មន្ត្រីអង្គការសិទ្ធិមនុស្សបានចាត់ទុកសកម្មភាពរារាំងរបស់អាជ្ញាធរ និងកម្លាំងសមត្ថកិច្ចមិនឲ្យពលរដ្ឋមានបញ្ហាពិតប្រាកដចូលទៅស្ដាប់ ឬបង្ហាញពីទុក្ខកង្វល់របស់ខ្លួននៅក្នុងអង្គវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនៅពេលនេះ គឺជាការបំបិទសិទ្ធិបញ្ចេញមតិ ហើយអាជ្ញាធរមិនហ៊ានយកការពិតមកដោះស្រាយ។
ការប៉ះទង្គិចគ្នានេះ បានកើតឡើងចំពេលដែលប្រធានក្រុមប្រឹក្សាខេត្ត លោក ឆាយ សារ៉េត ជួបពិគ្រោះយោបល់ជាមួយនឹងមន្ត្រីក្រុមប្រឹក្សាស្រុក និងឃុំ ព្រមទាំងមេភូមិជាច្រើននាក់ នៅក្នុងទីធ្លាវត្តអារាមមួយក្បែរសាលាស្រុកវាលវែង ខេត្តពោធិ៍សាត់។ វេទិកានេះមិនត្រូវបានអនុញ្ញាតឲ្យអង្គការក្រៅរដ្ឋាភិបាល អ្នកសារព័ត៌មានអន្តរជាតិ និងប្រជាពលរដ្ឋដែលមានទំនាស់ដីធ្លី ចូលរួមស្ដាប់និងពិគ្រោះយោបល់ឡើយ។
តំណាងប្រជាពលរដ្ឋម្នាក់មកពីឃុំថ្មដា អ្នកស្រី គុយ ស្រីម៉ៅ មានប្រសាសន៍ថា អធិការរងស្រុកវាលវែង លោក សូ សែម បានច្រានអ្នកស្រីទាំងកម្រោលបណ្ដាលឲ្យថ្លោះកជើងខាងឆ្វេង នៅពេលដែលអ្នកស្រីកំពុងតែឈរតវ៉ា និងចង់ចូលទៅជួបគណៈអធិបតីនៃវេទិកា។ អ្នកស្រីបន្តថា អាជ្ញាធរនិងកម្លាំងសមត្ថកិច្ចមិនត្រូវហាមឃាត់ក្រុមប្រជាពលរដ្ឋមិនឲ្យចូលទៅស្ដាប់ ឬបង្ហាញពីទុក្ខកង្វល់របស់ខ្លួនឡើយ ពីព្រោះថា ពួកគាត់ខំធ្វើដំណើរចម្ងាយរាប់រយគីឡូដី ដើម្បីមកជួបអាជ្ញាធរជួយដោះស្រាយ។
អ្នកស្រី គុយ ស្រីម៉ៅ៖ «សូមរដ្ឋាភិបាលជួយដោះស្រាយភូមិសង្គមថ្មីនៅស្រុកថ្មដា ស្រុកវាលវែង ខេត្តពោធិ៍សាត់ ផង។ អាប៉ូលិសឆ្កួតអស់ហ្នឹងវារុញឡើងថ្លោះកជើង ប៉ូលិសពុករលួយ ខ្ញុំមកនេះចង់ទាមទារយកយុត្តិធម៌របស់បងប្អូនប្រជាពលរដ្ឋឃុំថ្មដាវិញ»។
ក្រុមប្រជាពលរដ្ឋដែលប្រដាប់ដោយបដាពាក្យស្លោក និងឧបករណ៍បំពងសំឡេង បានស្រែកព្រមៗគ្នាឲ្យក្រុមហ៊ុនប្រគល់ដីជូនប្រជាពលរដ្ឋវិញដោយគ្មានលក្ខខណ្ឌ និងបានស្រែកចំអកឲ្យរាជរដ្ឋាភិបាលថា មានសិទ្ធិអំណាចតូចជាងក្រុមហ៊ុន ទើបដំណោះស្រាយដីធ្លីរបស់ពួកគាត់នៅតែបន្តអូសបន្លាយរហូតមកដល់ពេលបច្ចុប្បន្ន។
