ប្រជាពលរដ្ឋរស់នៅស្រុកសណ្ដាន់ ឃុំដងកាំបិត ខេត្តកំពង់ធំ ជាង ៥០គ្រួសារភ័យខ្លាច ក្រុមហ៊ុនចិនបណ្ដេញចេញពីលំនៅឋាន ក្រោយពីផ្ទះរបស់ពួកគាត់ត្រូវបានក្រុមសន្តិសុខរបស់ក្រុមហ៊ុន បាញ់ថ្នាំលើជញ្ជាំងផ្ទះ ដោយបង្ខំឱ្យរុះរើចេញ ចំណែកដីស្រែចម្ការរាបរយហិកតារ ក៏នឹងត្រូវក្រុមហ៊ុនរំលោភយក ដោយពុំទាន់ផ្ដល់សំណងសមរម្យ។
នៅចម្ងាយប្រមាណ ៥០០ម៉ែត្រពីការដ្ឋានគម្រោងអភិវឌ្ឍន៍អាងទឹកដងកាំបិត ស្រុកសណ្ដាន់ គេឃើញមានសកម្មភាពសាងសង់ការដ្ឋាន និងម៉ាស៊ីនបូមខ្សាច់លើដីពលរដ្ឋខ្លះ និងលើដីក្រុមហ៊ុនខ្លះ ដែលសរសេរបោះបង្គោលភ្ជាប់ស្លាកសញ្ញា ភាគច្រើនជាអក្សរចិន។ ចំណែកនៅលើជញ្ជាំងផ្ទះរបស់ពលរដ្ឋជាង ២០ខ្នង តាមបណ្ដោយដងស្ទឹងសែន និងផ្លូវឆ្ពោះទៅក្រុមហ៊ុន គេឃើញមានថ្នាំពណ៌ក្រហម ដែលសន្តិសុខក្រុមហ៊ុនដើរបាញ់។
ក្រោមរូបភាពនៃគម្រោងអភិវឌ្ឍន៍អាងទឹកដ៏ធំរបស់ក្រុមហ៊ុនចិនពលរដ្ឋភាគច្រើន រស់នៅភូមិស្រែខ្សាច់ និងស្រែវាល ឃុំដងកាំបិត ភ័យខ្លាច និងបារម្ភបញ្ហាជីវភាព ដោយសារតែខ្លាចបាត់បង់ដីស្រែចម្ការ និងផ្ទះសម្បែង។ ពលរដ្ឋថា ក្រុមហ៊ុនឱ្យពួកគាត់រុះរើផ្ទះ ដើម្បីយកដីអភិវឌ្ឍន៍អាងទឹក តែជាក់ស្ដែងក្រុមហ៊ុនកំពុងធ្វើអាជីវកម្មរ៉ែខ្សាច់លក់។
ពលរដ្ឋរស់នៅភូមិស្រែខ្សាច់ ឃុំដងកាំបិត កញ្ញា វ៉ាញ់ មៀន ប្រាប់វិទ្យុអាស៊ីសេរីថា ចាប់តាំងពីក្រុមហ៊ុនដើរបាញ់ថ្នាំលើជញ្ជាំងផ្ទះហើយមិនឱ្យរស់នៅលើដីនោះទៀត ពួកគាត់ដេកពុំសូវលក់ ភ័យខ្លាច ព្រោះបារម្ភគ្មានផ្ទះសម្ដែង និងដីចម្ការអាស្រ័យផលទៀត។ កញ្ញាថា ដីស្រែចម្ការ ជាង៣ហិកតារ របស់កញ្ញា ស្ថិតនៅចំគម្រោងអភិវឌ្ឍន៍របស់ក្រុមហ៊ុន។
កញ្ញា វ៉ាញ់ មៀន៖«ពិបាកដែរ ព្រោះអីអស់ដីស្រែចម្ការ អត់ដឹងទៅធ្វើស្រែចម្ការនៅណាទៀត។ និយាយទៅ ឥឡូវហ្នឹង លក្ខណៈថាជីវភាពកំពុងខ្វះខាតផង ដល់ពេលប៉ះពាល់អ៊ីចឹងទៅ រឹតតែដុនដាបទៅៗ»។
