សកម្មជនការពារព្រៃឡង់ពីការកាប់បំផ្លាញព្រៃឈើនៅកម្ពុជា រងការចោទពីបទកាប់បំផ្លាញព្រៃឈើ
2024.09.29
សកម្មជនការពារព្រៃឡង់ លោក អ៊ុក ម៉ៅ បង្ហាញពីបទល្មើសព្រៃឈើ នៅតំបន់ព្រៃឡង់ នៃភូមិអន្លង់ភេ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង កាលពីខែមិថុនា ២០២៤។
រូប៖ ពលរដ្ឋផ្ដល់ឱ្យ
តុលាការខេត្តស្ទឹងត្រែងចោទប្រកាន់ សកម្មជនការពារព្រៃឡង់ លោក អ៊ុក ម៉ៅ ពីបទកាប់ទន្ទ្រានព្រៃឈើ ក្រោយពីបានលាតត្រដាងការកាប់បំផ្លាញព្រៃឈើ នៅតំបន់ព្រៃសហគមន៍ភ្នំជម្រកសត្វ ដោយក្រុមហ៊ុនជីករុករករ៉ែ ឈ្មោះ លីន វត្តី ដែលមានទំនាក់ទំនងជិតស្និទ្ធជាមួយមន្ត្រីយោធាជាន់ខ្ពស់កម្ពុជា។
មេធាវីម្នាក់នៃសមាគមការពារសិទ្ធិមនុស្សអាដហុក (Adhoc) លោក អ៊ឹម ផាណា ដែលការពារក្តីឲ្យលោក អ៊ុក ម៉ៅ ឲ្យដឹងថា នៅក្នុងសវនាការ កាលពីថ្ងៃទី១៧ ខែកញ្ញា កន្លងមកនេះ ចៅក្រម និងព្រះរាជអាជ្ញា គ្មានភស្តុតាងដើម្បីចោទប្រកាន់ លោក អ៊ុក ម៉ៅ ពីបទកាប់ទន្ទ្រានព្រៃឈើ នោះឡើយ។ តុលាការក៏បានអនុញ្ញាតឲ្យលោក អ៊ុក ម៉ៅ ត្រឡប់ទៅផ្ទះវិញ ប៉ុន្តែស្ថិតក្រោមការតាមដាន និងមិនអនុញ្ញាតឲ្យចាកចេញពីភូមិកំណើតឡើយ។
លោក អ៊ុក ម៉ៅ គូសបញ្ជាក់ថា ទង្វើរបស់តុលាការនេះ គឺជាការដាក់ទណ្ឌកម្មដល់លោក ដោយសារលោកហ៊ានរាយការណ៍និងលាតត្រដាងជាសាធារណៈ ប្រឆាំងក្រុមហ៊ុន លីន វត្តី ដែលរំលោភយកដីព្រៃរបស់សហគមន៍។ វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យតុលាការខេត្តស្ទឹងត្រែង និងអភិបាលខេត្តនេះ ដើម្បីសាកសួរបន្ថែមជុំវិញបញ្ហានេះបានទេ នៅថ្ងៃទី ២៨ ខែកញ្ញានេះ។
ទីភ្នាក់ងារព័ត៌មានអនឡាញម៉ុងហ្គាបេ (Mongabay) កាលពីថ្ងៃទី៥ ខែកញ្ញាកន្លងមកនេះ បានចុះផ្សាយរបាយការណ៍ស៊ើបអង្កេតមួយស្ដីពីការកាប់បំផ្លាញព្រៃឈើ របស់ក្រុមហ៊ុន លីន វត្តី ដែលមានខ្នងការពារពីមន្ត្រីយោធាជាន់ខ្ពស់។ ក្រុមហ៊ុនមួយនេះ បានកាប់បំផ្លាញព្រៃឈើ និងកាន់កាប់ដីប្រមាណ២ភាគ៣ នៅតំបន់ភ្នំជម្រកសត្វ ដែលបច្ចុប្បន្នកំពុងរុករករ៉ែក្រោមដី។
សកម្មជនការពារព្រៃឡង់ខេត្តស្ទឹងត្រែង លោក អ៊ុក ម៉ៅ បានបង្ហាញអ្នកយកព័ត៌មានម៉ុងហ្គាបេ ពីទីកន្លែងវិនាសកម្មព្រៃឈើ នៅតំបន់ព្រៃសហគមន៍ភ្នំជម្រកសត្វ ដែលសហគមន៍ជនជាតិដើមភាគតិច រស់នៅតំបន់នោះ អាស្រ័យផលតាំងពីយូរយារណាស់មកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា