយរបស់ខ្ញុំគឺតាមឃុំ ស្រុក ខេត្ដ។ បើគេប្ដឹងចូលតុលាការមុនខ្ញុំមិនទាន់សន្និដ្ឋានថា ប្ដឹងចូលតុលាការដែរទេ ព្រោះចាំវែកញែករកឲ្យឃើញថា ប្រជាពលរដ្ឋមានអំណះអំណាងសិន»។
លោក គល់ សុគុណ ប្រកែកថា លោកមិនហ៊ានធានាលើភាពស្អាតស្អំរបស់បុគ្គលផ្សេងទៀតនៅក្នុងបណ្ដឹងចោទប្រកាន់របស់ពលរដ្ឋនោះទេ ប៉ុន្តែចំពោះរូបលោកមិនបានជាប់ពាក់ព័ន្ធអ្វីឡើយ។ លោកថែមទាំងរិះគន់ក្រុមតំណាងពលរដ្ឋថា បណ្ដឹងប្រឆាំងនឹងរូបលោក គឺធ្វើឡើងក្រោមហេតុផលនយោបាយ។
ត្រង់ចំណុចនេះតំណាងពលរដ្ឋបញ្ជាក់ថា ពួកគាត់មិនមែនជាសកម្មជនគណបក្សនយោបាយរបស់បក្សណាមួយឡើយ ហើយការប្ដឹងនេះគឺចង់ឲ្យតុលាការផ្ដន្ទាទោសចំពោះបុគ្គលរំលោភបំពានលើដីព្រៃរបស់រដ្ឋ និងចង់រក្សាដីព្រៃនោះទុកឲ្យអ្នកភូមិចំនួន ៤ភូមិចូលទៅមើលគោក្របី និងអាស្រ័យអនុផលព្រៃឈើនៅក្នុងព្រៃនោះបានឡើងវិញ។
តំណាងពលរដ្ឋរំលឹកថា កាលពីឆ្នាំ២០១១ មានអ្នកភូមិក្បាលទាហាន ជាង ៣០០នាក់ នាំគ្នាតវ៉ាប្រឆាំងនឹងក្រុមហ៊ុនចិន ភាពីម៉ិច ដើម្បីសុំទុកដីនៅតំបន់នោះអាស្រ័យផល។ តាំងពីពេលនោះមកក្រុមហ៊ុនលែងបោះទីតាំងដាំដំឡូងនៅទីនោះ ប៉ុន្តែមកដល់ឆ្នាំ២០១៥ ស្រាប់តែអាជ្ញាធរមូលដ្ឋាន នាំគ្នាពុះច្រៀកដីនោះជាឡូត៍ៗចែកបក្សពួក និងលក់ឲ្យអ្នកមានលុយឈូសឆាយយ៉ាងអនាធិបតេយ្យ។
ចំណែកមេភូមិអន្សាចំបក់ លោក ខ្លឹម ពៅ បានចេញមុខបញ្ជាក់ថា ផ្ទៃដីព្រៃនៅចំណុចច្រាបផ្ចឹក និងជើងភ្នំតាកុចមានទំហំជិត ២០ហិកតារ គឺឋិតនៅក្នុងទឹកដីរដ្ឋបាលភូមិលោកគ្រប់គ្រង ដូច្នេះលោកបានបែងចែកដីនោះឲ្យទៅពលរដ្ឋចំនួន ១៧៨គ្រួសារ ដើម្បីឈូសឆាយបង្កបង្កើនផលម្នាក់បន្តិច។ ចំណែកក្រុមពលរដ្ឋដែលប្ដឹងទាមទារទុកដីព្រៃនេះ មិនមែនជាអ្នកស្រុកភូមិរបស់លោកឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។