និយាយដោយសម្ដីមួយៗ រួមនឹងទឹកមុខស្រងូតស្រងាត់ កញ្ញា វ៉ាញ់ មៀន លើកឡើងថា ពលរដ្ឋភាគច្រើនពុំសប្បាយចិត្ត ចំពោះគម្រោងអភិវឌ្ឍន៍នេះទេ ព្រោះប៉ះពាល់ដល់ជីវភាពពួកគាត់។ ប៉ុន្តែពលរដ្ឋទាំងនោះ ពុំសូវមាននរណាហ៊ាន និយាយព្រោះខ្លាច ហើយអាជ្ញាធរប្រាប់ពលរដ្ឋថា នេះជាគម្រោងអភិវឌ្ឍន៍របស់រដ្ឋាភិបាល។
កាលពីខែកុម្ភៈ ឆ្នាំ២០២៣ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក រស់ សីលវ៉ា បានចុះហត្ថលេខាលើកិច្ចព្រមព្រៀង ស្ដីពីឥណទានសម្បទានសម្រាប់អភិវឌ្ឍន៍អាងទឹកដងកាំបិត ខេត្តកំពង់ធំ តែទោះជាយ៉ាងណាក្ដី កិច្ចព្រមព្រៀងនេះពុំមានបញ្ជាក់ពីគោលបំណងច្បាស់លាស់នោះទេ។
ពលរដ្ឋម្នាក់ទៀត លោក ញ៉ាក់ ឆន រស់នៅភូមិស្រែខ្សាច់ ដែលត្រូវបានក្រុមហ៊ុនរំលោភយកដីស្រែអស់ជាង ៥ហិកតារដែរនោះ លើកឡើងថា មកដល់ពេលនេះ ក្រុមហ៊ុនបានប្រើម៉ាស៊ីន ជីករណ្ដៅដីបូមខ្សាច់ ជាច្រើនកន្លែង ធ្វើឱ្យប៉ះពាល់ដីស្រែពលរដ្ឋជាច្រើនហិកតារ។
បុរសវ័យ ៥០ឆ្នាំរូបនេះបារម្ភពីជីវភាពកាន់តែលំបាក ព្រោះគ្មានដីអាស្រ័យផល ហើយលោកអះអាងថា ករណីនេះ អាជ្ញាធរពាក់ព័ន្ធបានដឹងឮ ពីផលប៉ះពាល់ពលរដ្ឋ ប៉ុន្តែអាជ្ញាធរហាក់មិនអើពើចុះពិនិត្យរកដំណោះស្រាយនោះឡើយ។ លោកថា បើសិនជាគម្រោងនេះធ្វើឡើង ដើម្បីពលរដ្ឋហេតុអ្វីចាំចាប់ដេញចេញពីភូមិកំណើត។
លោក ញ៉ាក់ ឆន៖.«រឿងដាំដំណាំដាំដុះ បានដីស្រែនឹងឯង បានហូបសព្វថ្ងៃ ពេលអត់អ៊ីចឹងទៀត អត់ដឹងពឹងអី ហើយនៅតាមដីស្រែ ដីចម្ការពលរដ្ឋគាត់ដើរខួង ក្រុមហ៊ុនចិនហ្នឹង វាដើរខួងពេញស្រែពេញចម្ការ ពេញណាពេញណី»។
វិទ្យុអាស៊ីសេរីពុំអាចទាក់ទងអភិបាលខេត្តកំពង់ធំ លោក ងួន រតនៈ និងអភិបាលស្រុកសណ្ដាន់ លោក ស៊ិន វណ្ណវុឌ្ឍ ដើម្បីបកស្រាយជុំវិញរឿងនេះបានទេនៅថ្ងៃទី២ ខែមករា។
ចំណែកមេឃុំដងកាំបិត ស្រុកសណ្ដាន់ លោក លន់ យ៉េន លើកឡើងថា ក្រុមហ៊ុនចិន កំពុងតែស្ដារស្ទឹង ដើម្បីផ្ទុកទឹកស្អាត សម្រាប់ឱ្យពលរដ្ឋប្រើប្រាស់នៅរដូវប្រាំង ពុំមានការធ្វើអាជីវកម្មរ៉ែនោះទេ។ ចំណែកបញ្ហាផលប៉ះពាល់លំនៅឋាន និងដីស្រែចម្ការពលរដ្ឋ លោកថា អាជ្ញាធរពាក់ព័ន្ធនឹងផ្ដល់ជាសំណង ប៉ុន្តែពុំទាន់ដឹងថា សំណងប៉ុន្មាននោះទេ។