ឆ្លើយតបនឹងបញ្ហានេះ នាយករដ្ឋបាលសាលាស្រុកវាលវែង លោក អ៊ុំ ស៊ីម មានប្រសាសន៍បញ្ជាក់ថា ដីសម្បទានសេដ្ឋកិច្ចរបស់ក្រុមហ៊ុន អឹម.ឌី.អេស បានធ្វើឲ្យប៉ះពាល់ដល់ដីប្រជាពលរដ្ឋចំនួន ៣ឃុំ គឺឃុំអូរសោម អន្លង់រាប និងឃុំថ្មដា ក៏ប៉ុន្តែរហូតមកដល់បច្ចុប្បន្ន ក្រុមហ៊ុនបានធ្វើការដោះស្រាយជូនប្រជាពលរដ្ឋបានជិត ៩០ភាគរយ ហើយផ្ទៃដីដែលនៅមានទំនាស់សល់មិនលើសពី ៥០ហិកតារឡើយ។ លោកបន្តថា ការដោះស្រាយបញ្ហាដីធ្លីត្រូវតែធ្វើឡើងតាមដំណាក់កាល គឺមិនអាចលើកគ្នារាប់រយនាក់មកសុំការដោះស្រាយភ្លាមៗដូច្នេះបាននោះទេ។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា ថ្លែងថា វេទិកាដែលរៀបចំឡើងដោយក្រុមប្រឹក្សាខេត្តនេះ គួរតែត្រូវបានអនុញ្ញាតឲ្យអង្គការក្រៅរដ្ឋាភិបាល និងប្រជាពលរដ្ឋចូលស្ដាប់ ឬលើកឡើងនូវបញ្ហារបស់ខ្លួនទើបប្រសើរ៖ «បាទ! វេទិកាសាធារណៈនេះយើងឃើញថា គ្រាន់តែជាការរៀបចំមួយរបស់ក្រុមប្រឹក្សាខេត្តដែលវាពុំទទួលបានដំណោះស្រាយអ្វីទាំងអស់ ព្រោះអីយើងឃើញថា សមាជិកក្រុមប្រឹក្សាបានចេញទៅផ្លូវក្រោយទៅវិញខណៈដែលប្រជាពលរដ្ឋបានធ្វើការតវ៉ា»។
វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តពោធិ៍សាត់ ត្រូវបានបញ្ចប់ដោយតក់ក្រហល់នៅម៉ោងប្រហែលជា ១០កន្លះ បន្ទាប់ពីមានក្រុមប្រជាពលរដ្ឋជាច្រើននាក់ឈរស្រែកតវ៉ារឿងដីធ្លីនៅផ្នែកខាងក្រៅនៃអង្គវេទិកា។ យ៉ាងណាក្រុមប្រជាពលរដ្ឋ បានស្នើសុំឲ្យតំណាងរបស់ខ្លួនចំនួន ៥នាក់ បានចូលទៅអង្គុយស្ដាប់ និងលើកបញ្ហាផ្សេងៗជូនអង្គវេទិកា ក៏ប៉ុន្តែកម្លាំងសមត្ថកិច្ចនៅតែមិនអនុញ្ញាតឲ្យចូលដោយបង្វែរឲ្យពួកគាត់ធ្វើដំណើរទៅកាន់សាលាស្រុក ដើម្បីជួបដោះស្រាយបញ្ហាជាមួយនឹងអភិបាលស្រុកវាលវែង លោក ឆេ ឈីវ។
ក្រោយពីជួបពិភាក្សា និងដោះស្រាយបញ្ហាដីធ្លីជាមួយលោកអភិបាលស្រុកវាលវែង ក្រុមប្រជាពលរដ្ឋបានដាក់ឱសានវាទរយៈពេល ១០ថ្ងៃ ប្រសិនបើមិនឃើញដំណោះស្រាយអ្វីនោះទេ ពួកគាត់នឹងកៀរគរមនុស្សកាន់តែច្រើនឡើងដើម្បីធ្វើការតវ៉ាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។