លោក លន់ យ៉េន៖«ផលប៉ះពាល់គេមានគោលការណ៍ មានសំណង ប៉ុន្តែក្រុមវាស់វែងមួយក្រុម និងមួយក្រុមទៀត ដើរវាយតម្លៃថា នៅតំបន់នេះ ទីផ្សារ ដូចជាដីធ្លី ថា តម្លៃយ៉ាងម៉េចៗ វាហ្នឹង គេសិក្សាទៀត។ ដូច្នេះ ខ្ញុំអត់ទាន់ចេះថា(អត់ទាន់ដឹងសំណងថា)ប៉ុន្មាន ប៉ុន្តែមានគោលការណ៍សំណង»។
យ៉ាងណា កាលពីដើមឆ្នាំ២០២៣ កន្លងទៅអាជ្ញាធរធ្លាប់លើកឡើងថា គម្រោងអភិវឌ្ឍន៍អាងទឹកដងកាំបិតនេះ ធ្វើឡើងដោយមានគណៈកម្មការវាយតម្លៃ ពីផលប៉ះពាល់បរិស្ថាន និងពលរដ្ឋ បានត្រឹមត្រូវ ដោយពុំមានបញ្ហាអ្វីនោះទេ។ ចំណែកពលរដ្ឋថា ការវាយតម្លៃរបស់គណៈកម្មការទាំងនោះ ធ្វើឡើងដោយគ្មានតម្លាភាពត្រឹមត្រូវ។
ទាក់ទិនរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ប្រាប់វិទ្យុអាស៊ីសេរីថា ករណីក្រុមហ៊ុនចិន ដើរបាញ់ថ្នាំតាមជញ្ជាំងផ្ទះពលរដ្ឋ ដោយបង្ខំឱ្យពួកគាត់រុះរើផ្ទះបែបនេះ គឺជាទង្វើខុសច្បាប់ ហើយក្រុមហ៊ុន គួរតែសហការជាមួយនឹងអាជ្ញាធរពាក់ព័ន្ធរកដំណោះស្រាយសមរម្យ បើពុំដូច្នេះទេ ពលរដ្ឋកាន់តែមានជីវភាពលំបាក។
លោក វណ្ណ សុផាត៖ «ក្រុមហ៊ុននឹងគាត់ធ្វើខុសច្បាប់ដូច្នេះប្រជាពលរដ្ឋគាត់អាចមានសិទ្ធិការពារលំនៅឋានរបស់ពួកគាត់តែបើការចុះទៅដោយមានអាជ្ញាធរចូលរួមក្នុងការបាញ់ថ្នាំលើជញ្ជាំងផ្ទះឱ្យពួកគាត់រុះរើអ៊ីចឹង វាលុះត្រាតែមានការប្រឹក្សាយោបល់ជាមួយនឹងពលរដ្ឋ និងអាជ្ញាធរពាក់ព័ន្ធ»។
ពលរដ្ឋស្នើឱ្យអាជ្ញាធរពាក់ព័ន្ធដោះស្រាយបញ្ហាទាំងនេះឱ្យបានឆាប់។ ពួកគាត់ថា ការស្នើនេះ ស្របនឹង មាត្រា៣៥ នៃរដ្ឋធម្មនុញ្ញ កថាខណ្ឌទី២ ចែងថា សេចក្ដីស្នើទាំងឡាយណារបស់ពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ។ ពួកគាត់ថា បើសិនជាអាជ្ញាធរពាក់ព័ន្ធ មិនដោះស្រាយបញ្ហានេះឱ្យបានឆាប់ទេនោះ ពួកគាត់នឹងនាំគ្នាតវ៉ាបិទផ្លូវ នៅមុខក្រុមហ៊ុនទ្រង់ទ្រាយធំ នៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។